Factornan Esencial pa Yuda Bo Comunica cu Bo Casa

‘MI NO mester a bisa e cos ei.’ ‘Mi no a splica bon kico mi kiermen.’ Bo a yega di sinti asina despues cu bo a purba comunica cu bo casa? Comunicacion ta un habilidad cu bo tin cu desaroya. Mescos cu cualkier otro habilidad, tin hende ta parce di por domin’e masha facil, mientras cu pa otronan ta mas dificil. Pero, maske bo ta pertenece na e ultimo grupo, bo por siña expresa bo pensamentonan na un manera agradabel, es decir, siña comunica na un manera cu ta produci e resultado desea.

Tin biaha, ta cultura ta influencia e manera cu hende ta bai om cu nan casa. Podise a base di cultura, hombernan ta lanta tende cu ‘hende homber no mester papia mucho  hopi.’ Kisas hende homber cu ta gusta papia ta ser menosprecia y mira como insinsero. Ta berdad cu Bijbel ta bisa: “Tur hende mester ta lihe pa tende, no lihe pa papia.” (Santiago 1:19) Sinembargo, e conseho ei ta aplica tanto na hende homber como hende mohe y e ta mustra cu comunicacion ta encera mas cu papia so. Dos hende kisas ta papia cu otro pa basta rato, pero kico si nan no ta scucha loke e otro ta bisa? Probablemente no tin berdadero comunicacion entre nan. Manera e texto di Santiago ta mustra, un parti importante di bon comunicacion ta e arte di scucha.

Comunicacion sin Palabra

Den algun comunidad, esposanan no ta supose di expresa loke nan ta pensa ni sinti. Anto esposonan no mester mete den asuntonan di e famia. Den un ambiente asina, esposo y esposa tin cu rei kico nan casa ta desea den cualkier situacion cu surgi. Tin esposa ta bira hopi habil den ripara e necesidadnan di nan casa, y ta actua lihe pa satisface esei. Den casonan asina, ta tuma luga comunicacion sin palabra entre esposo y esposa. Por lo general, e tipo di comunicacion aki ta bin di un banda so. Mientras cu e esposa kisas ta siña ripara kico su esposo ta pensa of sinti, masha poco biaha ta ser spera di e esposo su banda pa e desaroya e mesun habilidad y ripara e sintimentonan di su esposa.

Ta berdad cu den algun cultura hende homber ta observa e necesidadnan emocional di nan casa y ta purba satisface esei. Pero asta den e culturanan ei hopi matrimonio lo beneficia si tin mihor comunicacion.

Comunicacion Ta Hopi Importante

Comunicacion franco por preveni mal comprondemento y mal interpretacion. Casi na principio di e historia di e Israelitanan, e tribunan di Ruben, Gad y mitar tribu di Manases cu tawata biba na parti oost di Riu Yordan a traha “un altar grandi, impresionante” serca di Yordan. E otro tribunan a mal interpreta nan accion. Nan a pensa cu nan rumannan na otro banda di Yordan a comete un acto di apostasia, y e tribunan na parti west a prepara pa bai bringa contra e “rebeldenan.” Pero, prome cu nan a sali pa bai bringa, nan a manda un delegacion pa comunica of papia cu e tribunan na parti oost. Esei tawata un paso sabi! Nan a descubri cu e altar no tawata pa ofrece ofrenda kima ni sacrificio ilegal. Mas bien, e tribunan na parti oost tawatin miedo cu den futuro e otro tribunan lo a bisa nan: ‘Boso no tin porcion den Yehova.’ E altar lo mester a para como testigo cu nan tambe tawata adoradonan di Yehova. (Hosue 22:10-29) Nan a yama e altar Testigo, probablemente pasobra el a sirbi como un testigo pa nan cu Yehova tawata e Dios berdadero.—Hosue 22:34.

