Pregunta di Lector
Pregunta di Lector
Kico nos por siña for di e prohibicion cu tin na Exodo 23:19: “No herbe un yiu di cabrito den lechi di su mama”?
E mandamento aki di e Lei di Moises ta aparece tres biaha den Bijbel, y e por yuda nos compronde Yehova su punto di bista di loke ta moralmente corecto, su compasion y su ternura. E ta enfatisa tambe Yehova su odio contra adoracion falso.—Exodo 34:26; Deuteronomio 14:21.
Herbe un yiu di cabrito of di otro bestia den lechi di su mama lo tawata contra Yehova su areglo of lei di naturalesa. Dios a percura e lechi di mama pa alimenta e yiu y pa yud’e crece. Si cushna e yiu den lechi di su propio mama esei lo a demostra, segun e palabranan di un erudito, “un menosprecio di e relacion cu Dios a establece y santifica entre mayor y yiu.”
Ademas, tin experto ta kere cu e acto di herbe un yiu di cabrito den lechi di su mama lo por tawata un rito pagano pa laga awa yobe. Si esei tawata e caso, e prohibicion lo a sirbi pa proteha e Israelitanan for di e practicanan religioso cruel y sin sentido di e nacionnan rond di nan. E Lei di Moises spesificamente a prohibi e Israelitanan di sigui e custumbernan di e nacionnan ei.—Levitico 20:23.
Por ultimo, e lei en particular aki ta demostra Yehova su compasion y ternura. De echo, e Lei tawatin un cantidad di mandamento similar cu a prohibi crueldad contra bestia y tambe otro leinan cu a preveni cosnan cu a bai contra naturalesa. Por ehempel, den e Lei tawatin mandamento cu a prohibi pa sacrifica un bestia a menos cu el a keda por lo menos shete dia serca su mama, no por a mata un bestia cu su crio riba e mesun dia, y no tawatin mag di cohe un mama hunto cu su webonan of su yiunan for di un neishi.—Levitico 22:27, 28; Deuteronomio 22:6, 7.
Pues, ta bisto cu e Lei no tawata simplemente un set di mandamento y prohibicion complica. Un di e beneficionan di e Lei ta cu su principionan ta yuda inculca den nos un sensibilidad moral halto cu realmente ta refleha Yehova su cualidadnan maraviyoso.—Salmo 19:7-11.
[Reconocemento pa Potret na pagina 31]
© Timothy O’Keefe/Index Stock Imagery