“For di Awe Mi Ta Kere Cu Tin un Dios”

UN SEÑORA Ucraniano cu yama Alexandra y cu ta biba na Praga, Republica Checo, a sali trabou y tabata riba caminda pa cas. Na un parada di tram, el a mira un estuche chikito riba suela, cu e hendenan tabata scop segun cu nan tabata cana pasa. Ora el a cohe e estuche y wak aden, e no por a kere su wowo. Den dje tabatin un paki di biyete di 5.000 corona! Aparentemente no tabatin ningun hende eibanda ta busca e estuche. Como stranhero cu ta biba na Republica Checo, no ta facil pa Alexandra gana su pan di cada dia. Kico e lo a haci?

Ora Alexandra a yega cas, el a mustra su yiu muher Victoria e estuche. Nan a busca den e estuche pa mira si nan ta haya nomber y adres di e doño, pero en vano. Sinembargo, den e estuche tabatin un pida papel cu algun number skirbi ariba. Riba un banda di e papel tabatin un number di cuenta skirbi, y riba e otro banda tabatin mas number. Den e estuche tabatin tambe un papel di instruccion pa un banco local y un nota cu tabata bisa “330.000 corona” (rond di 10.000 dollar Mericano). Esei tabata exactamente e montante di placa cu tabatin den e estuche.

E esfuersonan di Alexandra pa yama e banco, uzando loke a parce di ta un number di telefon, no a duna resultado. P’esei el a bai e banco hunto cu su yiu muher y a splica nan kico a pasa. El a puntra nan tocante e number di cuenta cu nan a haya den e estuche. Ma e banco no tabatin ningun registro di e cuenta ei. E siguiente dia, Alexandra a bolbe bek cu e otro number cu tabata den e estuche. Y en berdad, e banco tabatin un cliente, un señora, cu e number di cuenta ei. Alexandra y Victoria a tuma contacto cu e señora, y e señora a confirma cu el a perde e estuche. Ora cu nan tur a bini hunto finalmente, e señora a gradici nan masha y a puntra nan: “Kico mi tin cu duna boso pa mi haya mi placa bek?”

Victoria a contesta: “Nada. Si nos tabata kier e placa, nos lo a keda cu ne.” Den su Checo kibra, el a splica: “Nos a trece e placa bek pa bo pasobra nos ta Testigo di Jehova. Nos consenshi entrena pa Bijbel no ta permiti nos keda cu loke no ta di nos.” (Hebreonan 13:18) Contento, e señora a bisa: “For di awe mi ta kere cu tin un Dios.”