Kico Lo Yuda Bo Compronde Bijbel?

“BO A sconde e cosnan aki pa sabinan y inteligentenan y a revela nan na mucha chikito.” (Lucas 10:21) E palabranan aki cu Hesus a dirigi na su Tata celestial ta indica cu pa nos por compronde Bijbel, nos mester tin e actitud corecto. E sabiduria di Yehova ta keda bisto den e echo cu el a percura un buki cu ta hende humilde y dispuesto pa siña so por echt compronde.

Pa mayoria di nos no ta facil pa ta humilde. Nos tur tin e tendencia pa ta orguyoso. Ademas, nos ta biba den “e ultimo dianan”, rondona pa hende cu ta ‘stimado di nan mes, cabesura y hincha cu orguyo.’ (2 Timoteo 3:1-4) E actitudnan aki ta stroba nos di compronde e Palabra di Dios, y lamentablemente nos tur ta wordo influencia den un of otro manera door di hende cu ta manifesta e caracteristicanan aki. Con anto bo por haya e actitud corecto pa compronde Bijbel?

Prepara Bo Curason y Mente

Esdras, un lider di e pueblo di Dios di antiguedad, a “dedica [“prepara”, NW] su curason pa studia e lei di SEÑOR.” (Esdras 7:10) Den ki manera nos por prepara nos curason? Pa cuminsa, nos mester tin un punto di bista corecto di e Scritura. Apostel Pablo a skirbi su rumannan cristian: “Ora boso a ricibi for di nos e palabra di Dios su mensahe, boso a acept’e no como palabra di hende, ma pa loke e ta berdaderamente, e palabra di Dios.” (1 Tesalonicensenan 2:13) Aunke Dios a uza hende pa skirbi e Scritura, loke nan a skirbi ta di origen divino. Ora nos reconoce e echo importante ei, nos lo ta mas dispuesto pa acepta loke nos ta lesa.—2 Timoteo 3:16.

Un otro manera pa prepara nos curason ta mediante oracion. Siendo cu ta pa medio di spirito santo Dios a inspira hende pa skirbi Bijbel, cu yudansa di e mesun spirito ei nos lo por compronde e mensahe di Bijbel. Nos tin cu pidi Dios e yudansa ei. Tuma nota cu e salmista tambe kier a haya e yudansa ei, ya cu el a skirbi: “Duna mi comprondemento, pa mi por warda bo lei y cumpli cu ne cu henter mi curason.” (Salmo 119:34) Nos tin cu pidi Dios pa e duna nos no solamente e capasidad mental pa compronde su Palabra sino tambe e actitud di curason cu lo permiti nos acept’e. Pa nos por compronde Bijbel, nos mester ta dispuesto pa acepta loke ta berdad.

Segun cu bo ta medita pa haya e actitud corecto, pensa con un estudio di Bijbel por yuda bo. Nos tin hopi bon motibo pa lesa e Palabra di Dios, pero e motibo di mas importante ta cu  lesamento di Bijbel ta yuda nos hala serca Dios. (Santiago 4:8) Ora nos lesa con Yehova ta reacciona bou di diferente circunstancia, cuanto e ta balora hende cu ta stim’e y con e ta trata cu esnan cu ta bira lomba p’e, nos ta compronde ki clase di persona e ta. Semper nos motibo primordial pa lesa Bijbel mester ta pa conoce Dios mihor y asina fortalece nos relacion cu ne.

Loke Por Stroba Nos di Haya e Actitud Corecto

Kico por stroba nos di compronde e Palabra di Dios? Un di e estorbonan ei ta un sintimento di lealtad cu no ta na su luga. Por ehempel, talbes bo ta duna hopi balor na e creencia- y opinionnan di cierto personanan. Sinembargo, kico lo bo haci si e personanan aki no ta realmente apoya of balora e berdad di e Palabra di Dios? Bou di e circunstancianan ei, por ta dificil pa compronde loke Bijbel ta siña realmente. Pa e motibo ei Bijbel ta anima nos pa samina cuidadosamente loke nos a ser siña.—1 Tesalonicensenan 5:21.

Maria, mama di Hesus a hay’e den un situacion dificil asina. El a lanta cu e tradicion Hudiu. El a cumpli cu e Lei di Moises cuidadosamente y sin duda e tawatin e custumber di bai sinagoga. Despues el a bin reconoce cu e manera cu su mayornan a siñ’e adora Dios no tawata aceptabel mas pa Dios. Consecuentemente, Maria a acepta Hesus su siñansa y tawata entre e prome miembronan di e congregacion cristian. (Echonan 1:13, 14) Cu esaki e no tawata faltando respet pa su mayornan of nan tradicionnan; mas bien, el a demostra su amor pa Dios. Si nos kier saca beneficio for di Bijbel, e ora ei mescos cu Maria, nos tambe mester ta mas leal na Dios cu na hende.

