Yehova Ta Entrena Wardadonan pa Su Tou

“SEÑOR ta duna sabiduria; for di su boca ta sali conocemento y comprondemento.”—PROVERBIONAN 2:6.

1, 2. Pakico hombernan batisa ta haci esfuerso pa haya mas responsabilidad den e congregacion?

“MI TAWATA masha contento ora nan a nombra mi como anciano”, segun Nick, kende a sirbi shete aña como superintendente. “Mi a mira e privilegio aki como un oportunidad pa expande mi sirbishi na Yehova. Mi a sinti cu mi tawatin e obligacion di gradicie pa tur loke el a haci pa mi. Tambe mi kier a yuda miembronan di e congregacion mas tanto posibel, den e mesun manera cu otro ancianonan a yuda mi.” Pero ademas di goso, Nick tawatin cierto precupacionnan. E di: “Dia mi a ser nombra mi no tawatin ni 30 aña ainda. Pesei mi tawatin miedo cu lo mi no tawata posee e habilidadnan necesario—e discernimento y sabiduria—pa pastorea e congregacion na un manera eficas.”

² E rumannan cu Yehova ta nombra pa percura pa su tou tin hopi motibo pa ta felis. Apostel Pablo a recorda e ancianonan di Efesio di un di e motibonan ei ora el a cita Hesus, bisando: “Ta mas bendiciona pa duna cu pa ricibi.” (Echonan 20:35) E trabou di un sirbido ministerial of di un anciano ta duna mas oportunidad na hombernan batisa pa “duna” Yehova y e congregacion. Por ehempel, sirbidonan ministerial ta asisti e ancianonan y ta percura tambe pa hopi otro asignacion cu ta tuma tempo, pero cu ta necesario. Amor pa Dios y pa prohimo ta motiva e rumannan aki pa rindi un sirbishi balioso.—Marco 12:30, 31.

3. Pakico algun ruman homber kisas no kier haci mucho esfuerso pa alcansa privilegio den e congregacion?

³ Kico nos por bisa di un ruman homber cu kisas no kier haci mucho esfuerso pa alcansa e privilegio di ta un sirbido ministerial y cu tempo un anciano pa motibo cu e ta sinti su mes incapas? Mescos cu Nick, kisas e ta precupa cu e no tin e habilidadnan necesario pa ta un wardado eficas. Abo tambe ta un ruman homber batisa cu ta pensa asina? Bo precupacionnan no ta sin base. Yehova ta tene wardadonan nombra responsabel pa e manera cu nan ta trata e tou. Hesus a bisa: “Cada un, na kende hopi a wordo duna, hopi lo wordo exigi; y esun cu hopi a wordo confia na dje, di esei nan lo exigi mucho mas.”—Lucas 12:48.

4. Con Yehova ta yuda e rumannan cu e ta nombra pa cuida su carnenan?

⁴ Yehova ta spera di esnan cu e ta nombra como sirbido ministerial y anciano pa nan atende nan responsabilidadnan adicional sin ningun yudansa? No. Al contrario, e ta percura yudansa practico cu no solamente ta yuda nan cumpli cu esakinan sino tambe pa nan ta exitoso. Manera e articulo anterior a splica, Yehova ta duna nan su spirito santo, y e fruta di esaki ta yuda nan cuida e carnenan cu ternura. (Echonan 20:28; Galationan 5:22, 23) Ademas, Yehova ta duna nan sabiduria, conocemento y comprondemento [“discernimento”, NW]. (Proverbionan 2:6) Con e ta haci esaki? Laga nos considera tres manera cu Yehova ta entrena rumannan cu e ta nombra pa cuida su carnenan.

Entrena Door di Wardadonan cu Experencia

5. Con bin Pedro y Huan tawata wardadonan eficas?

⁵ Ora apostel Pedro y Huan tawata para dilanti  e Sanedrin (Consilio), e huesnan di e corte ei, cu den bista di mundo tawata sabi, a haya cu e hombernan dilanti nan “no tawata ... educa ni siña.” Claro cu nan por a lesa y skirbi, pero nan no a bai e scolnan rabinico pa studia e Scritura. Apesar di esei, Pedro y Huan, hunto cu e otro disipelnan tawata bon maestro ya cu hopi di e personanan cu a scucha nan a sinti nan conmovi pa bira creyente. Con e hombernan comun aki por a bira maestronan asina extraordinario? Despues cu e corte a scucha Pedro y Huan, nan a “reconoce nan, cu nan ta hende cu tawata cana cu Hesus.” (Echonan 4:1-4, 13) Ta berdad cu nan a ricibi spirito santo, pero tawata obvio tambe—asta pa e huesnan cu tawata spiritualmente ciego—cu Hesus a entrena e hombernan ei. (Echonan 1:8) Tempo cu Hesus tawata hunto cu e apostelnan riba tera, el a siña nan no solamente con pa recohe hende semehante na carne, sino tambe con pa pastorea nan unabes cu nan a bira parti di e tou.—Mateo 11:29; 20:24-28; 1 Pedro 5:4.

