“Mi Ta cu Boso”
“Mi Ta cu Boso”
‘E mensahero di Yehova, a papia . . . bisando: “‘Mi ta cu boso’, Yehova ta declara.”’—HAGEO 1:13.
1. Hesus a referi na cua paralelo profetico pa nos tempo?
NOS ta bibando den un tempo masha importante den historia. E cumplimento di profecianan biblico ta proba cu desde aña 1914 nos ta den “e dia di Señor.” (Revelacion 1:10) Podise bo a yega di studia e topico ei, pues bo sa cu Hesus a compara “e dianan di e Yiu di hende” den poder di Reino cu “e dianan di Noe” y cu “e dianan di Lot.” (Lucas 17:26, 28) Bijbel ta indica anto cu e susesonan ei ta fungi como profecia tocante nos tempo, es decir, nan ta un paralelo profetico. Sinembargo, tin un otro paralelo profetico cu ta merece nos consideracion seriamente.
2. Ki encargo Yehova a duna Hageo y Zacarias?
2 Laga nos considera un situacion cu tawata existi den tempo di e profetanan Hebreo, Hageo y Zacarias. Ki mensahe e dos profetanan fiel ei a duna cu tin un aplicacion spesifico pa Yehova su pueblo den nos tempo? Hageo y Zacarias tawata ‘mensaheronan di Yehova’ pa e Hudiunan despues cu esakinan a regresa for di cautiverio na Babilonia. Nan encargo tawata pa sigura e Israelitanan cu nan tawatin Dios su sosten pa reconstrui e tempel. (Hageo 1:13; Zacarias 4:8, 9) Aunke e bukinan cu Hageo y Zacarias a skirbi ta bukinan cortico, nan ta forma parti di “tur Scritura [cu] ta inspira pa Dios y ta util pa siñansa, pa reprendemento, pa coreccion, pa educa den husticia.”—2 Timoteo 3:16.
E Profecianan Ei Mester Interesa Nos
3, 4. Dicon nos mester ta interesa den e profecianan di Hageo y Zacarias?
3 Un cos ta sigur, e mensahenan di Hageo y Zacarias a beneficia e Hudiunan di nan tempo, y nan profecianan a cumpli den e tempo ei. Pero dicon nos por ta sigur cu e dos bukinan aki mester interesa nos awe? Nos ta haya un indicacion na Hebreonan 12:26-29. Einan apostel Pablo ta cita e palabranan di Hageo 2:6, cu ta bisa cu Dios lo ‘sagudi e shelonan y e tera.’ E sagudimento aki al final lo “bolter e trononan di reinonan y destrui poder di e reinonan di e nacionnan.”—Hageo 2:22.
4 Pues, Pablo a cita e palabranan di Hageo pa declara loke lo bai pasa cu “e reinonan di e nacionnan” y el a papia di e superioridad di e Reino indestructibel cu cristiannan ungi lo ricibi. (Hebreonan 12:28) For di esaki bo por compronde anto cu ora Pablo a skirbi e buki di Hebreonan den prome siglo di nos era, e profecianan di Hageo y Zacarias a señala na un tempo den futuro. Awe ainda tin un resto di cristiannan ungi riba tera cu ta heredero di e Reino Mesianico hunto cu Hesus. Pues, e profecianan di Hageo y Zacarias mester ta importante pa nos tempo.
5, 6. Ki susesonan a hiba na e sirbishi di profetisa di Hageo y Zacarias?
5 Den e buki di Esdras nos ta haya informacion di susesonan cu a tuma luga prome cu Hageo y Zacarias a cuminsa profetisa. Despues cu e Hudiunan a regresa for di cautiverio na Babilonia na aña 537 prome cu nos era, gobernado Zorobabel y sumo sacerdote Hosue (of Jesua) a supervisa ponemento di e fundeshi di e tempel nobo na aña 536. (Esdras 3:8-13; 5:1) Esei na prome instante tawata motibo pa gran alegria. Sinembargo, poco despues miedo a cuminsa podera di e Hudiunan. Segun Esdras 4:4, enemigonan, esta, “e pueblo di e tera”, tawata “descurasha e pueblo di Huda, y a hinca miedo den nan pa traha.” E enemigonan aki, specialmente e Samaritanonan, a lanta acusacion falso contra e Hudiunan. E opositornan aki a combence rei di Persia pa prohibi e trabou di construccion di e tempel.—Esdras 4:10-21.
