Con pa Haya Berdadero Iluminacion

TABATA 18 di december 1810. Nochi tabata serando. Den e lama bruto di un tempestad pafo di e costa zuidoost di Escocia, e fragata HMS Pallas di e Ehersito Naval Britanico a perde rumbo. Pa motibo di scuridad y caida pisa di sneu, a bira mas y mas dificil pa e tripulantenan localisa e faronan cu nan tabatin mester pa guia nan barco na un luga sigur. Imagina bo e alivio cu nan a sinti ora cu porfin nan a mira lus y a stuur nan barco den direccion di esakinan! Pero, lamentablemente, loke nan a mira no tabata lusnan di faro cu mester a guia nan. Tabata mas bien candelanan cant’i costa cu obreronan tabatin sendi. Pallas a bai dal den baranca y a kibra completamente. Diesun marinero a hoga tragicamente.

Den e caso di Pallas, un fayo a causa e desaster. Pero na otro ocasionnan, marineronan a enfrenta un peliger asta mas grandi ainda—lusnan di faro engañoso. E lusnan ei tabata ser poni intencionalmente pa atrae e barconan y laga nan dal kibra contra baranca cant’i costa pa nan wordo pluma, segun e buki Wrecks, Wreckers and Rescuers.

‘Scrituranan Santo Cu Por Hiba na Salbacion’

Den bo buscamento di iluminacion, bo ta enfrenta e mesun peligernan cu e marineronan di e tempo ei a haya nan cu ne. Kisas bo ta sigui informacion engañoso, of bo por asta bira victima di engaño premedita. Tur dos caminda por hiba na tragedia. Kico bo por haci pa proteha bo mes? Haci sigur cu bo fuente di iluminacion ta autentico y confiabel. Pa mas cu 125 aña, e revista aki a defende Bijbel, e Palabra inspira di Dios, como e fuente mas confiabel di iluminacion pasobra e ta contene “scrituranan santo, cuanan por duna bo e sabiduria cu ta hiba na salbacion.”—2 Timoteo 3:15-17.

Claro cu ta masha rasonabel cu bo kier sa si Bijbel ta autentico, prome cu bo depende riba  dje como un lus di guia confiabel. (Salmo 119:105; Proverbionan 14:15) Sinti bo liber pa skirbi e editornan di e revista aki pa obtene informacion cu a yuda combence miyones di hende cu Bijbel en berdad ta inspira pa Dios. Lesa, por ehempel, e foyeto titula Un Buki pa Tur Hende. * E ta presenta hopi informacion cu ta mustra cu Bijbel ta exacto, autentico y inspira.

Berdadnan Fundamental

Kico anto ta algun di e berdadnan fundamental cu e “scrituranan santo” aki ta contene? Considera e siguiente ehempelnan.

Tin un solo Dios Todopoderoso y Creador kende a traha tur cos. (Genesis 1:1) Nos ta existi unicamente “pasobra [Dios] a crea tur cos” y a duna nos bida. (Revelacion 4:11) Pa e motibo ei ta e so merece nos adoracion. E Creador ta e Fuente supremo di tur iluminacion. (Salmo 36:9; Isaias 30:20, 21; 48:17, 18) E tin un nomber personal cu e kier pa nos uza. (Exodo 3:15, BPK, nota na pia di pagina) E nomber ei, skirbi na Hebreo y gespel como YHWH, ta aparece como 7.000 biaha den Bijbel. Pa hopi tempo el a ser uza na Papiamento den e forma di “Jehova.”—Salmo 83:18, NW.

Jehova a traha homber y muher pa biba pa semper den un paradijs aki riba tera. El a dota hende cu e mesun cualidadnan spiritual cu e tin. El a duna nan talento- y habilidadnan cu lo a permiti nan disfruta di bida humano placentero pa semper aki riba tera. (Genesis 1:26-28) Nunca tabata su proposito pa tera bira un tipo di luga pa test homber y muher—un trampolin pa bai biba como spirito den shelo, como si fuera ta einan so nan por a disfruta di un relacion cu Dios.

No tabatin nada malo den Dios su creacion humano. Ta ora algun criatura di Dios—tanto humano como spiritual—a haci maluzo di nan boluntad liber y a rebela contra dje, maldad a bini. (Deuteronomio 32:5) Nos prome mayornan a tuma den nan man e derecho pa nan mes dicidi kico ta bon y kico ta malo. (Genesis 2:17; 3:1-5) Esei a trece morto pa e famia humano. (Genesis 3:19; Romanonan 5:12) Pa resolve e cuestionnan cu e rebelion a lanta, Jehova a dicidi di permiti maldad pa un tempo. Pero su proposito pa tera y pa e famia humano no a cambia. (Isaias 45:18) Pronto, homber y muher lo biba pa semper den Paradijs riba un tera haci limpi.—Mateo 6:10; Revelacion 21:1-5.

Hesucristo no ta Dios Todopoderoso, sino Yiu di Dios. Hesucristo mes a siña su siguidonan pidi den oracion: “Nos Tata cu ta den shelo, bo nomber sea santifica.” (Mateo 6:9) Nunca el a pretende cu e ta igual cu Dios. El a bisa mas bien: “E Tata ta mas cu mi.”—Juan 14:28.

