Bo Ta Prepara pa Sobrevivi?

“Bai den e arca, abo y tur hende di bo cas, pasobra ta abo so mi a mira cu ta husto mi dilanti den e tempo aki.”—GENESIS 7:1.

1. Ki areglo pa hende sobrevivi Yehova a haci den tempo di Noe?

YEHOVA “a trece un diluvio riba e mundo di e impionan” den tempo di Noe, pero tambe el a haci areglo pa hende sobrevivi. (2 Pedro 2:5) E Dios berdadero a duna e homber husto Noe instruccionnan detaya pa traha un arca pa preserva bida durante e diluvio mundial. (Genesis 6:14-16) Manera nos lo a spera di un fiel sirbido di Yehova, “asina Noe a haci; conforme tur loke Dios a orden’e, el a haci.” Pa un parti, ta debi na Noe su obediencia cu nos ta na bida awe.—Genesis 6:22.

2, 3. (a) Con e hendenan den tempo di Noe a reacciona riba su actividad? (b) Cu ki confiansa Noe a drenta e arca?

2 Construccion di e arca no tawata un tarea facil. Hopi hende muy probablemente a keda masha asombra cu loke Noe y su famia tawata logrando. Sinembargo, esei no tawata suficiente pa combence nan cu pa haya salbacion nan mester a drenta den e arca. Finalmente, Dios su pasenshi cu e mundo malbado ei a caba.—Genesis 6:3; 1 Pedro 3:20.

3 Despues cu Noe y su famia a traha duro pa varios decada, Yehova a bisa Noe: “Bai den e arca, abo y tur hende di bo cas, pasobra ta abo so mi a mira cu ta husto mi dilanti den e tempo aki.” Cu fe y confiansa den Yehova su palabra, “Noe, cu su yiu hombernan, su esposa y esposanan di su yiu hombernan, a bai den e arca.” Yehova a sera e porta pa asina proteha su adoradonan. Ora cu e Diluvio a bin riba tera, e arca cu Dios a percura a resulta di ta confiabel y a logra preserva bida.—Genesis 7:1, 7, 10, 16.

Paralelonan Awe Cu Ta Similar na e Tempo di Noe

4, 5. (a) Cu kico Hesus a compara e tempo di su presencia? (b) Ki similaridadnan tin entre e tempo di Noe y nos tempo?

4 “E binida di e Yiu di hende lo ta mescos cu e dianan di Noe.” (Mateo 24:37) Cu e palabranan aki Hesus a indica cu e tempo di su presencia invisibel lo ta similar na e tempo di Noe, y en berdad ta asina. Vooral desde aña 1919, un mensahe di advertencia similar na esun cu Noe a duna ta ser declara na hende di tur nacion. Por lo general, nan ta reacciona mescos cu e hendenan den tempo di Noe.

5 Pa medio di e Diluvio, Yehova a tuma accion contra un mundo “yen di violencia.” (Genesis 6:13) Tawata bisto pa tur hende cu Noe y su famia no a participa den tal violencia, sino mas bien nan a sigui pacificamente cu nan trabou di construi un arca. Den esaki tambe nos ta mira un paralelo cu nos tempo. Hende sinsero awe por ‘distingui entre e husto y e malbado, entre un cu ta sirbi Dios y un cu no ta sirbie.’ (Malakias 3:18) E honrades, bondad, pas y diligencia cu Testigonan di Yehova ta desplega ta ser admira pa observadonan imparcial, y e cualidadnan aki ta distingui Dios su pueblo for di mundo en general. E Testigonan ta rechasa tur sorto di violencia y ta laga e spirito di Yehova guia nan. Ta pesei nan ta ser bendiciona cu pas y ta pesei nan ta sigui cana den un caminda husto.—Isaias 60:17.

6, 7. (a) Kico e hendenan den tempo di Noe no a realisa, y con awe ta mescos? (b) Ki ehempelnan ta mustra cu por lo general hende ta reconoce cu Testigonan di Yehova ta otro?