Lamentablemente, hopi hende ta duna masha poco balor na e berdad di Bijbel. Algun ta sinti nan satisfecho cu nan tradicionnan religioso cu ta basa riba siñansanan incorecto. Otronan ta mustra falta di respet pa e berdad den loke nan ta papia y nan manera di biba. Pesei, pa bo acepta e berdad di Bijbel, bo tin cu haci cierto sacrificio; kisas bo amigonan, biciñanan, coleganan di trabou y asta bo famianan ta bai contra bo. (Huan 17:14) No obstante, e homber sabi a skirbi: “Cumpra berdad, y no bend’e.” (Proverbionan 23:23) Si bo ta balora e berdad, Yehova lo yuda bo compronde Bijbel.

Otro cos cu por stroba un hende di compronde e mensahe di Bijbel ta ora e no ta dispuesto pa aplica loke esaki ta bisa. Hesus a bisa su disipelnan: “Boso si a haya comprondemento di e secretonan di reino di shelo, ma nan no. Pasobra curason di e pueblo aki a bira duro, nan a tapa nan horea.” (Mateo 13:11, 15, BPK) Mayoria hende cu Hesus a predica na dje no kier a scucha ni no tawata dispuesto pa cambia. En cambio, e comerciante biahero di Hesus su ilustracion si tawata completamente diferente! Ora el a haya un perla di gran balor, mesora e comerciante a bende tur loke e tawatin pa cumpr’e. Comprondemento di e berdad di Bijbel mester ta mesun precioso pa nos.—Mateo 13:45, 46.

E Desafio di Ta Dispuesto pa Siña

Un desafio grandi pa compronde Bijbel ta esun di ta dispuesto pa siña. Kisas ta dificil pa un hende acepta ideanan nobo for di un persona cu ta parce di tin un nivel di bida inferior na esun di dje. Pero e apostelnan di Hesucristo “no tawata homber[nan] educa ni siña.” (Echonan 4:13) Splicando e motibo di esei, apostel Pablo a skirbi: “Considera boso yamada, rumannan, cu no tawatin hopi hende sabi segun carni, ni hopi hende poderoso, ni hopi hende noble; ma Dios a scohe e cosnan bobo di mundo pa brongosa e sabinan.” (1 Corintionan 1:26, 27) Si bo ta haya cu ta dificil pa mustra humildad ora un persona di menos recurso ta siña bo algo, corda cu e ta djis un medio cu Dios ta uza pa siña bo. Acaso tin un honor mas grandi cu esun di ser siña door di Yehova, nos “Magnifico Instructor”?—Isaias 30:20, NW; 54:13.

 E comandante militar Sirio, Naaman, tawata un hende cu tawatin problema pa acepta instruccion for di un persona inferior na dje. El a bai bishita Eliseo, profeta di Yehova, pa busca cura pa su lepra. Pero Eliseo a manda un sirbido informa Naaman loke Dios a bisa cu e mester a haci pa e cura. E mensahe y e manera cu el a ser presenta a pone Naaman su humildad na prueba, y pesei na prome instante el a nenga di obedece e palabra di e profeta di Dios. Pero despues Naaman a cambia su actitud y a ser cura. (2 Reinan 5:9-14) Nos ta enfrenta un desafio similar ora nos ta lesa Bijbel. Kisas nos ta siña cu pa nos cura den sentido spiritual y moral, nos tin cu cambia nos manera di biba. Nos lo tin e humildad pa laga un hende siña nos kico nos tin cu haci? Ta hende cu ta dispuesto pa siña so por compronde Bijbel.

Un homber cu tawata na poder bou di Candace, reina di e Etiopenan, a demostra un bon actitud. E tawata regresando Africa den su garoshi ora e disipel Felipe a core banda di dje y a acerc’e. Felipe a puntra e homber si el a compronde loke e tawata lesa. E oficial tawata suficiente humilde pa responde: “Con mi por compronde, si un hende no guia mi?” Ora el a compronde e Palabra di Dios, el a batisa. Despues di esei, el “a sigui su caminda, regocihando.”—Echonan 8:27-39.

Por lo general, Testigonan di Yehova ta hendenan masha comun. Tur siman nan ta conduci estudionan di Bijbel den casnan di mas cu seis miyon hende. Siendo cu Bijbel ta siña nos e mihor manera di biba, ta splica di e unico speransa sigur pa humanidad y ta mustra nos con nos por conoce Dios, miyones di hende a haya un gran placer den studia Bijbel y compronde su mensahe. Bo tambe por tin e placer ei.

[Plachi na pagina 7]

Naaman tawatin problema pa acepta instruccion for di un sirbido inferior na dje

[Plachi na pagina 7]

Ora nos ta compronde Bijbel, esei ta alegra nos curason