Sirbi Cristo e Rei Lealmente

“Na dje a wordo duna dominio, gloria y un reino, pa tur pueblo, nacion y hende di tur idioma por sirbie.”—DANIEL 7:14.

1, 2. Con nos por sa cu Cristo no a ricibi poder completo di Reino na aña 33 di nos era?

CUA gobernante lo por duna su bida pa su subditonan y bolbe biba pa goberna como rei? Cua rei lo por biba riba tera, stimula e confiansa y lealtad di su subditonan na dje, pa despues goberna for di shelo? E unico persona cu lo por a haci esei y hopi cos mas ta Hesucristo. (Lucas 1:32, 33) Na Pentecoste di aña 33 di nos era, despues di Cristo su morto, resureccion y subimento na shelo, Dios a nombr’e como “cabes riba tur cos na e iglesia.” (Efesionan 1:20-22; Echonan 2:32-36) Asina Cristo a cuminsa goberna, aunke esei ainda tawata den un forma limita. Su prome subditonan tawata cristiannan ungi cu spirito, kendenan a forma e Israel spiritual, “e Israel di Dios.”—Galationan 6:16; Colosensenan 1:13.

² Casi 30 aña despues di e Pentecoste di aña 33 di nos era, apostel Pablo a confirma cu ainda Cristo no a tuma poder completo di Reino, pero e tawata “na man drechi di Dios, sperando for di e tempo ei padilanti, te ora su enemigonan wordo haci un banki pa su pianan.” (Hebreonan 10:12, 13) Anto, casi na final di e prome siglo di nos era, e biehito apostel Huan a mira adelanta den un vision con e Soberano di Universo, Yehova, ta instala Hesucristo como Rei di e Reino celestial resien estableci. (Revelacion 11:15; 12:1-5) Awe, mirando bek den historia, nos por repasa e evidencia combencente cu ta confirma cu Cristo a cuminsa goberna como Rei Mesianico den shelo na 1914. *

3. (a) Ki aspecto nobo e bon nobo di e Reino a haya desde 1914? (b) Ki preguntanan nos por haci nos mes?

³ Si, desde 1914 e bon nobo di e Reino a haya un aspecto nobo sumamente excitante. For di e tempo ei, Cristo ta gobernando activamente como Rei di e Reino celestial di Dios, aunke e ta haciendo esei “meimei di [su] enemigonan.” (Salmo 110:1, 2; Mateo 24:14; Revelacion 12:7-12) Ademas, rond mundo, su subditonan leal ta respondiendo cu entusiasmo na su autoridad door di participa den un programa mundial di educacion biblico hamas bisto den historia di humanidad. (Daniel 7:13, 14; Mateo 28:18) Cristiannan ungi cu spirito, “yiunan di e reino”, ta sirbi como “embahadornan pa Cristo.” Nan ta haya e apoyo leal di un multitud creciente di Cristo su “otro carnenan”, kendenan ta fungi como mensahero di e Reino di Dios. (Mateo 13:38; 2 Corintionan 5:20; Huan 10:16) Pero cada un di nos tin cu analisa nos mes pa mira si di berdad nos ta reconoce Cristo su autoridad. Nos ta firmemente leal na dje? Con nos por ta leal na un Rei cu ta goberna den shelo? Pero, laga nos considera prome pakico nos mester ta leal na Cristo.

Un Rei Cu Ta Inspira Lealtad

4. Como Rei nombra, kico Hesus a logra durante su ministerio riba tera?

⁴ Nos lealtad na Cristo ta funda riba aprecio pa loke el a haci y tambe pa su cualidadnan sobresaliente. (1 Pedro 1:8) Tempo cu Hesus tawata riba tera como e Rei nombra pero cu  ainda no a cuminsa goberna, el a demostra na escala chikito loke lo e haci como Rei reinante na escala mundial na e debido tempo di Dios. El a alimenta hende cu tawatin hamber. El a cura hende enfermo, ciego, incapasita, sordo y mudo. Asta el a lanta algun morto bek na bida. (Mateo 15:30, 31; Lucas 7:11-16; Huan 6:5-13) Ademas, loke nos ta siña tocante Hesus su bida riba tera ta permiti nos conoce su cualidadnan como e futuro Gobernante di tera. Y esun di mas notabel ta su amor abnega. (Marco 1:40-45) Den e contexto aki, segun ta wordo bisa Napoleon Bonaparte a yega di expresa: “Alehandro, Cesar, Karel de Grote y ami mes a funda imperionan, pero a base di kico nos a realisa nos hazañanan? A base di poder. Hesucristo so a funda su reino a base di amor, y awendia miyones di hende ta dispuesto pa muri p’e.”

