“Esun Cu Acepta Reprendemento Ta Prudente”

“DIRIGI bo curason na instruccion [“disciplina”, NW], y bo horeanan na palabranan di conocemento”, Proverbionan 23:12 ta bisa. Den e texto aki “disciplina”, of entrenamento moral, ta inclui tanto disciplina propio como e reprendemento cu nos ta ricibi di otro hende. Pa un hende por duna disciplina e mester sa ki coreccion ta necesario y con pa dun’e. P’esei, e “palabranan di conocemento” di un fuente confiabel ta esencial pa duna disciplina.

E buki biblico di Proverbionan ta un fuente excelente di palabranan sabi. E proverbionan registra den dje ta “pa conoce sabiduria y instruccion [“disciplina”, NW], ... pa ricibi instruccion den conducta prudente, husticia, huicio y rectitud.” (Proverbionan 1:1-3) Ta sabi pa nos ‘dirigi nos horeanan’ na nan. Proverbionan capitulo 15 ta duna conseho sano encuanto con nos por domina rabia, uza nos lenga y imparti conocemento. Laga nos considera algun versiculo for di e capitulo ei.

Kico Ta “Kita Rabia”?

Dunando un descripcion di ki efecto palabra papia por tin riba rabia, Rei Salomon di Israel di antiguedad a declara: “Un contesta suave ta kita rabia, ma un palabra skerpi ta lanta rabia.” (Proverbionan 15:1) Hende ta uza e palabra “rabia” pa describi un emocion fuerte of reaccion di desgusto. Con e proverbio aki por yuda nos trata cu e rabia di un otro persona y tambe controla esun di nos mes?

Palabra skerpi cu ta causa dolor por haci un situacion desagradabel bira piyo. Di otro banda, un contesta suave hopi bes ta calma e situacion. Ma no ta tur biaha ta facil pa contesta un persona rabia na un manera suave. Pero loke por yuda ta si nos ta purba compronde kico a pon’e rabia. Bijbel ta bisa: “Prudencia di un hende ta haci cu e no ta rabia lihe, y pa laga un ofensa pasa ta su gloria [“bunita di su parti”, NW].” (Proverbionan 19:11) Ta existi e posibilidad cu un persona ta rabia pa motibo cu e ta insigur di su mes of pasobra e kier atencion? Kisas e motibo real no tin nada di aber cu loke nos por a bisa of haci. Ora un persona contesta nos den un forma rabia den e ministerio cristian, hopi biaha esei no ta pasobra e doño di cas ta mal  informa tocante nos creencianan of ta ciega dor di un of otro concepto eroneo? Nos tin cu tum’e como algo personal y responde bek na mal manera? Asta ora e motibo di un persona su rabia no ta bisto mesora, si nos contesta cu palabranan cu ta causa dolor nos ta mustra cu nos no tin disciplina propio. Nos mester evita di reacciona asina.

E conseho pa duna un contesta suave ta balioso tambe ora nos tin cu controla nos mes rabia. Nos por aplica e conseho ei dor di siña expresa nos emocionnan na un manera cu no ta ofende e oyente. Ora nos ta trata miembronan di famia, en bes di papia bruto cu nan of insulta nan, nos por haci esfuerso pa expresa nos sintimentonan na un manera calmo. Por lo general, agresion verbal ta provoca represaya. Ora nos papia suavemente cu un persona tocante nos sintimentonan, nos manera di papia no ta sali den forma di acusacion y esei lo por impuls’e pa pidi despensa.

“Lenga di e Sabinan Ta Uza Conocemento Corectamente”

Disciplina propio ta afecta nos manera di papia y tambe loke nos ta bisa. Salomon a bisa: “Lenga di e sabinan ta uza conocemento corectamente, ma boca di e bobonan ta brota locura.” (Proverbionan 15:2) Ora nos cultiva un deseo pa yuda otro hende y nos papia cu nan tocante e proposito di Dios y su provisionnan maraviyoso, nos no ta ‘uzando conocemento corectamente’? Un persona bobo no ta haci esaki pasobra e falta conocemento.

Prome cu Salomon duna mas guia encuanto uzo di e lenga, e ta presenta un contraste cu ta pone hende pensa seriamente. “E wowonan di SEÑOR ta tur caminda, vigilando malo y bon.” (Proverbionan 15:3) Nos por alegra pa motibo di esaki pasobra Bijbel ta sigura nos: “Wowo di SEÑOR ta move bai bin dor di henter tera, pa e por sostene fuertemente esnan cu nan curason ta completamente di dje.” (2 Cronicanan 16:9) Dios sa ora nos ta haci loke ta bon. E ta tuma nota tambe di esnan cu ta practica loke ta malo y ta tene nan responsabel.

