Mayornan Sea un Bon Ehempel pa Boso Yiunan

“PSICOLOGONAN tin un siglo caba ta busca e clave pa lanta un bon yiu; pero nan por bien para e buskeda, no pasobra nan a hay’e sino pasobra e no ta existi.” Asina e reseña di un buki tocante criamento di yiu cu a sali den e revista Time a bisa. E buki ta bisa cu mucha ta bai mas lihe tras di e balornan di nan pareunan cu esnan di nan mayornan.

Nos tin cu reconoce en berdad cu hobennan di mas o menos e mesun edad tin hopi influencia riba otro. (Proverbionan 13:20; 1 Corintionan 15:33) E columnista William Brown a remarca: Si tin un solo cos cu ta domina bida di adolecentenan, ta e deseo pa otro hobennan acepta nan. E cos di mas indeseabel pa nan ta ser diferente for di nan pareunan. Ora mayornan no logra haci e ambiente na cas agradabel of no ta dedica suficiente tempo na nan yiunan—locual ta situacionnan masha comun den e mundo druk djawe—den un sentido nan ta habriendo porta pa influencia di otro hobennan, e asina yama presion di pareunan, causa daño na nan yiunan.

Ademas, durante e “ultimo dianan” aki, e areglo di famia ta bou di atake pasobra, manera Bijbel a profetisa, hende ta precupa principalmente cu placa, placer y nan mes interesnan. Pues, no ta nada straño anto cu yiunan a bira “desobediente na mayornan, malagradecido, desleal, sin cariño natural.”—2 Timoteo 3:1-3, NW.

E expresion “cariño natural” manera e ta para den Bijbel ta describi e amor cu mester existi entre miembronan di un famia. E amor aki ta un laso natural cu ta motiva mayornan pa mustra interes den nan yiunan, y yiunan pa pega na nan mayornan. Pero ora mayornan ta falta e cariño natural aki, e yiunan lo bai busca apoyo emocional otro caminda, por lo general serca nan pareunan. Y probablemente nan lo adopta e balornan y actitudnan di nan pareunan. Pero hopi bes mayornan por evita e situacion aki door di laga principionan di Bijbel dirigi nan bida di famia.—Proverbionan 3:5, 6.

Famia Ta un Areglo di Dios

Despues cu Dios a uni Adam cu Eva como esposo y esposa, el a duna nan e siguiente mandato: “Sea fructifero y multiplica, y yena e tera.” Despues di esei, famia—tata, mama y yiunan—a cuminsa existi. (Genesis 1:28; 5:3, 4; Efesionan 3:14, 15) Pa yuda hende lanta nan yiunan, Yehova a pone cu di naturalesa mayornan ta cumpli cu cierto aspectonan basico di criamento di yiu. Pero hende no ta manera bestia. Nan tin mester di yudansa adicional, pesei Yehova a percura un guia skirbi pa nan. Parti di e guia aki ta consisti di instruccionnan relaciona cu asuntonan moral y spiritual, y dunamento di disiplina apropiado.—Proverbionan 4:1-4.

Dirigiendo su mes specialmente na tatanan, Dios a bisa: “E palabranan aki, cu mi ta ordena  bo awe, mester ta riba bo curason. Siña nan cu tur diligencia na bo yiunan, y papia di nan ora bo ta sinta den bo cas, ora bo ta cana riba caminda, ora bo ta bai drumi y ora bo ta lanta.” (Deuteronomio 6:6, 7; Proverbionan 1:8, 9) Ripara cu mayornan mester a inculca e lei di Dios den nan mes curason prome. Pakico esaki tawata importante? Pasobra e clase di siñansa cu en berdad ta motiva otro hende no ta loke ta sali simplemente for di boca sino for di curason. Ta ora mayornan ta siña for di nan curason so nan lo por alcansa e curason di nan yiunan. E mayornan ei lo sirbi tambe como bon ehempel pa nan yiunan, kendenan ta detecta hipocresia facilmente.—Romanonan 2:21.