6 E entusiasmo inicial pa traha e tempel a fria. E Hudiunan a bai ocupa nan mes cu actividadnan personal. Sinembargo, na aña 520—un 16 aña despues cu nan a pone e fundeshi di e tempel—Yehova a asigna Hageo y Zacarias pa stimula e pueblo pa reanuda e trabou riba e tempel. (Hageo 1:1; Zacarias 1:1) Stimula pa e mensaheronan di Dios y despues di a haya evidencia bon cla di Yehova su sosten, e Hudiunan a reanuda e trabou riba e tempel y a caba cu e trabou na aña 515.—Esdras 6:14, 15.
7. E situacion den tempo di e profetanan Hageo y Zacarias tin ki paralelo den tempo moderno?
7 Bo sa e nificacion di tur esaki pa nos? Wel, nos tin trabou pa haci en conexion cu e predicacion di e bon nobo of ‘evangelio di e reino.’ (Mateo 24:14) Despues di Prome Guera Mundial a duna enfasis special na e trabou ei. Mescos cu e Hudiunan di antiguedad a ser libra for di cautiverio literal na Babilonia, asina Yehova su pueblo di tempo moderno a ser libra for di cautiverio na Babilonia e Grandi, e imperio mundial di religion falso. Dios su unginan a dedica nan mes na e trabou di predica, di siña hende y dirigi nan na adoracion berdadero. Awe e trabou ei ta sigui tuma luga na un escala asta mas grandi, y kisas abo ta participando den dje. Awor ta e tempo pa hacie, pasobra fin di e sistema malbado aki ta dilanti porta! E trabou aki cu Dios a asigna na nos tin cu sigui te ora cu Yehova interferi den asuntonan humano na e “gran tribulacion.” (Mateo 24:21) Esei lo elimina maldad y permiti adoracion berdadero prospera plenamente riba tera.
8. Dicon nos por ta sigur cu Dios ta sostene nos trabou?
8 Manera e profecianan di Hageo y Zacarias ta mustra, nos por conta cu Yehova su sosten y bendicion mientras cu nos ta participa di henter nos curason den e trabou aki. Apesar di e esfuersonan di algun hende pa stop e sirbidonan di Dios of pa prohibi e trabou asigna na nan, ningun gobierno no por a stop progreso di e trabou di predica. Pensa por ehempel riba e manera cu Yehova a bendiciona e obra di Reino cu aumento durante e decadanan despues di Prome Guera Mundial y te den nos tempo. Pero, ainda tin hopi di haci.
9. Nos mester presta atencion na ki situacion den antiguedad, y dicon?
9 Con loke nos ta siña for di Hageo y Zacarias por stimula nos mas ainda pa obedece e mandamento divino pa predica y siña otro hende? Wel, laga nos tuma nota di algun les cu nos lo por saca for di e dos bukinan biblico aki. Por ehempel, considera algun detaye relaciona cu e trabou di construccion di e tempel cu e Hudiunan cu a bolbe bek mester a efectua. Manera nos a menciona, e Hudiunan cu a regresa Herusalem for di Babilonia no a persevera den nan trabou riba e tempel. Despues cu nan a pone e fundeshi nan a baha man. Ki punto di bista robes a desaroya entre nan? Y kico nos por siña for di esei?
