Dios Tin Interes den Hende Grandi

E MALTRATO di hende grandi cu ta reina awe na tur parti di mundo no mester sorprende nos. Hopi tempo pasa, Bijbel a profetisa cu durante “e ultimo dianan” di e mundo malbado aki, hende lo “stima nan mes [y] lo no tin cariño.” (2 Timoteo 3:1-3, BPK) E palabra Griego traduci como “cariño” por referi tambe na e amor cu ta existi normalmente den famia. Y berdad manera Bijbel ta bisa, awe e cariño ei ta masha scars.

Na contraste cu personanan cu ta trata hende grandi malo, Yehova Dios si ta duna hopi balor na hende di edad avansa y e tin interes den nan. Wak con Bijbel ta mustra nos esaki.

“Un Hues pa Biuda”

E interes cu Yehova Dios tin den hende grandi ta bisto den e Scritura Hebreo. Por ehempel, na Salmo 68:5, David ta yama Dios “un hues pa biuda”, y por lo general ta trata aki di hende grandi. * Den otro traduccionnan di Bijbel, e palabra “hues” ta ser traduci como “defensor” of “protector.” Tur cos ta mustra anto cu Yehova ta interesa den e biudanan. De echo, Bijbel ta bisa cu si nan ser trata malo, su “rabia lo sende.” (Exodo 22:22-24) Tanto Dios como su sirbidonan ta duna hopi balor na biuda y na tur hende grandi fiel. Proverbionan 16:31 [NW] ta expresa e punto di bista di Yehova Dios y di su pueblo den e siguiente declaracion: “Cabei blanco ta un corona di bunitesa ora e ser haya den e caminda di husticia.”

Nada straño anto cu respet pa hende  grandi tawata un parti fundamental di e Lei cu Yehova a duna Israel. Un di e mandatonan a bisa e Israelitanan: “Lanta para pa esun cu tin cabei blanco, honra e anciano y teme bo Dios; Ami ta SEÑOR.” (Levitico 19:32) Pesei den Israel respet pa hende grandi tawata estrechamente liga cu e persona su relacion cu Yehova Dios. Esun cu a trata un hende grandi malo no por a bisa cu e stima Dios.

Cristiannan no ta cai bou di e Lei di Moises. Pero nan ta cai si bou di “e lei di Cristo”, y esei tin un efecto profundo riba nan conducta y actitud, locual ta inclui mustra amor pa nan mayornan y hende grandi, y tambe interes den nan. (Galationan 6:2; Efesionan 6:1-3; 1 Timoteo 5:1-3) Y cristiannan ta mustra amor no djis pasobra esei ta un deber sino pasobra nan ta sinti nan motiva di curason. Apostel Pedro a urgi: “Stima otro fervientemente di curason.”—1 Pedro 1:22.

Disipel Santiago ta duna mas motivacion pa nos mustra interes den hende grandi. El a skirbi: “E religion puro y sin mancha den bista di nos Dios y Tata [ta]: bishita huerfano y biuda den nan afliccion, y conserva bo mes liber di mancha di mundo.” (Santiago 1:27) Santiago ta pone nos pensa seriamente riba un punto. E ta hala nos atencion riba con importante e personanan stima aki ta pa Yehova.

Pesei, no ta suficiente pa simplemente abstene di trata hende grandi malo. Mas bien, nos tin cu mustra interes activo den nan door di haci cosnan cu ta beneficioso pa nan. (Mira e cuadro “Amor den Accion”, na pagina 6-7.) Santiago a skirbi: “Fe sin obranan ta morto.”—Santiago 2:26.

Consuelo “den Nan Afliccion”

Tin un punto mas cu nos por siña for di e palabranan di Santiago. Ripara cu Santiago a bisa cristiannan pa percura pa biudanan “den nan afliccion.” E palabra Griego traduci como “afliccion” ta nifica basicamente angustia of sufrimento causa pa e presionnan di nos circunstancianan di bida. Sin duda, hopi hende grandi ta pasa e tipo di angustia ei. Algun ta lucha cu soledad. Otronan ta deprimi debi na e limitacionnan cu biehes ta trece cu ne. Asta esnan cu ta basta activo den nan sirbishi na Dios por sinti nan desanima. Tuma por ehempel John, * un fiel proclamado di e Reino di Dios pa mas cu cuater decada, di cua e ultimo tresnan el a pasa den e sirbishi special di tempo completo. Awor cu John tin su 80 y pico aña, e ta reconoce cu e sa sinti su mes desanima. E ta bisa: “Hopi biaha mi ta wak bek y mi ta corda mi fayonan. Nan tawata hopi. Cada biaha mi ta bisa den mi mes cu mi por a haci mihor.”

Personanan asina por haya consuelo den e echo cu aunke Yehova ta perfecto, e no ta un perfeccionista. Maske e ta conciente di nos fayonan, Bijbel ta bisa di dje: “Si abo, SEÑOR, tuma inikidadnan na cuenta, o Señor, ken lo por a keda para?” (Salmo 130:3) Si, Yehova ta wak mas aleu cu nos fayonan y ta mira loke tin den nos curason. Con nos por sa esaki?

