Bo Tin “Frankesa di Expresion”?

MAS cu seis miyon hende den 235 pais tin loke Bijbel ta yama “frankesa di expresion.” E expresion ei ta aparece 16 biaha den e Scritura Griego Cristian di e Traduccion di Mundo Nobo di e Santo Scritura. (Filipensenan 1:20; 1 Timoteo 3:13; Hebreonan 3:6; 1 Huan 3:21) Kico “frankesa di expresion” ta encera? Kico ta yuda nos desaroy’e? Ki ora e frankesa aki ta permiti nos expresa nos mes sin estorbo?

Segun Vine’s Expository Dictionary of Old and New Testament Words, e palabra Griego pa “frankesa di expresion” ta indica “libertad di papia, papia sin reserva, . . . papia cu curashi, sin miedo; pues, e ta transmiti e pensamento di confiansa, curashi alegre, ser intrepido, sin ningun conexion necesariamente cu abla.” Sinembargo, nos no mester bruha y kere cu tal papiamento franco y direct ta mescos cu papiamento bot of bruto. Bijbel ta declara: “Laga boso palabranan ta semper cu gracia.” (Colosensenan 4:6) Frankesa di expresion ta encera keda desplega tacto y toch no laga circunstancianan angustioso of miedo di hende stroba nos di papia.

Acaso frankesa di expresion ta algo cu di naturalesa nos tin derecho riba dje? Considera loke apostel Pablo a skirbi e cristiannan na Efeso. El a bisa: “Na ami, esun di mas menos entre tur e santonan, e gracia [of, “bondad inmereci”, NW] aki a wordo duna, pa predica na e paganonan e rikesa insondabel di Cristo.” Pablo a agrega cu tawata pa medio di Hesucristo cu “nos tin frankesa y entrada cu tur confiansa pa medio di fe den dje.” (Efesionan 3:8-12) En bes di ta un privilegio cu di naturalesa nos tin derecho riba dje, frankesa di expresion ta e resultado di nos relacion cu Yehova Dios basa riba fe den Hesucristo. Laga nos mira kico por yuda nos obtene e frankesa aki y con nos por despleg’e ora nos ta predica, siña hende y haci oracion.

Kico Ta Yuda Nos Predica cu Curashi?

Hesucristo ta e ehempel di mas grandi di un persona cu a demostra frankesa di expresion. Su entusiasmo a motiv’e pa probecha di oportunidadnan pa predica. Sea cu e tawata sosega, comiendo na cas di un hende of canando riba caminda, nunca e no a laga un oportunidad di papia tocante e Reino di Dios pas’e voorbij. Ni bofon ni oposicion direct no a intimida Hesus y pon’e keda keto. Al contrario, cu curashi el a desenmascara e lidernan religioso falso di su tempo. (Mateo 23:13-36) Asta ora  nan a aresta Hesus y hib’e dilanti di tribunal, el a papia sin miedo.—Huan 18:6, 19, 20, 37.

E apostelnan di Hesus a desaroya e mesun manera di papia franco y direct. Na Pentecoste di aña 33, Pedro a papia cu frankesa di expresion dilanti di un multitud di mas cu 3.000 hende. Remarcablemente, apenas un poco tempo prome cu esei, Pedro a krimp di miedo ora cu un sirbido muher a reconoce ken e ta. (Marco 14:66-71; Echonan 2:14, 29, 41) Pero ora cu hende a hiba Pedro cu Huan dilanti di lidernan religioso, nan no a krimp di miedo. Sin basila y cu curashi, nan a duna testimonio tocante Hesucristo resusita. De echo, ta Pedro cu Huan su manera di papia franco y direct ta loke a pone e lidernan religioso reconoce cu e hombernan aki tawata cana antes cu Hesus. (Echonan 4:5-13) Kico a capasita nan pa papia cu asina tanto curashi?

Hesus a priminti su apostelnan: “Ora nan entrega boso, no precupa con of kico boso lo papia; pasobra na e ora ei lo wordo duna na boso kico boso mester papia. Pasobra no ta boso ta papia, ma ta e spirito di boso Tata ta papia den boso.” (Mateo 10:19, 20) Ta spirito santo a yuda Pedro y otro disipelnan supera cualkier timides of miedo cu lo por a stroba nan frankesa di expresion. E influencia di e forsa poderoso ei por yuda nos tambe.

