Pa Nan Ta un Goso pa Haci e Boluntad di Dios

HESUS a pone un ehempel pa tur cristian sigui ora cu el a bisa su Tata den oracion: “[Laga] no mi boluntad, ma di bo sosode.” (Lucas 22:42) Awe, miyones di sirbidor di Dios ta ripiti e mesun expresion humilde ei di sumision na Jehova. Entre nan tin e 52 studiantenan di e di 120 klas di e Scol Biblico di Galaad di Watchtower. Dia 11 di maart 2006, e graduadonan di e klas aki tabata contento cu e perspectiva di por bai haci e boluntad di Dios den varios pais, a pesar cu nan lo confronta circunstancianan dificil.

Kico a motiva e graduadonan aki pa laga e boluntad di Jehova dirigi nan bida? Chris cu Leslie, un pareha asigna pa sirbi como misionero na Bolivia, a splica nan motivacion asin’aki: “Ya cu nos a nenga nos mes, nos kier pone nos mes disponibel pa haci loke sea cu nan asigna nos den cooperacion cu Jehova su organisacion.” (Marco 8:34) Jason cu Chere, asigna pa bai Albania a agrega: “Tur asignacion cu nos a haya for di Jehova su organisacion tabatin su retonan cu ne. Sinembargo, nos a descubri cu Jehova ta merece nos pleno confiansa.”

Animacion pa Somete na e Boluntad di Jehova

George Smith, un miembro di e famia di Betel cu ta sirbi na e Departamento di Arte, a habri e programa cu oracion. Stephen Lett, miembro di e Cuerpo Gobernante di Testigonan di Jehova y presidente di e programa di graduacion, a duna tur presente un bonbini. Huespetnan for di 23 pais a bin na e Centro Educativo di Watchtower na Patterson, New York, pa nan por ta presente na e ocasion felis aki. Ruman Lett a bisa e klas di graduado cu nan ta bai efectua “algo masha poderoso.” El a hala atencion na “baluartenan”, of cosnan fuertemente hancra, cu e misioneronan lo por basha abou mediante e poder di e Scritura, manera por ehempel, doctrinanan falso. (2 Corintionan 10:4, 5) El a conclui: “Ki un goso boso lo sinti cu Jehova ta uza boso pa basha abou e cosnan fuertemente hancra cu tin den e hendenan di curason honrado den boso asignacion!”

Harold Jackson, miembro di e oficina principal, a papia riba e tema “Algun Cos pa Keda Corda.” El a bisa cu e misioneronan nobo no mester lubida nunca di “busca prome e reino di Dios y Su husticia.” (Mateo 6:33) Nan tin cu keda corda cu “amor ta edifica” y ta un factor importante y infalibel pa nan por tin exito. (1 Corintionan 8:1) E orador di: “Laga amor ta e influencia principal cu ta guia boso manera di trata cu otro hende.”

Despues di e discurso ei, Geoffrey Jackson, un miembro di Cuerpo Gobernante cu a sirbi como misionero for di 1979 te cu 2003, a puntra e graduadonan: “Ta Abo Ta Responsabel?” El a enfatisa con necesario ta pa nos  tin un punto di bista balansa di nos mes y di e ministerio. Cristiannan tin e responsabilidad di traha duro den e trabou di planta y muha e simiñanan di e berdad. Sinembargo, ta Jehova su responsabilidad pa duna crecemento spiritual, ya cu ta ‘Dios ta duna crecemento.’ (1 Corintionan 3:6-9) Ruman Jackson a agrega: “Jehova ta tene boso responsabel pa keda spiritualmente fuerte. Pero kico ta boso responsabilidad di mas grandi? Stima Jehova y stima e hendenan cu boso ta bai sirbi.”

Instructor di Galaad, Lawrence Bowen, a trata e tema “Sabi Con Bo Mester Comporta Bo Mes.” El a recorda e studiantenan cu Jehova milagrosamente a guia y proteha e Israelitanan durante nan trayecto den desierto. (Exodo 13:21, 22) E ta guia y proteha nos awe, en parte mediante e congregacion cristian ungi, cu ta “e pilar y sosten di e berdad.” (1 Timoteo 3:14, 15) E misioneronan nobo mester promove e berdad, pasobra ta e berdad ta duna guia y proteccion na personanan humilde.