Hesus ta hunga un papel vital den e realisacion di Dios su proposito. Dios a mand’e “como lus den mundo, pa tur esnan cu kere den [dje] no keda den scuridad.” (Juan 12:46) Apostel Pedro a bisa: “No tin salbacion den ningun otro.” (Echonan 4:12) Esaki ta e caso  pasobra nos salbacion ta depende di e sanger precioso di Cristo. (1 Pedro 1:18, 19) Hesucristo a duna su bida como un sacrificio di rescate pa libra humanidad for di e pica cu nos prome mayornan, Adam y Eva, a introduci den e famia humano. (Mateo 20:28; 1 Timoteo 2:6) Ademas, Dios a uza Hesus pa revela Su boluntad y proposito.—Juan 8:12, 32, 46, 47; 14:6; Echonan 26:23.

Dios a establece un Reino of gobierno celestial cu ta consisti di Hesucristo y personanan scohi for di entre humanidad. Esaki ta e tema cu ta bini cada bes padilanti den Bijbel. Dios a encarga e gobierno aki cu e tarea di haci sigur cu su boluntad ta sosode riba tera mescos cu den shelo. (Mateo 6:10) No tabata e proposito original di Dios pa ningun ser humano bai shelo. Nan hogar mester tabata aki riba tera. Pero despues cu hende a cai den pica, Dios a bini cu algo nobo. El a haci areglo pa scohe hende “for di tur tribu y lenga y pueblo y nacion” pa “reina” como rei hunto cu Cristo den un gobierno celestial. (Revelacion 5:9, 10) Pronto e gobernacion di Reino ei lo “garna y pone un fin” na tur forma di gobernacion humano cu a trece asina tanto miseria y dolor pa e famia humano.—Daniel 2:44.

Alma ta muri. E berdad fundamental aki di Bijbel ta clarifica hopi cos tocante hende y su perspectivanan di bida. E ta elimina tambe e mal comprondemento y informacion eroneo cu a confundi hende tocante e condicion di e mortonan.

E prome buki di Bijbel ta bisa nos: “Jehova Dios a forma e hende di stof di suela y supla den su nanishi e rosea di bida, y e hende a bira un alma bibo.” (Genesis 2:7, NW) Bo ta compronde kico esei ta nifica? Alma no ta un cos vago cu ta existi den e curpa humano. Hende no tin un alma. E ta un alma—un combinacion di elemento haya den “stof di suela” y un forsa di bida cu ta bini for di Dios. Alma no ta inmortal. Ora hende muri, e alma ta muri.—Genesis 3:19; Eclesiastes 9:5, 10.

Hende cu a muri por bolbe haya bida pa medio di un resureccion. Ora e tempo cu Dios a permiti maldad temporalmente ta tras di lomba, “tur [hende] cu ta den graf lo tende [Hesus] su bos, y lo sali; esnan cu a haci bon, pa un resureccion di bida, esnan cu a comete maldad, pa un resureccion di huicio.” (Juan 5:28, 29; Echonan 24:15) E resureccion lo restaura hende bek na bida humano den un paradijs riba tera, e clase di bida cu Dios tabata kier originalmente pa e famia humano.

 Examina e Scritura Cuidadosamente Tur Dia

Bo ta mira con un conocemento di e berdadnan fundamental ei por yuda bo? Den e tempo critico y turbulento aki e conocemento ei por proteha bo for di “loke falsamente ta wordo yama ‘conocemento’”, locual Satanas e Diabel ta propaga. E ta pretende di ta “un angel di lus”, y su representantenan, “sirbidornan di husticia.” (1 Timoteo 6:20; 2 Corintionan 11:13-15) Conocemento exacto di Bijbel por proteha bo for di e asina yama iluminacion basa riba e filosofianan di e “sabinan y inteligentenan” di mundo cu “a rechasa e palabra di SEÑOR.”—Mateo 11:25; Jeremias 8:9.

Pa motibo cu tabatin asina tanto siñansa y filosofia engañoso den tempo di apostel Juan, el a spierta e cristiannan di prome siglo: “No kere tur hende cu pretende cu nan tin [e] spirito di Dios.” Anto el a agrega: “Mira si e spirito cu nan tin ta pertenece na Dios.” (1 Juan 4:1, BPK) Pensa riba lo siguiente. Si bo ricibi un mensahe cu por tin un efecto profundo riba bo bida, lo bo acept’e gewoon asina djis pasobra aparentemente e ta bini di un bon fuente? Claro cu no. Lo bo verifica su fuente y analisa su contenido prome cu bo acept’e, no ta berdad?

Dor di percura un registro inspira por escrito cu ta contene berdadnan fundamental, Dios a haci posibel pa bo haci exactamente esei—“samina” si e lusnan guiado, of faronan, cu bo ta sigui ta autentico. (1 Tesalonicensenan 5:21) E hendenan di mentalidad noble den e prome siglo a haya elogio pasobra nan tabata “scudriña e Scrituranan tur dia” pa haci sigur cu loke nan a siña tabata realmente e berdad. (Echonan 17:11) Bo por haci mescos. Laga Bijbel, manera “un lampi cu ta lusa den un luga scur”, guia bo na un luga sigur. (2 Pedro 1:19-21) Si bo haci esei, lo bo “descubri e conocemento di Dios” cu ta trece berdadero iluminacion.—Proverbionan 2:5.

[Nota]

[Plachi na pagina 4]

E Palabra di Dios ta manera un lampi

[Plachi na pagina 5]

Con yama Dios?

[Plachi na pagina 5]

Kico futuro ta trece pa humanidad?

[Plachi na pagina 6]

Hesus ta Dios Todopoderoso?

[Plachi na pagina 6]

Unda e mortonan ta?

[Plachi na pagina 7]

Resureccion di e mortonan ta un di e berdadnan fundamental cu Bijbel ta siña