Hobennan, Scohe pa Sirbi Jehova

‘Scohe pa boso mes awe ken boso lo sirbi.’—JOSUE 24:15.

1, 2. Cristiandad a practica ki formanan robes di bautismo?

“LAGA [muchanan] bira cristian ora cu nan tin suficiente tino pa por siña conoce Cristo.” Un escritor cu yama Tertuliano a skirbi e palabranan ei na fin di siglo 2 di nos era. E tabata protestando contra bautismo di baby, un practica cu a cuminsa bira un custumber den cristianismo apostata di su tempo. Agustin, un di e tatanan di iglesia, contradiciendo Tertuliano y Bijbel, tabata pretende cu bautismo ta kita e mancha di pica original y cu babynan cu muri sin ta batisa ta ser condena na fierno di candela. E creencia ei a promove e custumber di batisa baby mas lihe posibel despues cu nan nace.

² Hopi religion tradicional di cristiandad te ainda ta batisa baby recien naci. Ademas, atrabes di historia, gobernante- y lidernan religioso di nacionnan asina yama cristian tabatin e custumber di tene bautismo obligatorio di “paganonan” conkista. Pero bautismo di baby y bautismo obligatorio di hende adulto no ta basa riba Bijbel.

Awe Dedicacion No Ta Automaticamente

3, 4. Kico por yuda yiunan di mayornan dedica na Dios haci un dedicacion voluntario?

³ Bijbel ta mustra cu Dios ta considera cu yiu chikito ta santo ora cu maske ta un di nan mayornan so ta un fiel cristian. (1 Corintionan 7:14) Pero, esaki ta haci e muchanan ei sirbidor dedica di Jehova? No. Sinembargo, muchanan cu ser cria pa mayornan dedica na Jehova ta haya entrenamento cu por hiba e muchanan ei na haci un dedicacion voluntario na Jehova. Rei sabi Salomon a skirbi: “Mi yiu, warda e mandamento di bo tata, y no bandona e siñansa di bo mama ...  Ora bo ta riba caminda, nan lo guia bo; ora bo ta drumi, nan lo cuida bo; y ora bo lanta, nan lo papia cu bo. Pasobra e mandamento ta un lampi, y e siñansa ta lus; y e reprendementonan di disciplina ta e caminda di bida.”—Proverbionan 6:20-23.

⁴ E guia di mayornan cristian por ta un proteccion pa hobennan, basta cu nan ta dispuesto pa siguie. Salomon a declara tambe: “Un yiu sabi ta haci su tata contento, ma un yiu bobo ta un tristesa pa su mama.” “Scucha, mi yiu, y sea sabi, y dirigi bo curason riba e caminda.” (Proverbionan 10:1; 23:19) Si, pa boso hobennan beneficia di e entrenamento di boso mayornan, boso mester ta dispuesto pa acepta conseho y disciplina. Boso no ta nace sabi, pero boso por ‘bira sabi’ y voluntariamente sigui “e caminda di bida.”

Kico Ta Reglamento Mental?

5. Ki conseho Pablo a duna yiunan y tatanan?

⁵ Apostel Pablo a skirbi: “Yiunan, obedece boso mayornan den Señor, pasobra esaki ta husto. Honra bo tata y bo mama (cu ta e prome mandamento cu un promesa), pa bai bo bon y pa bo tin bida largo riba tera. Y boso, tatanan, no provoca boso yiunan na rabia, ma lanta nan den e disciplina y instruccion di Señor [of, “reglamento mental di Jehova”, NW].”—Efesionan 6:1-4.

6, 7. Kico lanta yiu den e “reglamento mental di Jehova” ta ensera, y dicon esaki no ta nifica cu e mayornan ta influenciando nan yiunan inhustamente?

⁶ Acaso mayornan cristian ta influenciando nan yiunan inhustamente ora cu nan ta lanta nan den ‘e disciplina y reglamento mental di Jehova’? No. Ken por critica mayornan pasobra nan ta siña nan yiunan loke nan ta considera corecto y moralmente probechoso? Ateonan no ta ser critica pasobra nan ta siña nan yiunan cu Dios no ta existi. Mayornan catolico Romano ta sinti cu nan tin e obligacion di lanta nan yiunan den e fe catolico, y masha poco biaha nan ta ser critica pasobra nan ta purba haci esei. Di igual manera, hende no mester acusa Testigonan di Jehova di ta manipula mente di nan yiunan ora cu nan ta lanta nan pa adopta Jehova su manera di mira berdadnan basico y principionan moral.

