E Palabra di Yehova Ta Bibo

Puntonan Sobresaliente di Buki Dos di Salmonan

COMO sirbidonan di Yehova nos sa cu nos lo haya nos cu prueba y problema. Apostel Pablo a skirbi: “Tur hende cu ta desea di hiba un bida santo den Cristo Hesus lo wordo persigui.” (2 Timoteo 3:12) Kico lo yuda nos soporta prueba y persecucion, y asina demostra nos integridad na Dios?

E di dos seccion di e cinco coleccionnan di salmonan ta duna nos e yudansa ei. Salmo 42 te cu 72 ta mustra nos cu si nos kier soporta prueba cu exito, nos tin cu pone nos pleno confiansa den Yehova y siña spera riba dje pa haya liberacion. Ki un les balioso esei ta pa nos! E mensahe di Buki Dos di Salmonan, mescos cu e resto di e Palabra di Dios, di berdad ta “bibo y activo” te awe.—Hebreonan 4:12.

YEHOVA TA NOS “REFUGIO Y FORTALESA”

(Salmo 42:1–50:23)

Un levita ta den exilio. Tur tristo pasobra e no por bai na Yehova su santuario pa rindi adoracion, e ta consola su mes bisando: “Pakico bo ta abati, o mi alma? Y pakico bo a bira intrankil den mi? Spera riba Dios.” (Salmo 42:5, 11; 43:5) E versiculo aki, cu ta ser ripiti varios biaha, ta conecta e tres cupletnan di Salmo 42 y 43 hunto den un solo poema. Salmo 44 ta un suplica na fabor di Huda, cu tawata un nacion den angustia, kisas bou di menasa di ser invadi pa Asiria den tempo di rei Ezekias.

Salmo 45, un cantica tocante e casamento di un rei, ta un profecia relaciona cu e Rei Mesianico. E tres salmonan cu ta siguie ta presenta Yehova como “nos refugio y fortalesa”, “un Rei grandi riba henter mundo”, y “un refugio.” (Salmo 46:1; 47:2; 48:3) Esta bunita Salmo 49 ta mustra cu “di ningun manera un hende por redimi su ruman”! (Salmo 49:7) E prome ocho salmonan di e segundo coleccion ta ser atribui na e yiu hombernan di Core. E di nuebe, Salmo 50, ta un composicion di Asaf.

Contesta Riba Pregunta Biblico:

44:19—Kico tawata e “luga pa chacal”? E salmista kisas tawata referi na un campo di bataya, caminda e mortonan ta bira cuminda pa chacal.

45:13, 14a—Ken ta “e yiu muher di rei” cu nan ‘lo lei hiba cerca rei’? E ta e yiu muher di e “Rei eterno”, Yehova Dios. (1 Timoteo 1:17) E ta representa e congregacion glorifica cu ta consisti di 144.000 cristian, kendenan Yehova ta adopta como yiu door di ungi nan cu su spirito. (Romanonan 8:16) Lo lei hiba e “yiu muher” aki di Yehova, “prepara manera un bruid dorna pa su esposo”, cerca e bruidegom cu ta e Rei Mesianico.—Revelacion 21:2.

45:14b, 15—Ken “e birgennan” ta representa? Nan ta e “multitud grandi” di adoradonan berdadero cu ta uni cu e resto ungi y ta apoya nan. Siendo cu nan ta sali bibo “for di e gran tribulacion”, nan lo ta riba tera ora cu e matrimonio di e Rei Mesianico ser completa  den shelo. (Revelacion 7:9, 13, 14) Na e ocasion ei, nan lo yena “cu alegria y goso.”

45:16—Den ki manera yiunan lo ta na luga di e tatanan di e rei? Ora cu Hesus a nace riba tera, e tawatin antepasadonan terenal. Nan lo bira su yiunan ora cu e resusita nan for di morto durante su Reinado di Mil Aña. Algun di su “yiunan” lo ta entre esnan nombra como “prins den henter e pais.”

50:2—Dicon Bijbel ta yama Herusalem “e perfeccion di bunitesa”? Esaki no tawata debi na e stad su aparencia. Mas bien, tawata pasobra Yehova a uz’e y dun’e splendor door di hacie e sitio pa su tempel y e capital di su reinan ungi.

Les pa Nos:

42:1-3. Mescos cu un bina den un region seco ta anhela awa, asina e levita a anhela Yehova. E homber aki su tristesa, como cu e no por a adora Yehova na Su santuario, tawata asina intenso cu ‘su lagrimanan tawata su cuminda di dia y anochi’, es decir, el a perde tur su apetit. Nos tambe no mester cultiva un aprecio profundo pa adora Yehova hunto cu nos rumannan den fe?

