Goso Cu Ta Bin Door di Cana den Integridad

“Ta e bendicion di SEÑOR ta haci rico, y e no ta agrega tristesa na dje.”—PROVERBIONAN 10:22.

1, 2. Dicon nos mester evita di pensa demasiado riba futuro?

“SINTA pensa mucho riba futuro . . . ta stroba nos di mira e presente manera e ta”, segun un filosofo Mericano. Esaki ta berdad den caso di muchanan cu ta pensa asina tanto riba loke nan lo por haci ora nan bira grandi, cu ta te ora nan no ta mucha mas nan ta realisa e beneficionan cu infancia tawatin.

2 Asta nos como adoradonan di Yehova tin biaha ta sigui e manera di pensa aki. Considera e siguiente situacion. Nos ta anhela pa Dios cumpli cu su promesa di trece un paradijs riba tera. Ansiosamente nos ta spera un bida sin malesa, biehes, dolor y sufrimento. Aunke ta bon pa nos ta den expectativa di e cosnan ei, kico lo pasa si nos ta cuminsa pensa asina tanto riba e bendicionnan fisico di futuro cu nos no ta mira e bendicionnan spiritual cu nos tin actualmente? Esta lamentabel esei lo ta! Facilmente nos lo por bira tur desanima y nos ‘curason por sinti malo debi cu nos speransa a ser posponi’ mas di loke nos a imagina. (Proverbionan 13:12) Problema- y dificultadnan den bida lo por pone nos cai den e gara di desanimacion of laga nos sinti duele di nos mes. En bes di purba supera situacionnan desfaborabel, nos lo por desaroya un actitud di keha. Tur esaki nos por evita door di medita cu aprecio riba nos bendicionnan actual.

3. Riba kico nos lo enfoca den e articulo aki?

3 Proverbionan 10:22 ta declara: ‘Ta e bendicion di Yehova ta haci rico, y e no ta agrega tristesa na dje.’ E prosperidad spiritual di e sirbidonan actual di Yehova no ta un bendicion cu mester haci nos contento? Laga nos considera algun aspecto di nos prosperidad spiritual y wak kico nan ta nifica pa nos personalmente. Tumando  tempo pa reflexiona riba e bendicionnan cu Yehova a drama na abundancia riba e “hende husto cu ta cana den su integridad” di berdad lo fortalece nos determinacion pa sigui sirbi nos Tata celestial cu goso.—Proverbionan 20:7.

‘Bendicionnan Cu Ta Haci Nos Rico’ for di Awor

4, 5. Cua siñansa di Bijbel abo personalmente ta aprecia, y dicon?

4 Nos tin un conocemento exacto di siñansanan biblico. E religionnan di cristiandad por lo general ta bisa cu nan ta kere den Bijbel. Sinembargo, nan no ta di acuerdo cu otro tocante kico e ta siña. Asta miembronan di e mesun grupo religioso hopi biaha tin puntonan di bista distinto for di otro relaciona cu kico realmente e Scritura ta siña. Ki distinto nan situacion ta for di sirbidonan di Yehova! Sin importa di cua nacion, cultura of grupo etnico nos ta, nos ta adora e Dios berdadero cu nos conoce pa nomber. E no ta un dios misterioso cu ta consisti di tres den un. (Deuteronomio 6:4; Salmo 83:18, NW; Marco 12:29) Tambe nos sa cu e cuestion di mas importante cu tin relaciona cu Dios su soberania universal pronto lo ser resolvi y cu door di mantene nos integridad na Dios, cada un di nos personalmente ta envolvi den e cuestion ei. Nos conoce e berdad tocante e mortonan y nos no ta yen di miedo di un Dios cu hopi persona ta kere ta tormenta hende den fierno di candela of ta manda nan purgatorio.—Eclesiastes 9:5, 10.

5 Ademas, ta ki un goso pa sa cu nos no ta un producto accidental di evolucion descontrola! Al contrario, nos ta creacion di Dios, traha den su propio imagen. (Genesis 1:26; Malakias 2:10) E salmista a canta na Dios: “Mi ta alaba bo, pasobra mi ta traha na un manera temerosamente maraviyoso; maraviyoso ta bo obranan, y mi alma sa esei masha bon.”—Salmo 139:14.

6, 7. Ki cambionan den bo bida of den bida di hende cu bo conoce a resulta di ta un bendicion?

