Storia di Bida

Perseverancia Ta Trece Goso

SEGUN E RELATO DI MÁRIO ROCHA DE SOUZA

“No ta probabel cu Sr. Rocha lo sobrevivi un operacion.” A pesar di e pesimismo di e docter, awe, un 20 aña despues, ainda mi ta na bida sirbiendo como un predicado di tempo completo di Testigonan di Jehova. Kico a yuda mi persevera tur e añanan aki?

MI A pasa mi infancia na un hacienda banda di Santo Estêvão, un pueblito den e estado di Bahia, noordoost Brazil. Tempo mi tabatin shete aña, mi a cuminsa yuda mi tata cu trabou di hacienda. Tur dia despues di scol, e tabata duna mi un tarea. Despues di tempo, ki ora cu Tata tabata bai haci negoshi na Salvador, e stad capital, e tabata laga e hacienda na mi encargo.

Aunke nos no tabatin electricidad, awa di cranchi of e otro comodidadnan comun djawe, toch nos tabata felis. Nos tabata subi fli of core e garoshinan di palo cu ami cu mi amigonan tabata traha. Ademas, mi tabata toca clarinet den procesionnan religioso. Mi tabata canta den coro di mucha den e misa local, y ta einan mi a mira un buki cu yama História Sagrada, cu a lanta mi curiosidad den Bijbel.

Na 1932, tempo mi tabatin 20 aña, un secura severo y largo a asota e parti noordoost di Brazil. Nos bestianan a muri y e cultivonan a fracasa, p’esei mi a muda bai Salvador, caminda mi a haya trabou como conductor di tram. Despues mi a huur un cas y a trece mi famia pa biba cerca mi. Ora mi tata a muri na 1944, mi a keda cu e encargo di percura pa mi mama y mi ocho ruman muhernan y tres ruman hombernan.

 Di Conductor di Tram pa Predicado

Un di e prome cosnan cu mi a haci ora mi a yega Salvador tabata cumpra un Bijbel. Despues cu mi a asisti na iglesia baptista pa algun aña, mi a sera amistad cu Durval, un colega conductor di tram. Hopi bes ami cu Durval tabata papia oranan largo tocante Bijbel. Riba un dia el a duna mi un foyeto titula Unda e Mortonan Ta? * Aunke mi tabata combenci cu hende tin un alma inmortal, mi curiosidad a pone mi busca e textonan di Bijbel cita den e foyeto. Pa mi sorpresa, Bijbel a confirma cu e alma cu ta peca lo muri.—Ezekiel 18:4.

Notando mi interes, Durval a pidi Antônio Andrade, un predicado di tempo completo di Testigonan di Jehova, pa bishita mi na cas. Despues di su di tres bishita, Antônio a invita mi pa compañ’e den e trabou di comparti siñansanan di Bijbel cu otro hende. Despues cu el a papia na e prome dos casnan, e di: “Awor ta bo beurt.” Mi tabata hopi nervioso, pero pa mi gran alegria, un famia a scucha cu atencion y a acepta e dos bukinan cu mi a ofrece. Te na e dia djawe, mi ta haya e mesun sintimento di goso ora mi topa un persona cu ta interesa den e berdad di Bijbel.

Dia 19 di april 1943, riba e aniversario di e morto di Cristo pa e aña ei, mi a batisa den Ocean Atlantico, banda di Salvador. Pa motibo cu no tabatin suficiente hombernan cristian cu experencia, nan a nombra ami pa yuda e grupo di Testigonan cu tabata reuni den cas di Ruman Andrade den un di e cayanan smal cu ta conecta e parti halto y e parti mas abou di e stad di Salvador.

Oposicion na Principio

Durante e añanan di Segundo Guera Mundial (1939-45) nos actividad cristian no tabata mucho popular. Algun oficial tabata sospecha cu nos tabata spion Norte Americano pasobra mayoria di nos publicacionnan tabata bini di Merca. Esei a pone cu ta cada bes nan tabata aresta nos y interoga nos. Ora un Testigo no a bolbe bek for di sirbishi di veld, nos tabata conclui cu el a ser deteni, y nos tabata bai warda di polis pa busca moda di sac’e liber.

