Yehova Ta Declara “e Fin for di Principio”

“[Esun] kende ta declara e fin for di principio, y for di temponan antiguo, cosnan cu no a wordo haci ainda.”—ISAIAS 46:10.

1, 2. Kico ta remarcabel di e susesonan asocia cu e conkista di Babilonia, y kico e echo aki ta indica tocante Yehova?

DEN e scuridad di anochi, soldanan enemigo keto keto ta cana pasa door di Riu Eufrates den direccion di nan obhetivo, e poderoso stad di Babilonia. Segun cu nan ta yega cerca di e entrada di e stad, nan ta mira algo sorprendente. E bewakernan a laga e dos bladnan inmenso di e porta den muraya di Babilonia habri! E soldanan ta subi for di e riu y ta drenta e stad. Rapidamente nan ta captura e stad. Nan lider, Ciro, umbes ta tuma control di e pais conkista y despues ta saca un decreto cu ta libra e presonan Israelita. Miles di exiliado ta regresa cas pa restaura e adoracion di Yehova na Herusalem.—2 Cronicanan 36:22, 23; Esdras 1:1-4.

² E susesonan ei di aña 539 pa 537 prome cu nos era, awor ta bon confirma door di historiadonan. Loke ta remarcabel ta cu un 200 aña prome e susesonan ei tawata conoci caba. Yehova a inspira su profeta Isaias pa describi e caida di Babilonia asina tanto tempo di antemano. (Isaias 44:24–45:7) Dios no solamente a revela e circunstancianan rond di e conkista di Babilonia, sino asta nomber di e lider conkistado. * Yehova a bisa e Israelitanan, cu e tempo ei tawata su testigonan: “Corda e cosnan di antes cosnan di hopi tempo pasa, pasobra ami ta Dios, y no tin ningun otro Dios. Ami ta Dios, y no tin ningun manera mi, Kende ta declara e fin for di principio, y for di temponan antiguo, cosnan cu no a wordo haci ainda.” (Isaias 46:9, 10) Yehova di berdad ta un Dios cu por sa di antemano kico lo sosode.

3. Nos lo considera contesta riba cua preguntanan?

³ Cuanto Dios sa tocante futuro? Acaso Yehova sa di antemano kico cada un di nos ta bai haci? Nos futuro ta predestina? Den e  articulo aki y esun siguiente nos lo considera Bijbel su contesta riba e preguntanan aki y riba otro pregunta mas.

Yehova—Un Dios di Profecia

4. Ken ta e Fuente di e profecianan cu tin para skirbi den Bijbel?

⁴ Siendo cu Yehova tin e capasidad di sa futuro di antemano, el a inspira su sirbidonan den tempo biblico pa skirbi hopi profecia. Esaki ta permiti nos sa di antemano kico Yehova ta bai haci. Yehova a declara: “Mira, e cosnan di antes a pasa, awor mi ta declara cosnan nobo; prome cu nan sali na cla, mi ta anuncia nan na boso.” (Isaias 42:9) Ki un gran privilegio e pueblo di Dios tin!

5. Ki responsabilidad un persona tin ora cu e haya conocemento di antemano di loke Yehova ta bai haci?

⁵ Profeta Amos ta sigura nos: “SEÑOR Dios no ta haci nada, sin cu e revela su conseho secreto na su sirbidonan, e profetanan.” Un hende cu haya e conocemento aki di antemano tin un responsabilidad. Tuma nota di e ilustracion impactante cu Amos a uza: “Leon a gruña! Ken lo no tin temor?” Mescos cu e gruñamento di un leon ta proboca mesora un reaccion di tanto hende como bestia cu tend’e, asina profetanan manera Amos mesora a anuncia Yehova su declaracionnan. “Señor DIOS a papia! Ken por laga di profetisa?”—Amos 3:7, 8.

Yehova Su “Palabra” Lo ‘Alcansa Su Proposito’

6. Den ki manera Yehova su “proposito” a cumpli en conexion cu e caida di Babilonia?

⁶ Yehova a bisa mediante su profeta Isaias: “Mi proposito lo wordo estableci y lo mi cumpli cu tur loke ta agrada mi.” (Isaias 46:10b) Pa loke a trata Babilonia, Dios su “proposito” a encera yama Ciro for di Persia pa conkista Babilonia y causa Babilonia su caida. Yehova a declara e proposito ei hopi tempo di antemano, y manera nos a menciona caba, el a cumpli al pie de la letra na aña 539 prome cu nos era.

