Pronto Dios Su Proposito pa e Tera Lo Cumpli

ORA Adam cu Eva tawata den Paradijs ainda, nan a haya e mandato aki di Dios: “Sea fructifero y multiplica, y yena e tera y haci esaki somete na bo; y goberna riba e piscanan di lama y riba e parhanan di shelo, y riba tur ser bibo cu ta move riba tera.”—Genesis 1:28.

Haci e tera somete na nan a nifica mas cu djis cultiva of cuida un parti chikito di e tera. Adam cu Eva y nan desendientenan tawatin cu extende e Paradijs te ora cu el a abarca henter e planeta. Sinembargo, e prome pareha humano a peca y Dios a saca nan for di e hofi di Eden. (Genesis 3:23, 24) Pero esei no a nifica cu nunca mas hende lo a somete e tera.

Como cu Dios lo bai bendiciona humanidad obediente, nan lo por somete e tera. Ora e pueblo di Israel di antiguedad tawatin Dios su bendicion, nan cunucunan tawata produci bon cosecha y nan hofinan tawata pari masha bon fruta. Lo bai tin condicionnan similar segun cu nos planeta gradualmente ta bira un paradijs. Manera Dios su Palabra inspira, Bijbel, ta priminti, “tera [lo] duna su fruta; Dios, nos Dios, ta bendiciona nos.” (Salmo 67:6) De echo, e tera su sabana- y seronan, su palo- y flornan, su riu- y lamanan lo alegra. (Salmo 96:11-13; 98:7-9) Nos planeta lo bona cu matanan berde, lo ta yen di parhanan colorido, bestianan maraviyoso y hende cariñoso.

 Pronto un Mundo Nobo!

Awe nos ta na drempel di un mundo nobo cu Yehova Dios a priminti. Apostel Pedro a skirbi: “Segun su promesa nos ta sperando shelonan nobo y un tera nobo, den cual ta biba husticia.” (2 Pedro 3:13) Tin hende despues di lesa e palabranan ei di Pedro ta conclui cu kisas e planeta aki nunca lo no bira un paradijs. Kisas nan ta pensa cu e shelo y tera material lo ser remplasa. Acaso ta asina?

Kico ta e “shelonan nobo”? Esei no ta e shelo material crea door di Dios. (Salmo 19:1, 2) Pedro a caba di referi den e versiculonan prome na “shelonan” simbolico, esta, gobiernonan humano cu ta den un posicion mas halto cu nan subditonan. (2 Pedro 3:10-12) E “shelonan” aki no tawatin exito den goberna humanidad y nan lo pasa bai. (Yeremias 10:23; Daniel 2:44) E “shelonan nobo” cu lo remplasa nan ta e Reino di Dios forma pa Rei Hesucristo y su 144.000 coherederonan resusita pa bida celestial.—Romanonan 8:16, 17; Revelacion 5:9, 10; 14:1, 3.

E “tera nobo” cu Pedro a menciona no ta un planeta nobo. Yehova a traha e tera perfecto pa hende biba riba dje pa eternidad. (Salmo 104:5) Tin biaha Bijbel ta uza e palabra “tera” pa referi na hende. (Genesis 11:1) E “tera” cu pronto lo ser destrui ta consisti di hende cu ta haci nan mes parti di e mundo malbado aki. Den mesun manera un mundo di hende impio of malbado a sufri destruccion den e Diluvio di tempo di Noe. (2 Pedro 3:5-7) Kico anto e “tera nobo” ta? E ta un sosiedad nobo di hende, esta, Dios su adoradonan berdadero, cu ta “recto den nan curason.” (Salmo 125:4; 1 Huan 2:17) Tur lei pa e “tera nobo” lo bin for di e “shelonan nobo.” Hombernan fiel riba tera lo haci sigur cu hende ta cumpli cu e instruccionnan aki.

Cosnan Nobo y Maraviyoso!

Yehova definitivamente a duna nos un cas maraviyoso ora cu el a prepara e tera pa hende biba riba dje. E mes a bisa cu tur su trabou riba tera tawata “masha bon.” (Genesis 1:31) Satanas e Diabel a pone Adam cu Eva rebela. (Genesis 3:1-5; Revelacion 12:9) Sinembargo, pronto Dios lo percura pa e rectonan haya “loke ta bida berdadero.” Esei ta “bida eterno” den condicionnan perfecto den Paradijs. (1 Timoteo 6:12, 19) Laga nos considera awor algun di e bendicionnan cu hende lo disfruta di dje e tempo ei.

Durante Cristo su Reinado di Mil Aña, Satanas lo ser frena y lo e no por trece calamidad riba humanidad. Apostel Huan a bisa: “Mi a mira un angel [e arcangel Miguel, esta, Hesucristo] ta baha for di shelo cu e yabi di e abismo y un cadena grandi den su man. Y el a gara e dragon, e colebra di antiguedad, kende ta Diabel y Satanas, y a mar’e pa mil aña, y a tir’e den e abismo, y a sera y seya esaki over di dje, pa e no gaña e nacionnan mas, te ora cu e mil añanan a keda cumpli.” (Revelacion 20:1-3; 12:12) Fuera di ta liber di e influencia di Satanas mientras cu e ta den abismo, humanidad lo disfruta di hopi otro bendicionnan mas bou di gobernacion di e Reino.

Maldad, violencia y guera lo ta cosnan di pasado. Bijbel ta priminti: “Aki poco tempo e malbado lo no t’ei mas; maske cuanto bo busca su luga, e lo no t’ei. Ma e humildenan lo hereda e tera, y lo deleita nan mes den pas abundante. E hustonan lo hereda e tera,  y lo biba den dje pa semper.” (Salmo 37:10, 11, 29) Yehova Dios lo “haci gueranan stop te na e fin di tera.” (Salmo 46:9) Esakinan ta garantia maraviyoso cu lo tin pas y siguridad!

