Si, Bo Por Haya Felicidad

TIN biaha ta dificil pa haya felicidad, esta, felicidad berdadero y permanente. E motibo principal di esaki ta pasobra hopi hende, den nan afan pa haya felicidad, ta busca den e direccion robes. Tur loke nan tin mester ta un amigo di confiansa y competente cu lo por mustra nan e fuente corecto!

Bijbel ta e fuente di e guia necesario ei. Tuma por ehempel djis un di su bukinan, cu ta Salmonan. E buki aki ta un coleccion di 150 cantica sagrado dirigi na Yehova Dios, di cua Rei David di Israel di antiguedad a compone mas o menos mitar. Aunke ta bon pa sa ken e escritor tabata, ta mas importante pa sa cu e buki aki a ser skirbi bou di inspiracion di e Amigo di mas grandi di humanidad, cu ta Yehova. Nos por ta sigur anto cu e ta contene guia divino pa nos beneficio y cu e ta mustra cua ta e caminda cu ta hiba na felicidad.

E escritornan di e Salmonan tabata combenci cu un persona su felicidad ta depende di su relacion saludabel cu Dios. E salmista a skirbi: “Bendiciona [“Felis”, NW] ta e hende cu ta teme SEÑOR.” (Salmo 112:1) Ningun relacion humano, ningun pocesion material ni ningun logro personal por trece e felicidad cu hende ta haya dor cu nan ta pertenece na ‘e pueblo cu su Dios ta Yehova!’ (Salmo 144:15) Bida di varios sirbido di Yehova di nos tempo ta confirma esaki.

Susanne, den su cuarenta y pico aña, mes ta un ehempel. * El a bisa: “Awe, hopi hende ta join cierto gruponan pa logra metanan comun of pasobra nan tin interesnan comun. Sinembargo, rara bes nan ta mira tur otro hende den e grupo como nan amigo. Den e pueblo di Yehova si cosnan ta diferente. Nos amor pa Yehova ta pone cu nos tin cariño pa otro. Nos ta sinti nos comodo den e pueblo di Yehova, sin importa na ki parti di mundo nos  ta. E unidad aki ta enrikece nos bida enormemente. Ken mas por bisa cu nan tin amigo di nivel social y custumbernan totalmente distinto y di asina tanto diferente nacionalidad? Mi por bisa di henter mi curason cu, como parti di e pueblo di Yehova, mi ta felis.”

Maree, kende a nace na Escocia, tambe a siña cu un bon relacion cu Yehova ta masha importante pa haya felicidad. El a conta: “Prome cu mi a siña e berdad di Bijbel, mi tabata gusta wak peliculanan di horor. Pero anochi mi no por a pega soño sin un crus den mi man pa core cu e zumbi- y vampironan, riba cua hopi di e peliculanan tabata basa. Pero unabes mi a siña e berdad y a stop di wak e peliculanan ei, mi relacion cu Yehova a haci posibel cu mi por bai drumi sin miedo, felis di ta sirbi un Dios mas poderoso cu demoñonan of vampironan di fantasia.”

Confiansa den Yehova Ta Hiba na Felicidad

Nos no tin motibo pa duda cu e Creador ta todopoderoso y cu su sabiduria no tin limite. David tabata sa cu e por tabatin confiansa completo den Yehova y cu e por a busca refugio den dje, p’esei el a skirbi: ‘Felis ta e hende cu ta pone su confiansa den Yehova.’—Salmo 40:4.

Maria a bisa: “E experencia cu mi a haya na Spaña y otro caminda a siña mi cu ora nos haci cosnan manera Yehova kier, maske nos sintimento- y emocionnan por inclina nos pa haci nan otro manera, nos ta haya e mihor resultadonan posibel. Esaki ta resulta den felicidad pasobra e caminda di Yehova ta semper esun di mas mihor.”