Mas aleu Salomon ta enfatisa e balor di un lenga suave, bisando: “Un lenga suave ta un palo di bida, ma perversidad den dje ta kibra e spirito.” (Proverbionan 15:4) E expresion “palo di bida” ta duna e idea di algo cu ta cura y fortifica. (Revelacion 22:2) E papia suave of calmo di un persona ta refresca e spirito of disposicion di esnan cu ta tend’e. E ta stimula nan bon cualidadnan. Di otro banda, un lenga engañoso of perverso ta kibra e disposicion di e personanan cu ta tende.

Ricibi Disciplina y “Plama Conocemento”

“Un bobo ta desprecia disciplina di su tata”, e Rei sabi ta continua, “ma esun cu acepta reprendemento ta prudente.” (Proverbionan 15:5) Con un hende por “acepta reprendemento” si e no a ricibi esaki prome? E texto aki ta indica cu mester duna disciplina den forma di coreccion ora esaki ta necesario, no ta berdad? Den un famia, ta e mayornan, specialmente e tata, tin e responsabilidad pa duna disciplina y e yiunan tin deber di acepta esei. (Efesionan 6:1-3) Sinembargo, tur sirbidor di Jehova ta ricibi disciplina den un of otro forma. Hebreonan 12:6 ta bisa: “Esnan cu SEÑOR ta stima, e ta disciplina, y e ta suta tur yiu cu e ta ricibi.” E manera cu nos ta reacciona na disciplina ta revela si nos ta sabi of bobo.

Presentando un otro contraste mas, Salomon ta bisa: “Lipnan di e sabinan ta plama conocemento, ma curason di e bobonan no ta haci asina.” (Proverbionan 15:7) Plamamento di conocemento ta manera plamamento di simiña. Den temponan antiguo, un cunukero no tabata sembra tur su simiñanan na un caminda so. Mas bien, cada biaha e tabata plama un par di simiña te ora e cubri henter e tereno. Ta mescos cu plamamento di conocemento. Por ehempel, ora nos topa un persona den sirbishi, no ta sabi pa splic’e den un tiro  tur loke nos sa di Bijbel. En bes di esei, e persona sabi ta demostra disciplina den su abla. E ta “plama” conocemento tiki tiki segun cu e ta enfatisa gradualmente djis un berdad di Bijbel y ta edifica riba dje, teniendo cuenta cu e reaccion di esun cu ta tend’e. Ta esei ta loke Hesucristo, nos Ehempel, a haci ora el a papia cu un muher Samaritano.—Juan 4:7-26.

Imparti conocemento ta ensera bisa algo instructivo y beneficioso. Preparacion ta necesario pa expresa palabranan cu ta informa y anima. P’esei, “curason di e husto ta studia bon con pa contesta.” (Proverbionan 15:28) Ta masha importante pa nos palabranan ta manera awasero suave cu ta muha tera y ta beneficioso, y no manera un tormenta cu ta bari tur cos den su caminda!

‘Santo den Conducta’

Sin duda, e proceder sabi ta pa plama conocemento tocante Jehova y su proposito y ofrec’e “e fruta di lipnan” como “un sacrificio di alabansa.” (Hebreonan 13:15) Sinembargo, pa un sacrificio asina ta aceptabel pa Jehova, nos mester ta “santo den tur [nos] conducta.” (1 Pedro 1:14-16) Uzando dos proverbio den forma di contraste, na un manera combencente Salomon ta hala nos atencion riba e berdad vital aki. E ta bisa: “Sacrificio di e malbadonan ta abominacion pa SEÑOR, ma oracion di e rectonan ta su delicia. Caminda di e malbado ta abominacion pa SEÑOR, ma e ta stima esun cu ta sigui husticia.”—Proverbionan 15:8, 9.

Con personanan cu ta bandona e caminda cu ta hiba na bida ta mira reprendemento, y kico ta warda nan? (Mateo 7:13, 14) “Disciplina severo ta pa esun cu bandona e caminda; esun cu ta odia reprendemento lo muri.” (Proverbionan 15:10) En bes di acepta conseho di coreccion for di personanan responsabel den e congregacion cristian y arepenti di curason, algun cu ta cana den mal caminda ta prefera di bandona e caminda di husticia. Esta un bobedad!

Kico di un hende cu ta duna e impresion cu e ta acepta reprendemento mientras cu en realidad e ta odi’e? E tampoco no ta duna muestra di ta sabi. “Seol y Abadon [“luga di destruccion”, NW] ta dilanti di SEÑOR”, e Rei di Israel a bisa. “Cuanto mas e curasonnan di hende!” (Proverbionan 15:11) Na moda di papia, no tin nada cu por ta mas aleu for di e Dios bibo cu Seol, e luga di e mortonan. Toch, e ta dilanti dje. E conoce e identidad y personalidad di tur hende cu ta eiden y e por resusita nan. (Salmo 139:8; Huan 5:28, 29) Ta masha facil pa Jehova sa kico hende tin den  nan curason! Segun apostel Pablo: “Tur cos ta habri y bisto dilanti di wowo di esun cu nos tin di aber cu ne.” (Hebreonan 4:13) Esun cu ta fingi por gaña hende, pero no Dios.