Lo tin un abundancia di cuminda saludabel y sabroso riba nos mesa. E salmista a canta: “Lo tin abundancia di maishi den e tera, riba cabes di e seronan.” (Salmo 72:16) E tempo ei ningun hende lo no tin cu soporta e dolor teribel di hamber.

Ningun hende lo no sufri di malesa y enfermedad. De echo, “ningun habitante lo no bisa: ‘Mi ta malo.’” (Isaias 33:24; 35:5, 6) Ora cu Hesucristo tawata riba tera, el a cura leproso y tambe hende paralisa y esnan ciego. (Mateo 9:35; Marco 1:40-42; Huan 5:5-9) Imagina bo kico lo e haci den e mundo nobo! Pensa riba e felicidad cu lo tin ora cu hende ciego, sordo, paralisa y mudo haya curacion.

Segun cu humanidad obediente ta alcansa perfeccion humano, e dañonan causa pa biehes ta ser elimina. Bril di bista, garoti, kruk, rolstul, hospital y remedi lo pasa pa historia. Imagina bo e cambionan cu lo tin segun cu nos ta recupera nos vigor di hubentud! (Job 33:25) Tur mainta nos lo lanta refresca for di un bon sosiego djanochi, cla pa cuminsa un dia nobo di actividad gososo.

E resureccion di sernan keri y di otro personanan lo trece goso na nos curason. (Huan 5:28, 29; Echonan 24:15) Ki emocionante lo ta pa bisa bonbini na Abel, Noe, Abraham, Sara, Job, Moises, Rut, David, Elias, Ester, y hopi hende mas! Miyones di otro hende tambe lo ser resusita. Mayoria di nan nunca a siña tocante Yehova, pero nan lo haya un bonbini serca personanan ansioso pa siña nan tocante Dios, su proposito y su Yiu, Hesucristo. Segun cu esnan resusita ta siña conoce nan Creador, e tera di berdad lo ta yena cu e conocemento di Yehova.

Mas importante cu tur, nos lo por adora e unico Dios berdadero pa semper. Nos lo tin e privilegio di ‘sirbi Yehova cu goso’, y nos lo traha hunto den harmonia segun cu nos ta construi casnan bunita, cultiva e tera y, finalmente, somete henter e tera. (Salmo 100:1-3; Isaias 65:21-24) Ki un delicia lo ta pa biba pa semper den un paradijs bunita, productivo y pacifico cu ta trece honor na Yehova su nomber santo!—Salmo 145:21; Huan 17:3.

Un Ultimo Test pa Humanidad

Durante Hesus su Reinado di Mil Aña, lo e aplica e beneficionan di su sacrificio di rescate na tur hende obediente. Di e manera ei tur pica cu tempo lo ser elimina y humanidad lo ta eleva na perfeccion humano. (1 Huan 2:2; Revelacion 21:1-4) Unabes e efectonan di Adam su pica ta completamente elimina, hende perfecto lo cumpli cu e normanan di Dios den sentido fisico, mental, moral y spiritual. Pues nan lo “biba” den e pleno sentido di palabra ora nan alcansa perfeccion sin pica. (Revelacion 20:5) Esaki y e tera transforma den Paradijs lo trece hopi gloria pa Yehova!

 Despues cu Cristo su Reinado di Mil Aña termina, Satanas e Diabel y su demoñonan, of angelnan malbado, lo ser libra pa un tempo cortico for di e abismo caminda a tira nan un dies siglo prome. (Revelacion 20:1-3) Nan lo haya chens di haci un ultimo intento pa desvia hende for di Dios. Aunke algun hende lo entrega na mal deseo, e rebelion aki lo fracasa. Yehova lo ehecuta e personanan egoista y rebelde ei hunto cu Satanas y tur su demoñonan. Nunca mas maldad lo bolbe lanta cabes. Tur malechor lo ser destrui pa semper, y e hustonan lo ricibi bida eterno.—Revelacion 20:7-10.

Abo Lo T’ei?

Un eternidad di felicidad tin dilanti di hende cu ta stima Yehova Dios. Bida eterno den Paradijs lo no ta ni un tiki laf. De echo, bida lo bira mas interesante segun cu tempo ta pasa, pasobra no tin limite na e conocemento di Yehova Dios. (Romanonan 11:33) Semper lo bo tin algo nobo di siña, y lo bo tin tempo de sobra pa adkiri conocemento. Con bin? Pasobra lo bo no biba pa apenas 70 of 80 aña, sino pa eternidad.—Salmo 22:26; 90:10; Eclesiastes 3:11.

Si bo ta stima Dios, semper lo bo ta masha felis haciendo su boluntad. Apostel Huan a skirbi: “Esaki ta e amor di Dios, cu nos ta warda su mandamentonan; y su mandamentonan no ta pisa.” (1 Huan 5:3) Pues, no laga nada stroba bo di agrada Yehova Dios door di haci loke ta husto. Tene na mente e maraviyoso speransa cu e Palabra di Dios, Bijbel, ta pone bo dilanti. Sea determina pa haci e boluntad di Yehova, y nunca desvia for di e caminda aki. E ora ei lo bo t’ei ora cu Dios su proposito pa e tera ser cumpli y nos planeta—nos cas—bira un paradijs eterno.

[Plachi na pagina 4]

Cu Dios su bendicion, e cunucunan di Israel a produci na abundancia

[Plachi na pagina 7]

Cua ta e bendicionnan cu bo ta spera di disfruta di dje den Paradijs?