Na augustus 1943, Adolphe Messmer, un Testigo Aleman, a yega Salvador pa yuda organisa nos prome asamblea. Despues cu nos a haya permit di autoridadnan pa tene e asamblea, nos a cuminsa pone anuncionan pa e discurso publico “Libertad den e Mundo Nobo” den corantnan local, y tambe plak posternan riba bentana di pacus y riba e tramnan. Pero riba e di dos dia di e asamblea, un polis a informa nos cu nos permit pa tene reunion a keda cansela. E arsobispo di Salvador a pone presion riba e hefe di polis pa para nos asamblea. Sinembargo, e siguiente april nos a haya permit finalmente pa tene e discurso publico cu a ser anuncia mas prome.

 Un Meta pa Alcansa

Na 1946, mi a ricibi un invitacion pa asisti na e Asamblea Teocratico Nacionnan Gososo den e stad di São Paulo. E capitan di un barco di carga na Salvador a permiti un grupo di nos biaha riba su barco, basta nos a drumi riba dek. A pesar cu nos a pasa dor di un tormenta durante cua nos tur a maria, despues di cuater dia riba lama nos a yega sano y salvo na Rio de Janeiro. E Testigonan na Rio a ricibi nos den nan cas, y nos por a sosega un par di dia prome cu nos a sigui cu nos biahe cu trein. Un grupo chikito cu tabatin spandoek cu e mensahe “Bonbini Testigonan di Jehova” a saluda nos ora nos trein a yega São Paulo.

Un poco despues cu nos a regresa Salvador, mi a papia cu Harry Black, un misionero di Merca, tocante mi deseo pa bira pionero, manera predicadonan di tempo completo di Testigonan di Jehova ta ser yama. Harry a recorda mi cu mi tabatin responsabilidad di famia y a conseha mi pa mi tene pasenshi. Finalmente, pa juni 1952, mi rumannan a bira financieramente independiente, y mi a haya e asignacion pa sirbi como pionero den un congregacion chikito na Ilhéus, cant’i costa, 210 kilometer sur di Salvador.

Un Provision Generoso

E siguiente aña, mi a haya asignacion pa bai Jequié, un stad den interior di e pais caminda no tabatin Testigo. E prome persona cu mi a bishita tabata e pastor local. El a splica mi cu e stad tabata di dje y a prohibi mi di predica einan. El a spierta e parokianonan tocante yegada di un “profeta falso” y a pone spionnan rond e stad pa controla mi actividadnan. No obstante, riba e dia ei mi a laga mas cu 90 publicacion biblico y a cuminsa cuater estudio di Bijbel. Dos aña despues, Jequié tabatin su mes Salon di Reino cu 36 Testigo! Awe, tin ocho congregacion y rond di 700 Testigo na Jequié.

Durante mi prome lunanan na Jequié, mi tabata huur un cuarto chikito pafo di e stad. E tempo ei mi a topa Miguel Vaz de Oliveira, doño di Hotel Sudoeste, un di e mihor hotelnan na Jequié. Miguel a acepta un estudio di Bijbel y a insisti pa mi muda bai den un cuarto na su hotel. Despues, Miguel cu su casa a bira Testigo.

Otro grato recuerdo di e tempo cu mi a pasa na Jequié tin di aber cu Luiz Cotrim, un maestro di scol secundario cu kende mi a studia Bijbel. Luiz a ofrece pa yuda mi mehora mi conocemento di Portugues y matematica. Apenas mi a caba scol basico, p’esei mi a acepta su invitacion mesora. E lesnan ei despues di Luiz su estudio di Bijbel tur siman a yuda prepara mi pa e privilegionan adicional cu lo mi a ricibi pronto for di e organisacion di Jehova.