7. Dicon nos por tin confiansa cu Yehova su “palabra” semper ta cumpli?

⁷ Casi cuater siglo prome cu Ciro a conkista Babilonia, rei Yehosafat di Huda a confronta e ehersitonan combina di Amon y Moab. Cu confiansa el a bisa den oracion: “O SEÑOR, e Dios di nos tatanan, no ta abo ta Dios den e shelonan? Y no ta abo ta goberna riba tur e reinonan di e nacionnan? Poder y forsa ta den bo man, asina cu ningun hende no por para contra bo.” (2 Cronicanan 20:6) Isaias a expresa e mesun confiansa ora el a declara: “SEÑOR di ehersitonan a plania [“conseha”, NW], y ken por anula esaki? Y pa loke ta su man extendi, ken por hal’e bek?” (Isaias 14:27) Mas despues, ora cu rei Nabucodonosor di Babilonia a recobra su sano huicio despues di un periodo di locura, el a reconoce humildemente: “Ningun hende no por detene [Dios] su man ni bis’e: ‘Kico bo a haci?’” (Daniel 4:35) Si, Yehova ta sigura su pueblo: “Mi palabra cu ta sali for di mi boca ... lo no bolbe bashi cerca mi, sin cumpli cu loke mi ta desea, y sin alcansa e proposito cu cual mi a mand’e.” (Isaias 55:11) Nos por tin e pleno  confiansa cu Yehova su “palabra” semper ta cumpli. Dios su proposito ta infalibel.

Dios Su “Proposito Eterno”

8. Kico ta Dios su “proposito eterno”?

⁸ Apostel Pablo a menciona den su carta na e cristiannan na Efeso, cu Dios tin un “proposito eterno.” (Efesionan 3:11) Esaki no ta simplemente un plan di accion, como si fuera Dios tawatin cu plania con lo e bai traha. Mas bien, e tin di aber cu Yehova su determinacion pa cumpli cu loke originalmente tawata su proposito pa humanidad y pa e tera. (Genesis 1:28) Pa yuda nos compronde con infalibel Dios su proposito ta, laga nos considera e prome profecia registra den Bijbel.

9. Con Genesis 3:15 ta conecta cu Dios su proposito?

⁹ E promesa na Genesis 3:15 ta indica cu inmediatamente despues cu Adam cu Eva a peca, Yehova a dicidi cu su muher simbolico lo a bai produci un simiña, un yiu homber. Yehova a mira tambe di antemano e resultado di e enemistad entre su muher simbolico y Satanas, y e enemistad entre nan simiñanan cu lo ta contra otro. Aunke Yehova lo a permiti e Simiña di Dios su muher simbolico sufri herida na su hilchi, na Dios su debido tempo e Simiña lo a herida e colebra, Satanas e Diabel, den cabes. Mientrastanto, Yehova su proposito a avansa sin faya atrabes di e liña di desendencia selecta, te ora Hesus a aparece como e Mesias priminti.—Lucas 3:15, 23-38; Galationan 4:4.

Asuntonan Cu Yehova A Determina di Antemano

10. Acaso Yehova a predetermina for di principio cu Adam cu Eva lo peca? Splica.

¹⁰ Papiando di e papel cu Hesus a hunga den Dios su proposito, apostel Pedro a skirbi: “E [Hesus] tawata conoci caba prome cu e fundacion di mundo, ma a aparece den e ultimo temponan aki pa boso motibo.” (1 Pedro 1:20) Acaso Yehova a predetermina for di principio cu Adam cu Eva lo peca y cu e sacrificio di rescate provee door di Hesucristo lo bira necesario? No. E palabra “fundacion” ta ser traduci for di un expresion Griego cu literalmente ta nifica tiramento abou di simiña. Tawatin un “tiramento abou di simiña”, es decir, yiu humano a ser consebi, prome cu Adam cu Eva a peca? No. Ta despues di nan acto di desobediencia Adam cu Eva a procrea yiu. (Genesis 4:1) Pues, despues di e rebelion pero prome cu Adam cu Eva a consebi yiu, Yehova a predetermina cu e “simiña” lo presenta. Hesus su morto y resureccion a percura pa e areglo amoroso di e rescate, mediante cua lo elimina pica hereda y tur e obranan di Satanas.—Mateo 20:28; Hebreonan 2:14; 1 Huan 3:8.

