“O Cuanto Mi Ta Stima Bo Lei!”

“O cuanto mi ta stima bo lei! E ta mi meditacion henter dia.”—SALMO 119:97.

1, 2. (a) Ki situacion e escritor inspira di Salmo 119 a confronta? (b) Con el a reacciona, y dicon?

E ESCRITOR di Salmo 119 a confronta un prueba severo. Enemigonan arogante cu no tabata haci caso di Dios su lei tabata haci bofon di e salmista y a lansa mentira contra dje. Prinsnan tabata consulta hunto contra dje y a persigui e. E malbadonan a rondon’e, y asta su bida tabata na peliger. Tur esaki a pon’e “yora di tristesa.” (Salmo 119:9, 23, 28, 51, 61, 69, 85, 87, 161) A pesar di tur e dificultadnan aki, e salmista a canta: “O cuanto mi ta stima bo lei! E ta mi meditacion henter dia.”—Salmo 119:97.

² Lo ta bon pa nos puntra nos mes: “Con e lei di Dios por tabata un fuente di consuelo pa e salmista?” Wel, locual cu a sosten’e tabata su confiansa cu Yehova ta interesa den dje. E echo cu e salmista tabata familiarisa cu e areglonan amoroso di e lei ei, a hacie felis a pesar di e dificultadnan cu opositornan a caus’e. El a reconoce cu Yehova a trata bondadosamente cu ne. Ademas, como cu el a aplica e guia cu a bin di Dios su lei, esei a hacie mas sabi cu su enemigonan y asta a manten’e na bida. Obediencia na e lei a dun’e pas y un bon consenshi.—Salmo 119:1, 9, 65, 93, 98, 165.

3. Dicon ta un reto pa cristiannan biba di acuerdo cu e normanan di Dios awe?

³ Algun sirbido di Dios djawe tambe ta pasando den pruebanan pisa di nan fe. Kisas nos no ta confrontando un crisis cu ta menasa nos bida manera tabata e caso cu e salmista, pero si nos ta biba den “temponan trabahoso.” Hopi hende cu nos ta den contacto cu ne diariamente, no tin respet pa loke ta bon of malo desde e punto di bista di Dios; nan metanan ta materialista y ta enfoca solamente riba nan mes, nan actitud ta arogante y sin respet. (2 Timoteo 3:1-5) Cristiannan hoben cu regularidad ta confronta situacionnan cu ta forma un menasa pa nan normanan moral. Den un ambiente asina, kisas ta dificil pa mantene nos amor pa Yehova y pa loke ta corecto. Con nos por proteha nos mes?

4. Con e salmista a mustra aprecio pa e lei di Dios, y acaso cristiannan mester haci mescos?

⁴ Loke a yuda e salmista resisti e presionnan cu el a confronta, tabata e echo cu el a dedica tempo na studia e lei di Dios y medita cu aprecio riba dje. Asina el a bin cultiva un amor pa Dios su lei. De echo, casi tur versiculo di Salmo 119 ta menciona un of otro faseta di e lei di Yehova. * Awe cristiannan no ta mara na e Lei di Moises cu Dios a duna e antiguo nacion di Israel. (Colosensenan 2:14) Sinembargo, e principionan expresa den e Lei ei te ainda ta di gran balor. E principionan aki tabata un consuelo pa e salmista, mescos cu nan por ta un consuelo pa Dios su sirbidonan cu ta luchando pa trata cu e dificultadnan di bida di awendia.

5. Ki aspectonan di e Lei di Moises nos ta bai considera?

⁵ Laga nos wak ki animacion nos por saca for di solamente tres aspecto di e Lei di Moises: e  areglo di sabat, e areglo pa laga hende pober piki loke a resta di cosecha y e mandamento pa no cudisha. Den cada caso, nos lo ripara cu si nos kier supera e dificultadnan y presionnan cu ta caracterisa nos tempo, ta importante pa nos compronde e principionan cu ta e base di e leinan aki.

Satisface Nos Necesidad Spiritual

6. Menciona e necesidadnan fundamental cu tur hende tin.

⁶ Dios a crea hende cu e necesidad di varios cos esencial. Por ehempel, cuminda, cos di bebe y un dak riba su cabes, ta cosnan esencial pa un persona keda cu un bon salud fisico. Sinembargo, un hende tin cu percura tambe pa su “necesidad spiritual.” Lo e no ta realmente felis a menos cu e haci esei. (Mateo 5:3, NW) Yehova a haya cu ta asina fundamental pa hende satisface e necesidad aki cu nan ta nace cu ne, cu el a manda su pueblo interumpi un biaha pa siman nan actividadnan normal durante henter un dia afin di duna atencion na asuntonan spiritual, es decir, na cosnan relaciona cu nan adoracion di Dios.

