Un Les Tocante Orguyo y Humildad

UN INCIDENTE den e bida di Rei David ta resalta e diferencia entre berdadero humildad y orguyo. Esei a sosode despues cu David a conkista Herusalem y a hacie su ciudad capital. David a considera Yehova como e berdadero Rei di Israel, p’esei el a haci areglo pa trece e Arca—cu a simbolisa Dios su presencia—den e stad. E ocasion aki tabata asina importante pa David cu el a demostra su goso abiertamente segun cu e tabata cana tras di e sacerdotenan cu a carga e Arca. E habitantenan di Herusalem a mira nan Rei “ta bula” y “balia . . . cu tur su forsa.”—1 Cronicanan 15:15, 16, 29; 2 Samuel 6:11-16.

Sinembargo, David su casa, Mical, si no a participa den e procesion alegre ei. El a wak e procesion for di un bentana, y en bes di admira David su manera di expresa alabansa na Yehova, el a cuminsa “despreci’e den su curason.” (2 Samuel 6:16) Dicon Mical a reacciona asina? Evidentemente, el a duna demasiado importancia na su posicion como yiu muher di e prome Rei di Israel, Saul, y awor como esposa di e segundo Rei di Israel. Podise el a sinti cu su casa, siendo Rei, no mester a rebaha su mes na nivel di e pueblo comun y participa den nan forma di celebra. E sintimentonan di orguyo ei tabata bisto den e manera cu el a cuminda David ora esaki a yega cas. Na un manera sarcastico Mical a bisa: “Esta bunita e Rei di Israel a distingui su mes awe! El a expone su mes awe den bista di e crianan di su sirbidonan, manera un hende vulgar ta expone su mes sin ni un tiki di berguensa!”—2 Samuel 6:20.

Con David a reacciona riba e critica aki? David a scual Mical dor di declara cu Yehova a rechasa Mical su tata, Saul, y a scohe David na su luga. David a agrega: “Lo mi ta mas desprecia ainda cu esaki y lo mi ta humilde den mi mes bista; ma cerca e crianan di kendenan bo a papia, cerca nan lo mi ta distingui.”—2 Samuel 6:21, 22.

Si, David tabata determina pa sigui sirbi Yehova cu humildad. E actitud aki ta yuda nos compronde dicon Yehova a yama David “un homber conforme mi curason.” (Echonan 13:22; 1 Samuel 13:14) De echo, David tabata imitando e mihor ehempel di humildad, esta, e ehempel di Yehova Dios mes. Un punto interesante ta cu e expresion cu David a uza ora el a bisa Mical, “lo mi ta humilde” ta bin di un verbo basico na Hebreo cu tambe ta ser uza pa describi Dios su propio punto di bista di humanidad. Aunke Yehova ta e Persona mas importante den universo, Salmo 113:6 y 7 ta describie como esun ‘kende ta humilia su mes [baha for di su posicion of dignidad pa trata un persona cu tin un posicion inferior] pa mira e cosnan cu ta den shelo y riba tera; e ta lanta hende pober for di stof, y ta lanta esnan den necesidad for di e luga di benta sushi.’

Como cu Yehova ta humilde, no ta straño cu e ta odia e “wowonan altanero” di hende orguyoso. (Proverbionan 6:16, 17) Como cu Mical a desplega e caracteristica malbado aki y a falta respet pa e persona cu Dios a scohe como Rei, el a perde e privilegio di haya un yiu homber di David. El a muri sin haya ni un yiu. Ki un les importante esaki ta pa nos! Ken cu ta desea Dios su aprobacion tin cu aplica e palabranan aki: “Bisti boso mes cu humildad pa cu otro, pasobra ‘Dios ta resisti e orguyosonan, ma ta duna gracia na e humildenan.’”—1 Pedro 5:5.