11. Ki desaroyo Yehova a predetermina den e realisacion di su proposito?

 ¹¹ Dios a predetermina un otro desaroyo den e realisacion di su proposito. Loke Pablo a skirbi na e Efesionan ta indica esaki, esta, cu Dios lo “reuni hunto tur cos den Cristo, tanto loke ta den e shelonan como loke ta riba tera.” Anto relaciona cu “loke ta den e shelonan”, es decir, e personanan scohi pa ta heredero hunto cu Cristo, Pablo a splica: “Nos a obtene un herencia, siendo predestina [“predetermina”, NW] conforme e proposito di esun cu ta obra tur cos segun e conseho di su boluntad.” (Efesionan 1:10, 11) Si, Yehova a determina di antemano cu un cantidad limita di hende lo forma un parti secundario di e simiña di Dios su muher simbolico y cu nan hunto cu Cristo lo duna humanidad e beneficionan di e rescate. (Romanonan 8:28-30, NW) Apostel Pedro a referi na e hendenan aki como “un nacion santo.” (1 Pedro 2:9) Apostel Huan tawatin e privilegio di haya sa via un vision e cantidad di persona cu lo bira coheredero hunto cu Cristo—144.000. (Revelacion 7:4-8; 14:1, 3) Den union cu Cristo como Rei, nan ta sirbi “pa e alabansa di [Dios] su gloria.”—Efesionan 1:12-14.

12. Con nos por sa cu e personanan individual di e 144.000 no ta predestina?

¹² E echo cu Yehova a predetermina e cantidad di 144.000 hende no ta nifica cu cierto personanan tawata predestina pa sirbi Dios fielmente den e manera aki. De echo, e conseho- y spiertamentonan cu tin den e Scritura Griego Cristian a ser skirbi principalmente pa guia y fortalece e unginan pa nan por mantene integridad y tene nan mes digno di nan yamada celestial. (Filipensenan 2:12; 2 Tesalonicensenan 1:5, 11; 2 Pedro 1:10, 11) Yehova sa di antemano cu 144.000 persona lo cualifica pa sirbi su proposito. Ken nan lo resulta di ta, ta depende di e manera cu esnan invita scohe pa hiba nan bida, y esei ta un decision cu cada un di nan tin cu tuma personalmente.—Mateo 24:13.

Loke Yehova Sa di Antemano

13, 14. E manera cu Yehova ta uza su capasidad di sa cos di antemano ta na harmonia cu kico, y dicon?

¹³ Siendo cu Yehova ta un Dios di profecia y proposito, con e ta uza su capasidad di sa cos di antemano? Pa cuminsa, nos tin sigur cu tur Dios su camindanan ta berdadero, husto y amoroso. Ora cu apostel Pablo a skirbi e cristiannan Hebreo di prome siglo di nos era, el a confirma cu Dios su huramento y su promesa ta “dos cos incambiabel, den cuanan ta imposibel pa Dios gaña.” (Hebreonan 6:17, 18) Den Pablo su carta na e disipel Tito, tambe el a expresa e pensamento aki ora el a skirbi cu Dios “no por gaña.”—Tito 1:2.

¹⁴ Ademas, aunke Yehova su poder no tin limite, nunca e ta actua inhusto. Moises a describi Yehova como “un Dios di fieldad y sin inhusticia, husto y recto e ta.” (Deuteronomio 32:4) Kico cu Yehova haci ta na harmonia cu su personalidad maraviyoso. Su accionnan ta manifesta e harmonia perfecto di  su cualidadnan principal di amor, sabiduria, husticia y poder.

15, 16. Ki opcionnan Yehova a pone dilanti Adam den e hofi di Eden?