42:4, 5, 11; 43:3-5. Pa un motibo of otro cu ta fuera di nos control nos por keda temporalmente separa for di e congregacion cristian. Si esei ta e caso, loke por sostene nos ta di corda riba e goso cu nos tawatin di asocia cu e congregacion cristian. Aunke esaki na prome instante kisas ta intensifica e dolor di soledad, lo e recorda nos tambe cu Dios ta nos refugio y cu nos tin cu spera riba dje pa haya alivio.

46:1-3. Sea cual sea e calamidad cu nos por haya nos confronta cu ne, nos mester tin pleno confiansa cu “Dios ta nos refugio y fortalesa.”

50:16-19. Ken cu ta papia engaño y ta practica cosnan baho no tin derecho di representa Dios.

50:20. En bes di ta lihe pa papia tocante e faltanan di otro hende, nos mester pasa nan por halto.—Colosensenan 3:13.

“MI ALMA TA SPERA DEN KIETUD RIBA DIOS”

(Salmo 51:1–71:24)

E grupo di salmonan aki ta cuminsa cu David su oracion sincero despues di su pica cu Betsabe. Salmo 52 te cu 57 ta mustra cu Yehova lo libra esnan cu ta tira nan carga riba dje y ta spera riba dje pa haya salbacion. Manera David a expresa den Salmonan 58-64, durante tur su angustianan, el a haci Yehova su refugio. El a canta: “Mi alma ta spera den kietud riba Dios so, pasobra mi speransa ta den dje.”—Salmo 62:5.

Intimidad cu nos Libertador mester motiva nos pa “canta e gloria di su nomber.” (Salmo 66:2) Den Salmo 65 Yehova ta ser alaba como un proveedo generoso, den Salmo 67 y 68 como un Dios di liberacionnan, y den Salmo 70 y 71 como Libertador of Esun cu ta percura escape.

Contesta Riba Pregunta Biblico:

51:12—David a pidi pa e ser sosteni cu ken su “spirito boluntario”? Esaki no ta referi na Dios su boluntad di yuda David ni na Yehova su spirito santo sino na David su propio spirito, es decir, su inclinacion mental. El a pidi Dios dun’e e deseo di haci loke ta corecto.

53:1—Den ki sentido e persona cu ta nenga cu Dios ta existi ta “bobo”? Den e versiculo aki, bobo no ta referi na falta di inteligencia sino na bobedad moral. Esaki nos por  compronde door cu Salmo 53:1-4 ta describi e decadencia moral cu tal bobedad tin como consecuencia.

58:3-5—Den ki manera e malbadonan ta manera colebra? E cosnan cu nan ta gaña tocante otro hende ta manera veneno di colebra. Nan ta venena e bon reputacion di nan victimanan. “Manera vibora sordo cu ta tapa su horea”, e malbadonan no ta sigui guia ni acepta coreccion.

58:7—Con e malbadonan ta ‘dirti, disparce manera awa’? Kisas David tawata pensa riba e awanan di cierto vayenan den e Tera Priminti. Aunke un inundacion repentino lo a pone e nivel di awa den un vaye asina subi, e awanan aki ta core bai lihe y disparce. David tawata pidi den oracion pa e malbadonan disparce lihe.

68:13—Con asina e ‘hala di paloma tawata fura cu plata, y su plumanan cu oro cu ta lombra’? Cierto paloma cu tawatin color blou-shinishi tin un briyo riba nan plumanan cu ta keda cambia di color. Nan plumanan ta haya un aparencia metallic den e lus briyante di solo. David kisas tawata compara e victorioso guereronan Israelita cu tawata bin cas for di un bataya cu un paloma asina, es decir, bulando cu forsa y di aparencia briyante. Algun comentarista biblico ta indica cu e descripcion lo por ta referi tambe na un obra di arte, un trofeo, cu nan a tuma como botin. En todo caso, David tawata referi na e victorianan cu Yehova a duna su pueblo riba nan enemigonan.

68:18—Ken tawata e “donnan entre hende”? Esakinan tawata hombernan for di entre esnan tuma como catibo durante e conkista di e Tera Priminti. Despues a asigna e hombernan ei pa yuda e levitanan den nan trabou.—Esdras 8:20.

68:30—Kico e peticion pa “reprende e bestianan cu ta den e richinan” ta nifica? Referiendo figurativamente na e enemigonan di e pueblo di Yehova como bestia, David a pidi Dios reprende nan, es decir, frena nan poder di haci daño.

69:23—Kico ta e nificacion di ‘haci heup di enemigo tembla’? E musculonan di heup ta esencial pa un hende por haci tareanan cu ta rekeri forsa, manera hisa y carga cos pisa. Heup cu ta tembla ta indica un perdida di poder. David a pidi den oracion pa su enemigonan perde nan poder.

