Storia di Bida

Sirbiendo Yehova cu Goso A Pesar di Problema cu Salud

SEGUN E RELATO DI VARNAVAS SPETSIOTIS

Na 1990, na edad di 68 aña, mi a bira completamente paralisa. Sinembargo, ya awor mi tin 15 aña ta sirbi gososamente como un minister di tempo completo riba e isla di Chipre (of Cyprus). Kico a duna mi e fortalesa pa sigui activo den e sirbishi di Yehova a pesar di problema cu salud?

MI A nace dia 11 di october 1922 den un famia di nuebe yiu—cuater mucha homber y cinco mucha muher. Nos tawata biba den e pueblito Xylophagou, na Chipre. Aunke mi mayornan tawata relativamente bon para, toch criamento di un famia grandi asina a envolve hopi trabou pisa den cunucu.

Mi tata, Antonis, di naturalesa tawata curioso y tawata gusta lesa y studia. Poco despues cu mi a nace, Tata tawata di bishita cerca un maestro di scol di e pueblito y el a mira un tratado titula E Preekstoel di Pueblo, publica door di e Studiantenan di Bijbel (manera Testigonan di Yehova tawata conoci e tempo ei). El a cuminsa les’e, y a keda absorba den su contenido. Como resultado, Tata y un di su amigonan, Andreas Christou, tawata entre e prome hendenan riba e isla pa asocia nan mes cu Testigonan di Yehova.

Crecemento a Pesar di Oposicion

Cu tempo, nan dos a haya mas publicacion basa riba Bijbel for di Testigonan di Yehova. Poco despues, Tata cu Andreas a sinti nan motiva pa comparti cu e otro hendenan di e pueblito e berdadnan biblico cu nan a siña. Nan actividad di predica a proboca  oposicion fuerte di parti di clero Griego ortodox y di otro hende cu tawata haya Testigonan di Yehova un mal influencia.

Pero hopi di e hendenan local no por a keda sin respeta e dos maestronan di Bijbel aki. Mi tata tawata bon conoci pa su bondad y generosidad. Hopi biaha el a duna un man na famianan pober. Tin biaha e tawata sali keto keto for di cas anochi laat y bai pone trigo of pan na porta di famianan den necesidad. Tal conducta cristian abnega a haci e mensahe di e dos predicadonan aki mas atractivo.—Mateo 5:16.

Como resultado, rond di dies hende a reacciona faborablemente riba e mensahe di Bijbel. Segun cu nan comprondemento di e berdad a crece, nan a sinti e necesidad di reuni den varios cas pa studia Bijbel como grupo. Rond di aña 1934, Nikos Matheakis, un minister di tempo completo di Grecia, a bin Chipre y a reuni hunto cu e grupo na Xylophagou. Cu pasenshi y determinacion, Ruman Matheakis a yuda organisa e grupo y a yuda nan haya un mihor comprondemento di e Scritura. E grupo aki despues a bira e prome congregacion di Testigonan di Yehova na Chipre.

Segun cu e obra cristian a progresa y mas hende a acepta e berdad biblico, e rumannan a sinti cu nan tawatin mester di un luga permanente pa tene nan reunionnan. Mi ruman homber mayo, George, cu su casa, Eleni, a ofrece un luga cu nan tawata uza como mangasina. E propiedad aki, cu tawata pega cu nan cas, a wordo drecha y comberti den un luga apropiado pa tene reunion. Pues asina e rumannan a bira doño di nan prome Salon di Reino riba e isla. Esta gradicido nan tawata! Y esaki a stimula mas expansion!

Tumando e Berdad na Serio

Na 1938, na edad di 16 aña, mi a dicidi cu mi kier bira carpinte. Pues, Tata a manda mi na e capital di Chipre, Nicosia. Demostrando bon prevision, el a haci areglo pa mi keda  cerca Nikos Matheakis. Hopi hende riba nos isla te ainda ta corda e ruman aki pa su celo y hospitalidad. Su gran entusiasmo y curashi firme tawata cualidadnan necesario pa cualkier cristian na Chipre den e tempo ei.

Ruman Matheakis a yuda mi masha hopi mes pa mi por a haya un base solido di conocemento biblico y pa haci progreso spiritual. Mientras mi tawata keda cerca dje, mi a asisti na tur e reunionnan cu tawata wordo teni den su cas. Pa prome biaha, mi a sinti cu mi amor pa Yehova tawata creciendo. Mi a desaroya e determinacion pa cultiva un relacion significativo cu Dios. Den un par di luna, mi a pidi Ruman Matheakis si mi por compañ’e den sirbishi di veld. Esaki tawata na aña 1939.