 6 E hendenan den tempo di Noe no a realisa cu Noe tawatin e respaldo di Dios y cu e tawata actua a base di Dios su instruccion. Pesei nan no a tuma su predicacion na serio y no a actua a base di su mensahe di advertencia. Kico di awe? Aunke hopi hende ta keda impresiona cu e obra y comportacion di Testigonan di Yehova, mayoria di nan no ta tuma e bon nobo ni e spiertamento di Bijbel na serio. Biciñanan, doñonan di trabou of famianan kisas ta papia masha bon di e cualidadnan excelente di cristiannan berdadero pero na mes momento nan ta lamenta: “Unico cos, mare nan no tawata Testigo di Yehova!” Loke e observadonan aki no ta realisa ta cu e Testigonan ta desplega e cualidadnan ei manera amor, pas, cariño, bondad, suavidad y dominio propio pasobra Dios su spirito ta guia nan. (Galationan 5:22-25) E echo cu nan ta desplega e cualidadnan aki lo mester pone hende kere mas lihe den e mensahe cu nan ta predica.

7 Por ehempel na Rusia, Testigonan di Yehova tawata traha un Salon di Reino. Un homber cu a para papia cu un di e trahadonan a bisa: “Esaki si ta un sitio di construccion straño; no tin humamento, no tin palabra malo, anto ningun hende no ta burachi! Abo kisas ta un Testigo di Yehova?” E trahado a puntr’e: “Si mi bisa no, lo bo kere mi?” E homber a contesta mesora: “No, lo mi no kere bo.” Den un otro stad Ruso, e alcalde a keda masha impresiona ora cu el a mira e Testigonan traha nan Salon di Reino nobo. El a bisa cu aunke antes e tawata haya cu tur grupo religioso ta mescos, despues di a mira e sacrificio propio sinsero di Testigonan di Yehova den accion, e no ta pensa asina mas. Esakinan ta dos ehempel so cu ta mustra cu e sirbidonan di Yehova ta otro for di e hendenan cu no ta pega na normanan biblico.

8. Di kico ta depende cu nos lo sobrevivi e fin di e mundo malbado aki?

8 Durante e periodo final di e “mundo antiguo” cu a ser destrui door di e Diluvio, Noe tawata un fiel “predicado di husticia.” (2 Pedro 2:5) Den e ultimo dianan aki di e sistema di cosnan actual, e pueblo di Yehova ta proclama Dios su normanan husto y ta declara e bon noticia cu hende tin e posibilidad di sobrevivi y drenta e mundo nobo. (2 Pedro 3:9-13) Mescos cu Noe y su famia temeroso di Dios a ser preserva den e arca, sobrevivencia ta depende awe di un persona su fe y su fiel asociacion cu e parti terenal di Yehova su organisacion universal.

 Fe Ta Necesario pa Sobrevivi

9, 10. Dicon fe ta esencial si nos kier sobrevivi e fin di e sistema di cosnan di Satanas?

9 Kico un persona mester haci pa e por sobrevivi e destruccion inminente di e mundo aki cu ta bou di control di Satanas? (1 Huan 5:19) Na prome luga e tin cu reconoce cu e tin mester di proteccion. Caba e tin cu haci uzo di e proteccion ei. E hendenan den tempo di Noe a sigui cu nan bida diario manera nan a custumbra y nan no a haya cu tawata necesario pa busca proteccion contra e benidero calamidad. Nan tawata falta un cos mas, esta, fe den Dios.

10 Di otro banda, Noe cu su famia a reconoce cu nan tawatin mester di proteccion y liberacion. Tambe nan a eherce fe den e Soberano Universal, Yehova Dios. Apostel Pablo a skirbi: “Sin fe ta imposibel pa agrada [Yehova], pasobra esun cu bin serca Dios mester kere cu e ta, y cu e ta Esun cu ta recompensa esnan cu ta busc’e.” Pablo a agrega: “Pa medio di fe Noe, siendo spierta pa Dios tocante di cosnan cu no a wordo mira ainda, cu temor di Dios a prepara un arca pa salbacion di e hendenan di su cas, pa medio di cual el a condena mundo y a bira un heredero di e husticia cu ta segun fe.”—Hebreonan 11:6, 7.

