Kico Ta Dios Su Proposito pa e Tera?

DICON bo ta gusta cana keiro den un parke of cana pasa banda di flornan cu ta hole dushi? Dicon bo ta sinti bo anima y contento ora bo mira un playa bunita cu su santo blanco of seronan halto cu nan topnan te den nubia? Dicon bo ta para pa scucha parhanan den palo canta nan melodia alegre? Y dicon ta asina dushi pa mira cacho chikito hunga cu otro of mira un tou di carne come yerba den sabana?

Tin un solo contesta riba tur e preguntanan aki. Nos a ser crea pa biba den Paradijs! Ei ta caminda nos prome mayornan, Adam cu Eva, a cuminsa nan bida. Nos a haya nos deseo pa biba den Paradijs for di nan, y nan a hay’e for di nan Creador, Yehova Dios. E tawata sa cu nos como hende lo ta felis den Paradijs pasobra el a crea nos cu e cualidadnan necesario pa disfruta di nos cas terenal cu ta asina maraviyoso.

Dicon Yehova a crea e tera? “El a form’e pa e wordo habita” door di hende. (Isaias 45:18) Esun cu “a traha tera” a duna Adam cu Eva un bunita paradijs como nan hogar, e hofi di Eden. (Yeremias 10:12; Genesis 2:7-9, 15, 21, 22) Nan lo mester a disfruta sin fin di e riunan, flornan y palonan den e hofi! Tawatin parhanan masha bunita den shelo, y tur tipo di bestia tawata move riba tera; anto ningun di nan no tawata forma un peliger pa hende. Pisca y otro criaturanan tawata landa den e awanan limpi y cristalino di e tera. Mas importante ainda, Adam cu Eva tawata hunto. Nan por a procrea yiu. Anto den e gososo compania di nan creciente famia nan por a extende nan hogar, esta e paradijs.

Aunke e tera no ta un paradijs awe, nos por compar’e cu un cas excelente di un famia felis. E tera cu Dios a duna nos como nos cas tin tur loke nos mester: lus, calor, awa y cuminda. Nos ta masha contento cu solo su lus y calor y cu luna su briyo suave den  anochi! (Genesis 1:14-18) Den e bodega di e tera tin combustibelnan cu nos por uza, manera carbon y petrolio. Nos tin awa debi na e ciclo di awa y e tera su sistema di riu, lago y lama. Anto yerba berde ta e tera su tapijt.

Mescos cu nos por warda cuminda den un cas, asina tin cuminda na abundancia riba tera. Mediante cosechanan den cunucu y frutanan den hofi, Yehova ta duna nos ‘tempo di bon cosecha y ta satisface nos curason cu alegria.’ (Echonan 14:16, 17) Siendo cu e tera ta un cas asina excelente caba, imagina bo con lo e ta ora cu “e Dios felis”, Yehova, hacie un paradijs!—1 Timoteo 1:11, NW.

 [Reconocemento pa Potret na pagina 2]

COVER: Earth: NASA photo; Stars: NASA, ESA and AURA/​Caltech