Adkiri e Punto di Bista Corecto di Cosnan Material
10. E Hudiunan a desaroya ki punto di bista robes, y cu ki resultado?
10 E Hudiunan cu a regresa tawata bisa: “E tempo no a yega.” (Hageo 1:2) Ora cu nan a cuminsa cu construccion di e tempel, poniendo e fundeshi na aña 536, nan no a bisa cu “e tempo no a yega.” Pero poco despues nan a permiti oposicion for di e nacionnan biciña y interferencia di parti di gobierno afecta nan. E Hudiunan a cuminsa pone mas enfasis riba nan propio cas y nan propio comodidad. Tumando nota di e contraste entre nan casnan priva fura cu palo di bon calidad y e tempel para na mitar, Yehova a puntra: “Ta tempo pa boso mes si biba den boso casnan fura, mientras cu e cas aki ta keda desola?”—Hageo 1:4.
11. Dicon Yehova mester a conseha e Hudiunan den tempo di Hageo?
11 Si, e Hudiunan su prioridadnan a cambia. En bes di tene Yehova su proposito di reconstrui e tempel na prome luga, e pueblo di Dios a cuminsa consentra riba nan mes y riba nan cas. Nan a neglisha e trabou cu mester a wordo haci riba Dios su cas di adoracion. Yehova su palabra cu ta para skirbi na Hageo 1:5 a anima e Hudiunan pa ‘pensa bon riba nan conducta.’ Yehova tawata kiermen cu nan mester a para keto y medita riba loke nan tawata haciendo y wak con nan a ser afecta door cu nan no a tene e construccion di e tempel na prome luga den nan bida.
12, 13. Con Hageo 1:6 ta describi e situacion di e Hudiunan, y kico e versiculo ei kiermen?
12 Manera bo por imagina, e echo cu e Hudiunan a duna prioridad na e cosnan robes a afecta nan personalmente. Tuma nota di Dios su punto di bista expresa na Hageo 1:6: “Boso a sembra hopi, ma a cosecha poco; boso ta come, ma no tin basta pa satisface boso; boso ta bebe, ma no tin basta pa boso bira burachi; boso ta bisti paña, ma ningun hende su curpa no ta keinta; y esun cu ta gana sueldo, ta gana sueldo pa hinca den un saco cu buraco.”
13 E Hudiunan tawata den e tera cu Dios a duna nan, pero toch e tera no tawata produci manera nan lo tawata kier. Yehova no tawata bendiciona nan, manera el a spierta di antemano. (Deuteronomio 28:38-48) Sin Yehova su sosten, e Hudiunan tawata sembra simiña, pero cosecha poco; no tawatin suficiente cuminda pa satisface nan. Sin Yehova su bendicion, nan no tawata logra bisti paña cu ta keinta nan curpa. Tawata parce asta como si fuera e placa di nan sueldo a bai perdi den un saco yen di buraco, di manera cu e cobradonan di salario no tawatin ningun beneficio. Kico Yehova tawata kiermen cu e expresion: “Boso ta bebe, ma no tin basta pa boso bira burachi”? Esei no por kiermen cu bira burachi lo tawata prueba di Dios su bendicion ya cu Dios ta condena buracheria. (1 Samuel 25:36; Proverbionan 23:29-35) E expresion aki mas bien ta un otro manera di referi na e echo cu e Hudiunan no tawatin Dios su bendicion. Pues, cualkier biña cu nan por a logra traha lo tawata limita; lo e no tawata suficiente pa haci un hende burachi. Beibel na papiamentu koriente ta traduci Hageo 1:6: “Boso tin di bebe si, pero no suficiente pa sacia boso sed.”
14, 15. Ki les nos ta siña for di Hageo 1:6?
14 E les cu nos mester siña for di e informacion aki tocante e casnan di e Hudiunan no tin di aber cu e manera cu nos ta traha of drecha nos cas. Hopi prome cu e exilio na Babilonia, profeta Amos a scual e hendenan rico den Israel pa nan “casnan di ivor” y pa nan ‘drumimento riba cama di ivor.’ (Amos 3:15; 6:4) Nan casnan luhoso y mueblenan decora no a dura. Conkistadonan enemigo a plunder tur e cosnan ei. Sinembargo, añanan despues, despues di un exilio di 70 aña, gran parti di e pueblo di Dios no a siña for di esaki. Nos si lo siña? Lo ta bon pa cada un di nos puntra nos mes: ‘Francamente, cuanto enfasis mi ta pone riba hacimento di mi cas bunita? Kico di haci areglo pa educacion adicional pa asina bai dilanti den mi carera? Lo mi hacie apesar cu esei lo tuma basta tempo pa varios aña, y lo pone cu mi no tin tempo pa aspectonan importante di mi adoracion na Dios?’—Lucas 12:20, 21; 1 Timoteo 6:17-19.
