‘Bo Recordatorionan Ta Mi Delicia’

“Tur loke a wordo skirbi prome aya a wordo skirbi pa nos instruccion.”—ROMANONAN 15:4.

1. Con Yehova ta duna nos recordatorio, y dicon nos tin mester di nan?

YEHOVA bes tras bes ta duna su pueblo recordatorio pa yuda nan trata cu e presionnan di e tempo dificil aki. Algun di e recordatorionan aki ta bin dilanti durante nos lesamento di Bijbel personal, mientras cu otro recordatorionan kisas ta bin dilanti den forma di informacion of comentario durante reunionnan cristian. Mayoria cos cu nos ta lesa of tende na e ocasionnan ei ta cosnan cu nos sa caba. Probablemente nos a yega di considera informacionnan similar caba. Pero como cu nos tin e tendencia di lubida, nos continuamente tin cu refresca nos memoria relaciona cu Yehova su proposito-, lei- y instruccionnan. Nos mester aprecia Dios su recordatorionan. Nan ta curasha nos pasobra nan ta yuda nos enfoca riba e cosnan cu a motiva nos pa sigui un curso di bida na harmonia cu e boluntad di Dios. P’esei e salmista a canta na Yehova: “Bo testimonionan [of, “recordatorionan”, NW] . . . ta mi delicia.”—Salmo 119:24.

2, 3. (a) Dicon Yehova a conserva te den nos tempo e storia di bida di personahenan biblico? (b) Cua relatonan for di e Scritura nos lo trata den e articulo aki?

² A pesar cu e Palabra di Dios a ser skirbi hopi siglo pasa, e ta bibo y activo. (Hebreonan 4:12) E ta duna nos relatonan veridico di e bida di personahenan biblico. Aunke ta asina cu compara cu tempo biblico, custumbernan y puntonan di bista a cambia hopi, e problemanan cu nos ta confronta hopi biaha si ta similar na esnan cu e hendenan di e tempo aya a confronta. Hopi di e relatonan cu Bijbel a conserva pa nos beneficio, ta duna nos ehempelnan conmovedor di personanan cu a stima Yehova y cu a sirbie fielmente a pesar di circunstancianan desfaborabel. Otro relatonan ta hala atencion na e tipo di conducta cu Dios ta odia. Yehova a laga inclui tur e relatonan personal aki den Bijbel, tanto bon como malo, pa recorda nos di lesnan importante. Apostel Pablo a skirbi: “Tur loke a wordo skirbi prome aya a wordo skirbi pa nos instruccion, pa dor di perseverancia y e encurashamento di Scrituranan nos por tin speransa.”—Romanonan 15:4.

³ Laga nos enfoca riba tres relato den e Scritura: e relato di David su manera di trata cu Saul, esun di Ananias y Safira, y esun di Yosef (Hose) su comportacion pa cu e esposa di Potifar. Cada un di e relatonan aki ta siña nos algun les balioso.

Leal na e Areglonan di Dios

4, 5. (a) Ki situacion tabatin cu a envolve Rei Saul y David? (b) Con David a reacciona riba Saul su rabia contra dje?

⁴ Rei Saul a resulta infiel na Yehova y no tabata digno di goberna riba Su pueblo. Pues, Dios a rechas’e y a manda profeta Samuel ungi David como e futuro rei di Israel. Ora cu David a demostra su habilidad y balentia extraordinario como guerero y a wordo aclama pa e pueblo, Saul a cuminsa mira David como un rival. Varios biaha Saul a purba mat’e. Pero tur biaha David a sobrevivi e atakenan pasobra Yehova tabata cu ne.—1 Samuel 18:6-12, 25; 19:10, 11.

 ⁵ Pa añanan, David a hay’e obliga ta biba como fugitivo. Ora cu David a haya un chens pa mata Saul, su compañeronan a urgie pa haci esei, bisando cu ta Yehova a entrega David su enemigo den su man. Sinembargo, David tabata nenga di haci esei. Su lealtad na Yehova y e respet cu e tabatin pa Saul su posicion como Rei ungi di e pueblo di Dios a motiv’e pa actua asina. No ta Yehova a nombra Saul como Rei di Israel? Wel, Yehova lo kit’e tambe ora cu e haya ta bon. David a rasona cu e no tabatin derecho di interveni. Despues cu David a haci tur loke cu e tabata por bou di e circunstancianan ei pa suavisa Saul su rabia contra dje, David a conclui: “Siguramente SEÑOR lo dal e, of su dia di muri lo yega, of e lo bai den bataya y perece. SEÑOR warda mi di saca mi man contra SEÑOR su ungi”!—1 Samuel 24:3-15; 26:7-20.

