“Scohe Bida pa Bo Biba”

“Mi a pone bida y morto boso dilanti, e bendicion y e maldicion. Pesei, scohe bida pa bo biba.”—DEUTERONOMIO 30:19.

1, 2. Den ki aspectonan hende a ser crea den Dios su imagen?

“LAGA nos traha hende segun nos imagen, conforme nos semehansa.” E declaracion ei cu Dios a haci ta para skirbi den e prome capitulo di Bijbel. Di acuerdo cu esei, Genesis 1:26 y 27 ta informa: “Dios a crea hende segun su mes imagen; segun e imagen di Dios el a crea hende.” Pues, e prome hende tawata distinto for di tur otro creacion riba tera. El a parce su Creador, pasobra e por a imita Dios su actitud den su manera di rasona, y den demostra amor, husticia, sabiduria y poder. E tawatin e facultad di consenshi pa yud’e tuma decisionnan cu lo benefici’e y agrada su Tata celestial. (Romanonan 2:15) Cu poco palabra, Adam tawatin boluntad liber. Observando e diseño di su yiu terenal, Yehova a evalua loke el a crea asin’aki: “Ata, tur cos [ta] masha bon.”—Genesis 1:31; Salmo 95:6.

² Como desendiente di Adam, nos tambe ta traha den Dios su imagen y semehansa. Sinembargo, di berdad nos por scohe kico nos ta haci? Si, aunke Yehova tin e capasidad di sa di antemano kico lo bai pasa, e no ta predetermina nos accionnan individual y nan resultado final. Nunca lo e no permiti bida di su yiunan terenal wordo dirigi door di predestinacion. Pa yuda nos capta e importancia di uza nos boluntad liber pa scohe e caminda corecto, laga nos siña prome un les for di e nacion di Israel.—Romanonan 15:4.

 E Israelitanan Tawatin Libertad di Scohe

3. Cua tawata e prome di e Dies Mandamentonan, y con e Israelitanan fiel a scohe pa obedec’e?

³ Yehova a bisa e Israelitanan: “Ami ta SEÑOR [Yehova] bo Dios, kende a saca bo for di tera di Egipto, for di e cas di sclabitud.” (Deuteronomio 5:6) Na aña 1513 prome cu nos era, e nacion di Israel a experencia un liberacion milagroso for di sclabitud den Egipto y pesei nan no tawatin motibo pa duda e palabranan ei. Yehova, mediante su bosero Moises, a declara den e prome di e Dies Mandamentonan: “Bo no mag tin otro dios mi dilanti.” (Exodo 20:1, 3) Na e ocasion ei, e nacion di Israel a scohe pa obedece. Boluntariamente nan a duna Yehova nan debocion exclusivo.—Exodo 20:5, NW; Numbernan 25:11, NW.

4. (a) Ki choice Moises a pone dilanti di Israel? (b) Ki choice nos tin awe?

⁴ Un 40 aña despues, Moises na un manera enfatico a recorda un otro generacion di Israelita di e choice of escohencia cu nan mester a haci. El a declara: “Mi ta yama shelo y tera como testigo contra boso awe, cu mi a pone bida y morto boso dilanti, e bendicion y e maldicion. Pesei, scohe bida pa bo biba, abo y bo desendientenan.” (Deuteronomio 30:19) Awe ta mescos, nos tin un choice. Nos por scohe pa sirbi Yehova fielmente cu bida eterno na bista, of nos por scohe pa desobedec’e y sufri e consecuencianan. Considera dos ehempel di hendenan cu a scohe net contrario di otro.

5, 6. Ki escohencia Hosue a haci, y cu ki resultado?

⁵ Na aña 1473 prome cu nos era, Hosue a dirigi e Israelitanan pa drenta e Tera Priminti. Den un yamada urgente y motivador cu el a haci prome cu su morto, Hosue a roga henter e nacion: “Si ta desagradabel den boso bista pa sirbi SEÑOR, scohe pa boso mes awe kende boso lo sirbi: sea e diosnan cu boso tatanan tawata sirbi, cualnan tawata na e otro banda di Riu Eufrates, of e diosnan di e amoreonan, den kende nan tera boso ta biba.” Anto referiendo na su famia, el a sigui bisa: “Pa loke ta ami y mi cas, nos lo sirbi SEÑOR [Yehova].”—Hosue 24:15.