7, 8. (a) Con Dios a haci un distincion entre sabat y otro dianan? (b) Kico tabata e proposito di sabat?

⁷ E areglo di sabat a enfatisa e importancia di actividadnan spiritual, esta, pa hende dedica tempo na mehora nan relacion cu Dios. E prome biaha cu e palabra “sabat” ta aparece den Bijbel ta en conexion cu e percuracion di mana den desierto. E Israelitanan a haya instruccion pa recohe e pan milagroso aki durante seis dia. Riba e di seis dia, nan mester a recohe “pan pa dos dia”, pasobra riba e di shete dia nan lo no a haya mana. E di shete dia lo tabata “un sabat santo na SEÑOR.” Durante e dia ei cada hende lo mester a keda sinta na su luga. (Exodo 16:13-30) Un di e Dies Mandamentonan a bisa cu no tabatin mag di haci ningun trabou riba e dia di sabat. E dia ei tabata sagrado. E castigo pa esun cu no a cumpli cu ne tabata morto.—Exodo 20:8-11; Numbernan 15:32-36.

⁸ E lei di sabat a demostra Yehova su interes pa tanto e bienestar fisico como spiritual di su pueblo. Hesus a bisa: “Sabat ta poni pa hende.” (Marco 2:27) E sabat no solamente a permiti e Israelitanan sosega sino tambe a duna nan e oportunidad di hala mas cerca di nan Creador y demostra nan amor p’e. (Deuteronomio 5:12) Esei tabata un dia dedica exclusivamente na interesnan spiritual. Esei a ensera rindi adoracion como famia, haci oracion y medita riba e Lei di Dios. E areglo a sirbi pa proteha e Israelitanan pa nan no bai dedica tur nan tempo y energia na metanan materialista. E sabat a recorda nan cu nan relacion cu Yehova tabata e cos di mas importante den nan bida. Hesus a enfatisa e principio incambiabel ei ora el a bisa: “Ta para skirbi: ‘Hende lo no biba di pan so, ma di tur palabra cu ta sali for di boca di Dios.’”—Mateo 4:4.

9. Ki les e areglo di sabat ta siña cristiannan?

⁹ Dios no ta rekeri mas di su pueblo pa  nan tene un dia literal di 24 ora como sosiego di sabat. Pero e areglo di sabat no a keda como djis un punto di interes historico. (Colosensenan 2:16) Acaso e no ta un recordatorio cu nos tambe tin cu duna prioridad na actividadnan spiritual? Precupacionnan material y actividadnan di recreo no mester tin mas peso cu actividadnan relaciona cu nos adoracion. (Hebreonan 4:9, 10) P’esei nos lo por puntra nos mes: “Kico ta na prome luga den mi bida? Mi ta dunando prioridad na studia e Palabra di Dios, na haci oracion, na asisti na reunionnan cristian y na predica e bon nobo di e Reino? Of tin otro interesnan cu ta kita tempo for di e actividadnan ei?” Si nos ta pone asuntonan spiritual na prome luga den nos bida, Yehova ta sigura nos cu nos lo no keda sin e necesidadnan di bida.—Mateo 6:24-33.

10. Con nos por beneficia di dedica tempo na asuntonan spiritual?

¹⁰ E tempo cu nos ta dedica na studia Bijbel y publicacionnan biblico, y tambe na pensa profundamente riba nan mensahe, por yuda nos hala mas cerca di Yehova. (Santiago 4:8) Susan, cu un 40 aña pasa a cuminsa aparta tempo pa studia Bijbel riba un base regular, ta admiti cu na prome instante e no tabata disfruta di haci esaki. Tabata un tarea pisa. Pero mas el a lesa, mas el a cuminsa gusta esei. Awor e ta sinti realmente falta di su estudio personal si pa un motibo of otro e no por hacie. El a bisa: “Studiamento a siña mi conoce Yehova y mir’e como un Tata. Mi por confi’e, steun riba dje, y acerc’e libremente den oracion. Ta impresionante pa mira cuanto Yehova ta stima su sirbidonan, con e ta percura pa mi personalmente y con el a yuda mi.” Ki un gran goso nos tambe por haya dor di satisface nos necesidadnan spiritual regularmente!