Dilanti un Reto Nobo

Na 1956, mi a ricibi un carta di invitacion pa bini na nos sucursal, e tempo ei, na Rio de Janeiro, pa ricibi entrenamento como superintendente di circuito, manera ministernan biahero di Testigonan di Jehova ta ser yama. E curso na cua ocho ruman mas a asisti, a dura algo mas cu un luna. Ora mi a caba e curso, mi a wordo asigna na São Paulo, locual a pone mi duda un tiki. Mi a puntra mi mes: ‘Kico ami, un homber preto, ta bai haci aya meimei di tur e Italianonan ei? Nan lo acepta mi?’ *

 Dia mi a bishita e prome congregacion den e districto di Santo Amaro, mi a keda hopi anima ora mi a mira e Salon di Reino yen di Testigo y otro hende interesa. Loke a combence mi cu mi temornan tabata infunda tabata cu tur e 97 publicadornan di e congregacion a participa den sirbishi di veld e fin di siman ei. Mi a pensa den mi mes: ‘Nan en berdad ta mi rumannan.’ E calor di e rumannan stima ei a duna mi curashi pa persevera den e sirbishi biahero.

Burico, Cabai y Miereneter

Un di e retonan di mas grandi cu superintendentenan biahero tabata haya nan cu ne den e temponan ei tabata e biahenan largo cu nan mester a haci pa yega na e congregacionnan y gruponan mas chikito di Testigo den areanan pafo di stad. Na e luganan ei, si tabatin transporte publico mes, e tabata insigur y mayoria di e camindanan tabata hanchinan smal di tera.

Algun circuito a resolve e problema aki dor di cumpra un burico of un cabai pa e superintendente di circuito uza. Hopi biaha, riba dialuna, mi tabata pone e siya riba lomba di e bestia, mara mi pertenencianan y core tin biaha 12 ora pa yega e siguiente congregacion. Na Santa Fé do Sul, e Testigonan tabatin un burico cu tabata yama Dourado cu tabata conoce e ruta pa yega e gruponan di estudio den cunucu. Dourado tabata yega para na e portanan di hacienda y warda cu pasenshi pa mi habri esakinan. Despues di e bishita, ami cu Dourado tabata sigui pa e siguiente grupo.

Falta di medionan confiabel di comunicacion tambe a haci e trabou di circuito un reto. Por ehempel, pa por a bishita un grupo chikito di Testigo cu tabata reuni na un hacienda den e estado di Mato Grosso, mi tabatin cu crusa Riu Araguaia cu boto y core 25 kilometer dor di e selva riba lomba di un bestia. Na un ocasion, mi a skirbi e grupo pa informa nan di mi bishita, pero aparentemente e carta a perde pasobra ni un hende no tabata warda mi ora mi a crusa e riu. Tabata atardi lat, p’esei mi a pidi e doño di un bar chikito pa wak mi ekipahe, y mi a sali na pia cu mi tas.

A bira scur hopi lihe. Segun cu mi tabata cana trompica den e scuridad, na un dado momento mi a tende un miereneter ta supla. Mi a yega di tende cu un miereneter por lanta para y mata un hende cu su poderoso patanan di dilanti. Pues ki ora cu mi a tende un zonido den e matanan cu a crece bou di palo, mi a cana cu cuidou cu mi tas dilanti mi como un proteccion. Despues di a cana pa oranan largo, mi a yega na un rooi. Desafortunadamente, den e scuridad mi no a ripara cu tabatin prikkeldraad na e otro banda di e rooi. Mi a logra bula over di e rooi den un solo stap, pero mi a bin cai riba e prikkeldraad y corta mi curpa!

Finalmente, mi a yega na e hacienda. Mi a wordo ricibi pa un grupo di cacho cu tabata  blaf. E tempo ei tabata masha comun pa ladronnan di carne ataca hende anochi. P’esei asina cu e porta a habri, mi a identifica mi mes mesora. E rumannan lo mester a haya duele di mi ora nan a mira mi pañanan tur mancha na sanger. Pero nan tabata contento cu mi a yega.