Les pa Nos:

51:1-4, 17. Ora nos comete un pica, esei no necesariamente ta daña nos relacion cu Yehova Dios. Si nos arepenti, nos por confia riba su misericordia.

51:5, 7-10. Si nos a peca, nos por apela na Yehova pa pordona nos debi cu nos a hereda  un estado pecaminoso. Tambe nos mester pidie den oracion pa limpia nos, restaura nos, yuda nos elimina tendencianan pecaminoso for di nos curason y duna nos un spirito recto y firme.

51:18. David su picanan a menasa e bienestar di henter e nacion. Ta pesei el a pidi Dios su bon boluntad pa cu Sion. Ora nos comete un pica serio, hopi bes esei ta trece reproche riba e nomber di Yehova y riba e congregacion. Den oracion nos tin cu pidi Dios pa drecha e daño cu kisas nos a causa.

52:8. Door di obedece Yehova y acepta su disiplina di buena gana, nos por ta “mescos cu un palo berde di oleifi den e cas di Dios”, esta, hopi cerca di Yehova y productivo den su sirbishi.—Hebreonan 12:5, 6.

55:4, 5, 12-14, 16-18. David a sufri dolor emocional intenso debi na e conspiracion di su propio yiu homber Absalon y e traicion di su consehero di confiansa Ahitofel. Sinembargo, esei no a mengua David su confiansa den Yehova. Nos no mester laga dolor emocional debilita nos confiansa den Dios.

55:22. Con nos ta tira nos carga riba Yehova? Nos ta haci esaki (1) door di haci oracion na Yehova tocante un asunto cu ta precupa nos, (2) door di acudi na su Palabra y organisacion pa haya guia y sosten, y (3) door di haci loke rasonablemente nos por pa alivia e situacion.—Proverbionan 3:5, 6; 11:14; 15:22; Filipensenan 4:6, 7.

56:8. Yehova no solamente ta conciente di nos situacion sino tambe di e impacto emocional cu esei tin riba nos.

62:11. Dios no ta depende di ningun fuente externo di energia. E mes ta e fuente di poder. “Poder ta pertenece na Dios.”

63:3. Dios su “misericordia [of, “bondad amoroso”, NW] ta mihor cu bida”, pasobra sin dje, bida no tin proposito. Ta sabi di nos parti pa cultiva amistad cu Yehova.

63:6. Anochi por ta un excelente momento pa medita. Anochi ta keto y no tin distraicion.

64:2-4. Redo perhudicial por daña un persona inocente su bon nomber. Nos no mester scucha ni plama tal tipo di redo.

69:4. Pa nos mantene pas, tin biaha ta sabi pa “debolbe” door di pidi despensa, asta si nos no ta combenci cu ta nos ta robes.

70:1-5. Yehova ta tende nos ruegonan urgente pa yudansa. (1 Tesalonicensenan 5:17; Santiago 1:13; 2 Pedro 2:9) Dios por permiti un prueba sigui tuma luga, sinembargo lo e duna nos sabiduria pa trata cu e situacion y e fortalesa pa soport’e. Lo e no laga nos ser tenta mas di loke nos por soporta.—1 Corintionan 10:13; Hebreonan 10:36; Santiago 1:5-8.

71:5, 17. David a desaroya curashi y fortalesa door di haci Yehova su confiansa den su hubentud, asta prome cu el a confronta e Filisteo Goliat. (1 Samuel 17:34-37) Hobennan ta haci bon di depende riba Yehova den tur loke nan ta haci.

“Cu Henter Tera Wordo Yena cu Su Gloria”

E ultimo cantica di e segundo coleccion di salmo, Salmo 72, ta tocante e gobernacion di Salomon, cu a prefigura condicionnan cu lo reina bou di mando di e Mesias. Bendicionnan maraviyoso ta ser describi den e salmo ei: pas na abundancia, fin di opresion y violencia, cantidad di maishi riba e tera! Ken lo ta entre esnan cu lo disfruta di e cosnan aki y di otro bendicionnan di Reino? Nos por ta entre nan si, mescos cu e salmista, nos ta keda satisfecho di warda riba Yehova, y ta hacie nos refugio y nos fortalesa.

“E oracionnan di David ... a termina” cu e palabranan: “Bendiciona sea [Yehova] Dios, e Dios di Israel, kende so ta haci maraviyanan. Y bendiciona sea su nomber glorioso pa semper; y cu henter tera wordo yena cu su gloria. Amen y Amen.” (Salmo 72:18-20) Laga nos tambe bendiciona Yehova di henter nos curason y alaba su nomber glorioso.

[Plachi na pagina 9]

Bo sa ken “e yiu muher di rei” a prefigura?

[Plachi na pagina 10, 11]

Herusalem ta ser yama “e perfeccion di bunitesa.” Bo sa dicon?