“Nos Mester Obedece Dios Mas cu Hende”

‘E Bataya Ta di Yehova’

DOS ehersito enemigo a enfrenta otro, cada un para na un banda di e vaye. Durante 40 dia e hombernan di Israel a krimp di miedo y a ser bombardia cu e insultonan di Goliat, e guerero poderoso di e Filisteonan.—1 Samuel 17:1-4, 16.

Na bos halto Goliat a reta e Israelitanan cu e palabranan aki: “Scohe un homber pa boso mes y lag’e baha bin serca mi. Si e por bringa cu mi y mata mi, e ora ei nos lo bira boso sirbido; ma si mi prevalece contra dje y mat’e, e ora ei boso lo bira nos sirbido y sirbi nos. . . . Awe mi ta reta e trupanan di Israel; duna mi un homber, pa nos bringa cu otro”!—1 Samuel 17:8-10.

Den tempo antiguo, tawata normal pa guereronan poderoso representa nan ehersito den un combate mano a mano. Victoria a bai pa e ehersito di e guerero ganado. Pero den e caso aki e retado di Israel no tawata un solda comun y coriente. E tawata un gigante masha halto, un enemigo feros y intimidante. Sinembargo, door di haci bofon di e ehersito di e pueblo di Yehova, Goliat a seya su condena.

Esaki no tawata un simpel competencia militar. E confrontacion tawata entre Yehova y e diosnan di e Filisteonan. Rei Saul di Israel, en bes di mustra curashi y dirigi su ehersito contra e enemigonan di Dios, a paralisa di miedo.—1 Samuel 17:11.

Un Hoben Ta Confia den Yehova

Durante e confrontacion aki, un hoben cu ya a ser ungi pa bira rei di Israel a bishita su rumannan cu tawata den e ehersito di Saul. Su nomber tawata David. Ora el a tende e palabranan di Goliat, el a puntra: “Ta ken e Filisteo insircuncida aki ta, cu e ta reta e ehersitonan di e Dios bibo?” (1 Samuel 17:26) Den bista di David, Goliat a representa tanto e Filisteonan como nan diosnan. David, hopi indigna, y cu su rason, a desea di defende Yehova y Israel y bringa contra e gigante pagano. Pero rei Saul a bis’e: “Bo no ta capas pa bai contra e Filisteo aki pa bringa cu ne; abo ta un hoben ainda.”—1 Samuel 17:33.

Wak con distinto e actitud di Saul cu di David tawata for di otro! Saul a mira un hoben wardado di carne cu kier a bringa contra un gigante curason duro. Sinembargo, David a mira un homber cu a reta e Señor Soberano Yehova. David su curashi tawata basa riba su conviccion cu Dios lo no laga hende haci bofon di Su nomber y di Su pueblo sin castiga nan. Mientras cu Goliat tawata broma cu su forsa, David a pone su confiansa den Yehova, evaluando e situacion for di Dios su punto di bista.

‘Ami Ta Bin Riba Bo den e Nomber di Yehova’

David su fe tawata bon funda. El a corda cu Dios a yud’e libra su carnenan for di un beer y un leon. E hoben wardado tawatin sigur cu Yehova lo a yud’e awor pa bringa contra e inmenso adversario Filisteo aki. (1 Samuel 17:34-37) Arma cu un simpel slinger y cinco piedra lizo, David a sali bai enfrenta Goliat.

E hoben David a acepta e reto aparentemente imposibel aki door di confia den e  fortalesa cu Yehova ta suministra. Cu curashi el a bisa e Filisteo: “Bo ta bin riba mi cu spada, cu lansa y cu jabalina, ma ami ta bin riba bo den e nomber di [Yehova] di ehersitonan, e Dios di e ehersitonan di Israel, kende bo a reta. Awe SEÑOR lo entrega bo den mi man . . . Pa henter mundo sa cu tin un Dios na Israel, y pa henter e asamblea aki por sa cu SEÑOR no ta libra cu spada ni cu lansa; pasobra e bataya ta di SEÑOR.”—1 Samuel 17:45-47.

Kico tawata e resultado? E relato inspira ta bisa: “David a prevalece riba e Filisteo cu un slinger y un piedra, y el a dal e Filisteo mata; ma David no tawatin spada den su man.” (1 Samuel 17:50) David no tawatin spada den su man, pero e tawatin e sosten poderoso di Yehova Dios. *

A keda comproba cu David su fe den Yehova den e competencia ei tawata na su luga! Ora nos tin cu scohe entre tene miedo di hende of confia den Yehova su poder di salba, e loke nos tin cu scohe ta bisto: “Nos mester obedece Dios mas cu hende.” (Echonan 5:29) Ademas, ora nos ta mira situacionnan dificil manera Yehova Dios ta mira nan, nos por tin un bista balansa asta di problemanan cu ta intimida nos.

[Nota]

[Cuadro/​Plachi na pagina 9]

CON GRANDI GOLIAT TAWATA?

E relato na 1 Samuel 17:4-7 ta bisa nos cu Goliat su haltura tawata mas cu seis codo, esta, rond di tres meter. Un indicacion di e tamaño y forsa di e Filisteo tawata su corasa di scama di brons. Esei a pisa 57 kilo! E cabo di su lansa tawata manera un biga, y e punta di hero a pisa 7 kilo. Figura bo, e armadura di Goliat muy probablemente tawata mas pisa cu David mes!