6. Dicon ta importante pa nos considera e storia di David y Saul?

⁶ E relato aki ta contene un les masha importante. Bo a yega di puntra bo mes dicon cierto problemanan ta surgi den e congregacion cristian? Podise tin un persona ta actua den un manera cu no ta corecto. Su comportacion kisas no ta envolve malecho serio, pero e ta molestia bo. Con bo mester reacciona? Motiva pa interes cristian den e persona ei y lealtad na Yehova, bo por dicidi di papia cu ne den un manera bondadoso, cu e meta di resolve e asunto. Pero kico si e problema ta persisti? Despues cu bo a haci tur loke rasonablemente bo por a haci, lo bo tin cu laga e asunto den man di Yehova. Esei ta loke David a haci.

7. Den imitacion di David, con nos mester reacciona si nos ta experencia inhusticia of prehuicio?

⁷ Of podise bo ta confronta problemanan di inhusticia social of di prehuicio religioso. Kisas no tin mucho cos cu bo por haci tocante esei na e momentonan aki. Situacionnan asina por ta hopi dificil pa soporta, pero David su reaccion riba inhusticia ta siña nos un les. E salmonan cu David a skirbi ta un registro conmovedor di su oracionnan sincero na Dios pa ward’e di e garanan di Saul. Pero tambe nan ta registra su lealtad na Yehova y su interes profundo pa Dios su nomber sea glorifica. (Salmo 18:1-6, 25-27, 30-32, 48-50; 57:1-11) David a keda leal na Yehova a pesar cu Saul a sigui actua na un manera inhusto pa hopi aña. Nos tambe mester keda fiel na Yehova y na su organisacion sin importa ki inhusticia nos ta sufri y sin importa kico otro hende ta haci. Nos por tin sigur cu Yehova ta plenamente conciente di e situacion.—Salmo 86:2.

8. Con Testigonan di Yehova na Mozambique a reacciona ora cu nan lealtad na Yehova a ser poni na prueba?

⁸ Cristiannan na Mozambique ta un ehempel di nos tempo di personanan cu a pega fielmente na Yehova den tempo di prueba. Na 1984 nan pueblitonan cada bes tabata ser ataca pa miembronan arma di un movemento di resistencia cu tabata horta cos, kima casnan y mata hende. Tabata parce cu e cristiannan berdadero aki no por a haci casi nada pa defende  nan mes. E movemento militarisa tabata purba recluta e habitantenan di e area of obliga nan sostene e movemento den otro maneranan. Testigonan di Yehova a haya cu debi na nan posicion di neutralidad cristian nan no por a haci esei. Como cu nan a nenga di participa, e movemento a bira furioso riba nan. Nan a mata rond di 30 Testigo di Yehova den e periodo turbulento ei, pero ni sikiera e menasa di morto no por a kibra e lealtad di Dios su pueblo. * Mescos cu David, nan a soporta inhusticia pero cu tempo nan a sali victorioso.

Un Recordatorio Cu Ta Sirbi Como un Spiertamento

9, 10. (a) Con nos por beneficia di cierto ehempelnan den Bijbel? (b) Kico tabatin di malo den loke Ananias cu Safira a haci?

⁹ Algun di e personanan menciona den e Scritura ta sirbi como recordatorionan cu ta spierta nos pa conducta cu nos mester evita. De echo, Bijbel ta contene hopi relato di personanan, asta algun sirbido di Dios, cu a haci loke ta malo y cu a sufri e consecuencianan. (1 Corintionan 10:11) Un di e relatonan ei ta esun di Ananias y Safira, un pareha casa cu tabata miembro di e congregacion cristian di prome siglo na Herusalem.

