Nan A Nace Como Parti di Dios Su Nacion Scohi

“[Jehova] bo Dios a scohe bo ... pa ta un pueblo special pa su mes.”—DEUTERONOMIO 7:6.

1, 2. Ki actonan poderoso Jehova a efectua na fabor di su pueblo, y ki relacion e Israelitanan a forma cu Dios?

NA AÑA 1513 prome cu nos era, Jehova a forma un relacion nobo cu su sirbidornan riba tera. E aña ei, Jehova a humilia un potencia mundial y a libra e Israelitanan for di sclabitud. Cu e accion ei el a bira nan Salbador y Doño. Prome cu Dios a actua el a bisa Moises: “Bisa e yiunan di Israel: ‘Ami ta SEÑOR [Jehova], y ami lo saca boso for di bou di e carganan di e Egipcionan, y lo mi libra boso for di nan sclabitud. Tambe lo mi redimi boso cu un brasa extendi y cu huicionan pisa. Y lo mi tuma boso como mi pueblo, y lo mi ta boso Dios.’”—Exodo 6:6, 7; 15:1-7, 11.

² Poco despues di e Israelitanan su Exodo for di Egipto, nan a drenta den un relacion cu nan Dios, Jehova, basa riba un aliansa of pacto. En bes di trata cu personanan individual, famianan of grupo di famia, Jehova djawo en adelante lo tabatin un pueblo organisa, un nacion, riba tera. (Exodo 19:5, 6; 24:7) El a duna su pueblo lei cu a dirigi nan bida diario y, mas importante ainda, nan adoracion. Moises a bisa nan: “Ki gran nacion tin, cu tin un dios asina cerca di dje, manera SEÑOR nos Dios ta ki ora cu nos yama na dje? Of ki gran nacion tin, cu tin estatutonan y huicionan asina husto, manera henter e lei aki cu mi ta pone boso dilanti awe?”—Deuteronomio 4:7, 8.

Naci den un Nacion di Testigo

3, 4. Cua tabata un motibo importante di Israel su existencia como nacion?

³ Siglonan despues, Jehova mediante su profeta Isaias a recorda e Israelitanan di un motibo importante pakico nan ta existi como nacion. Isaias a bisa: “Asina SEÑOR [Jehova], bo Creador, ta bisa, o Jacob y Esun cu a forma bo, o Israel: ‘No tene miedo, pasobra ami a redimi bo; mi a yama bo na bo nomber; bo ta di mi! Pasobra ami ta SEÑOR bo Dios, Esun Santo di Israel, bo Salbador ... Trece mi yiu hombernan for di leu, y mi yiu muhernan for di e finnan di tera, cada un cu ta wordo yama na mi nomber, y cu mi a crea pa mi gloria, cu mi a forma y cu mi a traha. Boso ta mi testigonan’, SEÑOR [Jehova] ta declara, ‘y mi sirbidor cu mi a scohe ...  E pueblo cu mi a forma pa mi mes lo declara mi alabansa.’”—Isaias 43:1, 3, 6, 7, 10, 21.

⁴ Como un pueblo yama na Jehova su nomber, e Israelitanan lo a actua como testigo di su soberania dilanti di e nacionnan. Nan mester tabata un pueblo ‘crea pa Jehova su gloria.’ Nan mester a ‘declara Jehova su alabansa’, es decir, conta tocante su actonan maraviyoso di liberacion y asina glorifica su nomber santo. En corto, nan mester a fungi como un nacion di testigo pa Jehova.

5. Den ki manera Israel tabata un nacion dedica?

⁵ Den siglo 11 prome cu nos era, Rei Salomon a indica cu Jehova a haci Israel un nacion separa. Den oracion na Jehova, el a declara: “Bo a separa nan for di tur e pueblonan di tera como bo herencia.” (1 Reinan 8:53) Israelitanan individual tambe tabatin un relacion special cu Jehova. Mas prome, Moises a bisa nan: ‘Boso ta e yiunan di Jehova boso Dios. Pasobra bo ta un pueblo santo pa Jehova bo Dios.’ (Deuteronomio 14:1, 2) Pues, Israelitanan hoben no tabatin nodi dedica nan bida na Jehova. Nan a nace como miembro di Dios su pueblo dedica. (Salmo 79:13; 95:7) Cada generacion nobo tabata ser instrui den e leinan di Jehova y tabata obliga na warda nan debi na e aliansa cu a mara Israel na Jehova.—Deuteronomio 11:18, 19.

