Aumento Entre e Varios Gruponan Etnico di Uganda

UGANDA, situa entre dos extension di e Gran Vaye di Rift di Oost Africa y na ambos banda di evenaar, ta un pais sumamente bunita. E ta rico na naturalesa y su flora y fauna ta interesante. Debi cu e ta ubica riba e gran altiplano (hoogland) di Africa, e tin un clima fresco y un paisahe fascinante di seronan cu ta extende pa cientos di kilometer.

Masha poco pais tin partinan cu ta varia for di sumamente friu te cayente den un area chikito, manera tin na Uganda. E ta extende for di e puntanan di sero cubri cu sneu di e Seronan di Luna, e Seronan di Ruwenzori, den west, pa e areanan semiarido den oost. Den su vayenan bo por topa olifanti, bufalo y leon, y den e seronan y selvanan denso ta biba gorila, chimpanse y mas cu 1.000 sorto di parha. Gran parti di e continente Africano ta lucha cu secura y hamber, pero Uganda ta bendiciona cu riu y lago, manera Victoria, e di dos lago di awa dushi mas grandi na mundo. Den parti noord, Lago Victoria ta desemboca den Riu Nilo. Nada straño cu Winston Churchill a referi na e tera aki como “e perla di Africa”!

“E Perla” Ta Briya Awe

Sinembargo, e atraccion principal di Uganda ta su pueblo amigabel, hospitalario y hopi varia. Por describi e pais predominantemente “cristian” aki como un mescla di varios grupo etnico y cultura, cu te na e dia djawe tin nan propio tradicion- y formanan di bisti.

Ultimamente, mas y mas Ugandes ta respondiendo na e bon nobo di Bijbel relaciona cu e tempo ora pas permanente lo reina rond mundo. (Salmo 37:11; Revelacion 21:4) Ta un reto pa hiba e mensahe aki na tur hende, den un pais cu ta casi mes grandi cu Gran Bretania.

For di un cuminsamento chikito ora e prome bautismo di un residente local como Testigo di Yehova dedica a tuma luga den Lago Victoria na 1955, e “chikito” en berdad a bira mil na 1992. Desde e tempo ei padilanti tabatin un aumento continuo. Esaki ta na harmonia cu e  palabranan alentador di Dios: “Na su debido tempo, ami, SEÑOR, lo pura haci esaki.”—Isaias 60:22.

Nan Ta Vence Bareranan di Idioma

Ingles ta e idioma oficial y hopi hende ta papi’e, specialmente den educacion, pero e no ta e idioma nativo di mayoria Ugandes. Pues, den nan afan pa alcansa hende cu e bon nobo, Testigonan di Yehova ta tuma otro idiomanan principal tambe na consideracion. Esaki tabata necesario pasobra mas cu 80 porciento di e 25 miyon hendenan di e pais ta biba den areanan di cunucu of stadnan chikito, caminda hende ta depende principalmente di nan idioma materno pa comunica cu otro. Pues ta un reto pa alcansa e gruponan di idioma aki y pa satisface e necesidadnan spiritual di e hendenan.

No obstante, Testigonan di Yehova ta haciendo un gran esfuerso pa satisface e necesidadnan aki dor di predica na hende den nan mes idioma y dor di produci literatura biblico den varios idioma. Na e sucursal den e capital, Kampala, teamnan di traduccion ta prepara literatura pa cuater grupo di idioma, cu ta Acholi, Luganda, Ihukonzo y Runyankore. Ademas, asambleanan cristian teni den varios idioma den henter e pais tabatin asistencianan excelente, mas cu dobel e cantidad di Testigo di Yehova.Esaki ta indica bon cla cu e esfuersonan pa alcansa varios grupo di idioma ta contribuyendo na un aumento spiritual rapido. Pero esaki no ta tur cos.