15 Loke nos ta lesa na Hageo 1:6 mester haci nos conciente cu nos tin mester di Dios su bendicion den nos bida. E Hudiunan ei di antiguedad no tawatin Dios su bendicion, y nan a sufri consecuencianan desastroso debi na esei. Sea cu nos tin un abundancia di cosnan material of no, si nos no tin Yehova su bendicion, esei definitivamente lo perhudica nos relacion cu ne. (Mateo 25:34-40; 2 Corintionan 9:8-12) Sinembargo, con nos por haya e bendicion ei?
Yehova Ta Yuda pa Medio di Su Spirito
16-18. Ki nificacion Zacarias 4:6 tawatin den antiguedad?
16 Hageo su compañero profeta, Zacarias, a ser inspira pa enfatisa e medio cu Yehova a uza pa motiva y bendiciona Hudiunan deboto di e tempo ei. Y esaki ta mustra con lo e bendiciona bo tambe. Nos ta lesa: “‘No pa medio di forsa, ni pa medio di poder, ma pa medio di mi spirito’, e SEÑOR di ehersitonan ta bisa.” (Zacarias 4:6) Podise bo a yega di tende hende cita e versiculo aki hopi biaha, pero ki nificacion e tawatin pa e Hudiunan den tempo di Hageo y Zacarias, y kico ta su nificacion pa abo?
17 Corda cu e palabranan inspira di Hageo y Zacarias tawatin un efecto maraviyoso e tempo aya. Loke e dos profetanan a bisa a stimula e Hudiunan fiel. Hageo a cuminsa profetisa den e di seis luna di aña 520. Zacarias a cuminsa profetisa den e di ocho luna di e mesun aña. (Zacarias 1:1) Manera bo por mira na Hageo 2:18, e Hudiunan a bolbe cuminsa traha seriamente riba e fundeshi den e di nuebe luna. E Hudiunan a ser stimula pa actua, y nan a obedece Yehova cu confiansa den su sosten. Pues, e palabranan na Zacarias 4:6 tin di aber cu Dios su sosten.
18 Ora cu e Hudiunan a regresa nan pais na aña 537, nan no tawatin un forsa militar. Sinembargo, Yehova a proteha nan y a guia nan durante e biahe for di Babilonia. Ademas, ta Yehova su spirito tawata dirigi asunto ora cu nan a cuminsa traha riba e tempel poco despues di nan yegada. Unabes nan a cuminsa traha di henter nan curason atrobe, Yehova lo a apoya nan pa medio di su spirito santo.
19. Dios su spirito a vence cua influencia potente?
19 Mediante un serie di ocho vision, Zacarias a haya e garantia cu Yehova lo ta cu su pueblo, kende lo a cumpli fielmente cu e trabou cu mester a wordo haci riba e tempel te ora nan cab’e. E di cuater vision, cu ta para skirbi na Zacarias capitulo 3, ta mustra cu Satanas tawata opone e esfuersonan di e Hudiunan pa termina construccion di e tempel. (Zacarias 3:1, NW) Satanas sigur lo no tawata contento pa mira sumo sacerdote Hosue rindi sirbishi na fabor di e pueblo den un tempel nobo. Aunke Diabel tawata activo den su intento pa stroba e Hudiunan di traha e tempel, Yehova su spirito lo a hunga un papel importante den kita e obstaculonan y duna e Hudiunan e energia necesario pa sigui padilanti te ora cu nan a caba e tempel.
