Su Fe Ta Anima Otro Hende

ORA cu Silvia a nace na december 1992, a parce cu e tabata un mucha muher completamente salud. Pero na edad di dos aña, docternan a saca afo cu Silvia tin fibrosis kistica, un malesa incurabel cu gradualmente ta causa problemanan severo di respiracion y di digestion. Pa trata cu su malesa, Silvia tin cu guli 36 tablet pa dia, e ta uza remedi cu e mester inhala y ta haya fisioterapia. Como cu e capasidad di su pulmonnan ta 25 porciento so di loke ta normal, e tin cu uza un tanki di oxigeno portatil pa hala rosea, asta ora cu e sali for di cas.

“Pero e manera cu Silvia ta lucha cu e malesa aki ta asombroso”, segun su mama, Teresa. E mama a sigui bisa: “Gracias na su conocemento di e Scritura, e tin un fe firme. E fe aki ta yud’e deal cu su tristesa y dolornan. Semper e ta corda riba Jehova su promesa di un mundo nobo, caminda tur hende enfermo lo ser cura.” (Revelacion 21:4) Tin biaha ora cu e famia ta desanima, Silvia su sonrisa yen di confiansa ta lanta nan animo. E ta bisa su mayornan y su ruman homber: “Bida den e mundo nobo lo bai compensa tur nos sufrimento actual.”

Silvia cu regularidad ta comparti e bon noticia di e Palabra di Dios cu otro hende, y e hendenan cu e ta papia cu ne ta ripara cu su cara ta briya di felicidad y goso. E miembronan di e congregacion cristian caminda e ta asisti na Islanan Canario, tambe ta gusta tende su comentarionan y di mir’e participa den e reunionnan. Anto despues di cada reunion, Silvia gusta keda pa papia cu su rumannan cristian. Su personalidad masha amigabel y alegre a motiva tur hende den e congregacion pa stim’e.

Su tata, Antonio, a remarca: “Silvia ta siña nos un les hopi importante. Asta ora nos tin problema, bida ta un regalo for di Dios, y nos mester apreci’e.” Mescos cu Silvia, tur sirbidor di Dios—hoben y bieu—ansiosamente ta spera e tempo ora cu “ningun habitante lo no bisa: ‘Mi ta malo.’”—Isaias 33:24.

[Plachi na pagina 31]

Silvia ta lesa un versiculo di Bijbel pa un persona mientras cu su mama ta tene e tanki di oxigeno