5. Kico a haci e personalidad di Hesus asina atractivo?

⁵ Pa motibo cu Hesus tawata un persona manso y humilde di curason, e hendenan cu tawata carga cu e presionnan di bida a sinti nan refresca pa medio di su siñansa edificante y personalidad bondadoso. (Mateo 11:28-30) Muchanan a sinti nan comodo serca dje. Hombernan humilde cu tawatin discernimento tawata ansioso pa bira su disipel. (Mateo 4:18-22; Marco 10:13-16) Su compasion y trato respetuoso a pone hopi hende muher temeroso di Dios bira leal na dje. Hopi di nan a contribui cu nan tempo, esfuerso y pocesionnan material pa percura p’e segun cu el a cumpli cu su ministerio.—Lucas 8:1-3.

6. Ki sintimento tierno Hesus a revela ora Lazaro a muri?

⁶ Cristo a revela algun di su sintimentonan di mas tierno ora su amigo stima Lazaro a muri. E angustia di Maria y Marta a conmov’e asina tanto cu e no por a evita di saca un suspiro di tristesa, y el a “yora.” El a bira “masha emociona” y a pena profundamente, maske e tawata sa cu un poco despues lo el a lanta Lazaro bek na bida. Anto, conmovi pa amor y compasion, Hesus a uza e autoridad cu Dios a dun’e pa lanta Lazaro for di morto.—Huan 11:11-15, 33-35, 38-44.

7. Dicon Hesus merece nos lealtad? (Wak tambe e cuadro na pagina 31.)

⁷ Hesus su gran amor pa loke ta corecto y su odio contra hipocresia y maldad ta haci un impresion profundo riba nos. Dos biaha el a actua cu curashi pa core cu comerciantenan golos for di e tempel. (Mateo 21:12, 13; Huan 2:14-17) Ademas, como hende riba tera, el a pasa den tur tipo di contratiempo, loke a dun’e oportunidad pa e experencia personalmente tur e presion- y problemanan cu nos ta enfrenta. (Hebreonan 5:7-9) Hesus tawata sa tambe kico kiermen ser victima di odio y inhusticia. (Huan 5:15-18; 11:53, 54; 18:38–19:16) Finalmente, cu curashi el a enfrenta un morto cruel pa cumpli cu e boluntad di su tata y duna su subditonan bida eterno. (Huan 3:16) E cualidadnan di Cristo ei no ta impulsa bo pa sigui sirbie lealmente? (Hebreonan 13:8; Revelacion 5:6-10) Pero kico nos mester haci pa por ta un subdito di Cristo e Rei?

Con Bo Por Bira un Subdito?

8. Ki rekisitonan subditonan di Cristo tin cu cumpli cu ne?

⁸ Pensa riba e comparacion aki: Pa bo bira ciudadano di un otro pais, por lo general bo tin cu cumpli cu cierto rekisitonan basico. Kisas esnan cu kier bira ciudadano mester tin un bon reputacion y cumpli cu cierto normanan di salud. Di manera similar, subditonan di Cristo tin cu cumpli cu normanan halto di moralidad y nan mester tin un bon salud spiritual.—1 Corintionan 6:9-11; Galationan 5:19-23.

9. Con nos por mustra cu nos ta leal na Cristo?

⁹ Ademas, Hesucristo tin derecho di exigi pa su subditonan ta leal na dje y na su Reino. Nan ta mustra e lealtad ei door di biba na harmonia cu loke el a siña hende tempo cu e tawata riba tera como Rei nombra. Por ehempel, nan ta pone interesnan di Reino y e boluntad di Dios  prome cu tur interes material. (Mateo 6:31-34) Tambe nan ta haci esfuerso sinsero pa imita e personalidad di Cristo, asta bou di e circunstancianan di mas dificil. (1 Pedro 2:21-23) Hunto cu esei, e subditonan di Cristo ta sigui su ehempel door di tuma iniciativa pa haci bon na otro hende.—Mateo 7:12; Huan 13:3-17.

