Laga Boso Mannan Ta Fuerte
Laga Boso Mannan Ta Fuerte
“Laga boso mannan ta fuerte, boso cu den e dianan aki ta scucha e palabranan aki for di boca di e profetanan.”—ZACARIAS 8:9.
1, 2. Dicon e bukinan di Hageo y Zacarias ta merece nos atencion?
E PROFECIANAN di Hageo y Zacarias a wordo skirbi un 2.500 aña pasa. Sinembargo, definitivamente nan ta contene lesnan hopi importante pa bo bida. E relatonan biblico cu nos ta haya den e dos bukinan aki ta mas cu simplemente historia. Nan ta parti di “tur loke a wordo skirbi prome aya . . . pa nos instruccion.” (Romanonan 15:4) Hopi di loke nos ta lesa den e dos bukinan aki ta laga nos corda riba situacionnan real cu a bin ta tuma luga desde cu e Reino a ser estableci den shelo na aña 1914.
2 Referiendo na suseso- y circunstancianan cu e pueblo di Dios di pasado a experencia, apostel Pablo a declara: “Awor e cosnan aki a sosode cu nan como un ehempel, y nan a wordo skirbi como un spiertamento pa nos, riba kendenan e finnan di e siglonan a bin.” (1 Corintionan 10:11) Pues podise bo ta puntra bo mes: ‘Ki balor e bukinan di Hageo y Zacarias tin den nos tempo?’
3. Riba kico Hageo y Zacarias ta enfoca?
3 Manera e articulo anterior a menciona, e profecianan di Hageo y Zacarias a abarca e tempo ora cu e Hudiunan, libra for di cautiverio na Babilonia, a regresa nan tera cu Dios a duna nan. E dos profetanan a enfoca riba e reconstruccion di e tempel. E Hudiunan a pone fundeshi di e tempel na aña 536 prome cu nos era. Aunke algun Hudiu di edad a focus riba pasado, mayoria tawata “grita duro di goso.” Pero en realidad algo hopi mas importante a sosode den nos tempo. Con asina?—Esdras 3:3-13.
4. Kico a sosode poco despues di Prome Guera Mundial?
4 Poco despues di Prome Guera Mundial, Yehova a libra su unginan for di cautiverio na Babilonia e Grandi. Esaki tawata un indicacion grandi di Yehova su sosten. Prome cu esei, a parce manera cos cu lidernan religioso y nan socionan politico a para e trabou publico di predica y siña otro hende cu e Studiantenan di Bijbel tawata haci. (Esdras 4:8, 13, 21-24) Sinembargo, Yehova Dios a elimina obstaculonan cu tawata stroba e trabou di predica y di haci disipel. Atrabes di e decadanan cu a sigui despues di aña 1919, e trabou di Reino a sigui prospera y nada no por a para su progreso.
5, 6. Na ki gran logro Zacarias 4:7 ta señala?
5 Nos por tin sigur cu e trabou di predica y siña hende cu Yehova su sirbidonan obediente ta haci den nos tempo, lo sigui bai dilanti cu e sosten di Yehova. Na Zacarias 4:7 [BPK] nos ta lesa: “Lo e carga e ultimo piedra trece bou di grito di hubilo: Esta precioso, esta precioso.” Na ki gran logro den nos tempo esaki ta señala?
6 Zacarias 4:7 ta señala na e tempo ora cu lo trece e adoracion berdadero di e Señor Soberano na su estado perfecto den e patio terenal di su tempel spiritual. E tempel ei ta Yehova su areglo pa ador’e a base di e sacrificio di reconsiliacion di Cristo Hesus. Ta berdad cu e gran tempel spiritual a existi for di e prome siglo di nos era. Sinembargo, adoracion berdadero den su patio terenal, es decir, riba tera, tin cu alcansa ainda su estado perfecto. Awe tin miyones di adorado cu ta sirbi den e patio terenal di e tempel spiritual. Esakinan y multitud di hende resusita lo alcansa perfeccion durante Hesucristo Su Reinado di Mil Aña. Na fin di e mil aña, ta Dios su adoradonan berdadero so lo tin riba e tera haci limpi.
7. Ki papel Hesus tin den trece adoracion berdadero na su estado perfecto den nos tempo, y dicon esaki mester ta un animacion pa nos?
