Con Bo Por Tuma Decision di Acuerdo cu Dios Su Boluntad?

UN HOMBER na Merca a bai banco cu un cheque di 25.000 dollar. Su intencion tawata pa pone e cen riba un time deposit. Sinembargo, e bankero a conseh’e pa inverti e cen den bolsa di balor, splicando cu riba plaso largo e bolsa nunca ta perde su balor. E homber a dicidi di sigui e conseho di e bankero. Pero poco despues di esei, su inversion a perde gran parti di su balor.

E experencia aki ta ilustra cu no ta facil pa tuma decisionnan sabi. Kico di varios decision cu nos ta confronta den bida? Hopi decision por nifica e diferencia entre exito of fracaso—y tardi of tempran—entre bida of morto. Pues, con nos por tin e confiansa cu nos ta tumando decisionnan sabi?

“Esaki Ta e Caminda”

Tur dia, nos tin cu dicidi kico lo come, kico lo bisti, unda lo bai, etcetera. Algun decision por parce insignificante, sinembargo nan por tin consecuencianan serio. Por ehempel, e decision di sende un sigaria pa prome bes, por hiba na e custumber di sigui huma pa bida largo. Nunca nos no mester balota e importancia di decisionnan cu por parce chikito.

Na kico nos por acudi pa haya guia ora di tuma decision, asta esnan aparentemente insignificante? Lo ta un cos maraviyoso si nos por tawatin un consehero confiabel pa conseha nos ora nos ta confronta un decision dificil! Bo por haya un consehero asina. Un buki antiguo cu tin un mensahe pa nos tempo ta bisa lo siguiente: “Bo horea lo tende un palabra tras di bo ta bisa: ‘Esaki ta e caminda, cana den dje’, ki ora cu boso bira na man drechi of na man robes.” (Isaias 30:21) Ken a expresa e palabranan aki? Y con nos por ta sigur cu su guia ta confiabel?

Nos ta haya e garantia ei den Bijbel. Un buki cu miyones di hende a studia y di e manera ei a bin realisa cu e ta inspira door di Yehova Dios, e Creador. (2 Timoteo 3:16, 17) Yehova sa con nos ta traha, pues e ta e mihor fuente di guia. Tambe e por mira loke ta bai pasa den futuro, siendo cu e “ta declara e fin for di principio, y for di temponan antiguo, cosnan cu no a wordo haci ainda, bisando: ‘Mi proposito lo wordo estableci.’” (Isaias 46:10) Pesei un salmista a expresa su confiansa den e Palabra di Yehova asin’aki: “Bo  palabra ta un lampi pa mi pia y un lus pa mi caminda.” (Salmo 119:105) Sinembargo, con Yehova ta yuda nos nabega atrabes di e awanan turbulento di e mundo djawe? Con nos por tuma decision di acuerdo cu Dios su boluntad?

Aplica Principionan Biblico

Yehova Dios a duna cristiannan principionan divino pa yuda nan tuma decisionnan sano. Siña principionan biblico y aplica nan ta mescos cu siña un idioma y uz’e. Unabes bo ta domina e idioma, bo sa ki ora un hende a comete un eror gramatical pasobra loke e ta bisa no ta zona bon. Kisas bo no por bisa spesificamente ta kico ta robes den su declaracion, pero bo sa si cu e ta robes. Ora bo siña principionan biblico y sa con pa aplica nan corectamente den bo bida, lo bo sa por lo general ki ora un cierto decision no ta bon, esta, cu e no ta na harmonia cu e principionan di Dios.

Considera por ehempel e decision cu un yoncuman tin cu tuma ora di scohe un style di cabei. No tin un mandamento biblico cu spesificamente ta condena cierto style di cabei. Sinembargo, considera un principio biblico. Apostel Pablo a skirbi: “Mi kier pa hende mohe dorna nan mes cu bisti apropia, decente y modera, no cu cabei tur na vlecht y oro of perla of bisti costoso, sino mas bien cu bon obra, manera ta pas pa mohenan cu ta teme Dios.” (1 Timoteo 2:9, 10) Aki Pablo a skirbi tocante hende mohe, pero e principio ta aplica tanto na hende homber como hende mohe. Kico ta e principio? Nos aparencia mester refleha sano huicio, e mester ta decente y modera. Pues e yoncuman por puntra su mes: ‘Mi style di cabei ta modera, di tal manera cu e ta pas pa un cristian?’

