Un Guia Confiabel pa Felicidad

E REDACTORNAN di e Declaracion di Independencia di Merca tabata di opinion cu tur hende tin derecho di busca felicidad. Pero e echo cu un persona ta busca algo no ta nifica cu e ta hay’e tambe. Aunke hopi hende hoben ta busca careranan den e mundo di entretenimento y deporte, cuanto di nan bo conoce cu en berdad a logra e exito tan desea? Un cantante di fama cu sa kico kiermen lucha pa bira un musico exitoso a bisa: “Probablemente bo no ta bai logra.”

Si bo tin e mesun punto di bista ei, tin bon motibo pa bo no perde animo. Si bo ta busca felicidad den e manera corecto, lo bo logr’e. Pakico nos por bisa esei? E articulo anterior a papia di “e Dios felis”, Yehova. (1 Timoteo 1:11, NW) Den Bijbel, Dios ta percura guia pa bo buskeda di felicidad no caba na desilusion. Yehova por yuda bo vence e causanan comun di tristesa. Por ehempel, pensa riba e consuelo cu e ta duna bo ora un ser keri di bo muri.

Ora un Ser Keri Muri

Tin algo bon cu nos por bisa tocante morto? Morto ta ranca mayornan for di yiunan y yiunan for di mayornan. E ta separa amigonan intimo y ta trece insiguridad den comunidadnan cu ta hopi uni cu otro. Ora morto cai den un famia felis, e por causa un tristesa profundo.

Ningun hende no tin nodi bisa bo cu morto ta un sla duro. Sinembargo, algun hende ta nenga e realidad ei y ta pinta morto como un bendicion. Wak kico a pasa despues cu Horcan Katrina a asota Golfo di Mexico na augustus 2005. Na e entiero di un di e victimanan, e pastor a bisa: “No ta Katrina a  mat’e. Ta Dios a tum’e den shelo.” Na un otro ocasion, un oficinista di hospital, cu tur su bon intencion, a bisa yiu muher di un señora cu a muri pa e no worry pasobra Dios a tuma su mama den shelo. E yiu muher a reacciona yorando: “Pakico, pakico el a kit’e fo’i mi?”

Ta bon cla anto cu e conceptonan eroneo ei tocante morto hopi bes no ta consola esnan cu a keda atras. Pakico no? Pasobra e ideanan ei no ta basa riba e berdad tocante morto. Piyo ainda, nan ta pinta Dios como esun cu ta ranca sernan keri for di famia y amigo na un manera cruel y doloroso. E conceptonan ei ta duna impresion cu ta Dios ta e culpabel pa e tragedia di morto, en bes di ta un fuente di consuelo pa hende. Pero e Palabra di Dios ta declara e berdad tocante morto.

Bijbel ta yama morto un enemigo. E ta compara morto cu un rei cu a goberna riba humanidad. (Romanonan 5:17; 1 Corintionan 15:26) Morto ta un enemigo asina poderoso cu ni un hende no por resistie, y tur ser keri cu muri ta djis un victima mas di e cantidad incontabel di victimanan di morto. E berdad di Bijbel aki ta yuda nos compronde e tristesa y impotencia cu nos ta sinti ora un ser keri muri. E ta confirma cu e sintimentonan ei ta normal. Pero, ta keda e pregunta: Dios ta uza e enemigo morto como un medio pa tuma nos sernan keri den shelo? Laga Bijbel contesta e pregunta ei.

Eclesiastes 9:5 y 10 ta declara: “E mortonan no sa nada . . . No tin ni actividad ni planificacion ni sabiduria den Seol, caminda bo ta bai.” Kico ta Seol? Esei ta e graf comun di humanidad den cua hende ta bai ora nan muri. Den graf e mortonan ta completamente inactivo; nan no ta move, no ta pensa ni no ta sinti nada. Ta como si fuera nan ta den un soño profundo. * Pues Bijbel ta mustra bon cla cu Dios no ta tuma nos sernan keri pa nan ta hunto cu ne den shelo. E efectonan di morto ta laga nan sin bida den graf.