Rei David, kende como hende imperfecto a comete hopi fayo, a ser inspira pa Dios pa  compone e siguiente palabranan, registra na Salmo 139:1-3: “O SEÑOR, bo a samina mi y bo conoce mi. Bo sa ki ora mi ta sinta y ki ora mi ta lanta; bo ta compronde mi pensamentonan djaleu. Bo ta scudriña mi canamento y mi drumimento, y tur mi camindanan ta conoci pa bo.” Aki e palabra “scudriña” ta nifica literalmente “sefta”, casi mescos cu un cunukero ta bienta bagas pa laga e grano keda atras. Bou di inspiracion divino, David ta garantisa nos cu Yehova sa con pa sefta nos bon obranan y conserva esakinan den su memoria.

Nos Tata celestial y misericordioso ta corda y tambe aprecia nos bon obranan tanten cu nos keda fiel na dje. Si, Bijbel ta bisa cu pa Yehova lo ta un acto di inhusticia si e lubida nos trabou y e amor cu nos a mustra pa su nomber.—Hebreonan 6:10.

“E Prome Cosnan A Pasa”

Bijbel ta mustra cu nunca tawata e proposito di Dios pa hende experimenta problemanan di biehes. Ta despues cu nos prome mayornan, e prome homber y muher, a rebela contra nan Creador, hende a cuminsa  sinti e efectonan dañino di biehes. (Genesis 3:17-19; Romanonan 5:12) Pero esaki lo no sigui asina pa tempo indefini.

Manera nos a caba di mira, hopi di e problemanan djawe—incluso maltrato di hende grandi—ta duna prueba cu nos ta bibando den “e ultimo dianan” di e sistema di cosnan aki. (2 Timoteo 3:1) E proposito di Dios ta pa elimina e efectonan di pica, incluso e consecuencianan dañino di biehes y morto. Bijbel ta bisa: “[Dios] lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor; e prome cosnan a pasa.”—Revelacion 21:4.

Den e mundo nobo di Dios, e dolornan y enfermedadnan di biehes lo pasa pa olvido. Mescos ta conta pa maltrato di hende grandi. (Mikeas 4:4) Asta hende cu a muri y cu ta den e memoria di Dios lo ser resusita pa nan tambe haya e oportunidad di biba pa semper den un paradijs riba tera. (Huan 5:28, 29) E tempo ei, mas cu nunca prome, lo bira bisto cu Yehova Dios tin interes no solamente den hende grandi sino tambe den tur hende cu ta obedec’e.

[Nota]

[Cuadro/​Plachi na pagina 6, 7]

Amor den Accion

Entre Testigonan di Yehova, ancianonan di congregacion ta esnan cu ta tuma iniciativa pa mustra interes den e miembronan di edad avansa. Nan ta tuma e spiertamento di apostel Pedro pa “pastorea e tou di Dios meimei di [nan]” hopi na serio. (1 Pedro 5:2) Nan trabou di cuida e tou di Dios ta encera percura pa hende grandi den maneranan practico. Y kico asina esaki ta envolve?

Pa nan por haya un bon idea kico ta e necesidadnan di un persona di edad, nan mester tin pasenshi cu ne, si ta posibel bishit’e varios biaha y combersa amigablemente cu ne. Kisas e mester di yudansa cu hacimento di compras y trabounan di limpiesa, cu transport pa bai reunionnan cristian, cu lesamento di Bijbel y publicacionnan cristian y cu hopi otro cos mas. Caminda ta posibel, mester haci algun areglo practico y confiabel, y implementa esakinan. *

Pero kico mester wordo haci si un ruman homber of muher di edad di e congregacion ta den preta, kisas den un necesidad financiero? Na prome luga, lo ta bon pa haya sa si tin yiu of otro famia cu por yuda. Esaki lo cuadra cu loke 1 Timoteo 5:4 ta trece dilanti: “Si un biuda tin yiu of nieto, laga nan siña prome di practica piedad pa cu nan mes famia, y di recompensa nan mayornan, pasobra esaki ta aceptabel den bista di Dios.”

Kisas e hende grandi tin mester di yudansa pa investiga si e ta bini na remarca pa cualkier areglo social di parti di gobierno. Talbes un ruman di e congregacion lo por duna un man den esaki. Si e tipo di asistencia aki no ta disponibel, e ancianonan lo por determina si e ruman ta cualifica pa haya yudansa di e congregacion. Den algun caso esaki tawata permiti den e congregacion di prome siglo pasobra apostel Pablo a skirbi su colaborado Timoteo: “Laga un biuda wordo poni riba lista solamente si e tin mas cu sesenta aña, y tawata esposa di un homber so, y si e tin testimonio di bon obra; y si el a cria yiu, si el a mustra hospitalidad na stranhero, si el a laba pia di e santonan, si el a yuda esnan den afliccion y si el a dedica su mes na tur sorto di bon obra.”—1 Timoteo 5:9, 10.

[Nota]

[Plachi na pagina 5]

Dorcas a mustra interes den biuda pober.—Echonan 9:36-39