¹⁰ Despues di Pentecoste di aña 33 di nos era, a surgi e necesidad di percura materialmente pa e creyentenan nobo cu a keda Herusalem pa beneficia di asociacion cu e apostelnan. Algun miembro di e congregacion a bende nan propiedad pa haya fondo pa comparti cu otro ya asina ningun cristian mester a pasa necesidad. (Echonan 2:41-45) Ananias cu Safira a bende un tereno y a trece solamente un parti di e benta pa e apostelnan, pretendiendo cu nan donacion a representa tur e placa cu nan a haya di e benta. Ta berdad cu Ananias cu Safira tabatin derecho di duna cuanto cu nan tabata kier, pero nan motivacion tabata robes, y nan a actua na un manera deshonesto. Nan kier a impresiona e apostelnan y e congregacion, y nan kier a duna e impresion di ta haci mas di loke en realidad nan a haci. Apostel Pedro, bou di inspiracion di spirito santo, a desenmascara nan deshonestidad y hipocresia, y Yehova a mata nan.—Echonan 5:1-10.

11, 12. (a) Menciona algun recordatorio biblico tocante honestidad. (b) Ki beneficionan honestidad ta trece?

¹¹ Si algun dia nos sinti e tentacion pa no papia berdad den un intento pa laga hende  pensa bon di nos, laga e storia di Ananias cu Safira sirbi como un spiertamento serio. Kisas nos por gaña otro hende, pero nos no por gaña Yehova. (Hebreonan 4:13) Bes tras bes e Scritura ta conseha nos pa nos ta honesto cu otro, pasobra lo no tin luga pa ningun gañado despues cu limpia e tera di inhusticia. (Proverbionan 14:2; Revelacion 21:8; 22:15) E motibo pa esaki mester ta bisto. E promotor di tur mentira ta ningun otro cu Satanas e Diabel.—Huan 8:44.

¹² Un bida honesto ta trece masha hopi beneficio. Entre nan, nos tin un consenshi limpi y e satisfaccion di cu otro hende ta confia nos. Den hopi caso, cristiannan a haya trabou of a keda cu nan trabou pasobra nan tabata honesto. Sinembargo, e beneficio di mas importante ta cu honestidad ta duna nos e chens di forma amistad cu e Dios Todopoderoso.—Salmo 15:1, 2.

Keda Moralmente Puro

13. Den ki situacion Yosef a haya su mes, y con el a reacciona?

¹³ Na edad di 17 aña nan a bende Yosef, un yiu homber di patriarca Yacob, como catibo. Cu tempo el a bira parti di e famia di cas di Potifar, un oficial Egipcio, caminda Yosef a capta atencion di e esposa di su doño. E mohe kier a tene relacion sexual cu Yosef, kende tabata un mucha homber cu tin bon tipo, y dia tras dia e tabata urgi Yosef: “Drumi cu mi.” Yosef tabata leu di su famia den un pais caminda ningun hende no tabata conoc’e. Facilmente e por a tene relacion cu e mohe aki sin cu otro hende a haya sa di esei. Sinembargo, ora cu e esposa di Potifar finalmente a cohe Yosef tene, Yosef a hui bai.—Genesis 37:2, 18-28; 39:1-12.

14, 15. (a) Dicon e storia di Yosef ta importante pa nos? (b) Dicon un ruman muher cristian ta gradicido cu el a haci caso di Dios su recordatorionan?

¹⁴ Yosef a lanta den un famia temeroso di Dios, y e tabata sa cu relacion sexual entre hende cu no ta casa cu otro ta malo. El a puntra: “Con anto mi por haci e maldad grandi aki y peca contra Dios?” Probablemente el a yega na e conclusion ei pasobra el a corda riba e norma cu Dios a pone pa hende den e hofi di Eden: monogamia, esta, un solo esposa pa un solo esposo. (Genesis 2:24) Dios su pueblo djawe por beneficia si nan reflexiona riba e manera cu Yosef a reacciona den e situacion ei. Na algun luga, hende su actitud pa cu relacion sexual ta asina permisivo cu otro hobennan ta haci bofon di esnan cu ta nenga di envolve nan mes den inmoralidad. Relacion sexual pafo di matrimonio entre adultonan ta comun. Pues, e relato di Yosef ta un recordatorio oportuno pa nos. Te ainda Dios su norma ta cu fornicacion y adulterio ta pica. (Hebreonan  13:4) Hopi hende cu a cai pa e presion pa participa den relacion sexual ilicito ta di acuerdo cu tin motibonan combencente pa no haci esei. Entre e resultadonan indeseabel por tin e sintimento di humiliacion, un mal consenshi, jaloersheid, embaraso y malesa transmiti sexualmente. Manera e Scritura ta recorda nos, un persona cu practica fornicacion ta “peca contra su mes curpa.”—1 Corintionan 5:9-12; 6:18; Proverbionan 6:23-29, 32.