Bijbel ta bisa mayornan cristian pa lanta nan yiunan for di infancia den “e disiplina y instruccion di Señor.” (Efesionan 6:4; 2 Timoteo 3:15) For di infancia? Si! Un mama a bisa: “Tin biaha como mayor nos no ta duna nos yiunan e merito cu nan merece. Nos ta balota nan capasidad, siendo cu nan tin e. Como mayornan nos mester probecha di e capasidad aki.” Si, mucha ta gusta siña, y ora nan haya instruccion di mayornan cu ta adora Dios, nan tambe lo siña stima. E yiunan ei lo sinti nan sigur denter di e limitenan cu ser poni pa nan. Pesei, mayornan exitoso ta haci esfuerso pa bira compañeronan amoroso di nan yiunan, pa comunica bon cu nan, siña nan cu pasenshi y alabes cu firmesa, y crea un ambiente saludabel den cua nan yiunan ta desaroya bon. *

Proteha Boso Yiunan

Den un carta dirigi na mayornan, un cabes di scol na Alemania a skirbi: “Mayornan stima, nos kier anima boso pa envolve boso mes mas den e criamento di boso yiunan y pa no laga esaki na television of otro mucha riba caya. De echo, ta boso tin e [responsabilidad] di yuda nan desaroya nan personalidad.”

Un mayor cu ta laga su yiu den man di television of di otro mucha riba caya, den un sentido, ta lagando e spirito di mundo influencia e criansa di su yiu. (Efesionan 2:1, 2) E spirito di e mundo aki, cu ta contra e spirito di Dios, ta actua manera un biento fuerte cu ta hiba e simiñanan di pensamento “terenal, bestial [y] demoniaco” y sembra nan na abundancia den mente y curason di hende ingenuo of bobo. (Santiago 3:15, NW) E manera di pensa aki cu ta mes destructivo cu mal yerba, cu tempo ta corumpi e curason. Hesus a ilustra e efecto di loke ta ser sembra den curason, bisando: “E bon hende, for di e bon tesoro di su curason, ta saca loke ta bon; y e mal hende, for di e mal tesoro, ta saca loke ta malo; pasobra for di e abundancia di curason su boca ta papia.” (Lucas 6:45) Pesei, Bijbel ta anima nos: “Warda bo curason riba tur cos, pasobra e ta e fuente di bida.”—Proverbionan 4:23.

Claro cu mucha ta keda mucha, y algun ta cabesura y tin chens di bira asta desobediente. (Genesis 8:21) Kico mayornan por haci? Bijbel ta bisa: “Locura ta mara den curason di un mucha; bara di coreccion lo aleha esaki for di dje.” (Proverbionan 22:15) Algun hende ta mira esaki como un trato severo cu a bai for di moda. En realidad Bijbel ta contra violencia y tur clase di  maltrato. Pero e palabra “bara”, aunke tin biaha e por encera castigo literal, ta representa e autoridad cu un mayor ta eherce di un manera firme pero amoroso, motiva corectamente pa e interes cu e tin den e bienestar eterno di su yiunan.—Hebreonan 12:7-11.

Disfruta di Recreo Hunto cu Boso Yiunan

Ta un echo estableci cu pa un yiu desaroya bon, e tin cu hunga y diberti. Mayornan sabi ta probecha di oportunidadnan pa reforsa e laso entre mayor cu yiu door di recrea cu nan yiunan ki ora cu ta posibel. Pues, mayornan no solamente por guia nan yiunan den scohe e clase di recreo corecto sino tambe mustra e yiunan cuanto nan ta gusta di ta den nan compania.

Un tata Testigo ta bisa cu hopi bes e tawata hunga bala cu su yiu homber ora e yega cas for di trabou. Un mama ta corda cu e tawata gusta hunga spel of wega cu su yiunan. Un yiu mohe cu aworaki ta grandi caba ta corda con nan famia tawata gusta core bais hunto. Tur e yiunan aki ta adulto aworaki, pero e amor cu nan tin pa nan mayornan y pa Yehova ta mas fuerte cu nunca.

En berdad, mayornan cu ta mustra cu palabra y accion cu nan ta stima nan yiunan y cu nan ta gusta di ta den nan compania ta haci un impresion profundo y hopi bes duradero riba nan. Por ehempel, hopi di e graduadonan di un klas di e Scol Biblico di Galad di Watchtower a conta cu ta e ehempel y animacion di nan mayornan a lanta den nan e deseo pa drenta e sirbishi di tempo completo. Esta un herencia magnifico pa e yiunan y ki un bendicion pa e mayornan! Claro cu no ta tur yiu lo por drenta e sirbishi di tempo completo ora nan bira mas grandi, pero sin duda nan tur lo beneficia di mayornan temeroso di Dios cu ta bira nan mihor amigo- y ehempelnan pa imita. Y nan lo sinti nan impulsa pa honra nan mayornan.—Proverbionan 22:6; Efesionan 6:2, 3.