Nan splicacion tawata suficiente pa combence e otro tribunan cu mesora a laga e idea di tuma accion contra e dos tribunan y mei para. Si, comunicacion franco y habri a evita un conflicto arma. Mas despues, ora cu Israel a rebela contra Yehova Dios, nan esposo simbolico, el a bisa nan cu misericordiosamente lo e ‘papia cariñosamente cu nan.’ (Oseas 2:14) Ki un excelente ehempel pa hende casa! Si, purba yega na curason di bo casa door di papia cariñosamente cu ne di manera cu e por compronde bo sintimentonan. Esaki ta importante, specialmente si e asunto cu boso mester papia di dje ta un asunto emocional. Pattie Mihalik, un periodista na Merca, a comenta: “Tin hende ta bisa cu palabra ta barata, pero tambe palabra por tin balor incalculabel. Y aunke tin hende ta haya cu ta dificil pa expresa sintimento, e resultado por produci hopi mas cu cen na banco.”

Mehora e Habilidad di Comunica

Tin hende ta bisa: ‘Nos matrimonio tawata un fracaso for di principio.’ Otronan kisas ta conclui: ‘No por scapa e matrimonio aki.’ Kisas nan ta sinti cu ta imposibel pa mehora nan habilidad di comunica despues cu nan a  casa. Sinembargo, pensa riba e hendenan cu ta biba den sosiedadnan caminda ta famia ta scohe ken bo ta casa cu ne. Hopi hende den e culturanan ei cu tempo ta establece un bon comunicacion den nan bida matrimonial.

Un pareha den un pais di Oriente a uni via un matrimonio regla. Ta un intermediario nan a pidi pa biaha un distancia largo pa bai busca un bruid pa e homber. Pero toch e pareha, cu a biba casi 4.000 aña pasa, a desplega habilidad remarcabel den e arte di comunicacion. E homber, Isaak, a topa e intermediario y su futuro esposa den un cunucu. E homber cu tawata fungi como intermediario “a conta Isaak tur loke cu el a haci.” E relato biblico tocante e matrimonio aki ta sigui bisa: “E ora ei Isaak a hiba Rebeca den tent di su mama Sara [e paso aki a fungi como e casamento oficial], y el a tuma Rebeca y esaki a bira su esposa, y el a stim’e.”—Genesis 24:62-67.

Tuma nota cu Isaak a tende e informe prome anto “e ora ei” el a tuma Rebeca como su esposa. E intermediario tawata un cria digno di confiansa cu tawata dedica na Yehova, e Dios cu Isaak a adora. Isaak tawatin bon motibo pa confia e homber aki. Despues di esei, Isaak a bin ‘stima’ Rebeca, e mucha mohe cu el a casa cu ne.

Isaak cu Rebeca a desaroya bon habilidad di comunica cu otro? Wel, un problema serio a surgi den e famia despues cu nan yiu homber Esau a casa cu dos yiu mohe di Het. Rebeca a keda bisa Isaak: “Mi ta fada di mi bida pa motibo di e yiu mohenan di Het; si Yacob [nan yiu mas jong] tuma un esposa manera esakinan, for di e yiu mohenan di Het, . . . pakico biba ainda anto?” (Genesis 26:34; 27:46) Ta bisto cu el a expresa su precupacion bon cla.

Isaak a bisa Yacob, morocho di Esau, pa e no tuma un esposa for di e yiu mohenan di Canan. (Genesis 28:1, 2) Rebeca a expresa su punto di bista bon cla y Isaak a comprond’e. E pareha aki a comunica cu exito tocante un asunto familiar sumamente delicado, poniendo un bon ehempel pa nos awe. Pero kico si un pareha no por yega na un acuerdo? Kico nan por haci?

Con pa Trata cu Desacuerdo

Si abo cu bo casa tin un desacuerdo serio, no tuma e actitud di stop di papia cu bo casa of di no worry cu ne. Esei lo transmiti un mensahe masha cla: Bo ta infelis, y bo kier pa bo casa tambe ta infelis. Sinembargo, bo casa podise no ta ni compronde bon bon ta kico bo ta desea of ta sinti.

Abo cu bo casa tin cu papia sinseramente over di e asunto. Si ta un asunto delicado, kisas no ta facil pa keda calmo. E mayornan di Isaak, Abraham cu Sara, un biaha a confronta un situacion dificil. Como cu Sara tawata steril, el a sigui e custumber di e tempo ei y a duna su cria Agar na Abraham como concubina pa produci un yiu. Agar a haya un yiu homber cu Abraham, Ismael. Sinembargo, despues Sara mes a sali na estado, y el a haya un yiu homber pa Abraham, Isaak. Ora cu mester a kita Isaak for di pecho, Sara a mira cu Ismael tawata haci bofon di su yiu. Sara a sinti cu esaki lo por a bira un peliger pa su yiu y pesei el a urgi Abraham pa core cu e cria y cu Ismael. Si, Sara a expresa na un manera stret con el a sinti. Pero loke el a pidi no a agrada Abraham ni un tiki.

