E Situacion Actual di Pobresa

HOPI biaha bo por mira Vicente * ta lastra un garoshi carga cu cos door di e cayanan di São Paulo, Brazil. E ta cana piki carton, metal bieu y plestik. Ora cuminsa bira scur, e ta pone algun carton bou di su garoshi y ta cai drumi. Ta manera cos cu e no ta tende e bochincha cu auto y bus ta haci den e caya hopi druk caminda e ta pasa anochi. Un tempo e tawatin un trabou, un cas y un famia; pero el a perde tur cos. Awor e ta pasa trabou pa gana su pida pan di cada dia riba caya.

Desafortunadamente, miyones di hende rond mundo ta biba den pobresa extremo, mescos cu Vicente. Na paisnan den desaroyo tin hopi hende cu ta haya nan mes obliga ta biba riba caya of den barionan hopi pober. Unda cu bo bira bo ta mira hende ta pidi limosna: hende lam, hende ciego, muhernan cu ta duna yiu lechi na pecho. Na lusnan di trafico, muchanan ta core meimei di e autonan para na lus, tratando di bende mangel cu e speransa di haya dosplaca.

Ta dificil pa hustifica tal pobresa. E revista Britanico The Economist a comenta: “Nunca prome e rasa humano tawata asina rico, of mihor ekipa cu e conocemento medico, tecnologico y intelectual necesario pa combati pobresa.” Hopi hende sigur a beneficia di e conocemento aki. E cayanan di stadnan grandi den varios pais den desaroyo ta gepak cu autonan nobis nobis. Centronan comercial ta gestock cu lo ultimo di tur aparato, anto hende pa cumpra nan tin na granel. Dos centro comercial na Brazil a tene un campaña di promocion special. Nan a keda habri henter e anochi di 23 pa 24 di december 2004. Un di nan a contrata baliadonan di samba pa entretene e cumpradonan. E evenemento a atrae casi 500.000 cumprado!

Sinembargo, tin masha hopi hende cu no ta beneficia di e rikesa di hende rico. E diferencia grandi entre hende rico y hende pober  a pone hopi persona yega na e conclusion cu tin un necesidad urgente pa combati pobresa. E revista Brasileño Veja a declara: “E aña aki [2005] e bataya contra pobresa lo mester ta e topico principal riba agenda mundial.” Veja a informa tambe di e proposicion cu tin pa bin cu un “Marshall Plan” nobo cu e intencion di yuda e paisnan di mas pober, specialmente esnan na Africa. * Sinembargo, maske e proposicionnan ei ta duna e impresion cu tin progreso, e mesun revista a agrega: “Tin tambe masha hopi motibo pa duda di nan resultado. Si mayoria di e paisnan no tin masha gana di contribui, ta pasobra e recursonan rara bes ta yega na e hendenan pa cua nan ta destina.” Desafortunadamente, debi na corupcion y burocracia, gran parti di e fondonan suministra door di gobiernonan, agencianan internacional y personanan individual nunca ta yega na e hendenan cu realmente tin mester di nan.

Hesus tawata sa cu pobresa lo ta un problema continuo. El a bisa: “E pobernan boso tin semper serca boso.” (Mateo 26:11) Acaso esaki ta nifica cu semper lo tin pobresa riba tera? No por haci nada pa drecha e situacion? Kico cristiannan por haci pa yuda hende pober?

[Nota]