Con Felis Bo Ta?

KISAS en berdad bo ta puntra bo mes: ‘Con felis mi ta?’ Sociologonan ta haciendo hopi esfuerso pa purba saca afo con abo of otro hende lo contesta, pero nan tarea no ta nada facil. Mescos cu bo no por midi e amor cu un homber tin pa su esposa of e cantidad di tristesa cu un morto ta causa den famia, asina bo no por midi e felicidad cu un persona ta sinti. Emocion no ta un cos cu bo por cuantifica. Sinembargo, cientificonan ta reconoce un berdad basico si: tur ser humano tin e potencial pa ta felis.

A pesar cu hende a nace cu e potencial pa ta felis, problemanan serio ta pone cu awe ta reina un gran infelicidad. Por ehempel, den algun stad, victimanan di AIDS a yena santananan. Autoridadnan ta permiti pa bolbe habri e grafnan mas bieu pa traha luga pa dera esnan cu a muri recientemente. Na algun parti di Africa, hopi hende ta gana nan pan di cada dia cu trahamento di caha di morto. Y unda cu bo bira, bo ta mira hopi cara tristo di hende cu ta sufri di enfermedad serio y di esnan cu a perde famia y amigo den morto.

Kico di paisnan mas prospero? Cambio di circunstancia inespera por pone hende cu no ta prepara pa esei perde nan siguridad financiero di un dia pa otro. Na Merca, hopi pensionado mester a bai traha bek pasobra nan a perde parti di nan pension. Hopi bes gastonan medico ta caba cu tur loke un famia a spar. Un consehero huridico a bisa: “Bo ta bira tristo ora bo ta mira e hendenan aki cana drenta cu gastonan enorme y yen di problema cu salud. Hopi biaha bo ta haya bo ta bisa nan: ‘Boso ta bai perde boso cas.’” Pero kico di hende cu no tin precupacion financiero? Nan tambe lo por ta infelis?

Tin hende ta manera e famoso compositor Richard Rodgers. Nan a bisa di dje: “Masha poco hende a yega di duna asina tanto deleite na asina tanto hende.” Pero maske su canticanan a deleita otro hende, e tabata sufri di depresion cronico. El a alcansa e dos metanan cu hopi hende ta ambiciona, esta, placa y fama. Pero e tabata felis? Un persona cu a skirbi su biografia a remarca: “[Rodgers] a bira sumamente exitoso den su trabou, el a hiba un bida di luho y dos biaha el a gana e Premionan di Pulitzer hunto cu su partner. Pero hopi biaha tambe e tabata infelis y deprimi.”

Manera bo por a ripara, ora hende depende di rikesa pa haya felicidad, hopi bes nan ta keda desilusiona. Un reportero di inversion pa e corant The Globe and Mail di Toronto, Canada, a describi e “soledad y bashi” cu hopi hende rico ta sinti. Segun un consehero financiero, ora mayornan rico ta malcria nan yiunan cu hopi placa y e cosnan cu placa por cumpra, “mayoria bes nan ta sembra e simiñanan di miseria pa futuro.”

 Tin un Base Solido pa Felicidad?

Pa un mata floria, e mester haya bon tera, awa y un clima apropia. Mescos tambe, investigadonan ta reconoce cu cierto condicionnan di bida ta contribui na felicidad. Esakinan ta inclui un salud satisfactorio, bon trabou, suficiente cuminda, un dak riba cabes, paña pa bisti, logronan di deseonan creativo y berdadero amigo.

Probablemente bo ta di acuerdo cu e condicionnan ei por yuda haci hende felis. Pero tin un factor cu ta mas importante. Esei ta conocemento di “e Dios felis”, kende su nomber ta Yehova. (1 Timoteo 1:11, NW) Con e conocemento ei ta yuda? Yehova ta nos Creador, y el a duna nos e potencial pa ta felis. Ta logico anto cu e sa kico por haci nos berdaderamente felis. E siguiente articulo ta describi con e ta dirigi hende di tur parti di mundo of circunstancia di bida na felicidad duradero.

[Plachi na pagina 4]

Mescos cu un mata di flor, felicidad mester haya e condicionnan adecua pa e por crece

[Reconocemento pa Potret na pagina 3]

© Gideon Mendel/CORBIS