Un persona cu ta rechasa disciplina no solamente ta odia reprendemento sino tambe ta menosprecia esun cu ta dun’e. Salomon di: “Un hacido di bofon no ta stima esun cu reprend’e.” Anto pa amplia riba e punto aki el a agrega e pensamento paralelo: “Ni e lo no bai cerca e sabinan.” (Proverbionan 15:12) No tin masha speransa cu un persona asina lo bai cana den e bon caminda!

Punto di Bista Positivo

E siguiente tres proverbionan di Salomon tin di aber cu e palabra “curason.” E Rei sabi ta mustra ki efecto nos emocionnan tin riba nos cara: “Un curason alegre ta haci cara contento, ma ora cu e curason ta tristo, e spirito ta kibra.”—Proverbionan 15:13.

Kico por haci un curason tristo? Bijbel ta bisa: “Ansha den curason di hende ta hacie abati [tristo].” (Proverbionan 12:25) Con nos por evita cu e aspectonan negativo di bida ta kibra nos? En bes di pensa constantemente riba circunstancianan riba cua kisas nos no tin hopi control, nos por medita riba e bendicionnan spiritual rico cu Jehova a drama riba nos awor y riba loke lo e haci pa nos den futuro. Esaki lo hala nos mas cerca di dje. Si, si nos hala cerca “e Dios felis”, esei sin duda lo yena nos curason tristo cu goso.—1 Timoteo 1:11, NW.

Ademas, e mensahe di Bijbel ta un fuente excelente di consuelo y deleite. E salmista a bisa cu e hende cu tin ‘delicia den e lei di SEÑOR, y cu ta medita di dia y anochi riba su lei’, lo ta felis. (Salmo 1:1, 2) Asta ora nos ta hopi tristo, lesamento di Bijbel y meditacion riba loke e ta bisa lo anima nos. Nos tin tambe e sirbishi cu Dios a duna nos. Bijbel ta sigura nos cu “esnan cu sembra cu awa na wowo lo cosecha cu grito di alegria.”—Salmo 126:5.

Salomon ta bisa: “Curason di esun cu tin comprondemento ta busca conocemento, ma boca di e bobo ta alimenta su mes cu locura.” (Proverbionan 15:14) E proverbio aki ta hala nos atencion riba un contraste skerpi entre e conseho di un persona sabi y esun di un persona bobo. Un persona cu tin comprondemento ta busca conocemento prome cu e duna conseho. E ta scucha bon y ta purba haya e detayenan cu e mester sa di dje. E ta investiga den e Scritura pa haya sa cua lei y principio ta aplica den e situacion. Su conseho ta firmemente basa riba e Palabra di Dios. Sinembargo, un persona bobo no ta worry pa busca manera pa sa e detayenan di e situacion sino ta papia loke bini na su mente. P’esei, ora nos ta busca conseho, ta sabi pa bai cerca personanan maduro cu tin conocemento en bes di cerca esnan cu kisas ta inclina pa bisa nos loke nos kier tende. Nos por ta masha contento cu den e congregacion cristian tin ‘donnan den hende’ cu ta “busca conocemento” prome cu nan duna conseho!—Efesionan 4:8.

E siguiente proverbio ta declara con un punto di bista positivo por resulta den gran beneficio. E Rei di Israel a bisa: “Tur e dianan di esun cu ta aflihi ta malo, ma esun di curason contento semper tin fiesta.” (Proverbionan 15:15) Bida tin su bendicionnan y su calamidadnan, su goso y su tristesa. Si nos consentra solamente riba e parti negativo, tristesa lo domina nos pensamentonan y tur nos dianan lo ta deprimente. Sinembargo, si nos laga bendicionnan personal y e speransa cu Dios ta duna nos domina nos pensamentonan, e aspectonan di bida cu ta causa afliccion lo bira insignificante y nos lo experimenta un goso di curason. Un punto di bista positivo ta pone cu “semper [nos] tin fiesta.”

Laga nos haci tur nos esfuerso anto pa duna hopi balor na disciplina. Laga nos permitie influencia no solamente nos emocionnan, nos abla y accionnan, sino tambe nos punto di bista.

[Plachi na pagina 13]

“Un contesta suave ta kita rabia”

[Plachi na pagina 15]

Mayornan tin e responsabilidad di duna disciplina

[Plachi na pagina 15]

“Lipnan di e sabinan ta plama conocemento”