Enfoca Riba e Bondad di Jehova Su Organisacion

“Nos lo keda satisfecho cu e bondad di bo cas.”—SALMO 65:4.

1, 2. (a) Ki efecto e areglonan en conexion cu e tempel lo tabatin riba e pueblo di Dios? (b) Con David a sostene construccion di e tempel?

DAVID di Israel di antiguedad ta un di e hendenan di mas sobresaliente menciona den e Scritura Hebreo. E wardado, musico, profeta y rei aki a pone su confiansa completo den Jehova Dios. E relacion intimo cu David tabatin cu Jehova a lanta den dje un deseo pa traha un cas pa Dios. E cas of tempel ei lo a bira e centro di adoracion berdadero den Israel. David tabata sa cu e areglonan en conexion cu e tempel lo a trece goso y bendicion pa e pueblo di Dios. P’esei David a canta: “Bendiciona ta esun cu bo [Jehova] ta scohe y ta hala cerca bo, pa biba den bo pationan. Nos lo keda satisfecho cu e bondad di bo cas, bo tempel santo.”—Salmo 65:4.

² Jehova no a laga David supervisa e construccion di Su cas. Mas bien, el a reserva e privilegio ei pa su yiu Salomon. David no a murmura pa motibo cu un otro hende a haya e privilegio cu e mes a desea asina tanto. E cos di mas importante p’e tabata pa e tempel ser construi. El a sostene e proyecto di henter su curason dor di pasa e mapanan arkitectonico cu el a ricibi di Jehova pa Salomon. Ademas, David a organisa miles di Levita den divisionnan di sirbishi y a contribui cu gran cantidad di oro y plata pa construccion di e tempel.—1 Cronicanan 17:1, 4, 11, 12; 23:3-6; 28:11, 12; 29:1-5.

3. Ki actitud sirbidornan di Dios tin pa loke ta e areglonan pa adoracion berdadero?

³ E Israelitanan fiel a sostene e areglonan cu a ser haci pa adoracion berdadero na e cas di Dios. Como sirbidornan di Jehova di e tempo actual, nos tambe ta sostene areglonan pa adoracion den e parti terenal di Jehova su organisacion. Cu esei nos ta demostra cu nos tin e mesun actitud cu David tabatin. Nos no tin un actitud di keha. Mas bien, nos  ta enfoca riba e bondad di e organisacion di Dios. Bo a yega di pensa tocante e tantisimo cosnan bon pa cua nos por ta berdaderamente gradicido? Laga nos considera algun di nan.

Gradicido pa Esnan Cu Ta Hiba Delantera

4, 5. (a) Con “e esclabo fiel y prudente” ta cumpli cu su encargo? (b) Kico algun Testigo ta pensa di e cuminda spiritual cu nan ta ricibi?

⁴ Nos tin bon motibo pa ta gradicido pa “e esclabo fiel y prudente” cu Hesucristo a nombra riba su pertenencianan riba tera. E clase di esclabo di cristiannan ungi cu spirito ta encabesa e trabou di predica e bon nobo, ta programa reunionnan pa adoracion y ta publica literatura biblico den mas cu 400 idioma. Miyones di hende rond mundo ta ricibi cu gratitud e “cuminda [spiritual ei] na su debido tempo.” (Mateo 24:45-47) Sigur no tin motibo pa keha tocante esei.

⁵ Pa hopi aña, un Testigo di Jehova di edad avansa cu yama Elfi a haya consuelo y sosten dor di tuma na pecho e conseho biblico cu e clase di esclabo ta trece padilanti den su publicacionnan. Aprecio profundo a motiva Elfi pa skirbi: “Kico lo a para di mi sin e organisacion di Jehova?” Peter y Irmgard tambe ta sirbiendo Dios pa hopi decada. Irmgard ta expresa su gratitud pa tur e publicacionnan cu “Jehova su organisacion amoroso y bondadoso” a percura, incluso esnan diseña pa hende cu tin necesidadnan special, manera personanan cu tin problema cu bista of cu oido.

6, 7. (a) Con e actividadnan di e congregacionnan rond mundo ta ser supervisa? (b) Kico algun hende a bisa tocante e parti terenal di Jehova su organisacion?