⁶ Mas prome, Yehova a urgi Hosue pa tene hopi curashi y sea fuerte, y a dun’e e instruccion pa no keda sin obedece e Lei di Dios. Al contrario, door di medita riba e buki di Lei di dia y anochi, Hosue lo por tawatin exito den su caminda. (Hosue 1:7, 8) Hosue a haci esei y e tawatin exito. Loke el a scohe a hiba na hopi bendicion. El a declara: “Ni un di e bon promesanan cu SEÑOR a haci na e cas di Israel no a faya; tur a keda cumpli.”—Hosue 21:45.

7. Den tempo di Isaias, ki escohencia algun Israelita a haci, y cu ki consecuencia?

⁷ Na contraste, considera e situacion den Israel un 700 aña despues. Pa e tempo ei, hopi Israelita tawata sigui custumbernan pagano. Por ehempel, riba e ultimo dia di aña, e hendenan tawata reuni pa un bankete cu a consisti di un variedad di cuminda sabroso y biña dushi. Pero esaki no tawata un simpel reunion social. E tawata un ceremonia religioso cu a honra dos dios pagano. Profeta Isaias a skirbi Dios su punto di bista di e infieldad aki: “Boso cu ta bandona SEÑOR, cu ta lubida mi sero santo, cu ta pone mesa pa [“e dios di”, NW] Fortuna, y cu ta yena copa cu biña mescla pa [“e dios di”, NW] Destino.” Nan tawata kere cu e cosecha di e aña tawata depende, no di Yehova su bendicion, sino di satisface ‘e dios di Fortuna’ y ‘e dios di Destino.’ Pero en realidad, nan caminda rebelde y nan escohencia delibera a determina nan fin desastroso. Yehova a declara: “Lo mi destina boso pa spada, y boso tur lo hinca rudia pa wordo mata. Pasobra mi a yama, ma boso no a contesta; mi a papia, ma boso no a tende. Boso a haci loke ta malo den mi bista, y a scohe loke mi no tawatin delicia den dje.” (Isaias 65:11, 12) Nan escohencia imprudente a resulta den nan destruccion, y e diosnan di Destino y Fortuna no tawatin poder pa preveni esei.

 Haciendo e Escohencia Corecto

8. Segun Deuteronomio 30:20, haci e escohencia corecto ta encera kico?

⁸ Ora cu Moises a curasha Israel pa scohe bida, el a indica tres paso cu nan mester a dal: “Door di stima SEÑOR bo Dios, door di obedece su bos y door di tene duro na dje.” (Deuteronomio 30:20) Laga nos analisa cada un di e pasonan aki, ya asina nos por haci e escohencia corecto.

9. Con nos por demostra nos amor pa Yehova?

⁹ Door di stima Yehova bo Dios: Nos ta scohe pa sirbi Yehova pasobra nos stim’e. Nos ta tuma na pecho e ehempelnan di tempo di Israel cu ta sirbi como un spiertamento pa nos. Pues, nos ta resisti tur tentacion pa comete inmoralidad y nos ta evita estilonan di bida cu lo por pone nos cai den mundo su trampa di materialismo. (1 Corintionan 10:11; 1 Timoteo 6:6-10) Nos ta pega fielmente na Yehova y ta sigui su leinan of statutonan. (Hosue 23:8; Salmo 119:5, 8) Prome cu e Israelitanan a drenta e Tera Priminti, Moises a urgi nan: “Mira, mi a siña boso statutonan y huicionan mescos cu SEÑOR mi Dios a ordena mi, pa boso haci asina na e tera cu boso ta bai drenta pa podera di dje. Asina anto, warda nan y cumpli cu nan, pasobra esei ta boso sabiduria y boso comprondemento den bista di e pueblonan cu lo tende tur e statutonan aki.” (Deuteronomio 4:5, 6) Awor ta e tempo pa nos demostra nos amor pa Yehova door di pone su boluntad na prome luga den nos bida. Definitivamente nos lo ser bendiciona si nos scohe pa haci esei.—Mateo 6:33.

10-12. Ki lesnan nos ta siña door di considera loke a sosode den tempo di Noe?

¹⁰ Door di obedece Dios su bos: Noe tawata “un predicado di husticia.” (2 Pedro 2:5) Casi tur e hendenan prome cu Diluvio no a presta atencion y “no a haci caso” di Noe su spiertamento. Cu ki consecuencia? “E diluvio a bini y a bari nan tur.” Hesus a spierta cu nos tempo, durante “e presencia di e Yiu di hende”, lo ta mescos. Loke a pasa den tempo di Noe ta sirbi como un spiertamento serio pa e hendenan di awendia cu ta scohe pa no haci caso di Dios su mensahe.—Mateo 24:39, NW.

