Imita Cristo ora di Eherce Autoridad

UN EXPERIMENTO encuanto comportacion humano realisa algun aña pasa a duna resultadonan fasinante. E personanan cu a participa den dje a ser parti den dos grupo. E prome grupo a ser nombra como bewaker pa vigila e di dos grupo, cu mester a actua como preso. Kico a sosode?

Segun e informe, “den un par di dia mayoria di [e bewakernan] a bira ofensivo y bruto den nan trato, cla pa duna castigo, mientras cu e presonan a haya hopi miedo y a cuminsa sinti nan intimida.” E conclusion cu e investigadonan a yega na dje tawata cu casi tur hende por cai den e trampa di haci maluzo di poder of autoridad.

Bon Uzo y Maluzo di Autoridad

Claro cu bon uzo di autoridad por ta algo probechoso. E por duna guia apropiado y e por resulta den beneficionan fisico, emocional y spiritual. (Proverbionan 1:5; Isaias 48:17, 18) Sinembargo, manera e experimento menciona ariba a mustra, semper tin e peliger cu un hende ta bai mas aleu di loke ta rasonabel den uzo di autoridad. Bijbel ta mustra riba e peliger aki y ta bisa: “Ora cu un malbado ta goberna, pueblo ta suspira.”—Proverbionan 29:2; Eclesiastes 8:9.

Maluzo di poder ta perhudicial, asta ora e motivacion su tras ta bon. Por ehempel, resientemente un sosiedad religioso di maestronan na Irlanda a pidi despensa publicamente pa e manera cu algun maestro a haci maluzo di nan autoridad riba muchanan cu tawata bou di nan cuido. Sin duda, hopi di e maestronan ei tawatin bon intencion, asta noble, pero e metodonan cu algun di nan a uza tawata sumamente dañino. Un corant a informa cu “e violencia excesivo y severidad di hopi di e maestronan aki a traumatisa hopi mucha.” (The Irish Times) Pues, con bo por eherce autoridad den un manera cu ta motiva otro hende pa haci esfuerso en bes di aleha nan of herida nan cu palabra of accion?—Proverbionan 12:18.

“Tur Autoridad” A Wordo Duna na Hesucristo

Pensa riba e ehempel di Hesucristo. Un poco prome cu el a subi na shelo, el a bisa su disipelnan: “Tur autoridad a wordo duna na mi den shelo y riba tera.” (Mateo 28:18) Esei a hinca miedo den e disipelnan? Nan a sinti cu  Hesus lo a bai cuminsa refleha e mesun spirito di e Cesarnan of gobernantenan di Roma, kendenan tawatin e reputacion di uza nan poder pa aplasta cualkier protesta of rebelion contra gobierno?

E registro di Bijbel ta mustra claramente cu no! Hesucristo ta uza su autoridad den e mesun manera cu su Tata ta uza su autoridad. Aunke Yehova ta e legitimo Soberano Universal todopoderoso, e ta desea un sirbishi boluntario di parti di su subditonan, no un obediencia sin sentido, miedoso of forsa. (Mateo 22:37) Yehova nunca ta haci maluzo di su autoridad. Un vision impactante cu profeta Ezekiel a haya ta mustra esaki.

Den e vision aki, Ezekiel a mira cuater criatura angelical cu tawata apoya e soberania di Dios. Cada un tawatin cuater cara. Ezekiel a skirbi: “Pa loke ta forma di nan caranan: cada un tawatin cara di hende; na banda drechi tur cuater tawatin cara di leon, y na banda robes, cara di bishe macho; y tur cuater tawatin cara di aguila.” (Ezekiel 1:10) E cuater caranan aki ta representa Dios su cuater cualidadnan principal, perfectamente balansa. E Palabra di Dios ta describi esakinan como: amor, representa pa e cara di hende; husticia, representa pa e cara di leon; y sabiduria, representa pa e cara di aguila. E tres cualidadnan aki ta combina hunto cu e di cuater—poder, representa pa e cara di toro. Kico tur esaki ta nifica? E vision ta mustra cu semper Yehova ta eherce su poder y autoridad sin limite den un manera cu ta na harmonia cu su otro cualidadnan principal.

Semper Hesucristo a imita su Tata den e manera amoroso, sabi y husto cu el a uza su autoridad. Su disipelnan a haya un gran refrescamento sirbiendo bou di su autoridad. (Mateo 11:28-30) E cualidad cu mas ta refleha e personalidad  di tanto Yehova Dios como Hesucristo ta amor, y no poder of autoridad!—1 Corintionan 13:13; 1 Huan 4:8.

Con Abo Ta Eherce Bo Autoridad?

Con abo ta eherce bo autoridad? Por ehempel, den bo famia bo ta uza bo autoridad den un manera cu ta satisface unicamente bo antoho of caprichonan personal? Otro miembronan di bo famia ta cumpli cu bo decisionnan pa motibo di miedo of pasobra nan stima bo? Nan ta obedece bo djis pasobra bo tin mas autoridad? Esakinan ta preguntanan cu cabesnan di famia por haci nan mes pa yuda nan mantene ordo teocratico den e areglo di famia.—1 Corintionan 11:3.

Si bo tin cierto autoridad den e congregacion cristian, con lo bo maneha esaki? Pa sa si bo ta maneha esaki corectamente, evalua bo mes a base di e siguiente principionan inspira pa Yehova Dios y di cua Hesucristo a duna nos un bon ehempel.

‘E sirbido di Señor mester ta cariñoso cu tur hende, cu capasidad pa siña, cu pasenshi ora cu e wordo trata inhustamente, cu ta corigi cu suavidad esnan cu ta den oposicion.’—2 Timoteo 2:24, 25.