7 Gobernado Zorobabel y sumo sacerdote Hosue tawata presente pa mira final di e construccion di e tempel na aña 515. Zacarias 6:12 y 13 a predeci e papel similar cu Hesus lo tin den hiba adoracion berdadero na su estado perfecto. Nos ta lesa den e versiculonan ei: “Asina e SEÑOR di ehersitonan ta bisa: ‘Mira, un homber, kende su nomber ta Rama, pasobra e lo spruit for di caminda cu e ta; y e lo traha e tempel di SEÑOR. . . . Y ta e lo ricibi e honor y lo sinta y goberna riba su trono. Asina e lo ta un sacerdote riba su trono.’” Hesus ta den shelo y e ta esun cu a pone e liña di rei for di David spruit. Mirando cu t’e ta sostene e trabou di Reino na e tempel spiritual, bo ta kere cu tin un persona cu por stroba progreso di e trabou ei? Definitivamente cu no! Esaki mester anima nos pa sigui padilanti den nos sirbishi y no laga precupacionnan di bida diario desvia nos, no ta berdad?
Prioridadnan
8. Dicon nos mester pone e trabou na e tempel spiritual na prome luga den nos bida?
8 Pa nos por tin Yehova su sosten y bendicion, nos tin cu percura pa e trabou na e tempel spiritual keda na prome luga den nos bida. Distinto for di e Hudiunan cu a bisa: “E tempo no a yega”, nos tin cu corda cu nos ta bibando den “e ultimo dianan.” (Hageo 1:2; 2 Timoteo 3:1) Hesus a predeci cu su fiel siguidonan lo predica e bon nobo di Reino y haci disipel. Nos mester tene cuidou pa nos no neglisha nos privilegio di predica e bon nobo. E trabou di predica y di siña hende cu e rumannan ungi a reanuda na aña 1919, despues cu esaki a para temporalmente debi na oposicion di mundo, no ta cla ainda. Pero, bo por tin sigur cu lo e keda cla algun dia!
9, 10. Yehova su bendicion ta depende di kico, y esaki ta nifica kico pa nos?
9 Te na e grado cu nos ta sigui traha diligentemente, te na e grado ei nos lo ser recompensa, sea como pueblo of individualmente. Tuma nota di Yehova su promesa cu ta duna nos e garantia ei. For di momento cu e Hudiunan a bolbe cuminsa adora Yehova di henter nan alma y a reanuda seriamente e trabou riba e fundeshi di e tempel, Yehova a bisa: “For di awe padilanti lo mi bendiciona boso.” (Hageo 2:19) Nan lo a haya su pleno fabor atrobe. Awor considera e bendicionnan cu tawatin den Dios su promesa: “Lo tin pas pa e simiña: e mata di wendruif lo duna su fruta, e tera lo duna su producto, y e shelonan lo duna nan serena; y lo mi haci e restante di e pueblo aki hereda tur e cosnan aki.”—Zacarias 8:9-13.
10 Mescos cu Yehova a bendiciona e Hudiunan ei den sentido spiritual y material, asina lo e bendiciona nos segun cu nos diligentemente—y cu un curason contento—ta haci e trabou cu el a asigna nos. E bendicionnan aki ta entre otro, pas entre nos mes, siguridad, prosperidad y crecemento spiritual. Pero, bo por tin sigur cu pa nos sigui haya Dios su bendicion nos tin cu haci e trabou na e tempel spiritual na e manera cu Yehova kier pa nos hacie.
11. Con nos lo por analisa nos mes?
11 Awor ta tempo pa nos ‘pensa bon riba nos conducta.’ (Hageo 1:5, 7) Nos tin cu para keto un rato y analisa nos prioridadnan den bida. Yehova su bendicion riba nos awe ta depende di e grado cu nos ta glorifica su nomber y ta sigui padilanti den nos trabou na su tempel spiritual. Lo bo por puntra bo mes: ‘Mi prioridadnan a cambia? Con mi celo pa Yehova, pa su berdad y pa su trabou ta compara cu e celo cu mi tawatin tempo cu mi a batisa? Mi interes den un estilo di bida comodo ta afectando e atencion cu mi ta duna Yehova y su Reino? Miedo di hende—of precupacion pa loke otro hende lo pensa—ta stroba mi?’—Revelacion 2:2-4.
12. Hageo 1:6 y 9 ta trece dilanti ki situacion cu tawata reina entre e Hudiunan?
12 Nos no kier pa Dios keda sin drama su bendicion rico riba nos debi cu nos ta neglisha e trabou di glorifica su nomber. Corda cu despues di a cuminsa bon, e Hudiunan cu a regresa a cuminsa ‘hinca hopi esfuerso den nan mes cas’, segun Hageo 1:9 [BPK]. Nan a cuminsa consentra solamente riba nan propio necesidadnan diario y nan estilo di bida. Como consecuencia nan “a cosecha poco”, nan tawatin un scarsedad di bon cuminda y cos di bebe y falta di paña pa tene nan curpa cayente. (Hageo 1:6) Yehova a kita su bendicion. Tin un les den esaki pa nos?