6. Ki ehempel den entrenamento di otro personanan Hesus y Pablo a pone?

⁶ Despues cu Hesus a ser resusita, el a sigui entrena hombernan cu el a nombra como wardado. (Revelacion 1:1; 2:1–3:22) Por ehempel, ta e mes a scohe Pablo y a supervisa su entrenamento. (Echonan 22:6-10) Pablo tawata masha gradicido pa e entrenamento cu el a ricibi y a pasa loke el a siña pa otro anciano. (Echonan 20:17-35) Por ehempel, el a inverti hopi tempo y energia den entrenamento di Timoteo pa Timoteo por tawata “un trahado” den sirbishi di Dios, “cu no [tawa]tin motibo pa tin berguensa.” (2 Timoteo 2:15) E dos hombernan aki a bira amigonan intimo. Anteriormente, Pablo a skirbi di Timoteo: “El a sirbi hunto cu mi, manera un yiu cu su tata, den e trabou di evangelio.” (Filipensenan 2:22) Pablo no a trata di haci Timoteo ni ningun otro persona un disipel di su mes. Mas bien, el a anima su rumannan den fe pa bira ‘imitado di dje, mescos cu e tambe tawata di Cristo.’—1 Corintionan 11:1.

7, 8. (a) Ki experencia ta mustra cu ora ancianonan imita Hesus y Pablo, esei ta duna bon resultado? (b) Ki ora ancianonan mester cuminsa entrena rumannan cu tin potencial pa bira sirbido ministerial y anciano?

⁷ Wardadonan cu experencia ta imita Hesus y Pablo door di tuma iniciativa pa entrena ruman hombernan batisa, anto cu mesun bon resultado. Tuma por ehempel e experencia di Chad. El a lanta den un famia dividi pa motibo di religion pero resientemente el a ser nombra como anciano. El a bisa: “Atrabes di añanan, varios anciano cu experencia a yuda mi progresa spiritualmente. Pa motibo cu mi tata no tawata Testigo, e ancianonan ei a mustra un interes particular den mi y a bira manera tatanan spiritual pa mi. Nan a tuma tempo pa entrena mi den sirbishi, y despues, un anciano en particular a entrena mi pa mi por atende cu e asignacionnan di congregacion cu mi a ricibi.”

⁸ Manera Chad su experencia ta demostra, wardadonan cu tin bon discernimento ta cuminsa entrena e rumannan cu tin potencial pa bira sirbido ministerial y anciano hopi tempo prome cu esakinan a progresa suficiente pa cualifica pa e privilegionan ei. Pakico esaki ta necesario? Pasobra Bijbel ta bisa cu tanto sirbido ministerial como anciano mester alcansa un nivel moral y spiritual halto prome cu nan ser nombra pa sirbi. Nan mester wordo “proba prome.”—1 Timoteo 3:1-10.

9. Ki responsabilidad wardadonan maduro tin, y pakico?

⁹ Pa rumannan batisa por wordo proba, ta apropiado pa nan wordo entrena prome. Por ehempel, si bo pidi un studiante di scol traha un examen dificil pa cua e maestronan no a dun’e un entrenamento spesifico, lo e por pasa e examen cu exito? Cu tur probabilidad lo e faya, no ta berdad? Pesei, entrenamento ta necesario. Sinembargo, un maestro diligente lo entrena su studiantenan no solamente pa nan por pasa un examen sino tambe pa uza e conocemento cu nan ta haya. Mescos tambe, ancianonan diligente ta yuda ruman hombernan  batisa cultiva e cualidadnan cu ta ser rekeri di un homber nombra door di duna nan entrenamento spesifico. Nan ta haci esei no djis pasobra nan kier pa e rumannan aki ser nombra, sino tambe pa yuda nan bira capas pa percura den un forma adecuado pa e tou. (2 Timoteo 2:2) Claro cu rumannan batisa mester haci nan esfuerso y traha duro pa cumpli cu e rekisitonan cu un sirbido ministerial of anciano mester cumpli cu ne. (Tito 1:5-9) No obstante, wardadonan cu tin experencia por yuda esnan cu ta haci esfuerso pa alcansa un privilegio di sirbishi progresa mas lihe door di entrena nan di buena gana.