 Wallace Liverance, un otro instructor di Galaad, a urgi e graduadonan pa no lubida e palabra di Dios cu ta “tras” di nan. E palabra di Dios ta nos tras den e sentido cu ta siglonan pasa a completa e Bijbel. Mescos cu un wardado di carne cu ta duna instruccion canando tras di un tou di carne, asina Jehova ta tras di su pueblo, dunando nan guia mediante “e esclabo fiel y prudente.” (Isaias 30:21; Mateo 24:45-47) Scol di Galaad a yuda e graduadonan haya mas aprecio pa e esclabo fiel. E “esclabo” a asta percura pa nos tin e Traduccion di Mundo Nobo di e Santo Scritura. E orador a anima e graduadonan: “Tuma e tesoro aki di informacion, y uz’e pa siña otro hende.”—Mateo 13:52.

Haci e Boluntad di Jehova den Sirbishi di Veld

Den e parti di e programa “Ansioso pa Predica e Bon Nobo”, instructor di Galaad Mark Noumair, a trece dilanti algun di e experencianan cu e graduadonan tabatin den nan ministerio publico durante e periodo cu nan a asisti na e Scol di Galaad. (Romanonan 1:15) E entrevistanan cu varios graduado a saca na cla cu en berdad nan tabata masha ansioso mes pa predica na tur ocasion.

E graduadonan a haya mas animacion ainda for di un entrevista cu Kenneth Flodin a tene cu tres superintendente biahero cu awor ta sirbi na Merca. Richard Keller y Alejandro Lacayo, kendenan den pasado a sirbi na Sur y Centro America, a splica con nan a logra supera varios prueba. Tambe nan a conta tocante algun di e bendicionnan cu nan a haya tempo cu nan tabata sirbi como misionero. Moacir Felisbino a conta di e entrenamento cu el a haya trahando estrechamente hunto cu misioneronan na Brazil, caminda el a lanta como mucha.

David Schafer a entrevista tres misionero veterano, Robert Jones, Woodworth Mills y Christopher Slay. E tres rumannan aki a conta con nan a siña actua cu confiansa den Jehova ora cu nan tabata confronta dificultad. Nan a sigura e klas cu e entrenamento cu nan a haya for di Jehova su organisacion a prepara nan bon pa nan asignacion como misionero. Ruman Mills a resumie asin’aki: “Loke a yuda ami mas tanto no tabata e parti academico di Galaad, sino loke e scol a siña mi tocante humildad y amor.”

Guy Pierce, miembro di Cuerpo Gobernante, a presenta e discurso principal titula “Nunca Jehova Lo Fracasa.” Adam a fracasa, pero acaso esei a nifica un fracaso di parti di Dios? Ta Dios a crea Adam cu un defecto, manera tin hende ta bisa? Absolutamente cu no, pasobra e ‘Dios berdadero a traha hende recto.’ (Eclesiastes 7:29) Hesus su caminda di integridad bou di e prueba di mas grandi riba tera a comproba cu “Adam no tabatin ningun excuse, ningun motibo pa faya”, e orador a declara. E prueba di obediencia cu Adam a pasa den e hofi di Eden tabata hopi mas facil compara cu e prueba cu Hesus a confronta cu exito. Toch, Adam a fracasa. Sinembargo, nunca Jehova lo fracasa. Su proposito lo ser realisa. (Isaias 55:11) Ruman Pierce a bisa e misioneronan nobo: “Boso tin e privilegio di honra Jehova cu boso spirito di sacrificio propio. Jehova sea cu boso na unda cu boso ta sirbie como misionero.”

Despues cu Ruman Lett, presidente di e programa, a menciona e saludonan di varios sucursal di Testigonan di Jehova, el a entrega e graduadonan nan diploma y asignacion. Vernon Wisegarver, kende tin hopi aña ta sirbi como miembro di e famia di Betel, a representa e auditorio den e oracion di conclusion.

E 6.872 personanan presente a haya cu e programa di graduacion a renova nan entusiasmo pa haci e boluntad di Dios. (Salmo 40:8) E graduadonan Andrew y Anna a bisa: “Nos a dedica nos bida na Jehova. Nos a priminti Jehova di haci kico cu e pidi nos. Awel, a sosode cu Jehova a pidi nos pa bai Camerun, Africa.” Nan y e otro miembronan di e klas ta ansioso pa cuminsa cu un carera cu lo duna nan un sintimento di logro y satisfaccion. Si, pa nan ta un goso pa haci e boluntad di Dios.

[Cuadro na pagina 17]

ESTADISTICANAN DI E KLAS

Cantidad di pais representa: 6

Cantidad di pais na cua a asigna nan: 20

Cantidad di studiante: 52

Promedio di edad: 35,7

Promedio di aña den e berdad: 18,3

Promedio di aña den sirbishi di tempo completo: 14,5

[Plachi na pagina 18]

E di 120 Klas di Graduado di e Scol Biblico di Galaad di Watchtower

Den e lista akibou, e reinan ta numera di dilanti bai patras, y e nombernan ta bai di robes pa drechi den cada rei.

(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.