E Balor di “un Vaso Mas Delicado”

“BOSO, esposonan, biba cu boso esposanan cu comprension, manera cu un vaso mas delicado, como cu e ta hende muher; y dun’e honor”, segun apostel Pedro. (1 Pedro 3:7) Acaso e echo cu Bijbel ta referi na hende muher como “un vaso mas delicado” ta rebaha nan di un manera of otro? Laga nos wak kico e escritor inspira kier a bisa originalmente.

E sustantivo Griego traduci como “honor” ta nifica “prijs, balor, . . . respet.” Pues, un esposo cristian mester trata su esposa cu ternura, mustrando e debido consideracion na dje manera na un vaso delicado y precioso. Esaki di ningun manera ta rebaha e esposa. Por ehempel, tuma e famoso lampi di Tiffany cu dibuho di lotus. En berdad nos por considera e lampi masha bunita y fini aki como delicado. Acaso e caracter fragil di e lampi ta baha su balor? Al contrario! Na un findishi na 1997, nan a bende e lampi original di Tiffany cu dibuho di lotus pa 2,8 miyon dollar! Su composicion delicado a sirbi pa realsa su balor, no bah’e.

Asina tambe, ora duna honor na un hende muher manera na un vaso mas delicado, esei no ta baha su balor. Pa un esposo biba cu su casa “cu comprension” ta nifica cu e esposo ta tene cuenta cu e esposa su puntonan fuerte y su limitacionnan, loke e gusta y loke e no gusta, su punto di bista y su sintimentonan. Un esposo amoroso ta reconoce y respeta e diferencianan di personalidad cu tin entre e cu su esposa. E esposo ta mustra e debido consideracion na e esposa “pa [su] oracionnan no wordo stroba.” (1 Pedro 3:7) Un esposo cu no ta respeta e birtudnan femenino di su esposa ta pone su propio relacion cu Dios na peliger. Pues, ta bisto cu e Palabra di Dios no ta rebaha hende muher. Mas bien e ta duna nan dignidad y ta honra nan.

[Reconocemento pa Potret na pagina 32]

© Christie’s Images Limited 1997