Wardadonan Cu Ta “Ehempel Pa e Tou”
Wardadonan Cu Ta “Ehempel Pa e Tou”
“Pastorea e tou di Dios meimei di boso ... boluntariamente, ... cu hopi afan; ... siendo ehempel pa e tou.”—1 PEDRO 5:2, 3.
1, 2. (a) Cu ki privilegio Hesus a encarga apostel Pedro, y pakico e confiansa di Hesus no tawata pornada? (b) Ki sintimento Yehova tin pa wardadonan nombra?
POCO tempo prome cu Pentecoste di aña 33 di nos era, Pedro cu seis otro disipel tawata come un desayuno cu Hesus a prepara na oriya di Lama di Galilea. No tawata e prome biaha cu Pedro a mira Hesus despues cu el a resusita y sin duda tawata algo emocionante pa sa cu Hesus tawata na bida. Pero kisas Pedro tawatin un tiki miedo tambe. Al fin y al cabo, apenas un par di dia prome, el a bisa publicamente cu e no tawata conoce Hesus mes. (Lucas 22:55-60; 24:34; Huan 18:25-27; 21:1-14) Hesus a reprende Pedro kende tawatin un curason arepenti pa su falta di fe? No. Al contrario, el a encarga Pedro cu e privilegio di alimenta y pastorea su “lamchinan.” (Huan 21:15-17) Manera e relato biblico di e historia di e congregacion cristian di prome siglo ta mustra, no ta pornada Hesus a pone su confiansa den Pedro. Hunto cu e otro apostelnan y ancianonan di Herusalem, Pedro en berdad a pastorea e congregacion cristian atrabes di un periodo di prueba severo y aumento rapido.—Echonan 1:15-26; 2:14; 15:6-9.
2 Awe, pa medio di Hesucristo, Yehova a nombra hombernan cualifica pa sirbi como wardadonan spiritual pa guia Su carnenan atrabes di e tempo di mas critico den historia humano. (Efesionan 4:11, 12, BPK; 2 Timoteo 3:1) Yehova tawatin motibo pa confia den e hombernan ei? E hermandad cristian pacifico cu ta existi rond mundo ta demostra cu si. Ta berdad cu e wardadonan aki ta hendenan cu sa faya, mescos cu Pedro. (Galationan 2:11-14; Santiago 3:2) Y toch, ta nan Yehova a encarga cu e cuido di e carnenan cu “el a cumpra cu e sanger di su propio Yiu.” (Echonan 20:28, NW) Yehova tin un cariño profundo pa e hombernan aki y e ta considera nan “digno di dobel honor.”—1 Timoteo 5:17.
3. Con wardadonan spiritual ta mantene un actitud boluntario, di buena gana y cu afan?
3 Con wardadonan spiritual ta mantene un actitud boluntario, di buena gana y cu afan, birando asina ehempel pa e tou? Mescos cu Pedro y e otro wardadonan di prome siglo, nan ta depende riba e spirito santo di Dios, y esei ta duna nan e forsa cu nan tin mester pa cumpli cu nan responsabilidad. (2 Corintionan 4:7) Ademas, spirito santo ta produci den nan e fruta di spirito, locual ta amor, goso, pas, pasenshi, cariño, bondad, fe, suavidad y dominio propio. (Galationan 5:22, 23) Laga nos considera den ki manera spesifico wardadonan por pone un ehempel den demostra e fruta aki den nan trabou di pastorea e tou di Dios bou di nan cuido.
Stima e Tou y Cada Carne Individual
4, 5. (a) Con Yehova y Hesus ta mustra amor pa e tou? (b) Den ki manera wardadonan spiritual ta demostra amor pa e tou?
4 E cualidad di mas importante cu e spirito di Dios ta produci ta amor. Yehova ta manifesta su amor pa henter e tou, y prueba di esei ta e abundancia di alimento spiritual cu e ta percura p’e. (Isaias 65:13, 14; Mateo 24:45-47) Pero e ta bai mas aleu cu djis alimenta e tou. E tin un interes amoroso den cada carne individual. (1 Pedro 5:6, 7) Hesus tambe ta stima e tou. El a entrega su alma na fabor di dje, y e conoce cada carne personalmente, “na nan nomber.”—Huan 10:3, 14-16.