Despues di poco tempo, mi a bai cas bek pa bishita mi famia. E tempo cu mi a pasa den compania di mi tata a profundisa mi conviccion cu mi a haya e berdad y e proposito di bida. Na september 1939, Segundo Guera Mundial a cuminsa. Hopi mucha homber di mi edad a ofrece nan mes pa bai guera, pero siguiendo e instruccion di Bijbel, mi a dicidi di keda neutral. (Isaias 2:4; Huan 15:19) E mesun aña ei, mi a dedica mi bida na Yehova y mi a batisa na 1940. Pa prome bes, mi a sinti cu mi no tawatin miedo di hende mas!

Na 1948 mi a casa cu Efprepia. Nos a ser bendiciona cu cuater yiu. No a dura hopi cu nos a bin realisa cu nos tawatin cu traha duro pa por ‘lanta nan den e disiplina y instruccion di Yehova.’ (Efesionan 6:4) Nos oracion- y esfuersonan tawata enfoca riba inculca un amor profundo pa Yehova den nos yiunan y tambe respet pa su leinan y principionan.

Problemanan di Salud Ta Bira un Reto

Na 1964, na edad di 42 aña, mi a cuminsa sinti cu mi man y pia drechi ta bira doof. Pocopoco esaki a plama pa mi banda robes. Docternan a diagnostica cu mi tin debilidad muscular, un malesa incurabel cu despues di tempo ta hiba na paralisis completo. E noticia a shock mi pisa. E circunstancia aki a surgi asina lihe y onverwacht! Aplasta pa sintimentonan di rabia y indignacion, mi a pensa: ‘Dicon esaki mester a pasa net cu ami! Kico mi a haci pa merece esaki?’ Sinembargo, cu tempo mi a logra supera e prome  shock di e diagnosis. E ora ei mi a sinti mi aplasta pa ansiedad y insiguridad. Un cantidad di pregunta a keda bira rond den mi cabes. Lo mi bira completamente paralisa y tin cu bai depende totalmente di otro hende? Con lo mi trata cu esei? Lo mi por mantene mi famia, esta, mi casa y nos cuater yiunan? Mi tawata sinti dolor ora mi pensa riba e cosnan ei.

Na e punto critico aki den mi bida, mas cu nunca prome, mi a sinti e necesidad di acudi na Yehova den oracion y cont’e sinceramente tur mi precupacion y ansiedad. Mi tawata haci oracion di dia y anochi cu awa na wowo. No a tarda cu mi a sinti mi consola. E palabranan consolador di Filipensenan 4:6 y 7 a resulta hopi cierto den mi caso: “No precupa pa nada; ma den tur cos, pa medio di oracion y suplica cu gradicimento, laga boso peticionnan ta conoci dilanti di Dios. Y e pas di Dios, cu ta surpasa tur comprondemento, lo warda boso curason y boso mente den Cristo Hesus.”

Tratando cu Paralisis

Mi condicion a sigui empeora. Mi a bin realisa cu mi mester ahusta pura na mi circunstancia nobo. Como cu mi no por a traha mas como carpinte, mi a dicidi di busca un trabou menos pisa cu tawata pas cu mi condicion fisico y cu toch a yuda mi mantene mi famia. Na cuminsamento, mi a bende ijscream for di un van chikito. Mi a haci esaki pa mas o menos seis aña te ora cu mi malesa a pone cu mi mester uza rolstul. Despues mi a cambia bai haci varios trabou mas facil.

Pero desde 1990 mi salud a bai asina atras cu mi no por a traha mas. Awor mi ta depende completamente di otro hende, asta pa haci cosnan cu lo ta normal pa un persona cu tin bon salud. Mi tin mester di yudansa ora di bai drumi, pa baña mi curpa y pa bisti paña. Pa mi asisti na reunionnan cristian, un hende mester pusha mi den rolstul te na auto, caba hisa mi y hinca mi den auto. Ora nos yega Salon di Reino, mester hisa mi y saca mi for di auto, pone mi den rolstul, anto caba pusha mi hiba paden. Durante reunion, mi tin un calentador electrico band’i mi pa tene mi pianan cayente.

Pero a pesar di mi paralisis, mi ta asisti na tur e reunionnan cu basta regularidad. Mi ta compronde cu einan ta caminda Yehova ta siña nos, y asociacion cu mi rumannan spiritual ta un berdadero refugio y un fuente di sosten y animacion. (Hebreonan 10:24, 25) Bishitanan regular di rumannan spiritualmente maduro ta un yudansa constante pa mi. Mi no por keda sin sinti mescos cu David: “Mi copa ta yen te basha over.”—Salmo 23:5.

Mi casa stima atrabes di tur e añanan aki tawata un yudansa maraviyoso. Mi yiunan tambe a yuda mi masha bon mes. Ya pa varios aña, nan ta yuda mi cu mi necesidadnan di tur dia. Loke nan ta haci no ta facil, y segun cu e añanan ta pasa, ta bira mas y mas dificil pa cuida mi. Nan ta realmente ehemplar den cultiva pasenshi y gasta nan mes na mi fabor, y mi ta pidi Yehova pa sigui bendiciona nan.

