Pregunta di Lector

Si demoñonan ta molestia un persona, kico e por haci pa haya alivio?

E Palabra di Dios ta mustra cu hende cu ta sufri di atake di demoño por libra di e molester ei. Oracion ta hunga un papel masha importante pa haya e liberacion ei. (Marco 9:25-29) Pero si demoño ta molestia un persona, e tin cu dal mas paso. Susesonan relaciona cu e cristiannan di prome siglo ta ilustra kico mas kisas ta necesario pa haci.

Algun persona den antiguo Efeso tawata meti den demonismo prome cu nan a bira siguido di Cristo. Sinembargo, unabes nan a tuma e decision pa sirbi Dios, “esnan cu tawata practica magia a trece nan bukinan hunto y a kima nan dilanti di tur.” (Echonan 19:19) Door di destrui nan bukinan tocante adivinacion, e creyentenan nobo ei na Efeso a pone un ehempel pa ken cu ta desea di libra su mes di atake di demoño awe. Ta absolutamente necesario pa personanan asina deshaci di tur obheto relaciona cu spiritismo. Esaki ta inclui buki, revista, pelicula, material for di fuentenan electronico manera Internet, grabacionnan musical cu tin un caracter spiritista, y tambe amulet of otro articulonan cu hende ta bisti como “proteccion” of cu ta liga cu practicanan spiritista.—Deuteronomio 7:25, 26; 1 Corintionan 10:21.

Algun aña despues cu e cristiannan ei na Efeso a destrui nan bukinan tocante magia, apostel Pablo a skirbi: “Nos lucha . . . [ta] contra e forsanan spiritual di maldad.” (Efesionan 6:12) Pablo a urgi cristiannan: “Bisti e armadura completo di Dios, pa boso por para firme contra e trampanan di Diabel.” (Efesionan 6:11) E conseho ei ainda ta valido. Cristiannan tin cu fortifica nan spiritualidad pa por defende nan mes contra di spiritonan malbado. Pablo a enfatisa: “Riba tur cos, tumando e escudo di fe, cu cual boso lo por paga tur e flechanan sendi di e malbado.” (Efesionan 6:16) Un persona ta fortifica su fe door di studia Bijbel. (Romanonan 10:17; Colosensenan 2:6, 7) Pues anto, un estudio regular di Bijbel ta yuda nos desaroya fe cu ta sirbi como un baluarte of defensa contra e influencia di spiritonan malbado.—Salmo 91:4; 1 Huan 5:5.

E cristiannan ei na Efeso tawatin cu dal un otro paso importante. Pablo a bisa nan: “Cu tur oracion y suplica pidi tur ora bai den spirito.” (Efesionan 6:18) Si, awe ta masha importante mes pa personanan cu kier libra nan mes di atake di demoño haci oracion intenso na Yehova pa pidie su proteccion. (Proverbionan 18:10; Mateo 6:13; 1 Huan 5:18, 19) Apropiadamente Bijbel ta bisa: “Somete boso na Dios. Resisti Diabel y e lo hui for di boso.”—Santiago 4:7.

Pero no ta e persona cu ta bou di atake di demoño so tin cu pidi den oracion ferviente pa Yehova dun’e alivio. Otro cristiannan berdadero tambe por haci oracion na fabor di e persona cu profundamente ta desea di sirbi Yehova y cu sinseramente ta purba resisti e spiritonan malbado. Nan por pidi Dios pa laga cu e persona afligi pa demoño por haya e fortalesa spiritual necesario pa resisti e atakenan di demoño. Siendo cu e Palabra di Dios ta bisa cu “e oracion efectivo di un hende husto por logra hopi”, oracionnan di Dios su sirbidonan sigur lo beneficia personanan afligi cu ta haciendo nan maximo esfuerso pa “resisti Diabel.”—Santiago 5:16.

[Plachi na pagina 31]

Creyentenan na Efeso a destrui nan bukinan tocante magia