¹⁵ Jenny, * un Testigo di Yehova soltera, tin motibo pa aprecia Dios su recordatorionan. Na trabou tabatin un colega cu tin bon tipo ta mustra interes romantico den dje. Ora cu Jenny no a reacciona, e homber a cuminsa mustr’e mas atencion. Jenny a admiti: “Mi tabatin cu lucha pa keda moralmente puro, ya cu bo ta sinti bo bon ora cu un persona di e sexo opuesto ta tuma nota di bo.” Sinembargo, el a bin realisa cu e homber simplemente tabata purba agrega su nomber na e lista di hende muher cu el a drumi cu ne. Ora cu Jenny a sinti cu su determinacion pa resisti tabata debilita, el a roga Yehova pa yud’e keda fiel na dje. Jenny a haya cu e cosnan cu el a siña segun cu el a haci investigacion den Bijbel y den publicacionnan cristian tabata manera recordatorionan cu a stimul’e pa keda alerta. Un di e recordatorionan ei tabata e storia di Yosef y e esposa di Potifar. Jenny a conclui: “Tanten cu mi keda recorda mi mes cuanto mi ta stima Yehova, mi no tin cu tene miedo cu lo mi comete e gran maldad aki y peca contra dje.”

Haci Caso di Dios Su Recordatorionan!

16. Con nos por beneficia di repasa y medita riba e bida di personanan menciona den Bijbel?

¹⁶ Nos tur por aumenta nos aprecio pa e normanan di Yehova dor di purba compronde dicon el a preserva cierto relatonan den e Scritura pa nos. Kico nan ta siña nos? Ki cualidadnan of tendencianan cu e personahenan biblico a demostra nos tin cu imita of evita? Literalmente centenares di persona ta aparece den e paginanan di e Palabra di Dios. Lo ta bon pa tur hende cu ta stima instruccion divino cultiva e deseo pa haya e sabiduria cu ta duna bida, y esei ta inclui e lesnan cu nos por siña for di e ehempelnan cu Yehova a preserva pa nos cuidadosamente. Hopi biaha e revista aki mes a presenta articulonan tocante e tipo di personanan ei kende nan storia di bida tin algo di siña nos. Pakico bo no ta tuma tempo pa repasa e articulonan ei?

17. Kico abo ta pensa di Yehova su recordatorionan, y dicon?

¹⁷ Nos por ta hopi gradicido pa e interes amoroso cu Yehova ta desplega na hende cu ta haci esfuerso pa cumpli cu su boluntad! Nos siguramente no ta perfecto, mescos cu e hombernan y muhernan menciona den Bijbel no tabata perfecto. Sinembargo, e registro cu tin di nan accionnan ta un recurso sumamente balioso pa nos. Haciendo caso di Yehova su recordatorionan, nos por evita di comete erornan serio, y nos por imita e excelente ehempel di esnan cu a cana den e camindanan di husticia. Si nos haci asina, nos lo por canta hunto cu e salmista: “Bendiciona ta esnan cu ta warda [Yehova] su testimonionan [“recordatorionan”, NW], cu ta busc’e cu henter nan curason; mi alma ta warda bo testimonionan [“recordatorionan”, NW], y mi ta stima nan masha hopi mes.”—Salmo 119:2, 167.

[Nota]

Con Lo Bo Contesta?

• Kico nos por siña for di David su actitud pa cu Saul?

• Kico e relato di Ananias cu Safira ta siña nos?

• Dicon e storia di bida di Yosef ta importante specialmente pa nos awe?

[Preguntanan di Estudio]

[Plachi na pagina 26]

Dicon David a nenga di laga nan mata Saul?

[Plachi na pagina 27]

Kico nos ta siña for di e relato di Ananias cu Safira?

[Plachi na pagina 28]

Kico a pone Yosef rechasa proposicionnan inmoral?