5 Wardadonan spiritual ta imita Yehova y Hesus. Nan ta demostra amor pa henter e tou di Dios door di “ocupa [nan mes cu] siñamento” di e congregacion. Nan discursonan basa riba Bijbel ta yuda alimenta y proteha e tou, y nan trabou duro den e aspecto aki ta bisto pa tur hende. (1 Timoteo 4:13, 16) Loke ta menos bisto ta e tempo cu nan ta dedica na mantene registronan, atende corespondencia, traha programa y percura pa hopi otro detaye pa asina garantisa cu e reunionnan di congregacion y otro actividadnan ta tuma luga “corectamente y na un manera ordena.” (1 Corintionan 14:40) Gran parti di e trabou aki ta ser haci for di bista publico y probablemente ta ricibi masha poco reconocemento. E ta en berdad un trabou cu nan ta haci cu amor.—Galationan 5:13.
6, 7. (a) Con wardadonan por siña conoce e carnenan mihor? (b) Pakico tin biaha ta beneficioso pa nos papia cu un anciano tocante nos sintimentonan?
6 Wardadonan cristian amoroso ta haci esfuerso pa mustra interes personal den cada carne di e congregacion. (Filipensenan 2:4) Por ehempel, un wardado por siña conoce un carne door di traha cu ne den e trabou di predica. Hopi bes Hesus tawata hunto cu su siguidonan den e trabou di predica y a uza e ocasionnan ei pa anima nan. (Lucas 8:1) Un wardado cristian cu hopi experencia a bisa: “Pa mi, un di e mihor maneranan pa siña conoce y anima un ruman homber of un ruman muher ta door di traha cu ne den sirbishi di veld.” Si bo no a haya chens ultimamente di traha cu un di e ancianonan den sirbishi di veld, pakico bo no ta busca un oportunidad pa haci esaki pronto?
7 Amor a motiva Hesus pa ta solidario cu su siguidonan tanto den nan alegria como den nan tristesa. Por ehempel, ora 70 di su disipelnan a regresa cu goso for di nan predicacion, Hesus a ‘yena cu alegria.’ (Lucas 10:17-21, BPK) Sinembargo, ora el a mira e efecto cu morto di Lazaro tawatin riba Maria y e miembronan di su famia y amigonan, el “a yora.” (Huan 11:33-35) Mescos tambe, wardadonan amoroso djawe no ta indiferente pa cu e sintimentonan di e carnenan. Amor ta motiva nan pa “regociha cu esnan cu ta regociha” y pa “yora cu esnan cu ta yora.” (Romanonan 12:15) Ora bo tin bo momentonan di alegria of di tristesa, sinti bo liber pa papia di bo sintimentonan cu wardadonan cristian. Bo experencianan gososo lo anima nan, y ora bo conta nan di bo pruebanan, esei lo duna nan chens di fortalece bo y consola bo.—Romanonan 1:11, 12; 1 Tesalonicensenan 1:6; 3:1-3.
8, 9. (a) Con un anciano a mustra amor na su casa? (b) Pakico ta importante pa un wardado mustra amor na su famia?
8 E amor cu un wardado tin pa e tou ta particularmente bisto den e manera cu e ta trata su mes famia. (1 Timoteo 3:1, 4) Si e ta casa, e amor y e honor cu e ta mustra na su esposa ta sirbi como ehempel pa otro hombernan casa imita. (Efesionan 5:25; 1 Pedro 3:7) Pensa por ehempel riba e comentarionan di un señora cristian cu yama Linda. Su casa a sirbi como superintendente pa mas cu 20 aña prome cu su morto. Linda a bisa: “Semper mi esposo tawata druk cu asuntonan di congregacion. Pero el a laga mi sinti cu mi tawata parti di un team. Hopi bes e tawata expresa su aprecio pa mi sosten, y e tawata dedica su tempo liber na mi. Como resultado di esei, mi a sinti mi stima y mi no tawata envidia e tempo cu e tawata dedica na sirbi e congregacion.”
9 Si un wardado cristian tin yiu, e manera amoroso cu e ta disiplina nan y elogia nan regularmente ta sirbi como un modelo pa otro mayornan imita. (Efesionan 6:4) De echo, e amor cu e ta mustra na su famia ta duna evidencia continuo cu e ta merece e confiansa cu el a ricibi ora el a ser nombra como wardado pa medio di spirito santo.—1 Timoteo 3:4, 5.
Promove Goso y Pas Door di Comunica
10. (a) Kico por afecta e goso y pas di e congregacion? (b) Ki cuestion a menasa e pas di e congregacion di prome siglo, y con e cuestion ei a ser resolvi?