Un otro provision maraviyoso di Yehova pa fortifica su sirbidonan ta oracion. (Salmo 65:2) Como contesta riba mi suplicanan sincero, Yehova a duna mi e fortalesa pa sigui fiel den e fe durante tur e añanan aki. Specialmente ora mi ta sinti mi desanima, oracion ta duna mi alivio y ta yuda mi mantene mi goso. Comunicacion constante cu Yehova ta refresca mi y ta renoba mi determinacion pa sigui padilanti. Mi ta completamente combenci cu Yehova ta tende e oracionnan di su sirbidonan y ta duna nan e pas mental cu nan tin mester.—Salmo 51:17; 1 Pedro 5:7.

Mas cu tur cos, mi ta sinti mi yen di energia atrobe cada biaha cu mi corda cu Dios cu tempo lo cura tur hende cu ser bendiciona cu bida den Paradijs bou di e Reino di su Yiu,  Hesucristo. Mas cu un biaha lagrimanan di goso a yega di core na mi cara ora mi medita riba e speransa maraviyoso ei.—Salmo 37:11, 29; Lucas 23:43; Revelacion 21:3, 4.

Sirbiendo Como Minister di Tempo Completo

Rond di aña 1991 mi a realisa, despues di a analisa mi situacion, cu e mihor manera pa evita di sinti duele di mi mes tawata pa keda ocupa den comparti e precioso bon noticia di e Reino cu otro hende. E aña ei mi a cuminsa sirbi como un minister di tempo completo.

Como cu mi ta incapasita, mi ta duna testimonio principalmente via carta. Sinembargo, pa mi, skirbimento no ta un cos facil; mi tin cu haci hopi esfuerso. Ta dificil pa mi tene e pen firmemente den mi man door cu e malesa a debilita mi musculonan. Sinembargo, cu perseverancia y oracion, mi tin ya 15 aña ta predica door di skirbi carta. Tambe mi ta uza telefon pa predica na hende. Nunca mi no ta perde un oportunidad pa papia tocante mi speransa di e mundo nobo y di e tera transforma den Paradijs cu mi famia-, amigo- y biciñanan cu ta bin bishita mi na cas.

Como resultado, mi a disfruta di hopi experencia animante. Mi a keda masha contento di mira un di mi nietonan, cu un 12 aña pasa mi a studia cu ne, haci progreso spiritual y mustra aprecio pa e berdad biblico. Motiva pa su consenshi biblicamente entrena, el a keda fiel y firme encuanto e cuestion di neutralidad cristian.

Mi ta keda contento specialmente ora hende cu mi skirbi, tuma contacto cu mi pa mas informacion tocante Bijbel. De bes en cuando, tin hende ta pidi mas literatura biblico. Por ehempel, un señora a bel mi y gradici mi pa e carta animante cu mi a manda pa su casa. El a haya e pensamentonan den e carta masha interesante. Esaki a hiba na hopi combersacion biblico cu ne y cu su casa den mi cas.

Un Speransa Maraviyoso y un Punto di Bista Positivo

Atrabes di añanan, mi a mira e cantidad di proclamadonan di Reino aumenta den e parti aki di mundo. E Salon di Reino chikito cu ta pega cu e cas di mi ruman homber George a wordo expande y renoba varios biaha. E ta un bunita luga di adoracion, cu dos congregacion di Testigonan di Yehova ta uza.

Tata a muri na 1943, na edad di 52 aña. Pero ki un gran herencia spiritual el a laga atras! Ocho di su yiunan a acepta e berdad y ainda ta sirbi Yehova. Den e pueblito Xylophagou, caminda Tata a nace, hunto cu pueblitonan biciña, tin awor tres congregacion, cu un total di 230 publicado di Reino!

Resultadonan positivo asina tawata un gran motibo di goso pa mi. Awor, na edad di 83 aña, mi ta ripiti cu confiansa e palabranan di e salmista: “Leon chikito si tin necesidad y ta pasa hamber, ma esnan cu ta busca SEÑOR lo no tin falta di ningun cos bon.” (Salmo 34:10) Ansiosamente mi ta spera riba e tempo ora cu e profecia cu tin para na Isaias 35:6 lo bira realidad: “E cohonan lo bula manera bina.” Mi ta dicidido pa sigui sirbi Yehova cu goso te na e tempo ei, a pesar di mi problemanan di salud.

[Mapa na pagina 17]

(Pa e texto den su formato completo , wak e publicacion)

TURKIA

SIRIA

LIBANON

CHIPRE

Nicosia

Xylophagou

Lama Mediteraneo

[Plachi na pagina 17]

E prome Salon di Reino na Xylophagou, uza te ainda

[Plachi na pagina 18]

Ami cu Efprepia na 1946 y awe

[Plachi na pagina 20]

Mi ta haya goso den predica via telefon y carta