10, 11. Con wardadonan por entrena otro rumannan pa mas privilegio?

¹⁰ Den ki maneranan spesifico wardadonan cu tin experencia por entrena otro rumannan pa atende asignacionnan den congregacion? Pa cuminsa, wardadonan mester mustra interes den e rumannan den congregacion, por ehempel, door di traha regularmente cu nan den sirbishi di veld y yuda nan bira mas capas pa maneha “e palabra di [e] berdad na un manera corecto.” (2 Timoteo 2:15) Wardadonan maduro ta papia cu e rumannan ei tocante e goso cu nan ta haya door di sirbi otronan y e satisfaccion cu nan mes ta ricibi ora nan ta pone metanan spiritual y ta alcansa nan. Ademas, bondadosamente nan ta ofrece sugerencianan spesifico tocante con un ruman homber por bira un mihor “ehempel pa e tou.”—1 Pedro 5:3, 5.

¹¹ Unabes un ruman ser nombra como sirbido ministerial, wardadonan sabi ta sigui entren’e. Bruce, kende a sirbi como anciano pa hopi decada, a bisa: “Mi ta gusta sinta cu un sirbido ministerial resien nombra y repasa hunto cu ne e instruccionnan cu e esclabo fiel y prudente a publica. Nos ta lesa tambe cualkier guia relaciona cu su asignacion spesifico, y despues mi ta traha cu ne te ora e conoce su debernan bon.” Segun cu un sirbido ministerial ta haya experencia, e por ser entrena tambe den e trabou di pastorea. Bruce a agrega: “Ora mi pidi un sirbido ministerial compaña mi na un bishita di pastoreo, mi ta yud’e scohe textonan spesifico cu lo anima y motiva e persona of famia cu nos ta bai bishita. Pa un sirbido bira un wardado eficas ta hopi importante pa e siña uza e Scritura na un manera cu ta motiva otro hende.”—Hebreonan 4:12; 5:14.

12. Con wardadonan cu tin experencia por entrena ancianonan resien nombra?

¹² Wardadonan resien nombra tambe ta beneficia hopi di mas entrenamento. Nick, menciona anteriormente, a bisa: “E entrenamento cu mi a ricibi specialmente for di dos superintendente di mas edad tawata hopi probechoso. Por lo general, e rumannan aki tawata compronde con mester a atende cierto asuntonan. Semper nan tawata scucha mi cu pasenshi y tuma mi punto di bista na consideracion—asta ora nan no tawata di acuerdo cu ne. Mi a siña hopi door di observa e manera humilde y respetuoso cu nan a anda cu e rumannan den e congregacion. E ancianonan aki a inculca den mi e importancia di uza Bijbel habilmente ora di atende problema of ora di duna animacion.”

Entrena Door di e Palabra di Dios

13. (a) Kico un ruman tin mester pa e por ta un wardado eficas? (b) Pakico Hesus a bisa: “Mi siñansa no ta di mi”?

¹³ E Palabra di Dios ta contene e leinan, principionan y ehempelnan cu wardadonan tin mester pa nan por ta “perfecto [“competente”, NW], ekipa pa tur bon obra.” (2 Timoteo 3:16, 17) Un ruman homber por tin bon scol,  pero ta su conocemento di e Scritura y e manera cu e ta aplic’e ta yud’e bira un wardado eficas. Tuma Hesus como ehempel. E tawata e wardado spiritual di mas sabi, mas versa y cu mas discernimento cu a yega di biba riba tera; toch, ni e no a depende riba su mes sabiduria ora el a instrui e carnenan di Yehova. El a bisa: “Mi siñansa no ta di mi, ma di esun cu a manda mi.” Pakico Hesus a duna merito na su Tata celestial? E di: “Esun cu ta papia di su mes ta busca su mes gloria.”—Huan 7:16, 18.

