E Derecho di Tin un Nomber

TUR persona tin derecho di tin un nomber. Na Tahiti, nan ta duna nomber asta na un baby resien naci cu a ser bandona y cu ningun hende no sa ta ken ta su tata of su mama. Na oficina di registro civil nan ta duna e yiu bandona un nomber y un fam.

Sinembargo, tin un persona cu den un sentido nan a nenga e derecho basico aki, un derecho cu ta ser otorga na casi tur hende. Sorprendentemente, e persona aki ta “e Tata, di kende henter e famia den shelo y riba tera ta haya su nomber”! (Efesionan 3:14, 15) E cos ta cu hopi hende ta nenga di uza nomber di e Creador manera bo ta hay’e den Bijbel. Nan ta prefera di remplasa e nomber cu titulonan manera “Dios” of “Señor.” Pues anto, con Dios su nomber ta? E salmista ta contesta e pregunta ei: “Abo, kende su nomber ta Yehova, abo so ta e Haltisimo riba henter tera.”—Salmo 83:18, NW.

Na principio di siglo 19, ora cu e misioneronan di Sosiedad Misionero di London a yega Tahiti, e pueblo Polinesio tawata adora varios dios. Cada dios tawatin su propio nomber, y e diosnan principal tawata Oro y Taaroa. Pa por a distingui e Dios di Bijbel for di e otro diosnan, e misioneronan ei sin basila a cuminsa uza e nomber divino extensamente, cu gespel na Tahitiano ta Iehova.

E nomber ei a bira bon conoci y hende tawata uz’e gewoon den combersacion y corespondencia diario. Rei Pomare II di Tahiti, kende a reina na principio di siglo 19, a uz’e cu frecuencia den su cartanan personal. Prueba di esaki nos por mira den e copi di e carta riba e pagina aki. E ta skirbi na Ingles y ta exhibi den e Museo di Tahiti y Su Islanan. E carta aki ta proba cu den e tempo ei e hendenan no tawatin problema pa uza e nomber di Dios. Ademas, Dios su nomber personal ta aparece miles di biaha den e prome traduccion di Bijbel na Tahitiano, cu a ser completa na aña 1835.

[Plachi na pagina 32]

Rei Pomare II

[Plachi na pagina 32]

Rei y carta: Collection du Musée de Tahiti et de ses Îles, Punaauia, Tahiti