10. Con nos por mustra lealtad na Cristo (a) den famia y (b) den congregacion?

¹⁰ Un otro manera tambe cu Hesus su siguidonan ta mustra nan lealtad na dje ta door di refleha su cualidadnan den nan famia. Por ehempel, esposonan ta mustra lealtad na nan Rei celestial door di imita Cristo den e manera cu nan ta trata nan casa y yiunan. (Efesionan 5:25, 28-30; 6:4; 1 Pedro 3:7) Esposanan ta mustra cu nan ta leal na Cristo door di nan conducta limpi y door di desplega “un spirito suave y keto.” (1 Pedro 3:1-4; Efesionan 5:22-24) Yiunan ta leal na Cristo ora nan ta sigui su ehempel di obediencia. Como hoben, Hesus a keda sumiso na su mayornan, aunke nan tawata imperfecto. (Lucas 2:51, 52; Efesionan 6:1) Cristo su subditonan ta haci esfuerso pa imit’e lealmente door di ‘tene compasion cu otro, stima otro manera ruman’ y trata otro cu ‘misericordia.’ Nan ta trata na imita Cristo y ser “humilde den spirito, no pagando malo cu malo of insulto cu insulto.”—1 Pedro 3:8, 9; 1 Corintionan 11:1.

Subditonan Ta Obedece Su Lei

11. Na cua leinan Cristo su subditonan ta somete nan?

¹¹ Mescos cu hende cu kier bira ciudadano di un pais ta cumpli cu e leinan di nan pais nobo, e subditonan di Cristo tambe ta somete nan na “e lei di Cristo” door di biba na harmonia cu tur loke Hesus a siña y manda hende haci. (Galationan 6:2) Vooral cu “e lei real” di amor nan ta cumpli lealmente. (Santiago 2:8) Kico e leinan aki ta encera?

12, 13. Con nos ta somete nos lealmente na “e lei di Cristo”?

¹² Subditonan di Cristo tin nan imperfeccion- y fayonan. (Romanonan 3:23) Pesei, nan tin cu sigui cultiva “un amor sinsero” pa “stima otro fervientemente di curason.” (1 Pedro 1:22) “Si un di [nan] tin un keho contra un otro”, cristiannan ta aplica lealmente e lei di Cristo door di “soporta otro y pordona otro.” Obediencia na e lei aki ta yuda nan pasa imperfeccion por halto y haya motibo pa stima otro. Bo no ta gradicido di por ta den compania di hende cu ta lealmente sumiso na nos Rei amoroso y cu ta bisti nan mes cu amor, “e laso perfecto di unidad”?—Colosensenan 3:13, 14.

 ¹³ Ademas, Hesus a splica cu e amor cu el a laga como ehempel tawata mas grandi cu e amor cu hende por lo general tin pa otro. (Huan 13:34, 35) Si nos ta stima solamente esnan cu ta stima nos, nos lo no ta haciendo nada “extraordinario” [NW]. Den e caso ei nos amor lo ta incompleto y deficiente. Hesus a urgi nos pa imita e amor di su Tata door di tin un amor basa riba principio asta pa enemigonan cu ta odia nos y persigui nos. (Mateo 5:46-48) E amor aki ta impulsa subditonan di e Reino tambe pa persevera lealmente den nan trabou principal. Cua trabou?

Lealtad Poni na Prueba

14. Pakico e trabou di predica ta asina importante?

¹⁴ Awe subditonan di e Reino di Dios tin e trabou crucial di “duna testimonio tocante di e reino di Dios.” (Echonan 28:23) Ta masha importante pa nan haci esei pasobra e Reino Mesianico lo demostra cu Yehova tin derecho di ta e gobernante supremo di universo. (1 Corintionan 15:24-28) Ora nos ta predica e bon nobo, e hendenan cu ta tende ta haya oportunidad pa bira subdito di e Reino di Dios. Ademas, e manera cu hende ta reacciona riba e mensahe ei ta forma e base riba cua Cristo e Rei por husga humanidad. (Mateo 24:14; 2 Tesalonicensenan 1:6-10) Pesei, un manera principal den cua nos ta mustra nos lealtad na Cristo ta door di obedece su mandato pa informa otro hende tocante e Reino.—Mateo 28:18-20.

15. Dicon e lealtad di cristiannan ta ser poni na prueba?

¹⁵ Di mes, Satanas ta haci tur loke ta posibel pa opone e trabou di predica, y gobernantenan humano no ta reconoce e autoridad cu Dios a duna Cristo. (Salmo 2:1-3, 6-8) Pesei, Hesus a spierta su disipelnan: “Un esclabo no ta mas cu su shon. Si nan a persigui mi, boso tambe nan lo persigui.” (Huan 15:20) Pesei siguidonan di Cristo ta haya nan mes den un guera spiritual cu ta pone nan lealtad na prueba.—2 Corintionan 10:3-5; Efesionan 6:10-12.