13, 14. Con nos por aplica e les cu nos a saca for di Hageo 1:6 y 9, y dicon esaki ta importante?
13 Bo no ta di acuerdo cu pa nos sigui disfruta di Dios su bendicion, nos tin cu resisti e buscamento di cos pa nos mes te na e grado cu nos ta neglisha Yehova su adoracion? Nos tin cu haci esfuerso pa resisti esaki sea cu e actividad of interes cu ta kitando nos atencion ta e afan pa gana hopi placa, ta proyectonan pa bira rico lihe, ta plannan ambicioso pa educacion avansa ya asina nos por tin un carera deseabel den e mundo aki of ta programanan pa yuda nos alcansa nos pleno potencial of pa satisface deseonan personal.
14 Cosnan asina kisas no ta un pica riba nan mes. Sinembargo bo no ta ripara cu for di e punto di bista di haya bida eterno, e cosnan ei en realidad ta “obranan morto”? (Hebreonan 9:14) Den ki sentido? Nan ta spiritualmente morto, vano y improductivo. Si un persona persisti den nan, e obranan ei lo por hiba na morto spiritual. Esei a sosode cu algun cristian ungi den tempo di e apostelnan. (Filipensenan 3:17-19) El a sosode tambe cu algun cristian den nos tempo. Kisas bo sa di algun ruman cu pocopoco a wordo distrai for di actividadnan cristian y for di e congregacion; anto awor nan no ta demostra ningun inclinacion pa bolbe bek na e sirbishi di Yehova. Nos sigur ta spera cu e personanan ei lo bolbe na Yehova, pero echo ta cu coremento tras di “obranan morto” por pone hende perde Yehova su aprobacion y bendicion. Bo por imagina ki un situacion tristo esei lo ta. Lo e nifica cu bo ta perde e goso y pas cu Dios su spirito ta produci. Anto imagina bo ki un gran perdida lo e ta si bo no por beneficia di e caluroso hermandad cristian!—Galationan 1:6; 5:7, 13, 22-24.
15. Con Hageo 2:14 ta mustra e seriedad di nos adoracion?
15 Esaki ta un asunto masha serio mes. Tuma nota na Hageo 2:14 con Yehova a mira e Hudiunan cu a neglisha Yehova su cas di adoracion pa nan a bai fura nan propio casnan, sea cu ta literalmente nan tawata fura nan cas cu palo of nan tawata djis consentra riba haci nan cas bunita. “‘Asina e pueblo aki ta. Y asina e nacion aki ta mi dilanti’, SEÑOR ta declara, ‘y asina cada obra di nan mannan ta; y loke nan ta ofrece einan ta impuro.’” Cualkier sacrificio superficial cu e Hudiunan, cu no tawatin berdadero entusiasmo ni interes, a ofrece riba e altar temporal na Herusalem tawata inaceptabel tanten cu e pueblo tawata neglisha adoracion berdadero.—Esdras 3:3.
Dios Ta Garantisa Cu Lo E Sostene Su Adoradonan
16. Basa riba e visionnan cu Zacarias a haya, di kico e Hudiunan por tawata sigur?
16 Hudiunan obediente cu tawata traha riba reconstruccion di Dios su tempel a ser sigura di Dios su sosten. Dios a indica esei pa medio di un serie di ocho vision cu Zacarias a ricibi. E prome vision a garantisa nan cu e tempel lo keda cla y cu Herusalem y Huda lo gosa di prosperidad tanten cu e Hudiunan obedientemente a sigui cu e trabou nan dilanti. (Zacarias 1:8-17) E di dos vision a priminti cu lo bin un fin na tur gobierno cu a opone adoracion berdadero. (Zacarias 1:18-21) E otro visionnan a sigura e Hudiunan di Dios su proteccion riba e trabou di construccion, cu un multitud di hende for di hopi nacion lo basha bin na Yehova su cas di adoracion ora e ta cla, tambe cu lo tin berdadero pas y siguridad y cu obstaculonan aparentemente insuperabel cu ta stroba nan di cumpli cu e trabou cu Dios a asigna nan lo wordo kita. Ademas, maldad lo a ser elimina y nan lo tawatin supervision y proteccion di e angelnan. (Zacarias 2:5, 11; 3:10; 4:7; 5:6-11; 6:1-8) Bo por compronde dicon e Hudiunan obediente, teniendo tanto garantia di Dios su sosten, a ahusta nan estilo di bida y a consentra riba e trabou pa cua Dios a libra nan for di Babilonia.