Liber pa Scohe

6. Ki escohencia e Israelitanan individual tabatin cu haci?

⁶ Aunke e Israelitanan a nace den un nacion dedica, cada persona tabatin cu tuma un decision personal pa sirbi Dios. Prome cu nan a drenta e Tera Priminti, Moises a bisa nan: “Mi ta yama shelo y tera como testigo contra boso awe, cu mi a pone bida y morto boso dilanti, e bendicion y e maldicion. P’esei, scohe bida pa bo biba, abo y bo desendientenan, dor di stima SEÑOR bo Dios, dor di obedece su bos y dor di tene duro na dje; pasobra esaki ta bo bida y e largura di bo dianan, pa bo biba na e tera cu SEÑOR a hura na bo tatanan, na Abraham, Isaak y Jacob, pa duna nan.” (Deuteronomio 30:19, 20) Pues, individualmente e Israelitanan tabatin cu scohe pa stima Jehova, obedece su bos y tene duro na dje. Ya cu e Israelitanan tabatin boluntad liber, nan lo tabatin cu carga e consecuencianan di e escohencia cu nan haci.—Deuteronomio 30:16-18.

7. Kico a pasa despues cu e generacion di Josue a muri?

⁷ E periodo di Huesnan ta ilustra bon cla e consecuencianan di fieldad y di infieldad. Un poco prome cu e periodo ei a cuminsa, e Israelitanan a sigui e bon ehempel di Josue y Dios a bendiciona nan. “E pueblo a sirbi SEÑOR tur e dianan di Josue, y tur e dianan di e ancianonan cu a biba mas cu Josue, cu a mira henter e gran obra di SEÑOR cu el a haci pa Israel.” Sinembargo, poco despues di Josue su morto, “a lanta un otro generacion despues di nan cu no tabata conoce SEÑOR, ni e obra cu el a haci pa Israel. Anto e yiunan di Israel a haci maldad den bista di SEÑOR.” (Huesnan 2:7, 10, 11) Aparentemente, e generacion nobo y sin experencia, no a duna masha balor na nan herencia como miembro di un pueblo dedica, na kende su fabor nan Dios, Jehova, a efectua actonan poderoso den pasado.—Salmo 78:3-7, 10, 11.

Cumpliendo cu Nan Dedicacion

8, 9. (a) Ki areglo a permiti e Israelitanan demostra nan dedicacion na Jehova? (b) Kico esnan cu a haci ofrenda voluntario a gana pa nan mes?

⁸ Jehova a duna su pueblo varios oportunidad pa cumpli cu nan dedicacion como nacion. Por ehempel, Dios su Lei tabatin un sistema di sacrificio, of ofrenda, di cua algun tabata obligatorio, mientras cu otronan tabata voluntario. (Hebreonan 8:3) E sacrificionan ei a inclui ofrendanan voluntario manera, ofrenda kima, ofrenda di grano  y ofrenda di pas (of di comunion). E ofrendanan aki tabata regalonan presenta na Jehova pa haya su aprobacion y pa expresa gradicimento.—Levitico 7:11-13.

⁹ E sacrificionan voluntario aki a agrada Jehova. Bijbel ta bisa cu e ofrenda kima y e ofrenda di grano tabata ‘un holo dushi pa Jehova.’ (Levitico 1:9; 2:2) Den e ofrenda di pas, nan a ofrece e sanger y e vet di e bestia na Jehova, mientras cu e sacerdotenan y e persona cu a haci e ofrenda a come cierto porcion di e carni. Pues e tabata un cena simbolico cu a nifica un relacion di pas cu Jehova. E Lei a declara: “Awor ora boso ta ofrece un sacrificio di e ofrendanan di pas na SEÑOR, boso mester ofrece esaki di tal manera cu boso lo ta acepta.” (Levitico 19:5) Aunke di nacemento tur Israelita tabata dedica na Jehova, esnan cu realmente a desea di scohe Jehova como nan Dios dor di haci ofrendanan voluntario, ‘lo a ser acepta’ y a haya bendicion rico.—Malakias 3:10.