Dios Su Lei Tocante Pikimento di Loke A Resta di Cosecha

11. Con e areglo di piki loke a resta di cosecha a funciona?

¹¹ Un di dos aspecto di e Lei di Moises cu a refleha Dios su interes profundo den e bienestar di su pueblo tabata e derecho di piki loke a resta di cosecha. Yehova a duna ordo pa ora un cunukero Israelita cosecha e productonan di su cunucu, e mester a permiti hende pober recohe loke e cosechadonan a laga atras. Cunukeronan no tabatin mag di cosecha e rand di nan cunucu completamente, ni nan no tabatin mag di recohe wendruif ni oleifi cu a keda atras. Nan no tabatin mag di bai coi boshi di trigo cu nan a lubida den cunucu. Esaki tabata un areglo amoroso na fabor di hende pober, habitantenan stranhero, huerfanonan y viudanan. Ta berdad cu pa piki loke a resta di cosecha hende pober mester a traha duro, sinembargo haciendo esei nan a evita di tin cu cana pidi limosna.—Levitico 19:9, 10; Deuteronomio 24:19-22; Salmo 37:25.

12. Ki oportunidad e areglo di laga hende pober piki loke a resta di cosecha a duna e cunukeronan?

¹² E lei cu a permiti hende pober piki loke a resta di cosecha no a stipula cuanto e cunukeronan mester a laga atras pa esnan den necesidad. A keda na e cunukero pa dicidi si ta un rand smal of hancho di su cunucu e ta laga cu trigo sin cosecha. Esaki a siña e cunukeronan pa ta generoso. E areglo aki a duna nan e oportunidad di demostra nan aprecio pa Yehova, Esun cu a percura e cosecha, ya como cu ‘esun cu tene misericordia di esun den necesidad ta honra Esun cu a trah’e.’ (Proverbionan 14:31) Boaz tabata un cunukero cu a haci esei. Bondadosamente el a percura pa Rut por a recohe un bon cantidad di trigo. E viuda aki tabata piki loke a resta di cosecha riba Boaz su tereno. Yehova a recompensa Boaz ricamente pa su generosidad.—Rut 2:15, 16; 4:21, 22; Proverbionan 19:17.

13. Kico e antiguo lei tocante laga hende pober piki loke a resta di cosecha ta siña nos?

¹³ E principio cu ta e base di e lei tocante laga hende pober piki loke a resta di cosecha no a cambia. Yehova ta spera di su sirbidonan cu nan ta generoso, specialmente pa cu hende  den necesidad. Mas generoso nos ta, mas grandi nos bendicionnan lo ta. Hesus a bisa: “Duna, y lo wordo duna na boso: un midi bon yena, bon primi, bon sacudi, cu ta basha over, nan lo drama den boso scochi. Pasobra cu e mesun midi cu boso midi cu ne lo wordo midi bek pa boso.”—Lucas 6:38.

14, 15. Con nos por demostra generosidad, y cu ki posibel beneficionan tanto pa nos mes como pa esnan cu nos ta yuda?

¹⁴ Apostel Pablo a recomenda pa nos “haci bon na tur hende, y specialmente na esnan cu ta di e famia di fe.” (Galationan 6:10) Pues, ki ora cu nos rumannan cristian ta confronta prueba di nan fe, nos siguramente mester ta masha interesa pa nan haya yudansa spiritual. Pero acaso nan lo tin mester di yudansa practico tambe, por ehempel, pa yega Salon di Reino of pa bai supermercado? Den bo congregacion tin rumannan di edad avansa, rumannan enfermo of rumannan cu no por sali for di cas, kendenan lo aprecia un bishita di animacion of pa bo duna nan un man? Si nos ta haci esfuerso pa ta mas conciente di tal necesidadnan, e ora ei Yehova lo por uza nos pa contesta e oracionnan di un persona den necesidad. Aunke cuida otro ta un obligacion cristian, esun cu ta rindi yudansa tambe ta beneficia for di esei. Mustrando berdadero amor na rumannan den fe ta resulta den gran goso y profundo satisfaccion, y e ta pone nos haya Yehova su aprobacion.—Proverbionan 15:29.

¹⁵ Un otro manera importante den cua cristiannan ta demostra cu nan no ta egoista ta ora nan ta uza nan tempo y energia pa papia tocante e propositonan di Dios. (Mateo 28:19, 20) Ken cu tabatin e goso di yuda un otro persona yega na e punto di dedica su bida na Yehova, sa cu e palabranan aki di Hesus ta berdad: “Ta mas bendiciona pa duna cu pa ricibi.”—Echonan 20:35.

Tene Cuidou cu Cudishi

16, 17. Kico e di dies mandamento a prohibi, y dicon?