Con nan a resolve e desacuerdo? E relato biblico ta bisa: “Dios a bisa Abraham: ‘No tene duele pa motibo di e mucha ni pa motibo di bo cria; kico cu Sara bisa bo, scuch’e, pasobra ta door di Isaak bo desendientenan lo wordo conta.’” Abraham a scucha e instruccion di Yehova Dios y a actua di acuerdo cu esei.—Genesis 16:1-4; 21:1-14.

Podise bo ta bisa: ‘Wel, si Dios papia cu nos for di shelo, facilmente nos lo por yega na un acuerdo!’ Esei ta trece nos na un otro factor esencial pa resolve desacuerdonan matrimonial. Parehanan casa por scucha Dios. Con?  Door di lesa e Palabra di Dios hunto y acepta loke e ta bisa como guia cu ta bin di Dios.—1 Tesalonicensenan 2:13.

Un esposa cristian maduro a bisa: “Hopi biaha, ora cu un mucha mohe bin serca mi pa haya conseho tocante su matrimonio, mi ta puntr’e si e cu su casa ta lesa Bijbel hunto. Mayoria pareha cu tin problema den nan matrimonio no tin e custumber ei.” (Tito 2:3-5) Nos tur por beneficia di su observacion. Lesa e Palabra di Dios regularmente hunto cu bo casa. Den e manera ei, bo ta “tende” e palabranan di Dios encuanto con bo tin cu comporta bo dia tras dia. (Isaias 30:21) Pero tene cuidou! No uza Bijbel como un palo pa bati bo casa cu ne, door di continuamente hala atencion na textonan biblico cu bo ta haya cu bo casa no ta aplica. Mas bien, purba mira con boso tur dos por pone na practica loke boso ta lesa.

Si bo ta luchando cu un problema dificil, pakico bo no ta consulta e Index di Publicacionnan Watch Tower * (na Spaño) relaciona cu e cos spesifico ei cu ta precupa bo? Podise bo tin cu cuida mayornan di edad, y esaki ta causando tension den bo matrimonio. En bes di pleita riba loke bo casa tin cu haci of no, pakico boso no ta sinta hunto y consulta e Index? Prome, busca e encabesamento principal “Mayornan.” Bo por busca e referencianan bou di subtemanan, manera “cuida mayornan di edad.” Lesa hunto e articulonan relaciona cu esei for di e publicacionnan di Testigonan di Yehova. Lo bo por keda sorprendi ora bo nota cuanto abo cu bo casa por beneficia di informacion biblico cu a yuda hopi cristian sinsero.

Consultando e referencianan ei y lesando e informacion hunto lo yuda boso haya un punto di bista obhetivo di boso problema. Boso lo haya textonan biblico cu ta duna boso Dios su manera di pensa. Busca e textonan den Bijbel y lesa nan hunto. Si, asina boso lo tende loke Dios ta bisa tocante e problema cu boso ta confronta!

Mantene Bon Comunicacion

Bo a yega di purba habri un porta cu hende no a uza pa basta tempo? Cu masha krakmento, e porta ta habri pocopoco cu su scarnirnan tur frustia. Pero kico si tawata uza e porta ei cu regularidad y su scarnirnan tawata bon zeta? Lo tawata facil pa habrie. Wel, mescos ta e caso cu e porta di comunicacion. Si bo hacie un custumber di comunica y ta zeta e scarnirnan di e porta di comunicacion cu amor cristian, lo bo por comunica bo pensamentonan mas facilmente, asta ora boso tin desacuerdo encuanto asuntonan hopi importante.

Bo tin cu cuminsa un caminda. Aunke na principio comunicacion ta rekeri hopi esfuerso, traha riba dje. Anto cu tempo bo por disfruta di un relacion mas harmonioso cu bo casa, y esei lo hiba na amistad y comprension duradero.

[Nota]

[Plachi na pagina 7]

Lo bo busca Dios su guia ora surgi un desacuerdo?