⁷ Segun e diccionario Theological Dictionary of the New Testament, e palabra Griego original traduci como “instruccion” of “reglamento mental” na Efesionan 6:4 ta referi na un proceso cu ta “trata di corigi e mente, di drecha loke ta robes, di mehora e actitud spiritual.” Kico si un hoben ta resisti entrenamento di su mayornan debi na presion di su pareunan, esta, e deseo di haci loke su pareunan ta haci? Ta ken nos por bisa ta eherce presion perhudicial: e mayornan of e pareunan di e hoben? Si e hoben su pareunan ta presion’e pa uza droga, bebe hopi alcohol of participa den conducta inmoral, lo mester critica e mayornan pasobra nan ta purba ahusta nan yiu su manera di pensa y yud’e realisa kico ta e consecuencianan di tal conducta peligroso?

8. Kico a yuda cu Timoteo “a keda combenci” di loke el a siña?

⁸ Apostel Pablo a skirbi na e homber hoben Timoteo: “Continua den e cosnan cu bo a siña y a keda combenci di dje, sabiendo di ken bo a siña nan; y cu for di infancia bo a conoce e scrituranan santo, cualnan por duna bo e sabiduria cu ta hiba na salbacion pa medio di fe, cu ta den Cristo Hesus.” (2 Timoteo 3:14, 15) For di Timoteo su infancia, su mama y su wela a pone un fundeshi firme pa su fe den Dios basa riba conocemento di e Santo Scritura. (Echonan 16:1; 2 Timoteo 1:5) Despues, ora cu nan a bira cristian, nan no a forsa Timoteo pa kere sino mas bien el a “keda combenci” dor di nan  rasonamento sano basa riba conocemento biblico.

Jehova Ta Invita Bo pa Scohe

9. (a) Con Jehova a honra su criaturanan, y pa ki motibo? (b) Con Dios su Yiu unigenito a uza su boluntad liber?

⁹ Jehova por a traha su criaturanan manera robot, programa pa haci su boluntad y sin cu nan por a tuma nan propio decisionnan. Pero na luga di esei, el a duna nan e honor di tin boluntad liber. Nos Dios kier tin sirbidornan voluntario. E tin delicia den mira su criaturanan, bieu y hoben, sirbie pasobra nan stim’e. E mihor ehempel di somete na Dios su boluntad pa motibo di amor ta di su Yiu unigenito, di ken Jehova a bisa: “Esaki ta mi Yiu stima, den kende mi tin goso.” (Mateo 3:17) E Yiu primogenito aki a bisa su Tata: “Pa haci bo boluntad, o mi Dios, ta un delicia pa mi; bo lei ta den mi curason.”—Salmo 40:8; Hebreonan 10:9, 10.

10. Kico ta e base pa sirbi Jehova di un manera aceptabel?

¹⁰ Jehova ta spera cu e hendenan cu ta sirbie bou di guia di su Yiu ta demostra e mesun actitud di somete nan mes di buena gana na Su boluntad. Profeticamente, e salmista a canta: “Bo pueblo lo pone su mes disponibel den e dia di bo poder; den e splendor di santidad, for di e matris di marduga, bo hobennan ta pa bo manera serena.” (Salmo 110:3) Henter Jehova su organisacion, tanto e parti den shelo como esun riba tera, ta funciona a base di sumision na Dios motiva pa amor.

11. Ki choice tin poni dilanti di hobennan cu ta ser cria pa mayornan dedica?

¹¹ Pues, boso hobennan, mester compronde cu ni boso mayornan ni e ancianonan cristian den congregacion lo no bai forsa boso pa batisa. E deseo pa sirbi Jehova mester sali for di boso mes. Josue di pasado a bisa e Israelitanan: “Sirbi [Jehova] cu sinceridad y den berdad ... Scohe pa boso mes awe [ken] boso lo sirbi.” (Josue 24:14-22) Asina tambe, ta di boso propio boluntad boso mester scohe pa dedica boso mes na Jehova y uza boso bida pa haci su boluntad.

Acepta Bo Responsabilidad

12. (a) Aunke mayornan por educa nan yiunan, kico si nan no por haci pa nan? (b) Ki ora un hoben ta bira responsabel dilanti di Jehova pa e decisionnan cu e ta tuma?