¹⁶ E di tres aspecto di Dios su Lei pa Israel cu nos ta bai considera ta e di dies mandamento cu a taha hende di cudisha. E Lei a declara: “No cudisha cas di bo prohimo; no cudisha esposa di bo prohimo, ni su sirbido homber, ni su sirbido muher, ni su buey, ni su burico, ni nada cu ta pertenece na bo prohimo.” (Exodo  20:17) Ningun ser humano lo por a percura pa hende obedece un mandamento asina, ya cu ningun hende no por lesa curason. Sinembargo, e mandamento ei a eleva e Lei na un nivel mas halto cu hende su sistema hudicial. El a haci cada Israelita conciente di e echo cu e tabatin cu rindi cuenta directamente na Yehova, esun cu si por lesa e inclinacionnan di e curason. (1 Samuel 16:7) Ademas, e mandamento aki a yega na e causa fundamental di hopi acto ilegal.—Santiago 1:14.

¹⁷ E lei cu a taha Dios su pueblo di cudisha, a stimula nan pa evita materialismo, golosidad y di keha tocante nan situacion den bida. Tambe e lei a proteha nan di e tentacion pa comete ladronicia of inmoralidad. Semper lo tin hende cu tin propiedadnan material cu nos ta admira of kendenan den un manera of otro ta parce mas exitoso cu nos. Si nos no domina nos pensamento den situacionnan asina, nos lo por bira infelis y cuminsa envidia otro hende. Bijbel ta menciona cudishi como un di e manifestacionnan di “un estado mental desaproba.” Ta cumbini nos pa no cudisha.—Romanonan 1:28-30, NW.

18. Ki mentalidad ta reina den mundo awe, y ki efectonan negativo e por produci?

¹⁸ E mentalidad cu ta reina den mundo awe ta promove materialismo y competencia. Pa medio di propaganda, comercio ta stimula e deseo pa productonan nobo y hopi bes ta transmiti e idea cu nos lo no ta felis a menos cu nos obtene e productonan nobo aki. Esei ta precies e tipo di mentalidad cu e Lei di Yehova a condena. Un otro actitud similar cu tambe e lei di Yehova a condena ta e deseo di bai dilanti den bida cueste loke cueste y acumula rikesa. Apostel Pablo a spierta: “Esnan cu kier bira rico ta cai den tentacion y den trampa y den hopi deseonan loco y dañino, cualnan ta hundi hende den ruina y destruccion. Pasobra amor pa placa ta raiz di tur sorto di maldad, y algun hende, dor di desea esaki, a desvia for di e fe, y a traspasa nan mes cu hopi dolor.”—1 Timoteo 6:9, 10.

19, 20. (a) Pa hende cu stima e lei di Yehova, kico ta e cosnan cu ta realmente balioso? (b) Kico lo ta e topico di e siguiente articulo?

¹⁹ E personanan cu ta stima Dios su lei ta compronde e peligernan di un actitud materialista y ta ser proteha contra esei. E salmista por ehempel, a pidi Yehova den oracion: “Inclina mi curason na bo testimonionan, y no na ganashi deshonesto. E lei di bo boca ta mihor pa mi cu miles di pida oro y plata.” (Salmo 119:36, 72) Si nos ta combenci cu e palabranan aki ta berdad, esei lo yuda nos mantene e balansa necesario pa evita e trampa di materialismo, di golosidad y di ta mal contento cu nos situacion den bida. Ta “devocion na Dios”, no acumulacion di propiedad, ta e yabi pa alcansa e ganashi di mas grandi cu tin.—1 Timoteo 6:6, NW.

²⁰ E principionan cu ta e base di e Lei cu Yehova a duna e antiguo nacion di Israel ta mesun balioso den nos tempo trabahoso cu nan tabata ora cu Yehova a duna e Lei ei na Moises. Mas nos aplica e principionan aki den nos bida, mas nos lo compronde nan, mas nos lo stima nan y mas felis nos lo ta. E Lei ta contene hopi les balioso pa nos, y nos ta haya bon recordatorio di nan balor dor di analisa e bida y experencianan di personahenan biblico. Den e siguiente articulo nos lo considera algun di nan.

[Nota]

Con Lo Bo Contesta?

• Dicon e escritor di Salmo 119 a stima e lei di Yehova?

• Kico cristiannan por siña for di e areglo di sabat?

• Ki balor duradero Dios su lei tocante pikimento di loke a resta di cosecha tabatin?

• Con e mandamento pa no cudisha ta proteha nos?

[Preguntanan di Estudio]

[Plachi na pagina 21]

Kico e lei di sabat a enfatisa?

[Plachi na pagina 23]

Kico e lei tocante pikimento di loke a resta di cosecha ta siña nos?