E Palabra di Yehova Ta Bibo

Puntonan Sobresaliente di Buki Un di Salmonan

KICO lo ta un titulo apropiado pa un buki biblico cu ta consisti principalmente di alabansa na nos Creador, Yehova Dios? E nomber di mas apropiado lo ta Salmonan, es decir, Alabansanan. E buki di mas largo den Bijbel ta contene canticanan bunita componi cu ta conta tocante Dios su cualidadnan maraviyoso y obranan poderoso y ta relata cantidad di profecia. Hopi di e canticanan ta expresa e emocionnan cu nan escritornan a sinti ora nan tawata confronta adversidad. E expresionnan aki ta abarca un periodo di alrededor di mil aña, for di tempo di profeta Moises te na e tempo despues di exilio. E escritornan tawata Moises, rei David y otronan. E sacerdote Esdras ta esun cu aparentemente a compila e buki den su forma final.

For di tempo antiguo, hende a parti e buki di Salmonan den cinco seccion of coleccion di cantica: (1) Salmonan 1-41; (2) Salmonan 42-72; (3) Salmonan 73-89; (4) Salmonan 90-106, y (5) Salmonan 107-150. E articulo aki ta considera e prome coleccion. Tur e salmonan den e seccion aki—menos tres—ta ser atribui na rei David di antiguo Israel. Bijbel no ta identifica e compositornan di Salmo 1, 10 y 33.

“MI DIOS, MI BARANCA”

(Salmo 1:1–24:10)

Despues cu e prome salmo a declara bendiciona of felis e hende cu su delicia ta den e lei di Yehova, e di dos salmo ta papia spesificamente tocante e Reino. * E grupo di salmonan aki ta consisti principalmente di suplicanan na Dios. Por ehempel, Salmo 3-5, 7, 12, 13, y 17, ta peticionnan pa ser libra for di enemigo. Salmo 8 ta enfatisa Yehova su grandesa na comparacion cu hende su condicion insignificante.

Describiendo Yehova como e Protector di su pueblo, David a canta: “Mi Dios, mi baranca, den kende mi ta tuma refugio.” (Salmo 18:2) Den Salmo 19 David ta alaba Yehova como e Creador y Dunador di Lei; den Salmo 20 e ta alab’e como e Salbador y den Salmo 21 como e Salbador di su Rei ungi. Salmo 23 ta pinta Yehova como e Gran Wardador, mientras cu Salmo 24 ta describie como e Rei glorioso.

Contesta Riba Pregunta Biblico:

2:1, 2—Kico ta e “cos vano” cu e nacionnan ta plania? E “cos vano” ta e gobiernonan humano su precupacion constante pa sigui conserva nan propio autoridad. Esaki ta algo vano pasobra nan proposito lo fracasa sigur. Acaso e pueblonan di e nacionnan realmente por spera cu nan lo tin exito ora cu nan tuma nan posicion ‘contra Yehova y contra su ungi’?

2:7—Kico ta “e decreto” di Yehova? E decreto aki ta e aliansa of pacto pa un Reino cu Yehova a sera cu su Yiu stima, Hesucristo.—Lucas 22:28, 29, NW.

2:12—Den ki manera e gobernantenan di e nacionnan por “sunchi e yiu”? Den tempo biblico, un sunchi tawata un expresion di amistad y fieldad. E tawata un manera  pa duna huespetnan bonbini. E reinan di tera ta haya ordo pa sunchi e Yiu, es decir, dun’e bonbini como e Rei Mesianico.

3:titulo di introduccion—Kico ta e proposito di e encabesamento cu ta ser duna na algun di e salmonan? E encabesamento tin biaha ta identifica e escritor y/of ta duna informacion tocante e circunstancianan bou di cua a compone e salmo, manera ta e caso cu Salmo 3. E titulo di introduccion (skirbi cu letter schuin den Beibel Santu) tin biaha ta splica tambe e proposito of uzo di e cantica en particular ei (Salmo 4 y 5) y tambe ta duna instruccionnan musical (Salmo 6).

3:2—Kico ta “Sela”? En general, comentaristanan ta kere cu e expresion aki ta representa un pausa pa medita den silencio, sea ora di canta so of durante cantamento y tocamento di musica instrumental. Nan tawata uza e pausa pa enfatisa e pensamento of emocion di un salmo. No tin nodi lesa e palabra ei durante lesamento publico di e Salmonan.

11:3—Ta cua fundeshinan ta ser destrui? Esakinan ta e fundeshinan riba cua sosiedad humano ta basa: lei, orden y husticia. Ora esakinan ta desorganisa y confuso, ta reina desorden social y no tin husticia. Den circunstancianan asina, “e husto” tin cu pone su pleno confiansa den Dios.—Salmo 11:4-7.

21:3—Kico ta remarcabel tocante “un corona di oro fini”? Bijbel no ta bisa si e corona tawata literal of a simbolisa e gloria adicional di David debi na su tantisimo victorianan. Sinembargo, e versiculo aki ta señala profeticamente na e corona di rei cu Hesus a haya serca Yehova na aña 1914. E echo cu e corona ta traha di oro ta duna e idea cu su reino ta di e mihor calidad cu tin.