6 Nos ta evita custumbernan y practicanan perhudicial. Den medionan di comunicacion tin cantidad di spiertamento pa e peligernan di humamento, bebemento di mas y actividad sexual cu diferente partner. Mayoria hende no ta haci caso di e spiertamentonan aki. Pero kico ta pasa ora un persona sinsero siña cu e Dios berdadero ta condena e cosnan ei y cu esnan cu ta practica nan ta haci Dios tristo? Wel, e persona ei ta sintie conmovi pa stop cu e practicanan aki! (Isaias 63:10; 1 Corintionan 6:9, 10; 2 Corintionan 7:1; Efesionan 4:30) Aunke e persona ta haci esaki principalmente pa agrada Yehova Dios, e mes tambe ta haya beneficionan adicional: mihor salud y pas mental.

7 Pa hopi hende ta masha dificil pa stop cu custumbernan cu ta malo. Pero toch tur aña miles di nan ta logra hacie. Nan ta dedica nan mes na Yehova y ta wordo batisa den awa, demostrando asina publicamente cu nan a elimina e practicanan cu ta desagrada Dios for di nan bida. Ki un animacion esei ta pa nos tur! Nan ta yuda reforsa nos determinacion pa no bira catibo di conducta pecaminoso y perhudicial.

8. Ki conseho basa riba Bijbel ta contribui na felicidad den famia?

8 Nos por tin un bida di famia felis. Den hopi pais bida di famia ta debilitando. Hopi matrimonio ta termina den divorcio, lagando hopi biaha atras yiunan cu daño emocional severo. Den algun pais Europeo, casi 20 porshento di tur cas ta consisti di famianan di un solo  mayor. Con Yehova a yuda nos cana den e caminda di integridad relaciona cu bida di famia? Por fabor lesa Efesionan 5:22–6:4, y tuma nota di e conseho excelente cu e Palabra di Dios ta duna esposo, esposa y yiu. Door di aplica loke tin para skirbi einan y den otro partinan di e Scritura sigur ta fortalece e laso matrimonial, ta yuda mayornan lanta nan yiunan den e manera corecto, y ta contribui na un bida di famia felis. Esei no ta un bendicion cu ta haci nos contento?

9, 10. Con nos perspectiva pa futuro ta diferente for di esun di mundo?

9 Nos tin e siguransa cu e problemanan di mundo pronto lo ser resolvi. Apesar di conocemento cientifico y tecnologico y di e esfuersonan sinsero di cierto lidernan, problemanan serio di bida actual te ainda no tin solucion. Klaus Schwab, fundado di e Foro pa Economia Mundial, a menciona resientemente cu “e lista di retonan cu mundo ta confronta ta bira mas y mas largo y e tempo pa trata nan ta bira mas cortico.” El a papia di “peligernan cu ta afecta tur nacion, manera terorismo, destruccion di medioambiente y instabilidad financiero.” Schwab a conclui: “Awor, mas cu nunca, mundo ta confronta realidadnan cu ta rekeri accion colectivo y decisivo.” Segun cu siglo 21 ta avansa, hende en general ta sigui mira futuro di humanidad scur.

10 Ta ki un satisfaccion pa sa cu Yehova a institui un areglo cu tin e capasidad pa resolve tur e problemanan di humanidad, esta, e Reino Mesianico di Dios! Pa medio di e Reino ei, e Dios berdadero lo “haci gueranan stop” y trece un “abundancia di pas.” (Salmo 46:9; 72:7) E Rei ungi, Hesucristo, ‘lo libra esun den necesidad, esun afligi y e pober for di opresion y violencia.’ (Salmo 72:12-14) Bou di e gobernacion di Reino lo no tin scarsedad di cuminda. (Salmo 72:16) Yehova “lo seca tur lagrima kita for di [nos] wowo; y lo no tin morto mas; lo no tin lamento mas, ni yoramento, ni dolor; e prome cosnan a pasa.” (Revelacion 21:4) E Reino a keda estableci caba den shelo y pronto lo tuma e accion necesario pa resolve tur problema riba tera.—Daniel 2:44; Revelacion 11:15.

11, 12. (a) Coremento tras di placer ta produci felicidad duradero? Splica. (b) Kico ta produci berdadero felicidad?

11 Nos sa kico ta produci berdadero felicidad. Kico realmente ta produci felicidad? Un psicologo a bisa cu felicidad tin tres ingrediente: placer, envolvimento (den actividadnan manera trabou y famia) y proposito (trahando den direccion di un proposito of meta mas importante cu bo mes). Di e tres cosnan aki, el a menciona placer como esun di menos importancia y a remarca: “Esaki ta digno di ser menciona den noticia pasobra masha hopi hende ta enfoca nan bida riba placer.” Kico ta Bijbel su punto di bista di esaki?