⁶ E “esclabo fiel” ta wordo representa pa e Cuerpo Gobernante di Testigonan di Jehova, un grupo chikito di hombernan ungi cu spirito cu ta sirbi na e sede mundial di Testigonan di Jehova na Brooklyn, New York. E Cuerpo Gobernante ta nombra sirbidornan di Jehova cu tin experencia pa sirbi na sucursalnan cu ta supervisa e actividadnan di mas cu 98.000 congregacion rond mundo. Hombernan cu ta cumpli cu rekisitonan biblico ta ser nombra como anciano y sirbidor ministerial den e congregacionnan aki. (1 Timoteo 3:1-9, 12, 13) E ancianonan ta hiba delantera y ta pastorea e tou di Dios bou di nan cuido cu amor. Ta un bendicion berdad di por ta parti di e tou aki y di por experencia e amor y unidad cu ta existi entre henter e asociacion di “rumannan”!—1 Pedro 2:17; 5:2, 3.

 ⁷ En bes di keha, hopi bes e rumannan ta expresa aprecio pa e guia spiritual amoroso cu nan ta ricibi for di e ancianonan. Tuma por ehempel Birgit, un esposa cristian y mama cu tin 30 y pico aña. Como teenager, el a haya su mes envolvi den mal asociacion y casi el a comete malecho. Pero e conseho biblico franco di e ancianonan y e sosten cu el a ricibi di su rumannan cristian a scap’e for di un situacion cu por a bira hopi peligroso. Kico Birgit ta pensa awor? E ta bisa: “Mi ta hopi gradicido cu ainda mi ta pertenece na Jehova su organisacion maraviyoso.” Un mucha homber di 17 aña cu yama Andreas a bisa: “Esaki di berdad ta Jehova su organisacion, e mihor organisacion na mundo.” Nos no mester ta gradicido pa e bondad di e parti terenal di Jehova su organisacion?

Esnan Cu Ta Hiba Delantera Ta Imperfecto

8, 9. Kico algun contemporaneo di David a yega di haci, y con David a reacciona riba e accionnan ei?

⁸ Ta berdad cu e personanan nombra pa hiba delantera den adoracion berdadero ta imperfecto. Nan tur ta faya y algun tin debilidadnan persistente cu nan ta trahando duro pa domina. Esaki mester desgusta nos? No. Asta cierto personanan encarga cu hopi responsabilidad den Israel di antiguedad a comete fayonan grave. Por ehempel, tempo cu David tabata hoben ainda, nan a manda yam’e pa sirbi como musico pa calma Rei Saul cu tabata bastante perturba. Despues, Saul a purba mata David, kende finalmente a hay’e ta hui pa su bida.—1 Samuel 16:14-23; 18:10-12; 19:18; 20:32, 33; 22:1-5.

⁹ Otro Israelitanan a comporta nan di un manera traicionero. Por ehempel Joab, e comandante militar di David, a mata Saul su pariente Abner. Absalon a conspira contra su tata David pa e reinado. Y David su consehero di confiansa, Ahitofel, a traicion’e. (2 Samuel 3:22-30; 15:1-17, 31; 16:15, 21) Toch David no a keha amargamente, ni e no a bira lomba pa adoracion berdadero. Al contrario, adversidad a motiva David pa pega na Jehova y mantene e actitud excelente cu e tabatin ora el a hui pa motibo di Saul. E tempo ei, David a canta: “Tene misericordia di mi, o Dios, tene misericordia di mi, pasobra den bo mi alma ta tuma refugio; den e sombra di bo halanan lo mi tuma refugio, te ora cu destruccion [“adversidad”, NW] pasa bai.”—Salmo 57:1.

10, 11. Kico un cristian cu yama Gertrud a experencia tempo cu e tabata jong, y kico el a bisa tocante e fayonan di su rumannan den fe?

¹⁰ Nos no tin motibo pa keha cu tin traicion den e organisacion di Dios awe. Ni Jehova ni su angelnan ni wardadonan spiritual no ta tolera presencia di personanan malbado y traicionero den e congregacion cristian. No obstante, nos tur ta haya nos confronta cu imperfeccion humano, tanto di nos mes como di otro sirbidor di Dios.

