Pregunta di Lector

Kico Hesus tabata kiermen ora el a bisa Nicodemo: “Ni un hende no a subi na shelo, sino esun cu a baha for di shelo, esta, e Yiu di hende”?—Huan 3:13.

E tempo ei Hesus tabata riba tera, y e no a subi na shelo of bai shelo bek ainda. Sinembargo, loke nos sa tocante Hesus y e contexto di su palabranan por yuda nos compronde kico e tabata kiermen.

Hesus “a baha for di shelo” den e sentido cu prome e tabata biba den e region di spirito hunto cu su Tata. Pero na e tempo stipula, Dios a transferi e bida di su Yiu pa e matris di Maria, y asina Hesus a nace como hende. (Lucas 1:30-35; Galationan 4:4; Hebreonan 2:9, 14, 17) Hesus lo a ser resusita despues di su morto como un criatura spiritual y bolbe bek cerca Yehova. P’esei poco prome cu nan a mata Hesus, e por a pidi den oracion: “Glorifica mi cerca bo mes, Tata, cu e gloria cu mi tabatin cerca bo prome cu mundo tabata.”—Huan 17:5; Romanonan 6:4, 9; Hebreonan 9:24; 1 Pedro 3:18.

Ora cu Hesus tabata papia cu Nicodemo, un farizeo y maestro den Israel, Hesus no a bai shelo bek ainda. Naturalmente, no tabatin ningun otro hende cu a muri y subi na shelo, kiermen na e region di spirito. Hesus mes a declara cu Huan Bautista tabata sin igual entre e profetanan di Dios, pero toch “esun di mas chikito den e reino di shelo ta mas grandi cu ne.” (Mateo 11:11) Anto apostel Pedro a splica cu asta fiel Rei David a muri y tabata ainda den su tumba; David no a subi na shelo. (Echonan 2:29, 34) Tabatin un motibo pakico, personanan cu a muri prome cu Hesus, manera por ehempel David, Huan Bautista y otro hombernan di fe, no a bai shelo. Nan a muri prome cu Hesus a inaugura e caminda of posibilidad pa hende ser resusita pa bida celestial. Apostel Pablo a skirbi cu Hesus ‘a bai nan dilanti’ pa ‘inaugura un caminda nobo y bibo’ den shelo.—Hebreonan 6:19, 20; 9:24; 10:19, 20.

Ya cu Hesus no a muri y ser resusita ainda, kico e tabata kiermen ora el a bisa Nicodemo: “Ni un hende no a subi na shelo, sino esun cu a baha for di shelo, esta, e Yiu di hende”? (Huan 3:13) Ban wak e contexto, esta, locual Hesus tabata papia over di dje cu Nicodemo.

Ora cu e gobernante Hudiu ei a bin cerca Hesus den scuridad di anochi, Hesus a bis’e: “Di berdad, di berdad, mi ta bisa bo, si un hende no nace di nobo, e no por mira e reino di Dios.” (Huan 3:3) Nicodemo a puntra e ora ei: ‘Con esei por ta? Con un hende por nace pa di dos biaha?’ E no a compronde e siñansa divino aki tocante drentamento den e Reino di Dios. Acaso tabatin un manera cu lo e por a siña tocante esaki? Wel, no a base di loke hende sa; ningun hende lo por a siñ’e tocante esei pasobra ningun di nan no a yega di bai shelo y pues no por a splica nada tocante con pa drenta den e Reino. E unico excepcion tabata Hesus. E por a siña Nicodemo y otro hende pasobra e si a baha for di shelo y tabata cualifica pa siña hende tocante e cosnan ei.

Pues e pregunta basa riba e texto aki ta ilustra un punto balioso relaciona cu studiamento di e Palabra di Dios. No ta rasonabel pa duda di un texto biblico djis pasobra e ta parce dificil pa compronde. Nos mester mira loke Bijbel ta bisa den un cierto texto den lus di otro textonan y e mester ta na harmonia cu nan. Ademas, hopi biaha e contexto, es decir, e situacion cu tabata reina of e topico cu ta ser trata, por yuda nos haya e nificacion rasonabel y logico di un texto cu nos no por compronde.