Ademas, ta Hesus a duna su siguidonan e encargo di haci disipel. Esaki tawata na su luga, ya cu e ta Esun na ken “tur autoridad a wordo duna . . . den shelo y riba tera.” Y lo ‘e ta cu nan.’ (Mateo 28:18-20) Siendo cu e disipelnan di prome tawata sa cu nan tin Hesus su sosten, esei a duna nan confiansa ora cu nan a confronta autoridadnan cu tawata dicidido na stroba nan predicacion. (Echonan 4:18-20; 5:28, 29) E echo cu nos sa cu nos tambe tin tal sosten, mester tin e mesun efecto riba nos.

Pablo a señala un otro motibo mas pa papia cu curashi. El a conecta speransa cu “papia cu hopi frankesa.” (2 Corintionan 3:12; Filipensenan 1:20) Ya cu e mensahe di speransa tawata mucho maraviyoso pa e cristiannan ten’e pa nan so, nan mester a conta otro hende tocante dje. Si, nos speransa ta un motibo pa nos demostra frankesa di expresion.—Hebreonan 3:6, NW.

Predica cu Curashi

Con nos por predica cu curashi asta ora nos ta experencia circunstancia dificil? Considera e ehempel di apostel Pablo. Mientras e tawata preso na Roma, el a pidi su compañeronan di fe pa pidi den oracion ‘pa e palabra por wordo duna na dje pa e por habri su boca, di manera cu e por papia cu tur frankesa, manera e mester papia.’ (Efesionan 6:19, 20) E oracionnan ei a ser contesta? Si! Den prizon, Pablo a sigui “predica e reino di Dios . . . cu tur frankesa y sin ningun strobacion.”—Echonan 28:30, 31.

Ora cu nos ta probecha di oportunidadnan cu ta presenta pa duna testimonio na trabou, na scol of riba caminda, nos ta demostra cuanto frankesa di expresion nos tin. Timides, miedo di e manera cu hende lo por reacciona of falta di confiansa den nos propio habilidad, lo por pone nos keda keto. Aki atrobe apostel Pablo a pone un bon ehempel. El a skirbi: “Den nos Dios nos tawatin e curashi di papia e evangelio di Dios cu boso meimei di hopi oposicion.” (1 Tesalonicensenan 2:2) Solamente pasobra Pablo a depende riba Yehova, e por a haci cosnan cu riba su mes lo e no tawata por.

Oracion ta loke a yuda un señora cu yama Sherry tuma e curashi pa papia ora cu un oportunidad pa duna testimonio informal a presenta. Un biaha cu e tawata warda riba su casa, el a ripara un señora cu tambe tawata warda. Sherry a bisa: “Cu mi garganta gekrop mi a haci oracion pidi Yehova duna mi curashi.” Net ora Sherry a yega serca e señora, un pasto bautista tambe a yega. Sherry no a spera di topa cu un pasto. Sinembargo, el a bolbe haci oracion y por a duna un testimonio. El a laga literatura cu e señora y a haci areglo pa rebishit’e. Ora nos ta probecha di oportunidadnan cu presenta pa duna un testimonio, nos  por tin sigur cu si nos confia den Yehova, esei lo yuda nos papia cu curashi.

Ora Nos Ta Siña Hende

Frankesa di expresion ta estrechamente liga cu siñamento di hende. Bijbel ta bisa relaciona cu hombernan cu ta “sirbi bon” den e congregacion: “[Nan] ta obtene pa nan mes un grado di honor y hopi confiansa [“gran frankesa di expresion”, NW] den e fe cu ta den Cristo Hesus.” (1 Timoteo 3:13) Nan ta haya e frankesa di expresion aki door di aplica na nan mes loke nan ta siña otro hende. Esei ta proteha y fortalece e congregacion.

Ora nos tin frankesa di expresion den e manera aki, nos conseho ta mas efectivo y tin mas chens cu hende lo tum’e na pecho. En bes di ser distrai door di nos mal ehempel, nos oyentenan ta ser anima ora nan mira un aplicacion practico di loke nos ta siña nan. E frankesa aki ta haci posibel cu e rumannan cu tin e cualificacionnan spiritual por ‘reahusta nan ruman’ prome cu un problema escala. (Galationan 6:1, NW) Na contraste, un persona cu no ta pone un bon ehempel lo por basila pa duna conseho, ya cu e ta sinti cu e no tin derecho di papia. Anto e tardansa ei pa duna conseho necesario lo por hiba na consecuencianan desastroso.