12 Rei Salomon di antiguo Israel a declara: “Mi a bisa mi mes: ‘Bin awor, lo mi pone bo na prueba cu placer. Pesei, gosa bo mes.’ Y mira, esaki tambe tawata banidad. Di harimento mi a bisa: ‘Ta locura’, y di placer: ‘Di kico e ta sirbi?’” (Eclesiastes 2:1, 2) Biblicamente, cualkier felicidad cu ta bin di placer ta a lo mehor temporal. Kico di envolvimento den trabou? Nos tin e trabou di mas significativo pa participa aden, esta, e trabou di predica e Reino y haci disipel. (Mateo 24:14; 28:19, 20) Door di comparti  cu otro hende e mensahe di salbacion describi den Bijbel, nos ta participa den un trabou cu por resulta den nos propio salbacion y den salbacion di esnan cu scucha nos. (1 Timoteo 4:16) Como “Dios su colaboradonan”, nos ta experencia cu di berdad “ta mas bendiciona pa duna cu pa ricibi.” (1 Corintionan 3:9; Echonan 20:35) E trabou aki ta duna nos bida un proposito y ta duna e Creador un contesta pa Satanas e Diabel, esun cu ta reproch’e. (Proverbionan 27:11) Pues, Yehova a mustra nos cu debocion na Dios ta produci felicidad berdadero y duradero.—1 Timoteo 4:8, NW.

13. (a) Den ki manera e Scol di Ministerio Teocratico ta un bendicion cu ta haci nos contento? (b) Con abo a beneficia di e Scol di Ministerio Teocratico?

13 Nos tin un programa di entrenamento importante y efectivo. Gerhard ta sirbi como anciano den un congregacion di Testigonan di Yehova. Cordando riba su hubentud, el a conta: “Como hoben mi tawatin masha problema pa papia. Ora mi tawata bou di presion, apenas mi por a papia cla y mi tawata cuminsa gaga. Mi tawata sinti mi inferior y a haya compleho. Mi mayornan a haci areglo pa mi sigui un les pa corigi mi moda di papia, pero esei no a yuda. Mi problema tawata algo psicologico no fisico. Sinembargo, tawatin un provision maraviyoso for di Yehova—e Scol di Ministerio Teocratico. Mi participacion den e scol aki a duna mi curashi. Mi a haci mi best pa practica loke mi tawata siña. Y esei a duna resultado! Mi a cuminsa papia mas vlot, mi no tawatin compleho mas y mi a haya mas curashi den sirbishi. Awor mi ta duna asta discurso publico. Mi ta realmente gradicido na Yehova. El a duna mi un bida nobo pa medio di e scol aki.” E manera cu Yehova ta entrena nos pa haci su trabou no ta un motibo pa alegra?

14, 15. Na ora di angustia, ki yudansa tin cu ta facil pa haya? Menciona un ehempel.

14 Nos ta haya un relacion personal cu Yehova y sosten for di e hermandad internacional y uni. Katrin ta biba na Alemania, y el a keda sumamente angustia ora el a tende e informenan di un temblor severo y di e tsunami cu esei a causa na suitost Asia. Su yiu muher tawata di bishita na Tailandia ora cu e catastrofe a tuma luga. Pa 32 ora largo e mama aki no tawata sa si su yiu muher tawata na bida of si e tawata entre e victimanan cu ora pa ora tawata bira mas tanto. Ki un alivio Katrin a sinti ora cu finalmente el a haya un yamada di telefon cu a sigur’e cu su yiu muher tawata sano y salvo!

15 Kico a yuda Katrin pasa door di e oranan di angustia ei? El a skirbi: “Mi a pasa casi henter e tempo ei den oracion na Yehova. Mi a ripara bes tras bes cuanto fortalesa y pas mental esaki a duna mi. Ademas, rumannan spiritual amoroso a bishita mi y a sostene mi.” (Filipensenan 4:6, 7) Cuanto mas piyo su situacion lo tawata si lo e mester a pasa e oranan di angustia ei sin e beneficio di oracion na Yehova y sin e consuelo di un amoroso hermandad spiritual! Nos relacion intimo cu Yehova y cu su Yiu hunto cu nos asociacion intimo cu e hermandad cristian ta  un bendicion unico, mucho precioso pa nos mir’e como algo comun y coriente.