Anto cua principio util un hoben por saca for di e siguiente palabranan di disipel Santiago? “Adulteranan, boso no sa cu amistad cu mundo ta enemistad pa cu Dios? Pesei, ken cu kier ta amigo di mundo ta haci su mes enemigo di Dios.” (Santiago 4:4) Cristiannan ta odia e idea di ser un amigo di mundo, locual ta nifica enemistad cu Dios. E style di cabei cu e yoncuman su pareunan ta prefera lo lag’e parce un amigo di Dios of un amigo di mundo? E yoncuman cu ta pensando riba e asunto di style di cabei por uza e tipo di principionan ei basa riba Bijbel pa tuma un decision sabi. Si, principionan biblico ta yuda nos tuma decision. Anto ora nos custumbra tuma decision basa riba principionan biblico, ta bira mas facil pa yega na conclusionnan sabi cu lo no tin consecuencianan negativo.

Nos por haya hopi principio den e Palabra di Dios. Claro cu kisas nos lo no haya un texto cu ta aplica spesificamente na nos situacion. Sinembargo, nos por lesa tocante  algun persona cu a obedece Dios su guia y tocante otronan cu a ignora Dios su spiertamento. (Genesis 4:6, 7, 13-16; Deuteronomio 30:15-20; 1 Corintionan 10:11) Lesando e relatonan ei y analisando e resultadonan, nos lo saca afo principionan divino cu por yuda nos tuma decisionnan cu ta agrada Dios.

Wak por ehempel un combersacion cortico cu Hesucristo tawatin cu apostel Pedro. E hombernan cu tawata cobra e belasting di tempel a puntra Pedro: “Boso maestro no ta paga e belasting di tempel?” Pedro a contesta: “Si.” Poco despues, Hesus a puntra Pedro: “Ken e reinan di tera ta cobra tributo of belasting: nan yiu hombernan of stranheronan?” Ora Pedro a contesta: “Stranheronan”, Hesus a bis’e: “Kiermen e yiunan ta liber anto. Ma pa nos no ofende nan, bai lama, tira anzue y cohe e prome pisca cu bin ariba. Y ora bo habri su boca, lo bo haya un moneda. Cohe esei duna nan pa mi y pa bo.” (Mateo 17:24-27) Ki principionan nos por saca for di e relato aki?

Door di haci un serie di pregunta, Hesus a yuda Pedro compronde cu siendo cu E ta e Yiu di Dios, e no tin cu paga belasting. Aunke Pedro na prome instante no a compronde e punto ei, Hesus bondadosamente a yud’e compronde. Pesei, ora otro hende comete un eror, nos mester dicidi, mescos cu Hesus, pa trata nan cu compasion en bes di condena nan of mustra nan riba nan eror na un manera severo.

Pedro por a mira e ora ei e motibo pa paga e belasting, esta, pa no ofende otro hende. Esaki tambe ta otro principio cu nos por siña for di e relato aki. Tuma na cuenta e consenshi di otro hende ta mas importante cu insisti riba nos derecho pero cu lo ofende otro hende.

Kico ta motiva nos pa tuma decisionnan cu lo mustra respet pa e consenshi di otro hende? Amor pa nos prohimo. Hesucristo a siña nos cu e unico mandamento mas importante cu stima nos prohimo mescos cu nos mes, ta di stima Dios cu henter nos alma. (Mateo 22:39) Sinembargo, nos ta bibando den un mundo cu ta promove egoismo, y como hende pecaminoso nos ta inclina pa ta egoista. Pues, pa un persona stima su prohimo mescos cu su mes, e tin cu renoba su mente, esta, cambia su manera di pensa.—Romanonan 12:2.

Hopi hende a cambia nan manera di pensa, y nan ta tene cuenta cu e consenshi di otro hende ora di tuma decision, sea cu ta decisionnan grandi of chikito. Pablo a skirbi: “Boso a wordo yama pa libertad, rumannan; solamente, no uza boso libertad como un oportunidad pa e carni, ma laga un sirbi otro pa medio di amor.” (Galationan 5:13) Con nos por actua na harmonia cu e texto aki? Considera e caso di un ruman mohe hoben cu a muda pa un pueblo pafo di stad pa yuda hende siña tocante e Palabra di Dios. Segun cu e tawata papia cu e hendenan, el a bin realisa cu su pañanan a bira e topico di combersacion, aunke a base di normanan di stad su pañanan tawata modera. Su manera di bisti  y peña tawata modera, sinembargo el a dicidi di bisti paña menos colorido, menos na moda, “pa e palabra di Dios no wordo deshonra.”—Tito 2:5.