Hesus a confirma e berdad aki despues cu su amigo Lazaro a muri. El a compara morto cu un soño. Si Lazaro a bai shelo pa ta hunto cu Dios Todopoderoso, Hesus lo no a haci Lazaro ni un fabor dor di trec’e bek na tera pa despues e muri atrobe. E relato inspira ta declara cu na e graf Hesus a bisa na bos halto: “Lazaro, bin pafo!” Anto segun Bijbel, “esun cu a muri a bin pafo.” Lazaro a cuminsa biba atrobe. Hesus tabata sa cu ni un momento so Lazaro no a bandona tera. E tabata drumi sin bida den un graf.—Huan 11:11-14, 34, 38-44.

E incidente aki registra den Bijbel ta yuda nos compronde cu morto no ta un medio cu Dios ta uza pa transferi hende for di tera pa shelo. P’esei nos por hala cerca Dios, sabiendo cu no ta e ta hinca nos den tristesa. Nos  por tin e confiansa tambe cu e ta compronde completamente cuanto tristesa y daño e enemigo morto ta causa nos. Y e berdad di Bijbel tocante e condicion di e mortonan ta proba cu e mortonan no ta sufri den candela di fierno of purgatorio pero ta sin bida den graf. Pues, e recuerdo di nos sernan stima no tin nodi bai acompaña cu repudio contra Dios of miedo di un mundo desconoci. Ademas, den Bijbel Yehova ta duna nos un consuelo adicional.

Speransa Ta Hiba na Felicidad

E textonan cu nos a considera ta indica cu pa un hende ta berdaderamente felis, e mester tin un speransa. E palabra “speransa” den e sentido cu Bijbel ta uz’e ta ensera spera cu confiansa riba loke ta bon. Awor, pa mira con speransa por hiba na felicidad, laga nos bai bek na e relato caminda Hesus a resusita Lazaro.

Tin por lo menos dos motibo pakico Hesus a haci e milager ei. Un di nan tabata pa pone fin na e tristesa di Marta, Maria y nan amigonan desconsola. Nan lo por a bolbe disfruta di e compania di nan ser keri. Pero Hesus a menciona un di dos motibo mas importante na Marta: “Mi no a bisa bo, si bo kere, lo bo mira e gloria di Dios?” (Huan 11:40) The New Testament in Modern English di J. B. Phillips a traduci e ultimo frase como “e milager di loke Dios por haci.” Cu e resureccion di Lazaro, Hesus a duna un bista adelanta di loke Yehova Dios por y lo haci den futuro. Aki tin mas detaye tocante “e milager [aki] di loke Dios por haci.”

Segun Huan 5:28 y 29, Hesus a bisa: “No straña boso di esaki, pasobra e ora lo yega den cua tur cu ta den graf lo tende su bos, y lo sali.” Esaki ta nifica cu tur e mortonan den Seol, incluso nos sernan keri, lo bolbe haya bida. Echonan 24:15 ta revela mas tocante e suceso maraviyoso aki, bisando: “Lo tin un resureccion di tanto e hustonan como e malbadonan.” Pues, asta “e malbadonan”, hopi hende cu no a conoce ni sirbi Yehova, lo ricibi oportunidad den futuro pa haya e fabor di Dios.

Unda e resureccion aki lo tuma luga? Salmo 37:29 ta declara: “E hustonan lo hereda e tera, y lo biba den dje pa semper.” Pensa kico esei ta nifica! Famia- y amigonan separa for di otro pa motibo di morto lo ta hunto atrobe aki riba tera. Ora bo pensa riba e dushi tempo cu lo bo disfruta di dje den compania di bo sernan keri cu lo bini bek den resureccion, di mes bo curason ta yena cu felicidad.