16. Con subditonan di e Reino ta duna “Dios loke ta di Dios”?

¹⁶ No obstante, subditonan di e Reino di Dios ta keda leal na nan Rei invisibel sin falta respet pa autoridadnan humano. (Tito 3:1, 2) Hesus a declara: “Duna Cesar loke ta di Cesar, y Dios loke ta di Dios.” (Marco 12:13-17) Pesei e subditonan di Cristo ta obedece leinan di gobierno cu no ta na conflicto cu e leinan di Dios. (Romanonan 13:1-7) Sinembargo, ora e corte supremo Hudiu a bai contra e leinan di Dios door di prohibi Hesus su disipelnan di sigui predica, nan a bisa na un manera firme pero cu respet cu nan mester a “obedece Dios mas cu hende.”—Echonan 1:8; 5:27-32.

17. Dicon nos por enfrenta prueba di lealtad cu curashi?

¹⁷ Claro cu e subditonan di Cristo mester tin hopi curashi pa keda leal na nan Rei ora nan ta wordo persigui. No obstante, Hesus a bisa: “Bendiciona boso ta ora cu hende insulta boso y persigui boso, y ta gaña tur clase di maldad riba boso pa mi causa. Regociha y sea contento, pasobra boso recompensa den shelo ta grandi.” (Mateo 5:11, 12) Di experencia e prome siguidonan di Cristo a comproba cu e palabranan ei ta berdad. Asta ora nan a ser suta pa motibo cu nan a sigui predica tocante e Reino, nan a alegra pasobra “nan a wordo considera digno pa sufri berguensa pa su nomber. Y tur dia, den tempel y di cas pa cas, nan tawata sigui siña hende y predica Hesus como e Cristo.” (Echonan 5:41, 42) Nos ta elogia boso cu ta demostrando e mesun spirito di lealtad ora boso ta pasa den contratiempo, enfermedad, tristesa of oposicion.—Romanonan 5:3-5; Hebreonan 13:6.

18. Kico e palabranan cu Hesus a bisa Poncio Pilato ta indica?

 ¹⁸ Tempo cu Hesus tawata un rei nombra pero cu ainda no a asumi su cargo, el a splica e gobernado Romano Poncio Pilato: “Mi reino no ta di e mundo aki. Si mi reino tawata di e mundo aki, mi sirbidonan lo a bringa, pa mi no wordo entrega na e Hudiunan; ma ta asina cu mi reino no ta di e mundo aki.” (Huan 18:36) Pesei, subditonan di e Reino celestial no ta uza arma contra ningun hende ni no ta tuma parti den ningun conflicto humano. Como personanan leal na e “Prins di Pas”, nan ta keda completamente neutral den e conflictonan di mundo.—Isaias 2:2-4; 9:6, 7.

Recompensa Eterno pa Subditonan Leal

19. Pakico subditonan di Cristo por wak futuro cu confiansa?

¹⁹ E subditonan leal di Cristo, e “Rei di reinan”, ta wak futuro cu confiansa. Nan ta den pleno expectativa di e demostracion cu pronto lo e duna di su poder sobrenatural como rei. (Revelacion 19:11–20:3; Mateo 24:30) E resto di e “yiunan [leal] di e reino” ungi cu spirito ta anhela pa ricibi nan herencia precioso como rei cu Cristo den shelo. (Mateo 13:38; Lucas 12:32) E “otro carnenan” leal di Cristo ta spera ansiosamente riba e aprobacion di nan Rei ora e declara: “Bin, boso cu ta bendiciona di mi Tata, hereda e reino [su region aki riba tera cu lo ta un Paradijs] cu ta prepara pa boso desde e fundacion di mundo.” (Huan 10:16; Mateo 25:34) Pesei, laga tur subdito di e Reino keda determina pa sigui sirbi Cristo e Rei lealmente.

[Nota]

Bo Por Splica?

• Pakico Cristo ta merece nos lealtad?

• Con Cristo su subditonan ta mustra nan lealtad na dje?

• Pakico nos kier ta leal na Cristo e Rei?

[Preguntanan di Estudio]

[Cuadro na pagina 31]

MAS DI CRISTO SU CUALIDADNAN SOBRESALIENTE

Imparcialidad—Huan 4:7-30.

Compasion—Mateo 9:35-38; 12:18-21; Marco 6:30-34.

Amor abnega—Huan 13:1; 15:12-15.

Lealtad—Mateo 4:1-11; 28:20; Marco 11:15-18.

Empatia—Marco 7:32-35; Lucas 7:11-15; Hebreonan 4:15, 16.

Actitud rasonabel—Mateo 15:21-28.

[Plachi na pagina 29]

Door di mustra amor pa otro, nos ta somete nos lealmente na “e lei di Cristo”

[Plachi na pagina 31]

E cualidadnan di Cristo ta impulsa bo pa sirbie lealmente?