11. Kico nos por siña for di e manera cu Yehova a percura proteccion den pasado?

11 Pa sobrevivi e fin di e actual sistema di cosnan malbado, nos tin cu haci mas cu kere cu lo e ser destrui. Nos tin cu eherce fe den e provisionnan cu Dios a haci pa nos sobrevivi, y mustra nos fe door di probecha plenamente di nan. Claro cu nos tin cu eherce fe tambe den e sacrificio di rescate di Dios su Yiu, Hesucristo. (Huan 3:16, 36) Sinembargo, ta bon pa nos corda cu ta solamente esnan cu tawata den e arca di Noe a sobrevivi e Diluvio. Di igual manera, e stadnan di refugio den antiguo Israel a duna proteccion na e matado cu a mata un persona involuntariamente, solamente si el a hui bai prome na un di e stadnan ei y despues a keda den e stad te na morto di e sumo sacerdote. (Numbernan 35:11-32) Den tempo di Moises, e di dies plaga riba Egipto a mata tur primogenito di e Egipcionan, pero esnan di e Israelitanan a scapa. Dicon? Yehova a instrui Moises: “Nan [e Israelitanan] mester cohe un poco di e sanger [di e lamchi di Pasco] y pone esaki na e dos kozijnnan na banda y na esun ariba di porta di e casnan caminda nan ta come e lamchi. . . . Y ningun di boso no mag sali for di porta di su cas te ora dia habri.” (Exodo 12:7, 22) Ta cua primogenito den e Israelitanan  lo a tribi ignora e instruccion ei cu Dios a duna y bai pafo di un cas marca cu e sanger cu a wordo gespat riba e dos kozijnnan y ariba di e porta?

12. Ki pregunta cada un di nos tin cu haci nos mes, y dicon?

12 Pesei nos tin motibo pa pensa cuidadosamente riba nos situacion personal. Nos ta realmente paden di Yehova su areglo pa haya proteccion spiritual? Ora cu e tribulacion grandi dal aden, lagrimanan di goso y di gradicimento lo core na cara di esnan cu a busca tal proteccion. Pa otro hende, lo tin solamente lagrimanan di tristesa y lamento.

Ahustenan Progresivo Ta Prepara Nos pa Sobrevivi

13. (a) Ki proposito ahustenan den e organisacion tawatin? (b) Splica algun di e ahustenan progresivo cu a tuma luga.

13 Yehova a haci ahustenan cada bes mihor den e parti terenal di su organisacion. Esakinan a sirbi pa embeyece, stabilisa y fortalece su areglo pa duna nos proteccion spiritual. Di decada di 1870 pa aña 1932, miembronan di e congregacion tawata eligi hende homber pa e puesto di anciano y diacono. Na 1932 a remplasa e sistema di eligi anciano cu e sistema di un comite di sirbishi eligi door di e congregacion pa yuda un director di sirbishi cu tawata ser apunta. Durante 1938, a haci areglo pa nombramento teocratico di tur sirbido den congregacion. Desde 1972, bou di guia di e Cuerpo Gobernante di Testigonan di Yehova, ta haci recomendacion y si esakinan wordo aproba, congregacionnan ta haya carta cu ta nombra superintendentenan y sirbidonan ministerial teocraticamente.Atrabes di añanan, e cantidad di trabou di e Cuerpo Gobernante a aumenta y a haci cambionan pa facilita nan trabou.

14. Cua programa di entrenamento a cuminsa na 1959?

14 Na 1950, un consideracion cuidadoso di Salmo 45:16 a hiba na un programa continuo di entrenamento. E texto ei ta bisa: “Bo yiunan lo ta na luga di bo tatanan; lo bo nombra nan como prins den henter e pais.” Ancianonan cu awor ta hiba delantera den e congregacion ta ser entrena pa debernan teocratico cu nan mester cumpli cu ne actualmente y despues di Armagedon. (Revelacion 16:14, 16) Na 1959 a cuminsa cu e Scol di Ministerio di Reino. E tempo ei, a haci areglo pa duna un curso di instruccion di un luna largo principalmente pa sirbidonan di congregacion, manera superintendentenan presidente tawata ser yama e tempo ei. Awor a extende e scol aki y e ta ofrece instruccion na tur superintendente y sirbido ministerial. E ruman hombernan aki na nan turno ta hiba delantera den entrena Testigonan di Yehova individual den nan respectivo congregacionnan. Pues asina tur ruman ta haya yudansa spiritual y ta ser yuda pa aumenta e efectividad di nan ministerio como proclamado di e bon nobo di Reino.—Marco 13:10.