¹¹ Hende cu ta haci bofon di e spiertamentonan divino cu Dios su sirbidonan di tempo actual ta proclama, mester realisa kico lo ta e resultado si nan keda sin haci caso di e spiertamentonan ei. Apostel Pedro a bisa di e hacidonan di bofon ei: “Di nan mes boluntad nan no kier acepta e echo aki, cu pa medio di e palabra di Dios e shelonan a existi di hopi tempo pasa y e tera a wordo forma for di awa y pa medio di awa, door di cual e mundo di e tempo ei a wordo destrui, siendo inunda cu awa. Ma e shelonan y e tera actual pa medio di su palabra ta wordo reserva pa candela, warda pa e dia di huicio y destruccion di hendenan impio.”—2 Pedro 3:3-7.

¹² Mira e contraste entre e hendenan aki y e choice cu Noe y su hendenan di cas a haci. “Pa medio di fe Noe, siendo spierta pa Dios tocante di cosnan cu no a wordo mira ainda, cu temor di Dios a prepara un arca.” Door di haci caso di e spiertamento, Noe a trece salbacion pa e hendenan di su cas. (Hebreonan 11:7) Laga nos ta personanan cu ta lihe pa tende e mensahe di Dios y haci caso di dje obedientemente.—Santiago 1:19, 22-25.

13, 14. (a) Pakico ta sumamente importante pa nos ‘tene duro na Yehova’? (b) Con nos mester laga Yehova, “nos Alfarero”, moldea nos?

¹³ Door di tene duro na Yehova: Pa nos ‘scohe bida y keda biba’, nos no solamente tin cu stima Yehova y obedec’e, sino tambe nos tin cu ‘tene duro na Yehova’, es decir, persisti den haci su boluntad. Hesus a bisa: “Door di boso perseverancia boso lo gana boso alma.” (Lucas 21:19) En realidad, loke nos scohe relaciona cu esaki ta revela kico tin den nos curason. Proverbionan 28:14 ta remarca: “Bendiciona ta e hende cu semper tin temor, ma esun cu haci su curason duro lo cai den calamidad.” Farao di antiguo Egipto tawata un ehempel di esaki. Segun cu cada un di e Dies Plaganan tawata  asota Egipto, Farao a haci su curason duro en bes di desplega temor di Dios. Yehova no a obliga Farao desobedec’e sino mas bien a permiti e gobernante arogante ei di scohe. En todo caso, Yehova su boluntad a cumpli, manera apostel Pablo a splica relaciona cu e manera cu Yehova a mira Farao: “Ta pa e proposito aki mi a lanta bo, [of, “laga bo permanece”, NW] pa demostra mi poder den bo y pa mi nomber por wordo proclama den henter mundo.”—Romanonan 9:17.

¹⁴ Siglonan despues cu Israel a ser libra for di Farao su control, profeta Isaias a declara: “O SEÑOR, abo ta nos Tata, nos ta e klei y abo ta nos Alfarero; y nos tur ta e obra di bo man.” (Isaias 64:8) Segun cu nos ta laga Yehova moldea nos mediante nos estudio personal y aplicacion di su Palabra, nos gradualmente ta bisti e personalidad nobo. Nos ta bira mas manso y moldeabel, y asina ta bira mas facil pa nos pega fielmente na Yehova pasobra sinceramente nos kier agrad’e.—Efesionan 4:23, 24; Colosensenan 3:8-10.

“Siña Nan”

15. Segun Deuteronomio 4:9, Moises a recorda Israel di cua responsabilidad cu a consisti di dos aspecto?

¹⁵ Moises a bisa e nacion di Israel cu tawata cla pa drenta e Tera Priminti: “Solamente, paga tino y warda bo alma cu tur diligencia, pa bo no lubida e cosnan cu bo wowo a mira, y pa nan no kita for di bo curason tur e dianan di bo bida; ma siña nan na bo yiunan y na bo nietonan.” (Deuteronomio 4:9) Pa e pueblo por tawatin Yehova su bendicion y prospera den e tera cu nan tawata cerca di hereda, nan tawatin cu cumpli cu un responsabilidad dilanti di Yehova nan Dios. E responsabilidad aki a consisti di dos aspecto: nan no mester a lubida e cosnan maraviyoso cu Yehova a haci dilanti nan wowo, y nan mester a siña e cosnan ei na e futuro generacionnan. Como e pueblo di Dios awe, nos tin cu haci mescos si nos kier ‘scohe bida y keda biba.’ Kico nos a mira cu nos propio wowo cu Yehova a haci na nos fabor?