Algun persona den e congregacion cristian di prome siglo tawatin hopi autoridad. Por ehempel, Timoteo por a asta “instrui cierto hombernan pa nan no siña hende doctrina straño.” (1 Timoteo 1:3) Pero nos por ta sigur cu Timoteo a imita e cualidadnan di Dios den tur loke el a haci, pasobra sin duda el a sigui e conseho di Pablo pa instrui “cu suavidad” y pa ta “cariñoso cu tur hende” ora el a cumpli cu su responsabilidad como superintendente di e congregacion cristian. Pa motibo cu e mes tawata relativamente jong, e mester a comporta su mes manera un yiu respetuoso pa cu e cristiannan mas grandi y manera un ruman homber amoroso pa cu esnan mas jong. (1 Timoteo 5:1, 2) Bou di un cuido amoroso asina, e congregacion cristian ta refleha e spirito di un famia caluroso y amoroso, y no di un empresa caminda ta reina un ambiente den cua hende ta trata otro na un manera friu y sin heful.—1 Corintionan 4:14; 1 Tesalonicensenan 2:7, 8.

“E gobernantenan di e paganonan tin dominio riba nan, y nan shon grandinan ta eherce autoridad riba nan. Entre boso no ta asina, ma ken cu kier bira grandi entre boso lo ta boso sirbido.”—Mateo 20:25, 26.

Opresornan mundano ta eherce “dominio riba” otro hende door di impone nan boluntad riba nan y door di insisti pa nan haci cosnan den un cierto manera, menasando cu castigo si nan desobedece. Sinembargo,  Hesucristo a enfatisa e idea di sirbi otro hende y no di pone presion riba nan. (Mateo 20:27, 28) Semper el a trata su disipelnan na un manera amoroso y bondadoso. Ora bo ta sigui e ehempel di Hesus, ta mucho mas facil pa otro hende coopera cu bo. (Hebreonan 13:7, 17) Ta bira mas facil tambe pa nan ‘bai e miya extra’, haciendo esei boluntariamente y no obliga.—Mateo 5:41.

‘Cuida e carnenan cu Dios a confia na boso, no como si fuera boso ta doño di e carnenan, sino birando un ehempel pa nan.’—1 Pedro 5:2, 3, BPK.

Awe superintendentenan ta realisa cu nan tin cu duna cuenta na Dios pa e bienestar spiritual di tur miembro di e congregacion, y nan ta tuma e responsabilidad aki masha na serio. Nan ta haci esfuerso pa cuida e tou di Dios di buena gana, cu entusiasmo y den un manera amoroso. Mescos cu apostel Pablo, nan ta traha duro pa edifica y fortalece e fe di esnan cu ta bou di nan cuido, y pa no actua como doño di nan fe.—2 Corintionan 1:24.

Ora ancianonan tin cu ofrece conseho apropiado, nan ta haci esei cu un spirito suave pa reahusta un miembro cu a faya of pa yuda un ruman cristian progresa spiritualmente. Nan ta tene cuenta cu e recordatorio di apostel Pablo: “Rumannan, asta si un hende wordo sorprendi den cualkier delito, boso, cu ta spiritual, restaura un hende asina den un spirito di mansedumbre; cada un wak su mes, pa boso tambe no wordo tenta.”—Galationan 6:1; Hebreonan 6:1, 9-12.

“Soporta otro y pordona otro . . . Bisti amor, cual ta e laso perfecto di unidad.”—Colosensenan 3:13, 14.

Con bo ta trata cu un persona cu kisas no ta cumpli perfectamente cu e normanan cristian? Bo ta tene cuenta cu su imperfeccionnan, manera Yehova y Hesucristo ta haci? (Isaias 42:2-4) Of bo ta insisti pa den tur caso rumannan aplica e lei al pie de la letra? (Salmo 130:3) Corda, caminda ta posibel y si ta apropiado, mustra suavidad; sea firme solamente ora esei ta necesario. Trata otro hende cu amor. Esei lo yuda forma lasonan fuerte di confiansa mutuo entre abo y esnan riba ken bo tin autoridad.

Ora bo ta eherce autoridad cu a ser confia na bo, haci esfuerso pa imita Yehova Dios y Hesucristo. Corda e cuadro mental maraviyoso cu e salmista a pinta di e manera cu Yehova ta eherce su autoridad riba su pueblo. David a canta: “SEÑOR ta mi wardado, lo mi no tin falta di nada. E ta pone mi drumi den luganan di yerba berde; e ta hiba mi canto di awanan keto. E ta restaura mi alma; e ta guia mi den e camindanan di husticia pa motibo di su nomber.” Di igual manera, nos ta lesa di Hesus: “Ami ta e bon wardado; y mi conoce esnan cu ta di mi, y esnan cu ta di mi, conoce mi, mescos cu e Tata conoce mi y ami conoce e Tata; y mi ta duna mi bida pa e carnenan.” Nan ta e mihor ehempelnan cu nos por tin di eherce autoridad na un manera amoroso.—Salmo 23:1-3; Huan 10:14, 15.

[Comentario na pagina 18]

Semper Yehova ta uza su poder na harmonia perfecto cu su husticia, sabiduria y amor

[Plachi na pagina 18]

Tin biaha, ancianonan tin cu duna conseho amoroso na rumannan cu a faya

[Plachi na pagina 19]

Pablo a conseha Timoteo pa e tawata manera un yiu respetuoso y un ruman amoroso

[Plachi na pagina 20]

Hesucristo ta eherce su autoridad na un manera sabi, husto y amoroso