22:1, 2—Dicon David kisas a sinti cu Yehova a bandon’e? David tawata bou di asina un presion intenso di su enemigonan cu su ‘curason a bira manera wax y a dirti den su paden.’ (Salmo 22:14) Podise a parce David cu Yehova a bandon’e. Ora Hesus tawata claba na staca, e tambe a sinti asina. (Mateo 27:46) E palabranan di David ta refleha su reaccion humano riba su situacion desespera. Sinembargo, for di su oracion cu tin para skirbi na Salmo 22:16-21 ta bisto cu David no a perde fe den Dios.

Les pa Nos:

1:1. Nos mester evita di asocia cu hende cu no ta stima Yehova.—1 Corintionan 15:33.

1:2. Nos no tin cu laga ni un dia pasa sin considera asuntonan spiritual.—Mateo 4:4.

4:4. Ora nos ta rabia, ta sabi pa nos domina nos lenga pa nos no bisa algo cu lo duel nos despues.—Efesionan 4:26.

4:5. Nos sacrificionan spiritual ta “sacrificionan di husticia” solamente si nos tin e motivacion corecto y nos conducta ta conforme e rekisitonan di Yehova.

6:5. Por tin un motibo mas mihor cu esaki pakico nos kier sigui biba?—Salmo 115:17.

9:12, NW. Yehova ta busca dramamento di sanger afin di castiga esnan culpabel di sanger, pero e ta corda riba “e sclamacion di esnan afligi.”

 15:2, 3; 24:3-5. Adoradonan berdadero mester papia berdad y evita huramento falso y calumnia.

15:4. Nos mester haci tur loke nos por pa cumpli cu nos palabra, asta si ta masha dificil pa haci esei. Unico excepcion ta ora nos realisa cu nos a haci un promesa cu ta contrario na siñansanan biblico.

15:5. Como adorado di Yehova, nos tin cu tene cuidou pa nos no haci maluzo di placa.

17:14, 15. E “hombernan di mundo” ta dedica nan mes na obtene un bon nivel di bida, lanta un famia y laga atras un herencia. David su precupacion principal den bida tawata pa traha un bon nomber serca Dios di manera cu e por a ‘mira Dios su cara’, es decir, experencia Yehova su fabor. Ora cu David a “spierta”, den e sentido di bira plenamente conciente di Yehova su promesa- y garantianan, David lo a sinti ‘satisfecho di mira Dios su cara’, esta, lo el a alegra cu Yehova ta cu ne. Mescos cu David, nos tambe no mester fiha nos curason riba tesoronan spiritual?

19:1-6. Si e creacion, cu no por papia ni rasona, ta duna gloria na Yehova, nos cu por pensa, papia y adora no mester hacie mucho mas?—Revelacion 4:11.

19:7-11. Esta bon Yehova su rekisitonan ta pa nos!

19:12, 13. Erornan y actonan di arogancia ta picanan cu nos tin cu evita.

19:14. Nos mester paga tino no solamente na loke nos ta haci sino tambe na loke nos ta bisa y pensa.

“BO TA SOSTENE MI DEN MI INTEGRIDAD”

(Salmo 25:1–41:13)

Den e prome dos salmonan di e grupo aki, David ta expresa e deseo sinsero y determinacion firme pa mantene su integridad. El a canta: “Ma pa loke t’ami, lo mi cana den mi integridad.” (Salmo 26:11) Den su oracion pa pordon di pica, el a admiti: “Mientras cu mi a keda keto, mi curpa a para caba na nada door di mi kehamento henter dia.” (Salmo 32:3) Na Yehova su sirbidonan fiel David a duna e garantia aki: “E wowonan di SEÑOR ta riba e hustonan, y su horeanan ta atento pa scucha nan sclamacion.”—Salmo 34:15.

Ki balioso e conseho duna den Salmo 37 tawata pa e Israelitanan, y pa nos cu ta bibando den “e ultimo dianan” di e sistema di cosnan aki! (2 Timoteo 3:1-5) Papiando profeticamente di Hesucristo, Salmo 40:7 y 8 ta declara: “Ata, mi ta bin; den e rol di e buki ta para skirbi tocante di mi; pa haci bo boluntad, o mi Dios, ta un delicia pa mi; bo Lei ta den mi curason.” E ultimo salmo di e seccion ta trata David su peticion pa Yehova su yudansa durante e añanan turbulento cu a sigui despues di su pica cu Betsabe. El a canta: “Ma pa loke t’ami, bo ta sostene mi den mi integridad.”—Salmo 41:12.

Contesta Riba Pregunta Biblico:

26:6—Con nos, mescos cu David, figurativamente ta atende Yehova su altar? E altar ta representa Yehova su boluntad den e sentido cu e ta acepta e sacrificio di rescate di Hesucristo pa redencion di humanidad. (Hebreonan 8:5; 10:5-10) Nos ta atende Yehova su altar door di eherce fe den e sacrificio ei.