Andreas, un anciano cristian cu a sirbi den varios pais Europeo, tambe sa di experencia personal cu nos por pone nos confiansa den Yehova. El a bisa: “Mi ruman mayo, kende no tin mesun religion cu mi, tabatin un influencia grandi riba mi durante mi hubentud. El a curasha mi pa sigui un carera cu financieramente lo a duna mi hopi satisfaccion. P’esei el a keda sumamente desapunta ora mi a cuminsa cu e sirbishi di tempo completo, y no a depende riba e asina yama siguridad cu areglonan di pension di e mundo aki ta ofrece. Durante mi sirbishi di tempo completo, nunca mi a pasa necesidad, y mi a haya bendicionnan cu otro hende solamente por a soña cu ne.”

Na 1993, Felix a haya un invitacion pa yuda cu e trabounan pa amplia e facilidadnan di e sucursal di Testigonan di Yehova na Selters, Alemania. Unabes e trabou a finalisa, nan a  invit’e pa bira miembro permanente di e famia di Betel einan. Con el a reacciona? E di: “Mi a acepta e invitacion cu cierto reserva. Pero awor mi tin casi dies aña aki caba, y mi ta combenci cu Yehova a contesta mi oracionnan. E sa kico ta mihor pa mi. Dor di pone tur mi confiansa den dje y lag’e dirigi mi, mi ta dun’e oportunidad pa e mustra mi kico e kier pa mi haci.”

Susanne, menciona anteriormente, kier a sirbi como un predicado di tempo completo, un pionero, pero e tabatin problema pa haya un trabou part-time. Despues cu el a warda un aña pa haya algo di haci, el a actua cu confiansa den Yehova. El a conta: “Mi a entrega mi solicitud pa sirbi como pionero regular. Mi a spar suficiente pa paga mi gastonan normal pa mas o menos un luna. Y esta un luna excitante esei a resulta di ta! Mi sirbishi tabata un fuente di hopi goso, pero pa loke ta trabou, mi tabatin varios entrevista cu no a duna resultado. Sinembargo, manera Yehova a priminti, e no a laga mi na caya. Riba e ultimo dia di luna, mi por a firma un contract pa un trabou. Awor mi tabata sa cu mi por a echt confia den Yehova! E prome experencia aki den e sirbishi di tempo completo a yuda mi haya un bida felis y yen di satisfaccion.”

Conseho di Dios Ta Contribui na Felicidad

Rei David a comete algun fayo serio. P’esei tin biaha, e tabatin mester di conseho sabi. Nos ta mes dispuesto cu David pa acepta conseho y instruccion?

Un biaha, Aida, di Francia, a realisa cu el a comete un fayo serio. El a conta: “Mi precupacion principal tabata pa drecha mi relacion cu Yehova. Nada otro no a precupa mi.” El a bai busca yudansa cerca ancianonan cristian. Despues cu el a sirbi pa mas cu 14 aña den e ministerio di tempo completo, e ta bisa awor: “Mi ta hopi contento cu Yehova a pordona mi mi eror!”

Si nos ta dispuesto pa acepta conseho di Dios, nos no ta comete fayo facilmente. Judith a splica: “Tempo cu mi tabatin 20 aña, mi tabata gusta un socio comercial Aleman kende a haci tur loke e tabata por pa impresiona mi. E tabata un homber respeta, cu un carera briyante, pero e tabata casa caba! Mi a realisa cu mi tabatin cu scohe entre sea obedece e leinan di Yehova of bira lomba pa Dios completamente. Mi a confia mi mayornan e asunto. Mi tata tabata stret ora el a recorda mi loke Yehova a spera di mi. El a papia hopi franco cu mi—net loke mi tabatin mester! Toch mi a purba di busca un hustificacion. Pa varios siman mi mama a pasa anochinan largo papiando cu mi tocante con importante e leinan di Dios ta y con nan por proteha nos bida. Mi ta sumamente gradicido cu di curason mi a cuminsa sinti mi atrai na Yehova. Su disciplina y su siñansa a duna mi hopi felicidad: añanan largo di satisfaccion den e sirbishi di tempo completo y un excelente esposo cristian, cu ta stima mi y cu ta stima Yehova di henter su curason.”