15. Menciona dos manera cu ta proteha e puresa di e congregacion cristian.

15 Personanan cu kier bira parti di e congregacion cristian tin cu cumpli cu cierto rekisitonan. Ta logico cu no ta permiti bofonadonan di tempo actual bira parti di e congregacion, mescos cu no a permiti bofonado  drenta den e arca di Noe. (2 Pedro 3:3-7) Vooral desde 1952, Testigonan di Yehova a duna mayor sosten na un areglo cu ta yuda proteha e congregacion, esta, di expulsa pecadonan cu no arepenti. Claro cu amorosamente e rumannan ta yuda malechornan cu realmente arepenti pa nan ‘traha bereanan stret pa nan pianan.’—Hebreonan 12:12, 13; Proverbionan 28:13; Galationan 6:1.

16. Den ki condicion spiritual e pueblo di Yehova ta?

16 E prosperidad spiritual di e pueblo di Yehova no ta un sorpresa ni ta pa casualidad. Mediante profeta Isaias, Yehova a bisa: “Mira, mi sirbidonan lo come, ma boso lo pasa hamber. Mira, mi sirbidonan lo bebe, ma boso lo tin sed. Mira, mi sirbidonan lo regociha, ma boso lo wordo brongosa. Mira, mi sirbidonan lo dal grito di goso cu un curason contento, ma boso lo grita yora cu un curason pisa, y boso lo lamenta cu un spirito kibra.” (Isaias 65:13, 14) Yehova ta sigui percura un abundancia di cuminda spiritual oportuno y saludabel cu ta mantene nos spiritualmente fuerte.—Mateo 24:45.

Sea Prepara pa Sobrevivi

17. Kico lo yuda nos prepara pa sobrevivi?

17 Awor, mas cu nunca prome, ta tempo pa “nos considera con pa stimula otro pa stima y haci bon obra, y no laga di asisti na nos mes reunionnan, manera ta custumber di algun, ma curasha otro.” (Hebreonan 10:23-25) Door di keda hopi pega y activo cu un di e mas cu 98.000 congregacionnan di Testigonan di Yehova cu tin lo yuda nos prepara nos mes pa sobrevivi. Nos lo tin e sosten di rumannan den fe segun cu nos di curason ta haci esfuerso pa desplega ‘e personalidad nobo’ y pa yuda otro hende siña tocante Yehova su provision pa salbacion.—Efesionan 4:22-24; Colosensenan 3:9, 10; 1 Timoteo 4:16.

18. Dicon bo ta determina pa keda pega cu e congregacion cristian?

18 Satanas y su mundo malbado tin e deseo intenso di tenta nos y kita nos for di e congregacion cristian. Sinembargo, nos por keda un parti di e congregacion y por sobrevivi e fin di e actual sistema di cosnan malbado. Laga nos amor pa Yehova y gratitud pa su provisionnan amoroso, motiva nos pa ta mas determina cu nunca pa stroba e intentonan di Satanas. Un cos cu lo yuda fortalece nos determinacion ta di medita riba e bendicionnan cu nos tin actualmente. Den e siguiente articulo nos lo trata algun di e bendicionnan aki.

Kico Ta Bo Contesta?

• Con nos tempo ta similar cu esun di Noe?

• Cua cualidad ta esencial pa sobrevivi?

• Ki ahustenan progresivo a fortalece Yehova su areglo pa proteha nos?

• Con nos personalmente por prepara pa sobrevivi?

[Preguntanan di Estudio]

[Plachi na pagina 22]

E hendenan den tempo di Noe no a tum’e na serio

[Plachi na pagina 23]

Ta bale la pena tuma Dios su mensahenan di advertencia na serio

[Plachi na pagina 24]

Kico ta e proposito di e Scol di Ministerio di Reino?

[Plachi na pagina 25]

Awor ta tempo pa keda pega cu e congregacion cristian

[Plachi na pagina 25]