Con abo lo a reacciona si bo haya bo confronta cu un decision tocante bo areglo personal of un otro asunto di gusto personal? Bo por tin sigur cu Yehova lo keda contento ora cu bo decisionnan ta refleha cu bo ta interesa den e consenshi di otro hende.

Mira Asuntonan Riba Termino Largo

Fuera di principionan biblico y e consenshi di otro hende, kico mas nos por considera ora di tuma decision? Hiba un estilo di bida cristian ta dificil, mescos cu cana den un caminda smal, yen di baranca. Sinembargo, Dios ta duna cristiannan hopi libertad denter di e limitenan cu el a pone. (Mateo 7:13, 14) Nos tin cu considera ki efecto nos decisionnan lo tin riba nos bienestar spiritual, mental, emocional y fisico den futuro.

Supone cu bo tawatin pensa di acepta un trabou. Podise no tin nada inmoral ni inapropiado cu e trabou riba su mes. Lo bo por asisti na reunion- y congresonan cristian. Bo salario lo ta mas di loke hamas bo a soña. E doño di trabou ta duna hopi balor na bo habilidad y lo kier uza bo pleno potencial. Ademas, bo gusta e tipo di trabou ei. Tin algo cu mester stroba bo di acepta e oferta? Wel, kico si bo ta mira di antemano cu tin chens cu lo bo bai stima e trabou ei? Nan ta bisa bo cu nan lo no obliga bo traha overtime. Pero pa termina un proyecto, bo mes lo ta dispuesto pa haci mas esfuerso di loke ta necesario? Acaso e trahamento di overtime lo sosode cu frecuencia? Esei lo por kita bo for di bo famia y cu tempo asta for di actividadnan spiritual cu definitivamente bo no mester perde?

Wak con Jim a tuma un decision grandi relaciona cu su empleo. El a traha incansablemente y a bai hopi dilanti den e compania. Cu tempo, el a bira director di e compania den Oriente, director ehecutivo di nan filial na Merca y un miembro di e hunta di directiva di e compania su actividadnan na Europa. Sinembargo, ora a surgi un crisis economico na Japon, el a realisa con en vano tawata pa core tras di placa y poder. E placa cu el a traha asina duro p’e a disparce rapidamente. El a sinti cu su bida tawata falta un proposito. El a puntra su mes: ‘Kico lo mi ta haciendo aki dies aña?’ E ora ei el a realisa cu su casa y su yiunan si tawata enfoca riba metanan mas significativo den bida. Atrabes di añanan, nan a asocia cu Testigonan di Yehova. Jim tambe kier a sinti e felicidad y satisfaccion cu su famia tawata disfruta di dje. El a cuminsa studia Bijbel.

No a tarda hopi cu Jim por a mira cu su estilo di bida tawata strob’e di hiba un bida cu proposito como un cristian. Como cu constantemente e tawata biaha entre Asia, Merca y Europa, e no tawatin suficiente tempo pa studia Bijbel ni asocia cu rumannan den fe. E mester a tuma un decision: ‘Lo mi sigui hiba e bida cu mi a biba durante e ultimo 50 añanan, of lo mi sigui tras di un manera di biba nobo?’ Despues di a haci oracion tocante e asunto, el a considera ki efecto su decision lo tin riba termino largo. Anto el a dicidi di renuncia for di tur su puestonan cu excepcion di uno, ya asina e por tawatin tempo pa actividadnan spiritual. (1 Timoteo 6:6-8) Su decision a hacie mas felis, y a dun’e e oportunidad di ta ocupa cu actividadnan cristian.

Sea cu bo decisionnan ta grandi of chikito, nan ta importante. Un decision cu bo tuma awe por nifica e diferencia entre exito of fracaso, asta bida of morto den futuro. Bo por tuma decision sabi si bo tene cuenta cu principionan biblico, tambe e consenshi di otro hende y ki efecto bo accion lo tin riba termino largo. Tuma decision di acuerdo cu Dios su boluntad.

[Plachi na pagina 13]

Decisionnan aparentemente insignificante por tin consecuencianan serio

[Plachi na pagina 14]

Con principionan biblico lo por yud’e tuma un decision sabi?

[Plachi na pagina 15]

Hesus a papia cu Pedro cu compasion