E experencianan aki ta enfatisa bon cla anto e berdad y importancia di e palabranan di David: “Felis ta esun cu su eror ta pordona, kende su pica ta tapa. Felis ta e hende cu SEÑOR no ta tuma su crimen na cuenta.”—Salmo 32:1, 2, BPK.

Hende Cu Ta Mustra Consideracion na Otro Ta Haya Felicidad

David a skirbi: ‘Felis ta esun cu ta corda riba e pobernan.’ El a continua: ‘Yehova lo libr’e den e dia di angustia. Yehova lo proteh’e y ten’e na bida, y e lo wordo yama felis.’ (Salmo 41:1, 2) E consideracion amoroso cu David a mustra na Mefi-boset, e yiu coho di Yonatan, David su amigo stima, ta un ehempel di e actitud corecto cu nos mester tin pa cu hende pober of di condicion humilde.—2 Samuel 9:1-13.

Marlies, kende a sirbi como misionero pa 47 aña, tin e privilegio di predica na hende cu a haya nan ta hui for di e areanan di crisis di Africa, Asia y Oost Europa. El a bisa: “Nan tin tur tipo di problema, y por lo general nan ta  sinti cu nan no ta ser acepta completamente y cu asta nan ta ser descrimina. Semper ora bo ta yuda hende asina e ta haci bo felis.”

Marina, kende tin cuarenta y pico aña, a skirbi: “Como soltera, mi sa kico kiermen ora otro hende ta mustra interes den bo. Esaki ta impulsa mi pa anima otro hende dor di yama nan of skirbi nan carta. Hopi a expresa nan aprecio. E echo cu mi por yuda otro hende ta duna mi goso.”

Dimitar, di binti y pico aña, a bisa: “Mi mama a lanta mi su so. Tempo cu mi tabata mucha, mi tabata contento di por tabatin un superintendente di Estudio di Buki di Congregacion cu tabata bai cu mi tur siman den sirbishi pa entrena mi. Te awe mi ta gradicido pa su persistencia. Mi sa cu no tabata semper facil pa motiva mi.” Como muestra di gratitud pa e yudansa cu Dimitar a ricibi un tempo, awor e ta yuda otronan: “Mi ta purba sali den sirbishi di veld cu un hoben y tambe cu un ruman di edad avansa por lo menos un biaha pa luna.”

E buki di Salmonan ta menciona tambe otro cosnan cu ta haci hende felis. Un di nan ta e importancia di confia riba e forsa cu Yehova ta duna bo y no riba esun di bo mes: ‘Felis ta e hende, kende su fortalesa ta den Yehova.’—Salmo 84:5.

Corinna por conta di esaki. El a muda bai un pais caminda tabatin un necesidad grandi den e trabou di predica. “Mi a haya mi cu un idioma nobo, un cultura nobo y un manera nobo di pensa. Mi a sinti como si fuera mi tabata riba un otro planeta. E idea so di predica den un ambiente straño a duna mi hopi nervio. Mi a pidi Yehova yuda mi y, cu e forsa cu el a duna mi, mi por a predica henter dia den un teritorio isola. Cu tempo, esaki a bira masha normal. Mi a cuminsa hopi estudio di Bijbel, y ainda mi ta beneficiando di e experencia aki. Mi a siña cu asta e obstaculonan cu aparentemente ta insuperabel nos por vence cu e forsa di Yehova.”

Si, varios factor ta contribui na felicidad. Nan ta entre otro, cultiva amistad cu Dios y cu su pueblo, confia plenamente den Yehova, acepta su conseho y mustra consideracion na otro hende. Si nos cana den e camindanan di Yehova y obedece su leinan, nos por haya su aprobacion y esei ta haci nos felis.—Salmo 89:15; 106:3; 112:1; 128:1, 2.

[Nota]

[Plachi na pagina 12]

Maria

[Plachi na pagina 13]

Maree

[Plachi na pagina 13]

Susanne y Andreas

[Plachi na pagina 15]

Corinna

[Plachi na pagina 15]

Dimitar