“E Mihor Final Cu Mi Por A Imagina”

UN DOCENTE di un scol secundario na Spaña a skirbi: “Testigonan di Jehova tin mas cu shen aña ta demostra berdadero solidaridad, honrades intachabel y, mas cu tur cos, un fe indestructibel.” Kico a motiva e docente aki, cu ta bisa cu e ta ateo, pa haci un declaracion asina?

Tur cos a cuminsa ora cu Noemí, un mucha muher Testigo di Jehova y alumno di scol secundario, a haya como tarea pa skirbi un opstel como parti di su examen final. El a dicidi di desaroya e tema “E Triangulonan Biña bou di Dominio Nazi.”

Dicon el a scohe e tema ei? Noemí a splica: “Como cu un docente lo a supervisa mi trabou, mi a pensa cu lo mi por probecha di e oportunidad aki pa dun’e un testimonio. E relato di e manera cu Testigonan di Jehova den Alemania Nazi a keda fiel na nan principionan a conmove mi curason. Mi tabatin sigur cu lo e impresiona otro hende tambe.”

Noemí su opstel tabatin un impacto riba hopi mas tanto hende cu lo e por a imagina. Dia 5 di october 2002, su opstel a haya un premio den un competencia nacional riba tereno di investigacion cientifico y topiconan relaciona cu humanidad. Un hurado cu ta consisti di 20 academico for di universidadnan Spaño prominente ta saca e ganadonan di e competencia ei.

Noemí a ricibi su premio for di man di Pilar del Castillo, minister di enseñansa di Spaña. Noemí a probecha di e oportunidad pa duna e minister un ehemplar di e videocassette Testigonan di Jehova Ta Para Firme Contra Atake Nazi. E minister gustosamente a acepta e regalo.

Na Manresa, Noemí su pueblo natal, e corant local a hala atencion na Noemí su logro academico y a repasa e contenido di su opstel. Ademas, e cabes di su scol a pidie un copia di su opstel afin di inclui e den un programa pa conmemora e di 75 aniversario di e scol secundario.

Noemí a bisa: “Esaki ta e mihor final cu mi por a imagina pa mi estudio na scol secundario. Mi a keda supercontento ora cu mi a lesa e palabranan aki cu mi docente, Sr. Jorge Tomás Calot, a skirbi como parti di su introduccion di mi informe:

‘Mi ta ateo, pero lo mi tin gana di ta absolutamente combenci di e existencia di e Ser Supremo aki cu ta inspira den su adoradonan e “amor pa prohimo” di mas autentico.’”