¹² Hobennan, ta yega un momento cu boso no ta cai mas bou di e proteccion cu ta bin dor di e fieldad di boso mayornan. (1 Corintionan 7:14) Discipel Santiago a skirbi: “Pa esun cu sa di haci loke ta bon, y no ta hacie, p’e esaki ta pica.” (Santiago 4:17) Mayornan no por sirbi Dios pa nan yiunan, mescos cu yiunan no por sirbi Dios pa nan mayornan. (Ezekiel 18:20) Bo a siña tocante Jehova y su proposito? Bo ta suficiente grandi pa compronde loke bo a siña y pa cuminsa desaroya un relacion personal cu Jehova? Lo no ta rasonabel anto pa pensa cu Dios ta considera bo suficiente capasita pa tuma e decision di sirbie?

13. Cua ta algun pregunta cu lo ta bon pa teenagernan no batisa haci nan mes?

¹³ Bo ta un publicador no batisa cu ta ser cria pa mayornan cu ta adora Dios? Bo ta asistiendo na reunionnan cristian y asta ta participa den e predicacion di e bon nobo di Reino? Si ta asina, puntra bo mes honestamente:  ‘Dicon mi ta haci esaki? Mi ta asisti na reunion y participa den e trabou di predica pasobra mi mayornan ta rekeri esei of pasobra ami kier agrada Jehova?’ Bo a comproba pa bo mes “kico ta e bon y agradabel y perfecto boluntad di Dios”?—Romanonan 12:2.

Pakico Pospone Bautismo?

14. Menciona algun ehempel biblico cu ta mustra cu no mester pospone bautismo innecesariamente.

¹⁴ “Kico ta stroba pa mi wordo batisa?” E homber Etiope cu a haci e pregunta ei na e evangelisado Felipe a caba di siña cu Hesus tabata e Mesias. Pero e Etiope tabatin suficiente conocemento di e Scritura pa e realisa cu e no mester tarda pa duna testimonio abiertamente cu for di e momento ei en adelante lo e sirbi Jehova como parti di e congregacion cristian, y esei a dun’e hopi goso. (Echonan 8:26-39) Mescos tambe tabata e caso di un muher cu yama Lidia, kende ‘su curason a ser habri pa paga atencion na e cosnan cu Pablo tabata bisa.’ El a “batisa” mesora, e hunto cu e hendenan di su cas. (Echonan 16:14, 15) Di igual manera, e wardado di prizon na Filipos a scucha Pablo cu Silas segun cu nan ‘a papia e palabra di Jehova cu ne’, y “el a wordo batisa mesora, e y tur e hendenan di su cas.” (Echonan 16:25-34) Pues anto, si bo tin un conocemento basico di Jehova y di su proposito, un deseo sincero di haci su boluntad, y un bon reputacion den e congregacion y bo ta asisti fielmente na reunion y participa den e predicacion di e bon nobo di Reino, pakico lo bo mester pospone bautismo?—Mateo 28:19, 20.

15, 16. (a) Ki rasonamento incorecto kisas ta stroba algun hoben di batisa? (b) Con dedicacion y bautismo por sirbi como un proteccion pa hobennan?

¹⁵ Ta posibel cu bo ta basila pa dal e paso importante aki pasobra bo tin miedo cu lo bo tin cu rindi cuenta si bo haya bo envolvi den mal conducta? Si ta asina, pensa riba esaki: Lo bo nenga di bai saca bo rijbewijs djis pasobra bo tin miedo cu algun dia lo bo por ta envolvi den un accidente? Claro cu no! Wel, bo no mester basila tampoco pa batisa si bo ta cualifica. De echo, si bo a dedica bo bida na Jehova y a bai di acuerdo pa haci su boluntad, lo bo tin un motivacion fuerte pa haci bo best pa resisti malecho. (Isaias 12:2) Hobennan, por fabor no kere cu dor di pospone bautismo boso ta evita di tin cu rindi cuenta. Ora bo alcansa un edad cu bo ta carga bo propio responsabilidad, sea cu bo ta batisa of no, bo tin cu rindi cuenta na Jehova pa e manera cu bo ta actua.—Romanonan 14:11, 12.

