En Busca di Iluminacion

“IGNORANCIA nunca por ta mihor cu conocemento”, segun Laura Fermi, esposa di e famoso fisico Enrico Fermi. Algun hende lo no ta di acuerdo cu ne pasobra nan ta haya cu loke bo no sa hamas lo por perhudica bo. Pero pa mayoria hende e declaracion aki ta valido, no solamente riba tereno di investigacion cientifico sino tambe den otro areanan di bida. Ignorancia, esta, falta di conocemento di e berdad, a pone cu pa siglonan largo hopi hende a dual den scuridad intelectual, moral y spiritual.—Efesionan 4:18.

P’esei hende cu ta pensa mas aleu ta busca iluminacion. Nan kier sa pakico nos ta aki y na unda nos ta bai. Nan buskeda a hiba nan riba diferente caminda. Laga nos considera algun di nan brevemente.

E Caminda di Religion?

Segun tradicion budista, algo cu tabatin Siddhārtha Gautama, fundado di budismo, sumamente perturba ta sufrimento y morto di hende. El a pidi maestronan religioso hindu pa yud’e haya “e caminda di e berdad.” Algun di nan a recomend’e pa practica yoga y hiba un bida di abnegacion extremo. Finalmente Gautama a scohe meditacion personal profundo como e caminda cu ta hiba na berdadero iluminacion.

Otronan a uza droga cu ta pone nan halucina den nan buskeda di iluminacion. Por ehempel, awe miembronan di Iglesia Indigena Mericano ta bisa cu peyote—un tipo di cadushi cu ta contene un substancia cu ta causa halucinacion—ta un “revelador di conocemento scondi.”

Segun e filosofo Frances di siglo 18, Jean-Jacques Rousseau, cualkier hende cu ta investiga cosnan cu un curason sincero por ricibi un revelacion spiritual personalmente for di Dios. Con? Dor di scucha “loke Dios ta bisa bo curason.” Anto, loke bo ta sinti tocante cierto cosnan—loke bo emocionnan y consenshi ta bisa bo—lo bira “un guia mas sigur den e inmenso labirinto aki di opinion humano”, segun Rousseau.—History of Western Philosophy.

Atrabes di Intelecto?

Hopi contemporaneo di Rousseau no tabata ni un tiki di acuerdo cu e tipo di acercamento religioso ei. Por ehempel, segun su compatriota Frances, Voltaire, religion sigur no a ilumina hende. Al contrario, e ta haya cu ta religion tabata e motibo principal pakico Europa a cai den siglonan di ignorancia, supersticion y intolerancia durante e periodo cu algun historiado ta yama e Epoca di Scuridad.

Voltaire a bira parti di un movemento Europeo racionalista conoci como Iluminacion. Su siguidonan a  adopta e ideanan di e Griegonan di antiguedad—esta, cu inteligencia humano y investigacion cientifico ta e yabinan pa haya berdadero iluminacion. Un otro miembro di e movemento racionalista, Bernard de Fontenelle, a bisa cu inteligencia humano riba su mes lo a hiba humanidad na “un siglo cu dia pa dia lo bira mas ilumina, di manera cu, na comparacion cu ne, tur siglo anterior lo perde den scuridad.”—Encyclopædia Britannica.

Esakinan ta djis algun di e cantidad di ideanan conflictivo tocante con pa haya iluminacion. Tin realmente ‘un guia sigur’ cu nos por acudi na dje den nos buskeda di e berdad? Wak kico e siguiente articulo ta bisa tocante e fuente confiabel di iluminacion.

[Plachi na pagina 3]

Gautama (Buda), Rousseau y Voltaire a cohe diferente caminda den nan buskeda di iluminacion