Con pa Yega na Curason di un Mucha

BO A yega di sinti bo tristo ora bo mira un mucha ta hunga guera? Esenanan asina a bira algo comun y coriente asta entre mucha hopi chikito ya cu violencia a penetra den mundo di entretenimento. Con lo bo por yuda un mucha pa e cambia co’i hunga di guera pa co’i hunga di pas? Waltraud, un señora Testigo di Yehova cu tin hopi aña como misionero na Africa, a haya un manera pa yuda un mucha homber haci esei.

Guera a pone cu Waltraud tawatin cu bandona e pais caminda e tawata biba y muda pa un otro pais na Africa. Einan el a cuminsa studia Bijbel cu mama di un mucha homber di cinco aña. Ki ora cu el a bishita e mama, e mucha homber tawata hunga cu un scopet chikito di plestik, e unico co’i hunga cu e tawatin. Nunca Waltraud a mir’e mik e scopet riba nada, pero semper e tawata bezig ta habri y sera e scopet, como si fuera ta bala e ta hinca aden.

Waltraud a bisa e mucha: “Werner, bo sa dicon mi ta biba den bo pais? Pa motibo di guera; mi tawatin cu hui for di caminda mi tawata biba pa scapa di hombernan peligroso cu tawata tira hende cu scopet cu ta parce esun cu bo tin. Bo ta kere cu e tiramento ei tawata un cos bon?”

“No, e no ta bon”, Werner a contesta tristo.

“Bo tin rason”, Waltraud a bis’e. Caba el a puntra Werner: “Bo sa dicon mi ta bishita abo cu bo mama tur siman? Ta pasobra Testigonan di Yehova kier yuda hende biba na pas, tanto na pas cu Dios como na pas cu nan prohimo.” Cu aprobacion di Werner su mama, Waltraud a bisa Werner: “Si bo duna mi bo scopet, lo mi bent’e afo, y lo mi percura pa bo haya un truck di co’i hunga cu tin cuater wiel.”

Werner a dun’e su scopet. E tawatin cu warda cuater siman, pero su co’i hunga nobo a yega, un truck di co’i hunga traha di palo! El a acept’e cu un sonrisa grandi.

Abo ta tuma tempo pa papia cu bo yiunan? Bo ta purba yega na nan curason di manera cu nan ta sinti nan motiva pa deshaci di co’i hunga cu ta parce arma di guera? Si ta asina, lo bo ta siñando nan un les cu lo beneficia nan pa resto di nan bida.