16. Conta un experencia cu ta ilustra e balor di e speransa di resureccion.

16 Nos tin e speransa di bolbe mira nos sernan keri cu a muri. (Huan 5:28, 29) Un homber hoben cu yama Matthias a lanta como un Testigo di Yehova. Sinembargo, e no a aprecia su bendicionnan y el a drif bai for di e congregacion cristian ora e tawata teenager. Awor e ta skirbi: “Nunca mi no tawatin combersacionnan realmente profundo cu mi tata. Atrabes di añanan, nos tawatin hopi pleito cu otro. Pero toch mi tata semper tawata kier lo mihor pa mi. E tawata stima mi masha hopi, locual mi no a realisa e tempo ei. Na 1996, ora mi tawata sinta na su cama, cu su man teni y yorando amargamente, mi a bis’e cuanto ta duel mi tur loke mi a haci y cu mi ta stim’e masha hopi. Pero e no por a tende mi. Despues di tawata malo pa un periodo cortico, el a fayece. Si mi ta na bida pa mira mi tata den e resureccion, lo mi drecha loke mi a faya cu ne den pasado. Anto sigur lo e keda hopi contento di sa cu awor mi ta sirbi como anciano y cu ami cu mi casa tin e privilegio di sirbi como pionero.” Ki un bendicion e speransa di resureccion ta pa nos!

“E No Ta Agrega Tristesa na Dje”

17. Ki beneficio nos ta saca ora nos ta medita riba e bendicionnan di Yehova?

17 Hesucristo a bisa relaciona cu su Tata celestial: “E ta haci su solo sali riba mal hende y riba bon hende, y ta laga awa yobe riba hende husto y riba hende inhusto.” (Mateo 5:45) Si Yehova Dios ta drama bendicion asta riba hende inhusto y malbado, cuanto mas lo e haci esei riba e hendenan cu ta cana den e caminda di integridad! Salmo 84:11 ta declara cu Yehova “no ta keda sin duna loke ta bon na esnan cu ta cana den rectitud.” Ora nos medita riba e cuido y interes special cu Yehova a mustra na esnan cu ta stim’e, nos curason ta yena cu gratitud y goso!

18. (a) Den ki manera ta asina cu Yehova no ta agrega dolor na su bendicion? (b) Dicon hopi sirbido fiel di Dios ta sufri?

18 ‘E bendicion di Yehova’ ta loke a duna prosperidad spiritual na su pueblo. Y Bijbel ta sigura nos cu “e no ta agrega tristesa na dje.” (Proverbionan 10:22) Pero dicon anto hopi sirbido fiel di Dios ta pasa door di test- y pruebanan cu ta causa nan hopi dolor y sufrimento? Dificultad y angustia ta sosode cu nos pa tres motibo principal. (1) Nos propio inclinacion pecaminoso. (Genesis 6:5; 8:21; Santiago 1:14, 15) (2) Satanas cu su demoñonan. (Efesionan 6:11, 12) (3) E mundo malbado. (Huan 15:19) Aunke Yehova ta permiti cos malo pasa cu nos, no ta e ta causa nan. De echo, “tur bon regalo y tur don perfecto ta for di ariba, y ta baha bin for di e Tata di lusnan.” (Santiago 1:17) E bendicionnan di Yehova no ta causa dolor.

19. Kico ta spera esnan cu sigui cana den integridad?

19 Ora nos ta experencia prosperidad spiritual esei ta encera semper cu nos ta hala mas serca Dios. Ora nos desaroya un relacion intimo cu ne, nos ta ‘montona pa nos mes e tesoro di un bon fundeshi pa futuro, pa nos por gara loke ta bida berdadero’, esta, bida eterno. (1 Timoteo 6:12, 17-19) Den e futuro mundo nobo di Dios, nos lo haya tanto rikesanan spiritual como bendicionnan fisico. E bida berdadero lo ta e tipo di bida cu tur cu sigui “obedece” Yehova lo tin. (Deuteronomio 28:2) Despues di a fortalece nos determinacion, laga nos sigui cana gososamente den integridad.

Kico Bo A Siña?

• Dicon no ta sabi pa pensa demasiado riba futuro?

• Ki bendicionnan nos ta disfruta di dje awor?

• Dicon fiel sirbidonan di Dios ta sufri?

[Preguntanan di Estudio]