E echo cu nos ta papia cu curashi no kiermen cu nos ta bira critico, of ta nenga di considera e opinion di otronan of ta keda tene duro na nos mes ideanan. Pablo a conseha Filemon a base “di amor.” (Filemon 8, 9) Anto e palabranan di e apostel evidentemente a haya un reaccion faborabel. Si, amor mester ta e motivacion pa cualkier conseho cu un anciano ta duna!

Frankesa di expresion ta definitivamente importante ora mester duna conseho. Pero e ta importante tambe na otro ocasionnan. Pablo a skirbi e congregacion na Corinto: “Mi tin gran frankesa di expresion pa cu boso. Mi tin hopi cos di broma relaciona cu boso.” (2 Corintionan 7:4, NW) Pablo no a keda sin elogia su rumannan ora nan tawata merece esei. Amor a motiv’e pa enfoca riba e bon cualidadnan di su compañeronan di fe, apesar cu e tawata conciente di nan faltanan. E congregacion cristian djawe tambe ta ser edifica ora cu ancianonan ta elogia y anima nan rumannan libremente.

Tur cristian mester tin frankesa di expresion pa nan por ta efectivo den nan trabou di siña hende. Sherry, menciona anteriormente, kier a anima su yiunan pa duna testimonio na scol. Pero el a admiti: “Maske mi a lanta den e berdad, masha poco biaha mi tawata duna testimonio na scol. Y casi mi no sa duna testimonio informal. Mi a puntra mi mes, ‘Ki ehempel  mi ta poniendo pa mi yiunan?’” Esaki a motiva Sherry pa haci mas esfuerso pa duna testimonio informal.

Si, otro hende ta observa nos echonan y ta ripara si nos ta keda sin practica loke nos ta siña otro. Pues anto, laga nos desaroya frankesa di expresion door di haci esfuerso pa nos accionnan cuadra cu loke nos ta bisa.

Haci Oracion cu Frankesa

Frankesa di expresion ta specialmente importante ora ta trata di nos oracionnan na Yehova. Sin berguensa of miedo, nos por desahoga nos curason na Yehova cu e confiansa cu e ta tende nos oracionnan y lo contesta nan. Asina nos ta disfruta di un relacion caluroso y intimo cu nos Tata celestial. Nunca nos no mester basila pa acerca Yehova, pensando cu nos ta mucho insignificante. Kico si nos ta sinti nos culpabel pa motibo di un of otro falta of pica y esei ta stroba nos di expresa nos mes di curason? Acaso ainda nos por acerca e Soberano di universo libremente?

Hesus su posicion eleva como Sumo Sacerdote ta duna nos mas motibo ainda pa confiansa ora di haci oracion. Na Hebreonan 4:15 y 16 nos ta lesa: “Nos no tin un sumo sacerdote cu no por compadece di nos debilidadnan, sino un cu a wordo tenta den tur cos mescos cu nos, ma toch sin pica. Pesei, laga nos acerca e trono di gracia cu confiansa [“frankesa di expresion”, NW], pa nos ricibi misericordia y haya gracia pa yuda den tempo di necesidad.” Esei ta e balor di Hesus su morto y di su papel como Sumo Sacerdote.

Si nos sinseramente ta trata na obedece Yehova, nos tin tur motibo pa confia cu lo e tende nos faborablemente. Apostel Huan a skirbi: “Stimanan, si nos curason no ta condena nos, nos tin confiansa dilanti di Dios; y kico cu nos pidi nos ta ricibi for di dje, pasobra nos ta warda su mandamentonan y ta haci e cosnan cu ta agradabel den su bista.”—1 Huan 3:21, 22.

Haci oracion na Yehova sin estorbo ta nifica cu nos por cont’e tur cos. Sea cual sea nos temornan, cualkier precupacion, ansiedad of miedo cu nos tin, nos por conta Yehova, cu e confiansa cu nunca lo e sera su horea pa nos oracionnan sinsero. Asta ora nos a comete un pica grave, e sintimento di culpa no mester stroba nos di expresa nos mes den oracion si nos a arepenti sinseramente.

E regalo inmereci di frankesa di expresion ta algo realmente precioso. Cu ne nos por glorifica nos Dios den nos actividad di predica y siña hende y nos por hala mas y mas serca di dje. Laga nos ‘no tira nos confiansa of frankesa di expresion afo, cual tin un gran recompensa’, e recompensa di bida eterno.—Hebreonan 10:35.

[Plachi na pagina 13]

Apostel Pablo a papia cu curashi

[Plachi na pagina 15]

Pa duna siñansa cu ta efectivo nos mester tin frankesa di expresion

[Plachi na pagina 16]

Frankesa den oracion ta esencial