¹⁵ Considera con Yehova su cualidadnan principal a ser manifesta den e susesonan cu a tuma luga den hofi di Eden. Como un Tata amoroso, Yehova a provee tur loke e criaturanan humano tawatin mester. El a crea Adam cu e capasidad di pensa, di rasona riba un asunto y di yega na un conclusion. Distinto for di bestia, cu pa gran parti ta ser dirigi pa instinto, Adam tawatin e capasidad di scohe. Pesei despues di a crea Adam, Dios a wak abou for di su trono celestial y a mira “tur loke el a traha, y ata, tur cos tawata masha bon.”—Genesis 1:26-31; 2 Pedro 2:12.

¹⁶ Ora cu Yehova a scohe pa duna Adam e mandamento pa no come di “e palo di conocemento di bon y malo”, El a provee suficiente instruccion di manera cu Adam por a dicidi kico pa haci. El a permiti Adam come for di “tur palo di e hofi” cu excepcion di un palo, y a spiert’e di e resultadonan fatal di come di e fruta di e palo prohibi. (Genesis 2:16, 17) El a splica Adam kico lo ta e consecuencianan di su accion. Kico Adam lo haci?

17. Dicon nos por bisa cu Yehova ta selectivo den loke e ta scohe pa mira di antemano?

¹⁷ Yehova aparentemente a scohe pa no mira di antemano kico Adam—y Eva—lo haci, aunke cu e tawatin e capasidad di por sa tur cos di antemano. Pesei e asunto no ta si Yehova por mira futuro di antemano, sino si e ta scohe pa haci esei. Ademas, nos por rasona cu Yehova, siendo un Dios di amor, lo no a predetermina concientemente y cruelmente cu rebelion lo mester a tuma luga, compaña pa tur su consecuencianan tristo. (Mateo 7:11; 1 Huan 4:8) Pues, Yehova ta selectivo den loke e ta scohe pa mira di antemano.

18. Dicon e echo cu Yehova ta selectivo den loke e ta scohe pa mira di antemano no ta indica imperfeccion di su parti?

¹⁸ Acaso e echo cu Yehova ta selectivo den scohe loke e ta mira di antemano ta nifica cu di un manera of otro e ta imperfecto of falta poder? No. Moises a describi Yehova como “e Baranca”, y a agrega: “Su obra ta perfecto.” No ta Yehova ta responsabel pa e consecuencianan di pica humano. E efectonan desastroso cu nos tur ta experencia awe a origina di Adam su acto inhusto di desobediencia. Apostel Pablo a rasona bon cla cu “door di un hende pica a drenta den mundo, y morto door di pica, y asina morto a pasa pa tur hende, pasobra tur a peca.”—Deuteronomio 32:4, 5; Romanonan 5:12; Yeremias 10:23.

19. Ki preguntanan nos lo considera den e siguiente articulo?

¹⁹ For di loke nos a trata te asina leu, nos a siña cu no tin inhusticia cerca Yehova. (Salmo 33:5) Al contrario, Yehova ta uza tur su capasidad, cualidadnan moral y normanan na harmonia cu su proposito. (Romanonan 8:28) Como e Dios di profecia, Yehova ta “declara e fin for di principio, y for di temponan antiguo, cosnan cu no a wordo haci ainda.” (Isaias 46:9, 10) Tambe nos a mira cu e ta selectivo den uza su capasidad di mira futuro di antemano. Pues anto, ki efecto esaki mester tin riba nos? Con nos por haci sigur cu nos decisionnan ta conforme Dios su proposito amoroso? Y ki bendicionnan nos lo haya door di haci esei? E siguiente articulo lo trata e preguntanan aki.

[Nota]

Bo Por Splica?

• Ki ehempelnan di antiguedad ta confirma cu Dios su “palabra” semper ‘a alcansa su proposito’?

• Kico Yehova a predetermina en conexion cu su “proposito eterno”?

• Den ki manera Yehova ta uza su capasidad di mira futuro di antemano?

[Preguntanan di Estudio]

[Plachi na pagina 22]

Yehosafat tawatin confiansa den Yehova

[Plachi na pagina 23]

Dios a predeci Hesus su morto y resureccion

[Plachi na pagina 24]

Acaso Yehova a predetermina loke Adam cu Eva lo haci?