¹¹ Tempo cu Gertrud, kende a sirbi Jehova pa hopi aña, tabata jong, nan a acus’e falsamente cu e ta un gañado y no un proclamado di Reino di tempo completo. Con el a reacciona? Gertrud a murmura tocante e trato ei? No. Un poco prome cu su morto na 2003 cu 91 aña di edad, el a reflexiona riba su bida y a bisa: “E experencianan aki y otronan cu mi a pasa aden despues a siña mi cu a pesar di e fayonan cu hende ta comete, Jehova ta esun cu ta dirigi su gran obra, den cua e ta uza nos cu ta hende imperfecto.” Ora Gertrud a haya su mes confronta cu e imperfeccionnan di otro sirbidornan di Dios, el a acudi na Jehova den oracion sincero.

12. (a) Ki mal ehempel algun cristian di e prome siglo a pone? (b) Riba kico nos mester consentra?

¹² Siendo cu asta e cristiannan di mas leal y devoto ta imperfecto, ora un sirbidor nombra comete un fayo, laga nos sigui haci “tur cos sin murmura.” (Filipensenan 2:14) Ta masha lamentabel pa bai tras di e mal ehempel di  algun persona di e congregacion cristian di prome siglo! Segun discipel Hudas, e maestronan falso di e tempo ei no a “haci caso di autoridad y a papia ofensivamente di esnan glorioso.” Ademas, e malechornan ei tabata “murmurado, kehado tocante nan suerte den bida.” (Hudas 8, 16, NW) Laga nos rechasa e rumbo cu e murmuradonan ei a sigui y consentra riba e cosnan excelente cu nos ta ricibi di e “esclabo fiel.” Laga nos mustra nos aprecio pa e bondad di Jehova su organisacion y “haci tur cos sin murmura.”

“E Discurso Aki Ta Ofensivo”

13. Con algun hende a reacciona riba cierto siñansanan di Hesucristo?

¹³ Mientras cu algun persona den e prome siglo tabata murmura contra sirbidornan nombra, otronan tabata murmura contra e siñansanan di Hesus. Manera Juan 6:48-69 ta trece dilanti, Hesus a declara: “Esun cu come mi carni y bebe mi sanger tin bida eterno.” Ora Hesus su discipelnan a tende e palabranan aki, hopi di nan a bisa: “E discurso aki ta ofensivo, ken por scuch’e?” [NW] Hesus tabata conciente cu “su discipelnan tabata murmura contra esaki.” Ademas, “como resultado di esaki hopi di [nan] a retira y no tabata cana cu ne mas.” Pero no ta tur discipel a murmura. Ripara kico a pasa ora Hesus a puntra e 12 apostelnan: “Boso tambe kier bai anto?” Apostel Pedro a contesta: “Señor, cerca ken nos lo bai? Abo tin e palabranan di bida eterno. Y nos a kere y a haya sa cu Abo ta Esun Santo di Dios.”

14, 15. (a) Pakico algun persona ta bira mal contento cu cierto aspecto di siñansa cristian? (b) Kico nos por siña for di e caso di un homber cu yama Emanuel?

¹⁴ Den e tempo actual, un grupo masha chikito di sirbidor di Dios a bira malcontento cu algun aspecto di siñansa cristian y a murmura contra e parti terenal di Jehova su organisacion. Pa ki motibo? Hopi bes e personanan aki ta murmura pasobra nan no ta compronde Dios su manera di haci cosnan. E Creador ta revela e berdad na su pueblo na un manera progresivo. P’esei de bes en cuando nos comprondemento di e Scritura tin cu wordo refina. E gran mayoria di Jehova su sirbidornan ta alegra cu e refinamentonan ei. Pero algun ta bira “demasiado husto” y ta resisti cambio. (Eclesiastes 7:16) Orguyo por hunga un rol, y algun ta cai den e trampa di pensamento independiente. Sea cual sea e motibo, e murmuramento ei ta peligroso, ya cu e por pone nos bai bek den mundo y su camindanan.

¹⁵ Tuma por ehempel Emanuel. E ta un Testigo cu tabata critica algun cos cu el a lesa den publicacionnan di “e esclabo fiel y prudente.” (Mateo 24:45) El a stop di lesa nos literatura cristian y cu tempo a bisa e ancianonan di su congregacion cu e no kier tabata un Testigo di Jehova mas. Sinembargo, den poco tempo Emanuel a bin realisa cu e siñansanan di Jehova su organisacion en berdad ta corecto. El a tuma contacto cu e Testigonan, a admiti su fayo y a ser restaura como Testigo di Jehova. Dor di esei, el a bolbe bira un homber felis.