29:3-9—Kico e salmo kier describi door di compara e bos di Yehova cu un tormenta cu ta inspira respet profundo segun cu e ta pasa? Simplemente esaki: Yehova su poder asombroso!

31:23—Con Yehova ta paga abundantemente un persona cu ta actua cu orguyo? E pago aki ta castigo. Un persona husto ta haya su recompensa of pago pa su erornan cu no ta intencional den forma di disiplina for di Yehova. Pero como cu un persona orguyoso no ta bira bek for di su mal caminda, su pago  abundante cu e ta haya ta castigo severo.—Proverbionan 11:31; 1 Pedro 4:18.

33:6—Kico ta e “rosea” di Yehova su boca? E rosea aki ta Dios su forsa activo, of spirito santo, cu el a uza pa crea e shelo material. (Genesis 1:1, 2) Bijbel ta yam’e e rosea di su boca pasobra, mescos cu un rosea poderoso, Yehova por mand’e haci cosnan cu ta keda na un distancia.

35:19, BPK—Kico David tawata kiermen cu su peticion pa no laga esnan cu ta odi’e kinipi wowo cu otro? E echo cu nan a kinipi wowo cu otro lo a indica cu e enemigonan di David tawata gosa cu nan plannan malicioso contra dje tawatin exito. David a pidi pa esaki no sosode.

Les pa Nos:

26:4. Lo ta sabi di nos parti pa evita di asocia cu hende cu ta sconde nan identidad. Sea cu ta hendenan den chat room riba Internet, esnan na scol y na trabou cu ta pretende di ta nos amigonan pa motibonan tramposo, apostatanan kendenan ta pone un mascarada di sinseridad y hende cu ta hiba un bida dobel.

26:7, 12; 35:18; 40:9. Nos tin cu alaba Yehova publicamente na reunionnan cristian.

26:8; 27:4. Nos gusta asisti na reunionnan cristian?

26:11. Mientras cu David a expresa su determinacion pa mantene su integridad, el a haci peticion tambe pa ser salba. Si, nos por mantene nos integridad apesar di nos imperfeccion.

29:10. E echo cu Yehova ta sinta riba “e diluvio” ta indica cu e tin pleno control di su poder.

30:5. Yehova su cualidad principal ta amor, no rabia.

32:9. Yehova no kier pa nos ta manera burico cu ta obedece pasobra ta uza un bosal of zwiep. Al contrario, su deseo ta pa nos scohe pa obedec’e pasobra nos ta compronde su boluntad.

33:17-19. Ningun sistema traha pa hende, sin importa con poderoso, por trece salbacion. Nos confiansa mester ta den Yehova y su areglo di Reino.

34:10. Ki un gran estimulo esaki ta pa personanan cu ta pone interesnan di Reino na prome luga den nan bida!

39:1, 2. Ora cu hende malbado ta busca informacion pa perhudica nos rumannan den fe, ta sabi di nos parti pa ‘warda nos boca cu un bosal’ y keda keto.

40:1, 2. Spera riba Yehova por yuda nos trata cu depresion y asina sali “for di e pos di destruccion, for di e lodo di klei.”

40:5, 12. Si nos no perde for di bista e echo cu nos bendicionnan ta “mucho hopi pa conta”, calamidadnan y faltanan personal, pa hopi cu nan por ta, lo no aplasta nos.

‘Bendiciona Sea Yehova’

Ki un consuelo y animacion e 41 salmonan di e prome coleccion ta! Sea cu nos ta pasando door di prueba of ta sufri di un mal consenshi, nos por saca fortalesa y animacion for di e parti aki di Dios su Palabra poderoso. (Hebreonan 4:12) E salmonan aki ta contene informacion cu ta duna nos guia confiabel encuanto con nos mester biba. Bes tras bes nos ta ser garantisa cu sin importa ki dificultad nos haya nos aden, Yehova lo no bandona nos.

E prome coleccion di salmonan ta termina cu e palabranan: “Bendiciona sea [Yehova], e Dios di Israel, for di eternidad te na eternidad. Amen y Amen.” (Salmo 41:13) Despues di a considera e prome grupo di salmonan nos tambe no ta sinti nos conmovi pa bendiciona of alaba Yehova?

[Nota]

[Comentario na pagina 19]

Si e creacion, cu no por papia ni rasona, ta duna gloria na Yehova, cuanto mas nos mester hacie!

[Plachi na pagina 17]

David a compone mayoria di e prome 41 salmonan

[Plachi na pagina 18]

Bo sa cua salmo ta describi Yehova como e Gran Wardador?

[Plachi na pagina 20]

No laga ni un dia pasa sin considera asuntonan spiritual

[Reconocemento pa Potret na pagina 17]

Streyanan: Cortesia di United States Naval Observatory

[Reconocemento pa Potret na pagina 19]

Streyanan, pagina 18 y 19: Cortesia di United States Naval Observatory

[Reconocemento pa Potret na pagina 20]

Streyanan: Cortesia di United States Naval Observatory