16, 17. (a) Kico misioneronan entrena na Galad a logra haci den e predicacion di Reino? (b) Ki ehempelnan abo conoce di rumannan cu a mantene nan celo?

¹⁶ Nos ta masha contento di mira con Yehova a bendiciona nos trabou di predica y haci disipel. For di dia cu e Scol Biblico di Galad di Watchtower a habri na aña 1943, misioneronan den hopi pais a hiba delantera den e trabou di haci disipel. Te awe tin graduadonan di e prome klasnan di e scol aki cu ta mantene un celo pa e predicacion di Reino, a pesar cu nan ta di edad avansa y limitacionnan fisico ta stroba algun di nan. Un excelente ehempel ta Mary Olson, kende a gradua di Galad na 1944. El a sirbi como misionero, prome na Uruguay, despues na Colombia y awor na Puerto Rico. Aunke Ruman Olson no por haci masha mas door di problema cu salud causa pa biehes, el a keda cu su entusiasmo pa predica. Haciendo bon uzo di su conocemento di  Spaño, e ta programa tempo tur siman pa sali cu e publicadonan local den sirbishi di veld.

¹⁷ Nancy Porter, cu awor ta biuda y kende a gradua for di Scol di Galad na 1947, ainda ta sirbi na Bahamas. E tambe ta un misionero cu ta keda ocupa den e trabou di predica. Ruman Porter a bisa den su storia di bida: “Siña otro hende berdad di Bijbel ta un fuente special di goso. E ta percura un rutina spiritual ordena cu a duna mi bida structura y stabilidad.” * Ora Ruman Porter y otro sirbidonan fiel wak atras, nan no ta lubida loke Yehova a haci. Kico di nos? Nos ta medita cu aprecio riba e manera cu Yehova a bendiciona e obra di Reino den nos area?—Salmo 68:11.

18. Kico nos por siña door di lesa e storia di bida di misioneronan?

¹⁸ Nos ta hopi contento cu loke e “veteranonan” aki den sirbishi di Yehova a logra y te ainda ta logra. Lesando nan storia di bida ta un fuente di animacion pa nos pasobra ora nos mira loke Yehova a haci pa e rumannan fiel aki, esei ta fortifica nos determinacion pa sigui sirbi Yehova. Abo ta lesa cu regularidad e storianan emocionante ei cu ta sali den E Toren di Vigilancia y medita riba nan?

19. Con mayornan cristian por haci bon uzo di e storianan di bida cu ta sali den E Toren di Vigilancia?

¹⁹ Moises a recorda e Israelitanan cu nan no mester a lubida tur loke Yehova a haci pa nan y cu e cosnan aki mester a keda den nan curason pa e resto di nan bida. Caba el a agrega un paso mas: “Siña nan na bo yiunan y na bo nietonan.” (Deuteronomio 4:9) Storianan di bida real tin un atraccion special. Hobennan cu ta crece tin mester di bon ehempel. Rumannan muher soltero por siña hopi les for di e ehempel di rumannan muher di edad kende nan storia di bida ta sali den E Toren di Vigilancia. Tanto rumannan homber como rumannan muher tin mayor oportunidad di ta ocupa cu e predicacion di e bon nobo door di bai sirbi den un teritorio di otro idioma den nan mes pais. Mayornan cristian, dicon boso no ta uza e experencianan di e fiel misioneronan di Galad y di otro rumannan pa motiva boso yiunan pa scohe un bida di sirbishi di tempo completo?

20. Kico nos tin cu haci pa “scohe bida”?

²⁰ Pues anto, con cada un di nos por “scohe bida”? Door di uza nos maraviyoso don di boluntad liber pa mustra Yehova cu nos stim’e, y door di sigui haci nos best den su sirbishi tanten cu e ta permiti nos e privilegio ei. Pasobra manera Moises a declara, Yehova “ta bo bida y e largura di bo dianan.”—Deuteronomio 30:19, 20.

[Nota]

Bo Ta Corda?

• Kico bo a siña for di e ehempelnan cu nos a considera di hende cu a scohe contrario di otro?

• Ki pasonan nos tin cu dal pa asina nos “scohe bida”?

• Bijbel ta urgi nos pa cumpli cu cua responsabilidad cu ta consisti di dos aspecto?

[Preguntanan di Estudio]

[Plachi na pagina 26]

“Mi a pone bida y morto boso dilanti”

[Plachi na pagina 29]

Noe y su famia a salba door cu nan a obedece Dios su bos

[Plachi na pagina 30]

Mary Olson

[Plachi na pagina 30]

Nancy Porter