10. Con Jehova a expresa su mal contento den tempo di Isaias y di Malakias?

¹⁰ Sinembargo, e nacion dedica di Israel cu frecuencia a duna prueba di ta infiel na Jehova. Jehova a bisa nan mediante su profeta Isaias: “Bo no a trece pa mi henter e carne di bo ofrendanan kima, y bo no a glorifica mi cu bo sacrificionan. Mi no a obliga bo sirbi mi cu un regalo.” (Isaias 43:23, NW) Ademas, ofrendanan cu no tabata haci voluntariamente y motiva pa amor, no tabatin balor den bista di Jehova. Por ehempel, tres siglo despues di Isaias, den tempo di profeta Malakias, e Israelitanan tabata ofrece bestia mancaron. P’esei Malakias a bisa nan: “‘Mi no ta contento cu boso’, e SEÑOR di ehersitonan ta bisa, ‘ni lo mi no acepta un ofrenda for di boso man.’ ... ‘Boso ta trece loke a wordo horta, y loke ta lam of malo; asina boso ta trece e ofrenda! Mi mester acepta esei for di boso man?’ SEÑOR ta bisa.”—Malakias 1:10, 13; Amos 5:22.

 Rechasa Como un Nacion Dedica

11. Ki oportunidad Jehova a duna Israel?

¹¹ Tempo cu e Israelitanan a bira un nacion dedica na Jehova, el a priminti nan: “Si di berdad boso kier obedece mi bos y warda mi aliansa, e ora ei boso lo ta un tesoro peculiar riba tur pueblo, pasobra henter tera ta di mi; y boso lo ta pa mi un reino di sacerdotenan y un nacion santo.” (Exodo 19:5, 6) E Mesias priminti lo a aparece meimei di nan y duna nan e prome chens di bira miembro di Dios su gobernacion di Reino. (Genesis 22:17, 18; 49:10; 2 Samuel 7:12, 16; Lucas 1:31-33; Romanonan 9:4, 5) Pero mayoria hende di e nacion di Israel no a cumpli cu nan dedicacion. (Mateo 22:14) Nan a rechasa e Mesias y cu tempo a mat’e.—Echonan 7:51-53.

12. Ki declaracionnan di Hesus ta mustra cu Israel a ser rechasa como Jehova su nacion dedica?

¹² Un par di dia prome cu Hesus su morto, el a bisa e lidernan religioso Hudiu: “Boso no a lesa nunca den e Scrituranan: ‘E piedra cu e trahadonan a rechasa, esaki a bira e piedra-di-skina principal; esaki a bin di SEÑOR, y e ta maraviyoso den nos bista’? P’esei mi ta bisa boso, e reino di Dios lo wordo kita for di boso, y duna na un nacion cu si ta hacie produci fruta.” (Mateo 21:42, 43) Pa mustra cu Jehova a rechasa nan como un nacion dedica na Dje, Hesus a declara: “O Jerusalem, Jerusalem, abo cu ta mata e profetanan y ta piedra esnan cu ta wordo manda cerca dje! Cuanto biaha mi no tabata kier a hunta bo yiunan, manera un galiña ta hunta su puyitonan bou di su halanan, y boso no tabata kier. Mira, boso cas ta keda desola pa boso!”—Mateo 23:37, 38.

Un Nacion Dedica Nobo

13. Ki declaracion profetico Jehova a haci den tempo di Jeremias?

¹³ Den tempo di profeta Jeremias, Jehova a profetisa un cos nobo relaciona cu su pueblo. Nos ta lesa: “‘Ata, e dianan ta bin’, SEÑOR ta declara, ‘cu lo mi sera un aliansa nobo cu e cas di Israel y cu e cas di Juda, no manera e aliansa cu mi a sera cu nan tatanan den e dia cu mi a cohe nan na nan man pa saca nan for di tera di Egipto, mi aliansa cu nan a kibra, aunke cu mi tabata un esposo pa nan’, SEÑOR ta declara. ‘Ma esaki ta e aliansa cu lo mi sera cu e cas di Israel despues di e dianan ei’, SEÑOR ta declara. ‘Lo mi pone mi lei den nan y lo mi skirbie riba nan curason; y ami lo ta nan Dios y nan lo ta mi pueblo.’”—Jeremias 31:31-33.

14. Ki tempo y a base di kico Jehova su nacion dedica nobo a keda forma? Identifica e nacion nobo ei.

¹⁴ E base pa e aliansa nobo aki a ser poni ora cu Hesus a muri y despues a presenta e balor di su sanger drama na su Tata na aña 33 di nos era. (Lucas 22:20; Hebreonan 9:15, 24-26) Sinembargo, e aliansa nobo a drenta na vigor ora cu Dios a drama spirito santo na Pentecoste di aña 33 y un nacion nobo, “e Israel di Dios”, a keda forma. (Galationan 6:16; Romanonan 2:28, 29; 9:6; 11:25, 26) Den un carta na cristiannan ungi, apostel Pedro a declara: “Boso ta un rasa scohi, un sacerdocio  real, un nacion santo, un pueblo peculiar, pa boso por proclama e alabansanan di esun cu a yama boso for di scuridad na su lus maraviyoso; pasobra un tempo boso no tabata un pueblo, ma awor boso ta e pueblo di Dios.” (1 Pedro 2:9, 10) Pues, e relacion special entre Jehova y Israel carnal a termina. Na aña 33 di nos era, Jehova a transferi su bendicion for di Israel terenal pa Israel spiritual, esta e congregacion cristian, ‘un nacion cu si ta produci fruta’ di e Reino Mesianico.—Mateo 21:43.