A pesar di e dificultadnan, tabata un dushi tempo. Mi tabata gusta e biahenan largo riba cabai y na pia, tin biaha sosegando den sombra di palo, scuchando e paharitonan canta y mirando e zoronan crusa mi dilanti riba e camindanan bandona ei. Un otro fuente di goso tabata e echo cu mi bishitanan tabata un berdadero yudansa pa e hendenan. Hopi di nan tabata skirbi mi pa expresa nan gratitud. Otronan a gradici mi personalmente ora nos tabata topa na asambleanan. Tabata un placer pa mira con hende tabata vence problema personal y progresa spiritualmente!

Porfin un Ayudante

Durante e añanan ei den e trabou biahero, hopi bes mi tabata mi so, y esei a siña mi depende riba Jehova como “mi baranca y mi baluarte.” (Salmo 18:2) Ademas, mi a realisa cu como soltero mi por a pone tur mi atencion na interesnan di Reino.

Sinembargo, na 1978, mi a topa un ruman muher pionero cu yama Júlia Takahashi. El a kita for di un trabou bon paga como verpleegster den un hospital grandi na São Paulo pa por a bai sirbi caminda tabatin mas necesidad di publicador di Reino. E ancianonan cristian cu tabata conoc’e tabata papia masha bon di su cualidadnan spiritual y habilidadnan como pionero. Manera bo por imagina, mi decision pa casa despues di asina tanto aña tabata un sorpresa pa algun hende. Un bon amigo di mi no por a kere, y el a priminti mi un toro di 270 kilo si di berdad mi a casa. Na nos recepcion di casamento dia 1 di juli 1978 nos a come e toro ei a la parilla.

Perseverancia a Pesar di Problema cu Salud

Júlia a join mi den e trabou biahero, y hunto nos a bishita congregacionnan den e parti zuid y zuidoost di Brazil durante e ocho añanan cu a sigui. E tempo ei mi a cuminsa haya problema cu curason. Dos biaha mi a cai flou ora mi tabata papia cu un doño di cas den e trabou di predica. En bista di mi limitacionnan, nos a acepta un asignacion como pionero special na Birigüi, Estado di São Paulo.

E Testigonan na Birigüi a ofrece pa hiba mi cu auto pa bishita un docter na Goiânia, rond di 500 kilometer leu. Unabes mi condicion a stabilisa, mi a laga haci un operacion pa pone un pacemaker (marcapaso). Esei tabata rond di 20 aña pasa. A pesar cu mi a haci dos operacion mas di curason, ainda mi ta activo den e trabou di haci discipel. Mescos cu hopi otro esposa cristian leal, Júlia ta un fuente constante di fortalesa y animacion pa mi.

Aunke problema cu salud a limita mi actividad y tin biaha ta desanima mi, ainda mi por traha como pionero. Mi ta conciente cu nunca Jehova a priminti nos cu bida den e sistema bieu aki lo ta liber di problema. Si apostel Pablo y otro cristiannan fiel di antiguedad tabatin cu persevera, nos lo no tin cu haci mescos?—Echonan 14:22.

Recientemente, mi a bin topa e prome Bijbel cu mi a cumpra den decada di 1930. Parti paden di e kaft mi a skirbi 350—e cantidad di proclamado di Reino na Brazil tempo mi a cuminsa asisti na e reunionnan cristian na 1943. Casi mi no por kere cu aworaki tin hopi mas cu 600.000 Testigo na Brazil. Esta un privilegio di por a duna un aporte chikito den e crecemento aki! Jehova sin duda a bendiciona mi perseverancia. Mescos cu e salmista, mi por bisa: “SEÑOR a haci cosnan grandi pa nos; p’esei nos ta contento.”—Salmo 126:3.

[Nota]

[Plachi na pagina 9]

Testigonan ta anuncia e discurso publico na e prome asamblea den e stad di Salvador, 1943

[Plachi na pagina 10]

Yegada di Testigonan na São Paulo pa e Asamblea Nacionnan Gososo, 1946

[Plachi na pagina 10, 11]

Den e trabou biahero na final di decada di 1950

[Plachi na pagina 12]

Hunto cu mi casa, Júlia