Yehova Kier pa Bo Ta Felis

Nos a considera dos manera den cua Yehova por aumenta bo felicidad a pesar di problema. Na prome luga, pa medio di Bijbel, e ta percura conocemento y guia pa yuda bo enfrenta dificultad cu exito. Ademas di yuda nos biba cu e tristesa profundo di morto, conseho di Bijbel por yuda nos tambe pa trata cu problemanan economico y di salud. E por duna bo e forsa pa soporta inhusticia social y disturbionan politico. Y si bo aplica su guia den bo bida, e por yuda bo trata cu otro problemanan personal tambe.

Na di dos luga, un estudio di Bijbel por duna bo un speransa cu ta hopi mas balioso cu cualkier cos cu sociedad humano ta ofrece. Resureccion di amigo y famia ta parti di e speransa cu Bijbel ta menciona. Revelacion 21:3 y 4 ta duna mas detaye: “Dios mes lo ta meimei di [humanidad], y e lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor; e prome cosnan a pasa.” Esaki ta nifica cu cualkier causa di tristesa den bo bida lo disparce pronto y pa semper. Loke Bijbel ta priminti lo bira realidad, y abo por tin e deleite di mira esei cumpli. E solo echo cu bo sa cu lo tin un mihor tempo den futuro ta un alivio. E echo cu bo sa cu lo bo no sufri pa  tempo indefini despues di morto ta un motibo pa ta felis.

E siguiente experencia ta ilustra esaki. Hopi aña pasa Maria a mira con su esposo a muri un morto doloroso pa motibo di cancer. Mientras cu ainda e tabata yora morto di su casa, problemanan financiero a obliga e y su tres yiu muhernan sali for di e cas di famia. Dos aña despues, Maria a haya sa cu e tabatin cancer. El a haci dos operacion grandi y tur dia e ta sufri di dolornan fuerte. A pesar di e problemanan aki, e tin un actitud asina optimista cu e ta anima otro hende. Con e ta mantene su felicidad?

Maria ta bisa: “Ora mi tin un problema, mi ta purba pa no pensa mucho riba mi mes. Mi ta evita preguntanan manera: ‘Pakico ami? Pakico mi tin cu sufri asina aki? Pakico mi tabatin cu bira malo?’ Pensamento negativo ta gasta tur energia. Na luga di esei, mi ta uza mi energia pa sirbi Yehova y yuda otro hende. Esei ta haci mi felis.”

Con speransa ta yuda Maria? El a fiha su curason riba e futuro ora Yehova elimina enfermedad y otro problemanan for di humanidad. Ora e bai hospital pa ricibi tratamento, e ta comparti e speransa ei cu otro pashentnan cu tin cancer y cu kisas ta deprimi. Con importante speransa ta pa Maria? E ta bisa: “Hopi biaha mi ta pensa riba loke Bijbel ta bisa na Hebreonan 6:19, caminda Pablo ta describi speransa como un anker pa e alma. Sin e anker ei, lo bo drif manera un boto sin rumbo den un tormenta. Pero si bo ta mara na e anker ei, lo bo ta safe a pesar di e problemanan tempestuoso cu bo ta enfrenta.” E “speransa di bida eterno, cu Dios, kende no por gaña, a priminti”, ta yuda Maria keda felis. E speransa ei por yuda abo tambe.—Tito 1:2.

Pa medio di un estudio di Bijbel, bo por haya berdadero felicidad a pesar di bo problemanan. Pero kisas bo tin bo dudanan tocante e aspectonan practico di esaki. Testigonan di Yehova gustosamente lo mustra bo e contestanan biblico cu bo mester sa si bo kier ta berdaderamente felis. Segun cu bo ta warda e speransa cu Yehova ta ofrece cumpli, bo por ta entre e hendenan describi den e manera aki: “Nan lo haya alegria y goso, y tristesa y suspiro lo hui bai.”—Isaias 35:10.

[Nota]

[Plachi na pagina 5]

Ta e berdad di Bijbel so por alivia tristesa

[Plachi na pagina 7]

E speransa biblico di resureccion por contribui na felicidad