Mayornan Soltero Por Tin Exito

Awe, hopi mucha ta lanta den casnan cu un mayor so. Aunke esaki ta haci criamento di yiu mas dificil, mayornan soltero por tin exito. E ehempel biblico di Eunice, un Hudiu cristian di prome siglo, ta un bon animacion pa nan. Eunice tawata casa cu un homber cu no tawata creyente y probablemente e no a ricibi ningun apoyo spiritual for di dje. Apesar di esei, Eunice tawata un bon ehempel den e criansa di Timoteo. E bon influencia cu tanto e como Loida, wela di Timoteo, tawatin riba Timoteo for di esaki su infancia, a resulta di ta mas poderoso cu cualkier influencia negativo cu Timoteo su pareunan lo por a eherce riba dje.—Echonan 16:1, 2; 2 Timoteo 1:5; 3:15.

Awe hopi hoben cu a lanta cu un mayor no creyente of den cas di un mayor soltero ta manifesta e mesun cualidadnan excelente cu e hoben Timoteo tawatin. Por ehempel, Ryan, kende awor tin 22 aña di edad y kende ta un predicado di tempo completo, a lanta den cas cu un mayor so hunto cu su ruman homber y ruman mohe mas grandi. Nan tata tawata un  alcoholico y el a bai laga e famia tempo cu Ryan tawatin cuater aña. Ryan a bisa: “Mami tawata determina pa nos famia a sigui sirbi Yehova, y el a pega na e determinacion ei cu henter su curason.”

Ryan a continua: “Por ehempel, mi mama a haci sigur cu nos a asocia cu mucha cu por tawatin un bon influencia riba nos. Nunca e tawata permiti nos anda cu mucha cu Bijbel ta describi como mal asociacion, ni pafo ni paden di e congregacion. Ademas, el a inculca den nos e punto di bista corecto di siñansa escolar.” Aunke hopi bes Ryan su mama tawata ocupa y tawata bini cas cansa for di trabou, esaki no a strob’e di mustra interes amoroso den su yiunan. Ryan a bisa: “Semper e kier tawata hunto cu nos y papia cu nos. E tawata siña nos cu pasenshi pero na un manera firme, haciendo su best pa garantisa cu como famia nos tawatin un estudio di Bijbel regularmente. E no tawata haci wega cu principionan di Bijbel.”

Ora Ryan wak bek na su hubentud, e ta realisa cu e influencia humano di mas poderoso den su bida y den bida di su rumannan mas grandi tawata di un mayor cu en berdad a stima Dios y a stima su yiunan. Pues boso como mayornan cristian—sea casa of biuda, cu of sin un casa creyente—no laga desanimacion ni contratiempo temporal stroba boso di sigui haci esfuerso pa siña boso yiunan. Por sosode cu algun hoben, manera e yiu perdi, ta bai for di e berdad. Pero ora nan mira con bashi y cruel e mundo aki realmente ta, nan por bini bek. Si, “hende husto ta sigui cana den nan integridad. Su yiunan tras di dje ta felis.”—Proverbionan 20:7, NW; 23:24, 25; Lucas 15:11-24.

[Nota]

[Cuadro/​Plachi na pagina 11]

Dios A Scohe Hesus Su Mayornan

Ora Yehova a manda su Yiu pa e nace como un ser humano, el a scohe su mayornan cuidadosamente. Ta interesante pa nota cu Dios a scohe un pareha di condicion humilde, cu inclinacion spiritual y cu no a malcria Hesus sino cu a siñ’e e Palabra di Dios y e balor di traha duro y pa ser responsabel. (Proverbionan 29:21, NW; Lamentacion 3:27) Hose a siña Hesus e ofishi di carpinte, y sin duda tanto Hose como Maria a pidi Hesus, e primogenito, yuda nan cuida e otro yiunan, cuanan tawata por lo menos seis.—Marco 6:3.

Bo por imagina bo con Hose su famia tawata prepara hunto den tempo di e pasco Hudiu pa haci nan biahe anual pa Herusalem—un biahe ida y buelta di 200 kilometer den un tempo cu no tawatin e medionan di transporte manera tin awe. Sin duda, un famia di nuebe miembro of mas lo mester tawata bon prepara pa haci un biahe largo asina. (Lucas 2:39, 41) Apesar di e desafionan, casi sigur Hose cu Maria a balora e ocasionnan aki y a probecha di nan pa siña nan yiunan tocante susesonan biblico di pasado.

Mientras Hesus tawata na cas ainda, el a ‘keda sumiso na’ su mayornan, tur e tempo ei y a “crece den sabiduria y estatura, y den gracia serca Dios y hende.” (Lucas 2:51, 52) Si, Hose cu Maria a resulta di ta digno di Yehova su confiansa. Esta un bon ehempel pa mayornan djawe!—Salmo 127:3.