10 Spirito santo por produci goso y pas den curason di un cristian individual, entre un cuerpo di anciano y den henter e congregacion. Sinembargo, falta di comunicacion franco por afecta e goso y pas aki. Salomon di antiguedad a remarca: “Plannan ta fracasa pa falta di deliberacion.” (Proverbionan 15:22, BPK) Di otro banda, comunicacion respetuoso y franco ta promove goso y pas. Por ehempel, ora e cuestion di sircuncision a menasa di desbarata e pas di e congregacion di prome siglo, e cuerpo gobernante den Herusalem a busca e guia di spirito santo. Ademas, e ancianonan aki a expresa nan diferente puntonan di bista riba e asunto aki. Despues di un consideracion profundo, nan a yega na un decision. Ora nan a informa e congregacionnan di nan decision unanime, e rumannan a “regociha pa motibo di e encurashamento”, y esaki a promove goso y pas.—Echonan 15:6-23, 25, 31; 16:4, 5.
11. Con ancianonan por promove goso y pas den e congregacion?
11 Awe tambe wardadonan ta promove goso y pas den e congregacion door di comunica bon cu otro. Ora problemanan ta menasa e pas di e congregacion, nan ta reuni hunto y expresa nan opinionnan na un manera franco. Cu respet nan ta scucha comentario di otro. (Proverbionan 13:10; 18:13) Despues cu nan pidi den oracion pa spirito santo, nan ta basa nan decisionnan riba principionan di Bijbel y riba e guia publica door di “e esclabo fiel y prudente.” (Mateo 24:45-47; 1 Corintionan 4:6) Unabes e cuerpo di anciano tuma un decision sano basa riba e Scritura, cada anciano ta somete su mes na e guia di spirito santo door di sostene e decision ei asta ora e mayoria no a respalda su opinion personal. E modestia ei ta promove goso y pas y ta sirbi como un bon ehempel pa e carnenan por mira con nan mester cana cu Dios. (Mikeas 6:8) Abo ta cooperando den un forma modesto cu e decisionnan basa riba Bijbel cu e wardadonan den e congregacion ta tuma?
Mustra Pasenshi y Bondad
12. Pakico Hesus mester a trata su apostelnan cu pasenshi y bondad?
12 Aunke e apostelnan tawata faya bes tras bes, Hesus a trata nan cu pasenshi y bondad. Por ehempel, varios biaha el a purba inculca den nan cu nan mester ta humilde. (Mateo 18:1-4; 20:25-27) Y toch, riba e ultimo anochi di Hesus su bida riba tera, despues cu el a caba di duna nan un les di humildad door di a laba nan pia, “a lanta un discusion entre nan tocante cua di nan tawata wordo considera di ta esun di mas grandi.” (Lucas 22:24; Huan 13:1-5) Hesus a zundra e apostelnan? No, el a rasona bondadosamente cu nan, y el a bisa nan: “Ken ta mas grandi: esun cu ta sinta na mesa of esun cu ta sirbi? No ta esun cu ta sinta na mesa? Ma ami ta meimei di boso manera esun cu ta sirbi.” (Lucas 22:27) E pasenshi y e bondad cu Hesus a demostra—compaña pa su bon ehempel—cu tempo a conmove su apostelnan.
13, 14. Ki ora specialmente wardadonan mester ta bondadoso?
13 Di igual manera, kisas un wardado spiritual tin cu conseha un ruman varios biaha relaciona cu un cierto fayo. E ruman por asta irita e wardado. Sinembargo, si e wardado corda riba su mes fayonan ora e ta “spierta esnan cu ta hiba un bida desordena”, lo e por mustra pasenshi y bondad na su ruman. Den e forma ei e ta imita Hesus y Yehova, kendenan ta mustra e cualidadnan aki na tur cristian—incluso e wardadonan.—1 Tesalonicensenan 5:14; Santiago 2:13.
14 Tin biaha, wardadonan por haya nan ta duna conseho fuerte na un ruman cu a comete un pica serio. Si e ruman no arepenti, e wardadonan mester sac’e for di e congregacion. (1 Corintionan 5:11-13) Asta si mester yega asina leu, e manera cu nan ta trata e persona ta demostra cu nan ta odia e pica, y no e pecado. (Hudas 23) Ora un carne cu a dual haya un trato bondadoso serca e wardadonan, ta bira mas facil pa despues di tempo e bolbe na e tou.—Lucas 15:11-24.
Fe Ta Motiva Bon Obra
15. Den ki manera wardadonan ta imita e bondad di Yehova, y kico ta motiva nan pa haci esei?
15 ‘Yehova ta bon pa tur hende’, asta pa esnan cu no ta aprecia loke e ta haci pa nan. (Salmo 145:9; Mateo 5:45) Su bondad ta specialmente bisto den e echo cu e ta manda su pueblo predica “e evangelio ... di e reino.” (Mateo 24:14) Wardadonan ta refleha e bondad di Dios door di hiba delantera den e trabou di predica aki. Kico ta motiva nan pa haci esfuerso incansabel? Esei ta fe firme den Yehova y den su promesanan.—Romanonan 10:10, 13, 14.