¹⁶ Rond mundo tin cantidad di Testigo di Jehova cu ta sinti cu nan decision di batisa tempo nan tabata jong a yuda nan masha hopi. Tuma por ehempel un hoben Testigo di 23 aña di edad na West Europa. E ta corda  cu e echo cu el a batisa cu 13 aña a motiv’e pa tene cuidou pa “e pasionnan di hubentud” no domin’e. (2 Timoteo 2:22) For di chikito el a fiha su bista riba e meta di sirbi como un minister di tempo completo. Awe, felismente e ta sirbi na un sucursal di Testigonan di Jehova. Bendicion na abundancia ta spera tur hoben cu scohe pa sirbi Jehova, y esei ta inclui abo tambe.

17. Relaciona cu ki actividadnan ta necesario pa compronde kico ta ‘e boluntad di Jehova’?

¹⁷ Dedicacion y bautismo ta marca e comienso di un bida den cua nos ta tuma Jehova su boluntad na cuenta den tur nos actividadnan. Pa cumpli cu nos dedicacion nos mester ‘cumpra tempo.’ Con nos ta haci esei? Dor di uza e tempo cu di otro manera nos lo a dedica na actividadnan vano, pa mas bien studia Bijbel seriamente, asisti cu regularidad na reunion y participa mas plenamente posibel den e predicacion di e evangelio of ‘bon nobo di reino.’ (Efesionan 5:15, 16; Mateo 24:14) Nos dedicacion na Jehova y nos deseo di haci su boluntad lo tin un bon influencia riba tur aspecto di nos bida, incluso riba e manera cu nos ta uza nos tempo liber, nos custumbernan di come y bebe, y e tipo di muzik cu nos ta scucha. Dicon bo no ta scohe e tipo di recreo cu lo bo por disfruta di dje pa eternidad? Miles di Testigo hoben y felis lo por conta bo cu tin hopi manera sano pa diberti y toch keda denter di e limitenan di ‘e boluntad di Jehova.’—Efesionan 5:17-19.

“Laga Nos Bai cu Boso”

18. Ki pregunta hobennan tin cu puntra nan mes?

¹⁸ Di aña 1513 prome cu nos era te cu Pentecoste di aña 33 di nos era, Jehova tabatin riba tera un pueblo organisa cu el a scohe pa ador’e y pa nan ta su testigonan. (Isaias 43:12) Israelitanan hoben tabata nace como parti di e nacion ei. Desde Pentecoste, Jehova tin un “nacion” nobo riba tera, Israel spiritual, “un pueblo pa su nomber.” (1 Pedro 2:9, 10; Echonan 15:14; Galationan 6:16) Apostel Pablo a declara cu Cristo a purifica pa su mes “un pueblo peculiar, cu celo den hacimento di bon obra.” (Tito 2:14) Hobennan, boso ta liber pa determina personalmente unda boso ta haya e pueblo ei. Ken awe ta forma ‘e nacion husto cu ta keda fiel’, cu ta biba na harmonia cu principionan biblico, cu ta actua como Testigonan fiel di Jehova, y cu ta proclama su Reino como e unico speransa pa humanidad? (Isaias 26:2-4) Wak e iglesianan di cristiandad y otro religionnan, y compara nan conducta cu loke Bijbel ta rekeri di berdadero sirbidornan di Dios.

19. Di kico miyones di hende rond mundo a bira combenci?

¹⁹ Miyones di hende rond mundo, incluso hopi hoben, a bira combenci cu e resto ungi di Testigonan di Jehova ta forma e “nacion husto” ei. Nan ta bisa e Israelitanan spiritual aki: “Laga nos bai cu boso, pasobra nos a tende cu Dios ta cu boso.” (Zacarias 8:23) Di curason nos ta spera y ta pidi den oracion cu boso, hobennan, lo dicidi di bira parti di Dios su pueblo y asina “scohe bida”, esta, bida eterno den Jehova su mundo nobo.—Deuteronomio 30:15-20; 2 Pedro 3:11-13.

Como Repaso

• Kico reglamento mental ta ensera?

• Ki clase di sirbishi ta aceptabel pa Jehova?

• Ki choice tin dilanti di tur hoben cu ta ser cria pa mayornan dedica?

• Pakico no mester pospone bautismo innecesariamente?

[Preguntanan di Estudio]

[Plachi na pagina 26]

Ken lo bo scucha?

[Plachi na pagina 28]

Con dedicacion y bautismo por sirbi como un proteccion pa bo?

[Plachi na pagina 29]

Kico ta stroba bo di batisa?