20. Con spirito santo a yuda e Hudiunan cumpli cu Dios su boluntad?
20 A parce como si fuera tawatin un obstaculo insuperabel di oposicion cu tawata bin for di funcionarionan gubernamental, kendenan a logra haya un prohibicion pa para e trabou. Sinembargo, Yehova a priminti cu lo e kita e supuesto “sero” aki y hacie un “sabana.” (Zacarias 4:7) Y esei ta loke a sosode! Rei Dario I a haci un investigacion y el a descubri e memorandum di Ciro cu a autorisa e Hudiunan pa reconstrui e tempel. Pues, Dario a anula e prohibicion y a duna autorisacion pa saca placa for di e tesoro real pa duna e Hudiunan pa asina yuda nan cubri e gastonan di e trabou. Ki un cambio remarcabel di circunstancia! Acaso Dios su spirito santo a hunga un papel den esaki? Bo por tin sigur di esei. E Hudiunan a termina e tempel na aña 515, den e di seis aña di e reinado di Dario I.—Esdras 6:1, 15.
21. (a) Den tempo antiguo, con Dios a “sagudi tur e nacionnan”, y con e “cosnan deseabel” a sali afo? (b) Con esei ta cumpli den nos tempo?
21 Na Hageo 2:5, e profeta a recorda e Hudiunan di e aliansa cu Dios a establece cu nan na Sero Sinai ora cu “henter e sero tawata sagudi masha duro mes.” (Exodo 19:18) Den e dianan di Hageo y Zacarias, Yehova tawata bai causa un otro sagudimento, describi den e lenguahe figurativo di versiculo 6 y 7. E situacion den e Imperio di Persia lo a bira instabil, pero e trabou riba e tempel lo a sigui padilanti te ora e termina. Personanan no Hudiu, esta, “e rikesa [of, “cosnan deseabel”, NW] di tur nacion”, tambe cu tempo lo a bin glorifica Dios hunto cu e Hudiunan den e luga di adoracion ei. Na un escala mas grandi den nos tempo, Dios a ‘sagudi e nacionnan’ pa medio di nos predicacion cristian, y ‘e cosnan deseabel di tur nacion’ a drenta pa adora Dios hunto cu e resto ungi. En berdad e unginan y e otro carnenan hunto ta yenando awor e cas di Yehova cu gloria. E adoradonan berdadero aki ta warda cu fe riba e dia cu Yehova lo ‘sagudi e shelonan y e tera’ den un otro sentido. Esei lo ta afin di bolter y destrui e poder di e reinonan di e nacionnan.—Hageo 2:22.
22. Con e nacionnan ta ser “sagudi”, cu ki resultado, y kico ainda tin cu tuma luga?
22 E versiculonan ei ta recorda nos di e sagudimento of cambionan grandi cu a tuma luga den varios elemento cu “e shelonan y e tera, e lama y e tera seco” ta simbolisa. Por ehempel, Satanas e Diabel y su demoñonan a ser tira abou den bicindario di e tera. (Revelacion 12:7-12) Ademas, e predicacion encabesa pa Dios su unginan definitivamente a sagudi aspectonan di e sosiedad humano di e sistema di cosnan aki. (Revelacion 11:18) Apesar di esei, “un multitud grandi” di e cosnan deseabel di tur nacion a uni cu Israel spiritual den sirbi Yehova. (Revelacion 7:9, 10) E multitud grandi ta traha hunto cu cristiannan ungi den e predicacion di e bon noticia cu pronto Dios lo sagudi e nacionnan na Armagedon. E suseso ei lo habri caminda pa trece adoracion berdadero na su estado perfecto rond mundo.
Bo Ta Corda?
• Ki tempo y bou di ki circunstancia Hageo y Zacarias a sirbi?
• Con bo por aplica e mensahe cu Hageo y Zacarias a duna?
• Dicon bo ta haya cu Zacarias 4:6 ta duna un bon animacion?
[Preguntanan di Estudio]
[Plachi na pagina 20]
E bukinan di Hageo y Zacarias ta sigura nos di Dios su sosten
[Plachi na pagina 23]
“Ta tempo pa boso mes si biba den boso casnan fura, mientras cu e cas aki ta keda desola?”
[Plachi na pagina 24]
Yehova su pueblo ta participa den e trabou di alcansa ‘e hendenan deseabel di e nacionnan’