Con Bon Bo Ta Comunica?

“CARTA di Amor di un Hende di 60 Aña.” Esei tawata e tema di un concurso cu un banco na Japon a tene algun aña pasa. E concurso a anima Japonesnan entre 50 pa 60 y pico aña, pa expresa “honestamente” loke nan ta sinti pa nan casa. Un participante a skirbi na su esposa: “Podise lo bo hari, pero lo duel mi si mi no bisa bo e cos aki. At’e ta bin na bos duro: Danki cu bo a casa cu mi.”

Den varios cultura, incluso algun na Oriente, nan ta descurasha hende pa expresa nan sintimentonan libremente. Sinembargo, mas cu 15.000 hende a reacciona riba e concurso di carta di amor. E tawata asina popular cu nan a tene un di dos concurso, y nan a publica varios buki basa riba e cartanan cu a drenta. Esaki ta duna e idea cu tin hopi hende cu den e profundidad di nan curason, ta anhela pa expresa kico nan ta sinti pa nan casa stima. Sinembargo, tin otro hende cu no kier expresa esei. Dicon no? Muy probablemente pasobra ta rekeri un cierto esfuerso y habilidad pa laga otro hende—manera por ehempel bo casa—compronde kico bo ta sinti.

Hitoshi Kato, kende a skirbi un buki tocante bahamento cu pension, a bisa cu serca parehanan di edad na Japon, hopi biaha ta e esposanan ta cuminsa cu e tramitenan pa divorcio debi na rencor profundo cu nan a acumula atrabes di añanan. Anto Kato a agrega: “Pero esei tambe ta resultado di e echo cu e pareha no a expresa nan sintimentonan na otro ora cu nan tawata confronta crisis.”

Un esposo cu a baha cu pension, kisas ta keda sorprendi ora cu su casa lanta un dia entreg’e papel di divorcio. Pero kisas pa hopi aña e pareha no a papia tocante kico nan ta  sinti pa otro. Podise e esposo y esposa a purba expresa nan sintimentonan, pero nan no por a mantene e combersacion na un nivel constructivo. En bes di desaroya un relacion mas intimo, nan tawata haya nan cada bes den pleito cu otro.

Con un esposo y esposa por trata cu nan desacuerdonan na un manera calmo y comunica nan sintimentonan den un manera agradabel? Talbes lo bo ta interesa pa sa cu bo ta haya e sugerencianan di mas practico, no den un buki resien skirbi pa un consehero matrimonial, sino den un buki antiguo cu hende a aprecia pa siglonan, esta, Bijbel.