Pioneronan Ta Encabesa e Obra

Congregacionnan ta apoya di buena gana e campañanan anual di mas o menos tres luna, durante cua nan ta bai predica den teritorionan aisla. (Echonan 16:9) Un cantidad creciente di pionero, of predicado di tempo completo, jong y entusiasma ta encabesa e obra aki. Nan ta bai areanan leu caminda, den algun caso, e mensahe di e bon nobo no a yega ainda.

Dos Testigo a ser asigna como pionero special pa un periodo di tres luna na Bushenyi, un pueblo chikito den parti west di Uganda. Hunto cu e unico Testigo den e area ei, nan a  predica y organisa reunionnan cristian. Denter di un luna, e dos pioneronan tabata conduci estudio regular di Bijbel cu 40 persona, di cua 17 a cuminsa asisti na e reunionnan di Testigonan di Yehova. E pioneronan ta conta: “Algun persona cu nos a ofrece e foyeto Kico Dios Ta Rekerí di Nos? * a bini nos cas algun dia despues cu varios papel caminda nan a skirbi e contestanan riba e preguntanan cu tin den e foyeto. Nan kier a sa si nan contestanan tabata corecto.” Awe, den e stad ei tin un congregacion cu su propio Salon di Reino.

Dos pionero a biaha bai un teritorio den parti west di Uganda caminda nunca prome e mensahe di e bon nobo no a yega di ser predica. Nan a skirbi: “E hendenan tin un berdadero sed pa e berdad di Bijbel. Durante e tres lunanan cu nos tabata akinan, nos por a cuminsa y conduci 86 estudio di Bijbel.” Un poco despues a establece oficialmente un grupo di Testigo den e area ei.

Otro Trahadonan Entusiasma den e Teritorio

Entre e pioneronan yen di entusiasmo tin algun cu a sirbi pa hopi aña. Por ehempel, prome cu Patrick a bira un Testigo di Yehova, e tabata toca clarinet den e banda di forsanan aereo di e gobernante di Uganda, Idi Amin. Na 1983, seis luna despues cu Patrick a batisa, el a join e filanan di predicadonan di tempo completo. Awe e ta un superintendente biahero cu ta bishita y anima e congregacionnan.

Margaret a batisa na 1962. A pesar cu e tin casi 80 aña di edad y ta lucha cu un problema di heup cu ta strob’e di move manera e kier, e ta dedica rond di 70 ora pa luna na comparti e speransa basa riba Bijbel cu su bisiñanan. E ta pone e literatura na bista riba un banki pafo di su cas y ta cuminsa combersa cu ken cu pasa eibanda y cu tin gana di scucha e bon nobo tocante un mundo nobo pacifico.

Simon, un cunukero di oost Uganda, tabata buscando e berdad pa 16 aña largo ora cu na 1995 el a haya algun literatura publica dor di Testigonan di Yehova. Loke el a lesa a dun’e e deseo pa sa mas tocante e Reino di Dios y e proposito maraviyoso di Yehova pa tera. Na Kamuli caminda Simon tabata biba no tabatin Testigo, pues el a biaha bai Kampala, 140 kilometer leu, pa busca nan. Awe tin un congregacion den su pueblo.

“Nos T’ei pa Keda”

Mescos cu den otro areanan di Africa, hopi hende ta spera pa un grupo religioso tin un  luga di adoracion adecua. Pa algun congregacion di Testigo di Yehova, esaki a presenta un problema aparentemente sin solucion pasobra nan no tabatin e medionan financiero pa construi un Salon di Reino adecua. No tin palabra pa describi e gratitud cu e rumannan a sinti ora cu na cabamento di 1999 a cuminsa rond mundo cu un programa acelera pa construi Salon di Reino. Durante e siguiente cinco añanan, a traha 40 Salon di Reino na Uganda. Awe, casi tur congregacion tin nan propio Salon di Reino modesto pero representabel. E mensahe cu e actividad di construccion ei ta transmiti na comunidadnan local ta: “Nos t’ei pa keda.” Esaki sin duda a contribui na aumento.