16. Con wardadonan por “haci bon” na e carnenan?
16 Ademas di “haci bon na tur hende” pa medio di e predicacion, wardadonan tin e responsabilidad di haci loke ta bon “specialmente na esnan cu ta di e famia di fe.” (Galationan 6:10) Un manera cu nan ta haci esaki ta pa medio di bishitanan di pastoreo edificante. Un anciano a bisa: “Mi ta gusta haci bishita di pastoreo. Esaki ta duna mi oportunidad pa elogia e rumannan pa nan esfuersonan y pa yuda nan realisa cu nos ta aprecia nan trabou duro.” Tin biaha, wardadonan por sugeri un ruman con e por mehora su sirbishi na Yehova. Door di haci esei, wardadonan sabi ta imita apostel Pablo. Wak por ehempel con el a suplica e rumannan na Tesalonica: “Nos tin confiansa den Señor tocante di boso, cu boso ta haciendo y lo sigui haci loke nos ta ordena.” (2 Tesalonicensenan 3:4) Tal expresionnan di confiansa ta stimula e bon tendencianan di e carnenan y ta bira mas facil pa nan ta “obediente na esnan cu ta hiba delantera.” (Hebreonan 13:17, NW) Dia bo ricibi un bishita di pastoreo edificante, expresa bo aprecio p’e.
Suavidad Ta Rekeri Dominio Propio
17. Ki les Pedro a siña di Hesus?
17 Hesus tawatin un spirito suave, asta ora el a ser proboca. (Mateo 11:29) Dia el a ser traiciona y aresta, el a manifesta suavidad y un gran dominio propio. Di otro banda, Pedro si a actua sin pensa; el a saca un spada y tuma vengansa. Pero Hesus a record’e: “Bo ta kere cu mi no por pidi mi Tata, y mesora e lo pone mas cu diesdos legion di angel na mi disposicion?” (Mateo 26:51-53; Huan 18:10) Pedro a siña su les y despues el a skirbi cristiannan: “Cristo . . . a sufri pa boso, lagando un ehempel pa boso, pa boso sigui den su pasonan . . . Ora cu el a wordo zundra, e no a zundra bek; ora cu el a sufri, e no a menasa.”—1 Pedro 2:21-23.
18, 19. (a) Ki ora specialmente wardadonan tin cu desplega suavidad y dominio propio? (b) Ki preguntanan nos lo considera den e siguiente articulo?
18 Di igual manera, pa wardadonan por tin exito nan tambe mester tin un spirito suave asta ora nan ser trata inhustamente. Por ehempel, kisas nan ta purba yuda un miembro di e congregacion cu no ta reacciona faborablemente. Si e persona en cuestion ta debil of malo spiritualmente, lo e por “papia sin pensa, manera hinca di spada” ora e haya conseho. (Proverbionan 12:18) Sinembargo, mescos cu Hesus, wardadonan no ta reacciona cu palabra skerpi ni cu accionnan di vengansa. Mas bien, nan ta eherce dominio propio y ta sigui mustra empatia, locual por resulta di ta un bendicion pa esun cu tin mester di yudansa. (1 Pedro 3:8, 9) Abo ta siña for di e ehempel di e ancianonan y ta manifesta suavidad y dominio propio ora bo ricibi conseho?
19 Sin duda, tanto Yehova como Hesus ta aprecia e trabou duro di e miles di wardadonan cu ta cuida e tou mundial di buena gana. Nan tin un amor profundo tambe pa e miles di sirbidonan ministerial cu ta apoya e ancianonan den “sirbi e santonan.” (Hebreonan 6:10) Pakico anto algun ruman homber batisa kisas ta basila pa haci esfuerso pa alcansa e “bon trabou” aki? (1 Timoteo 3:1) Y con Yehova ta entrena esnan cu e ta nombra como wardado? Nos lo considera e preguntanan aki den e siguiente articulo.
Bo Ta Corda?
• Den ki manera wardadonan ta mustra amor pa e tou?
• Con tur miembro di e congregacion por promove goso y pas?
• Pakico wardadonan ta mustra pasenshi y bondad ora nan ta duna conseho?
• Con ancianonan ta desplega bondad y fe?
[Preguntanan di Estudio]
[Plachi na pagina 18]
Amor ta motiva ancianonan pa sirbi e congregacion
[Plachi na pagina 18]
Nan ta dedica tempo tambe na nan famia tanto den recreo ...
... como den sirbishi
[Plachi na pagina 20]
Bon comunicacion entre e ancianonan ta promove goso y pas den e congregacion