Dedicacion Individual

15. Riba e dia di Pentecoste di aña 33, Pedro a urgi su oyentenan pa haci cua bautismo?

¹⁵ Despues di Pentecoste di aña 33, cada persona individual, Hudiu of no Hudiu, tabatin cu haci un dedicacion personal na Dios y ser batisa “den nomber di e Tata y di e Yiu y di e spirito santo.” * (Mateo 28:19) Na Pentecoste, apostel Pedro a bisa Hudiunan y proselitonan receptivo: “Arepenti, y laga cada un di boso wordo batisa den e nomber di Hesucristo pa pordon di boso picanan; y boso lo ricibi e don di spirito santo.” (Echonan 2:38) E Hudiunan y proselitonan ei tabatin cu indica mediante nan bautismo no solamente cu nan a dedica nan bida na Jehova sino tambe cu nan a acepta Hesus como e medio cu Jehova lo uza pa pordona nan picanan. Nan tabatin cu reconoce Hesus como Jehova su Sumo Sacerdote y como nan Lider, e Cabes di e congregacion cristian.—Colosensenan 1:13, 14, 18.

16. Den tempo di Pablo, con hende cu tabatin e disposicion corecto—tanto Hudiu como no Hudiu—a bira parti di Israel spiritual?

¹⁶ Añanan despues, apostel Pablo a declara: “[Mi] a declara prome na esnan na Damasco, despues na Jerusalem y den henter e region di Judea y na e paganonan, cu nan mester arepenti y comberti na Dios, y haci obranan cu ta cuadra cu arepentimento.” (Echonan 26:20) Despues di a combence hende—tanto Hudiu como no Hudiu—cu Hesus tabata Cristo, e Mesias, Pablo a yuda nan yega na dedicacion y bautismo. (Echonan 16:14, 15, 31-33; 17:3, 4; 18:8) Dor di acudi na Dios, e discipelnan nobo a bira miembro di Israel spiritual.

17. Ki trabou di seyamento ta cerca di termina, y ki otro trabou ta tumando luga rapidamente?

¹⁷ Awe, e seyamento definitivo di e resto di Israelitanan spiritual ta cerca di termina. Ora esei keda completa, e ‘cuater angelnan’ cu ta wanta e bientonan di destruccion di “e gran tribulacion” lo haya autorisacion pa laga nan los. Mientrastanto, recohemento di e “multitud grandi”, cu tin e speransa di biba pa semper riba tera, ta tumando luga rapidamente. E “otro carnenan” aki voluntariamente ta scohe pa eherce fe den “e sanger di e Lamchi” y ta batisa como simbolo di nan dedicacion na Jehova. (Revelacion 7:1-4, 9-15; 22:17; Juan 10:16; Mateo 28:19, 20) Entre nan tin hopi hoben cu a ser educa pa mayornan cristian. Si bo ta un hoben asina, e siguiente articulo lo interesa bo.

[Nota]

Como Repaso

• Dicon Israelitanan hoben no tabatin nodi haci un dedicacion personal na Jehova?

• Con e Israelitanan por a demostra cu nan a cumpli cu nan dedicacion?

• Dicon Jehova a rechasa Israel como su nacion dedica, y con nan a ser remplasa?

• Di Pentecoste di aña 33 en adelante, kico tanto hende Hudiu como no Hudiu tabatin cu haci pa bira miembro di Israel spiritual?

[Preguntanan di Estudio]

[Plachi na pagina 21]

Muchanan Israelita a nace como miembro di Dios su nacion scohi

[Plachi na pagina 23]

Cada Israelita mester a tuma un decision personal pa sirbi Dios

[Plachi na pagina 23]

Ofrendanan voluntario a duna e Israelitanan e oportunidad di demostra nan amor pa Jehova

[Plachi na pagina 25]

Despues di Pentecoste di aña 33, siguidonan di Cristo tabatin cu haci un dedicacion personal na Dios y simbolisa esaki mediante bautismo