Un congregacion chikito den noord di Uganda tabata tene su reunionnan bou di algun palo di mango cu tabata duna bon sombra. Ora a logra haya un tereno, cosnan a cana rapidamente. E rumannan di e team di construccion, cu yudansa di e Testigonan local, a cuminsa construi un Salon di Reino. Un expolitico prominente den e area a keda impresiona cu e trabou. El a ofrece e rumannan su garashi pa nan uz’e pa tene nan reunionnan te ora e Salon di Reino tabata cla. El a acepta un estudio di Bijbel tambe cu un di e trahadonan voluntario di construccion. Awor e ta un publicador batisa yen di entusiasmo, contento di por rindi adoracion na Yehova den e bunita Salon di Reino ei!

Na un proyecto di construccion di Salon di Reino den e parti zuidoost di e pais, e amabilidad, e amor y spirito di cooperacion cu un mazon local a observa den e rumannan a conmov’e asina tanto cu el a ofrece pa yuda voluntariamente cu e trabou. Den e fase final di e proyecto, el a asta traha henter anochi pa e rumannan por a caba cu e Salon di Reino pa e programa di dedicacion e siguiente mainta. El a bisa: “Boso ta e unico hendenan cu di berdad ta stima otro, no cu palabra so.”

A Pesar di Problema, Tin Potencial pa Aumento

Awor cu e rumannan ta predicando den mas teritorio na Uganda, tin un crecemento formal den e cantidad di Testigo einan, y hopi hende interesa ta asociando cu e congregacionnan. Sinembargo, e gran cantidad di refugiado cu a basha drenta Uganda ta motibo di precupacion. Guera civil den paisnan bisiña a afecta e pueblo di Yehova tambe. E Testigonan den camponan di refugiado a manifesta un confiansa grandi den Yehova. Un ex alto oficial di un pais bisiña cu tambe a yega di persigui e Testigonan tempo cu tabatin un prohibicion den e pais ei, ta corda cu antes e tabata bon para. Despues cu el a studia Bijbel den un di e camponan di refugiado y a bira Testigo di Yehova, el a comenta: “Prosperidad material y un posicion halto den e mundo aki no tin mucho balor. Aunke mi ta pober y malo aworaki, mi bida ta mucho mas mihor cu nunca. Mi conoce Yehova, y mi ta masha gradicido pa e privilegio di por acerc’e den oracion. Ademas di tin un speransa firme pa futuro, mi sa pakico nos tin cu soporta problema awe. Pues mi tin un pas interior cu nunca antes mi tabatin.”

Tin un dicho cu ta bisa cu si bo hinca un pida palo den e tera fertil di Uganda anochi, pa mainta lo e tin raiz. E crecemento spiritual cu ta tumando luga den e pais ei ta indica cu e tereno spiritual tambe ta masha fertil. Nos ta gradici Yehova Dios cu el a permiti tempo pa mas hende ainda di e poblacion hopi varia di Uganda siña tocante su Reino. Hesus a compara esaki cu un “perla di gran balor” cu mas y mas hende na Uganda a cuminsa compronde.—Mateo 13:45, 46.

[Nota]

[Mapa na pagina 8]

(Pa e texto den su formato completo , wak e publicacion)

SUDAN

UGANDA

Riu Nilo

Kamuli

Tororo

Kampala

Bushenyi

Lago Victoria

KENIA

TANZANIA

RUANDA

[Plachi na pagina 9]

Tres di e tantisimo predicadonan pionero yen di entusiasmo

[Plachi na pagina 10]

Patrick

[Plachi na pagina 10]

Margaret

[Plachi na pagina 10]

Simon

[Plachi na pagina 10]

Congreso di districto na Tororo

[Reconocemento pa Potret na pagina 8]

Trasfondo: © Uganda Tourist Board