17. En bista di e garantia cu nos tin, kico nos mester puntra nos mes?
17 Di un manera similar, e garantia cu nos tin cu adoracion berdadero lo triunfa sigur, mester stimula nos na actividad y motiva nos pa pensa seriamente riba Yehova su cas di adoracion. Puntra bo mes: ‘Si di berdad mi ta kere cu awor ta e tempo pa haci e trabou di predica e bon nobo di Reino y di haci disipel, mi metanan y estilo di bida ta cuadra cu e conviccion ei? Mi ta dedica suficiente tempo na studia Dios su Palabra profetico, na hacie mi interes intenso, y na combersa tocante dje cu otro rumannan cristian y tambe cu otro hendenan cu mi ta topa?’
18. Ki tin nos dilanti segun Zacarias capitulo 14?
18 Zacarias a referi tambe na e destruccion di Babilonia e Grandi sigui pa e guera di Armagedon. Nos ta lesa: “Lo ta un dia unico cu ta conoci pa SEÑOR—lo no tin ni dia ni anochi, ma ora nochi ta sera lo sosode cu tin lus.” Si, e dia di Yehova lo ta en berdad un dia scur y friu pa su enemigonan riba tera! Pero pa Yehova su adoradonan fiel lo e ta un dia di lus continuo y aprobacion. Zacarias ta describi tambe con tur cos den e mundo nobo lo proclama Yehova su santidad. Adoracion berdadero na Dios su gran tempel spiritual lo ta e unico forma di adoracion riba tera. (Zacarias 14:7, 16-19) Ki un garantia remarcabel! Nos lo experencia cumplimento di loke a ser predeci y nos lo mira e vindicacion di Yehova su soberania. E dia ei di Yehova lo ta unico!
Bendicionnan Permanente
19, 20. Dicon bo ta haya Zacarias 14:8 y 9 un animacion?
19 Despues di e tremendo logro ei, Satanas y su demoñonan lo keda restringi na un abismo di inactividad. (Revelacion 20:1-3, 7) E ora ei bendicionnan lo core durante Cristo Su Reinado di Mil Aña. Zacarias 14:8 y 9 ta bisa: “Lo sosode den e dia ei cu awanan bibo lo core for di Herusalem, esun mitar pa lama di pariba y e otro mitar pa lama di pabou; esaki lo sosode tanto den zomer como den winter. Y [Yehova] lo ta rei riba henter e tera; den e dia ei [Yehova] lo ta e unico, y su nomber e unico.”
20 “Awanan bibo”, of “un riu di e awa di bida”, cu ta representa Yehova su provisionnan pa humanidad haya bida eterno, lo core continuamente for di e asiento di e Reino Mesianico. (Revelacion 22:1, 2) Un multitud grandi di adorado di Yehova, cu a sobrevivi Armagedon, lo beneficia door di ser libra for di e condena di morto hereda for di Adam. Asta esnan cu ta morto caba lo beneficia pa medio di un resureccion. Asina lo cuminsa un fase nobo di Yehova su gobernacion di e tera. Tur hende rond mundo lo reconoce Yehova como e Soberano Universal, e unico persona cu mester ser adora.
21. Kico mester ta nos determinacion?
21 En bista di tur loke Hageo y Zacarias a predeci y tur loke a cumpli caba, nos tin motibo solido pa sigui padilanti den e trabou cu Dios a asigna nos pa haci den e patio terenal di su tempel spiritual. Laga nos tur sigui haci esfuerso pa mantene interesnan di Reino na prome luga mientras cu nos ta warda riba e tempo ora cu lo hiba adoracion berdadero na su estado perfecto. Zacarias 8:9 ta urgi nos: “Laga boso mannan ta fuerte, boso cu den e dianan aki ta scucha e palabranan aki for di boca di e profetanan.”
Bo Ta Corda?
• Ki paralelo historico ta haci e bukinan di Hageo y Zacarias hopi importante pa nos awe?
• Hageo y Zacarias ta siña nos ki les tocante nos prioridadnan?
• Dicon un consideracion di Hageo y Zacarias ta duna nos motibo pa mira futuro cu confiansa?
[Preguntanan di Estudio]
[Plachi na pagina 26]
Hageo y Zacarias a anima e Hudiunan pa traha di henter nan alma y pa asina haya bendicion
[Plachi na pagina 27]
Abo ta ‘hincando hopi esfuerso den bo mes cas’?
[Plachi na pagina 28]
Yehova a priminti bendicion, y el a dun’e tambe