14. Con wardadonan ta evita di busca nan mes gloria?

¹⁴ Wardadonan leal ta evita di busca nan mes gloria. Nan ta basa nan conseho y animacion, no riba nan mes sabiduria, sino riba e Palabra di Dios. Nan ta compronde cu e asignacion di un wardado ta pa yuda e carnenan haya “e mente di Cristo”, no e mente di e ancianonan. (1 Corintionan 2:14-16) Por ehempel, kico lo pasa si un anciano cu ta yudando un pareha cu tin dificultad matrimonial basa su conseho riba su mes experencia en bes di riba principionan biblico y informacion publica door di “e esclabo fiel y prudente”? (Mateo 24:45) Su conseho lo ta limita na su conocemento personal, y fuera di esei lo e por ta hopi bou di influencia di custumbernan local. Ta berdad cu algun custumber riba nan mes no ta malo, y kisas e anciano tin hopi experencia den bida. Pero e carnenan ta beneficia mas tanto ora wardadonan ta anima nan pa scucha e bos di Hesus y e dichonan di Yehova en bes di sigui pensamento di hende of custumbernan local.—Salmo 12:6; Proverbionan 3:5, 6.

Entrena Door di “e Esclabo Fiel y Prudente”

15. Ki encargo Hesus a duna “e esclabo fiel y prudente”, y kico a contribui na e exito di e clase di esclabo?

¹⁵ Wardadonan manera apostel Pedro, Huan y Pablo tur tawata miembro di e grupo cu Hesus a describi como “e esclabo fiel y prudente.” E clase di esclabo aki ta consisti di Hesus su rumannan ungi riba tera, kendenan tin e speransa di goberna cu Cristo den shelo. (Revelacion 5:9, 10) Durante e ultimo dianan di e sistema di cosnan aki, manera nos por a verwacht, e cantidad di rumannan di Cristo cu a keda riba tera a baha. Sinembargo, e trabou cu Hesus a encarga nan cu ne, esta, e predicacion di e bon nobo di Reino prome cu e fin yega, ta tumando luga na un escala mas extenso cu nunca actualmente. Toch, e clase di esclabo tin bastante exito! Loke a contribui na esei sin duda ta e echo cu nan a entrena miembronan di e “otro carnenan” pa yuda nan den e trabou di predica y siña. (Huan 10:16; Mateo 24:14; 25:40) Awe, ta e grupo leal aki ta haci e mayor parti di e trabou.

16. Con e clase di esclabo ta entrena hombernan nombra?

 ¹⁶ Con e clase di esclabo ta percura e entrenamento aki? Den e prome siglo, a autorisa representantenan di e clase di esclabo pa entrena y nombra superintendentenan den e congregacionnan, y nan, na nan turno, a entrena e carnenan. (1 Corintionan 4:17) Mescos ta sosode awe. E Cuerpo Gobernante—e grupo chikito di ancianonan ungi cu ta representa e clase di esclabo—ta autorisa su representantenan pa entrena y nombra sirbido ministerial y anciano den e miles y miles di congregacionnan rond mundo. Ademas, e Cuerpo Gobernante ta organisa scolnan pa entrena miembronan di Comite di Sucursal, superintendentenan biahero, ancianonan y sirbidonan ministerial pa nan por percura mihor pa e carnenan. Tambe nan ta haya mas instruccion mediante carta, articulonan publica den E Toren di Vigilancia y otro publicacionnan, manera Organisá pa Hasi Yehova Su Boluntat. *

17. (a) Con Hesus a demostra su confiansa den e clase di esclabo? (b) Con wardadonan spiritual ta mustra cu nan tin confiansa den e clase di esclabo?

¹⁷ Hesus tawatin asina tanto confiansa den e clase di esclabo cu el a nombr’e riba “tur su propiedadnan”—esta, tur su interesnan spiritual riba tera. (Mateo 24:47) Wardadonan nombra ta demostra cu nan tambe tin confiansa den e clase di esclabo door di aplica e instruccionnan cu nan ta ricibi di su Cuerpo Gobernante. Si, ora wardadonan entrena otro rumannan, ora nan laga nan mes wordo entrena door di e Palabra di Dios, y ora nan aplica e entrenamento cu e clase di esclabo ta percura, nan ta promove union den e tou. Nos ta masha gradicido cu Yehova a entrena hombernan cu tin un interes profundo den cada miembro di e congregacion cristian!

[Nota]

Con Lo Bo Contesta?

• Con wardadonan spiritual maduro ta entrena otro rumannan?

• Pakico wardadonan no ta instrui otronan a base di nan mes pensamentonan?

• Con y pakico wardadonan ta mustra confiansa den e clase di esclabo?

[Preguntanan di Estudio]

[Plachi na pagina 24, 25]

Ancianonan cristian ta entrena hombernan mas hoben den e congregacion

[Plachi na pagina 26]

“E esclabo fiel y prudente” ta percura hopi entrenamento pa ancianonan