16. Kico por yuda nos vence duda tocante cierto siñansanan cristian?

¹⁶ Kico nos mester haci si nos sinti nos tenta pa murmura pa motibo di algun duda cu nos por tin relaciona cu cierto siñansanan di Jehova su organisacion? Den e caso ei laga nos no perde pasenshi. Cu tempo e “esclabo fiel” por publica algo cu ta contesta nos preguntanan y clarifica nos dudanan. Ta sabi pa busca yudansa di ancianonan cristian. (Hudas 22, 23) Oracion, estudio personal y asociacion cu rumannan cristian cu tin un enfoke spiritual tambe por yuda nos elimina duda y haya mas aprecio pa e berdadnan di Bijbel fortalecedor di fe cu nos a siña pa medio di Jehova su canal di comunicacion.

 Mantene un Actitud Positivo

17, 18. En bes di murmura, ki actitud nos mester tin, y pakico?

¹⁷ Nos tin cu admiti cu hende imperfecto tin un tendencia natural pa peca, y kisas algun persona por tin un inclinacion fuerte pa keha sin cu nan tin un base pa esei. (Genesis 8:21; Romanonan 5:12) Pero si nos crea e custumber di murmura, nos ta pone nos relacion cu Jehova Dios na peliger. P’esei nos tin cu domina cualkier posibel inclinacion pa murmura.

¹⁸ En bes di murmura tocante cierto cosnan den e congregacion, ta bon pa nos mantene un actitud positivo y sigui un rutina cu ta tene nos ocupa, gososo, reverente, balansa y sano den fe. (1 Corintionan 15:58; Tito 2:1-5) Jehova tin control riba tur aspecto di su organisacion, y Hesus ta conciente di desaroyonan den cada congregacion, mescos cu e tabata den e prome siglo. (Revelacion 1:10, 11) Warda cu pasenshi riba Dios y Cristo, Cabes di e congregacion. Nan por utilisa wardadonan responsabel pa corigi situacionnan cu talbes mester ser reahusta.—Salmo 43:5; Colosensenan 1:18; Tito 1:5.

19. Mientras cu nos ta spera pa e Reino tuma pleno control riba asuntonan di humanidad, riba kico nos tin cu enfoca?

¹⁹ Pronto e mal sistema di cosnan aki lo caba, y e Reino Mesianico lo tuma pleno control riba asuntonan di humanidad. Mientrastanto, ta masha importante pa cada un di nos mantene un actitud positivo! Esei lo yuda nos reconoce e virtudnan di nos rumannan cristian, en bes di consentra riba nan fayonan. Ora nos enfoca riba e bon aspectonan di nan personalidad, esei lo haci nos felis. Asina nos lo ser anima y edifica spiritualmente, en bes di keda cansa emocionalmente pa motibo di murmuramento.

20. Un actitud positivo lo permiti nos disfruta di ki bendicionnan?

²⁰ Un actitud positivo lo permiti nos tambe pa corda e cantidad di bendicionnan cu nos ta disfruta di dje pa motibo cu nos ta asocia cu e parti terenal di Jehova su organisacion. Esaki ta e unico organisacion na mundo cu ta leal na e Soberano di universo. Kico bo ta pensa di e echo ei y e privilegio di por rindi adoracion na e unico Dios berdadero, Jehova? Nos ta desea pa bo actitud ta mescos cu esun di David, kende a canta: “Abo cu ta scucha oracion, cerca bo tur hende ta bin. Bendiciona ta esun cu bo ta scohe y ta hala cerca bo, pa biba den bo pationan. Nos lo keda satisfecho cu e bondad di bo cas.”—Salmo 65:2, 4.

Bo Ta Corda?

• Pakico nos mester ta gradicido pa e rumannan cu ta hiba delantera den e congregacion?

• Con nos mester reacciona ora rumannan cu ta hiba delantera den congregacion comete fayo?

• Con nos mester mira refinamento den comprondemento di e Scritura?

• Kico por yuda un cristian vence duda?

[Preguntanan di Estudio]

[Plachi na pagina 20]

David a duna Salomon e mapanan di e tempel y a sostene adoracion berdadero di henter su curason

[Plachi na pagina 23]

Gustosamente ancianonan cristian ta duna yudansa spiritual