Jehova Ta Libra Esun Aflihi

“Hopi ta e afliccionnan di e husto, ma SEÑOR ta libr’e for di nan tur.”—SALMO 34:19.

1, 2. Ki problema un cristian fiel a confronta, y dicon nos lo por haya nos cu sintimentonan similar?

UN MUCHA muher cu yama Keiko * tin mas cu 20 aña como Testigo di Jehova. El a sirbi pa un periodo como un proclamado di Reino di tempo completo, un pionero regular. E tabatin masha aprecio pa e privilegio ei. Sinembargo, no mucho tempo pasa sintimentonan di desesperacion y isolacion a podera di Keiko. “Mi tabata yora so”, el a conta. Pa combati su pensamentonan negativo, Keiko a bai dedica mas tempo na estudio personal. El a bisa: “Pero toch, mi no por a trece cambio den mi manera di pensa. Mi tabata asina deprimi cu mi kier a muri.”

² Abo a yega di lucha cu sintimentonan similar di desesperacion? Como un Testigo di Jehova, bo tin masha hopi motibo pa alegra pasobra devocion na Dios “ta contene promesa pa e bida presente y pa esun cu ta bin.” (1 Timoteo 4:8) Bo ta biba actualmente den un paradijs spiritual! Pero acaso esei ta nifica cu bo ta proteha di tur sufrimento of afliccion? Definitivamente cu no! Bijbel ta bisa: “Hopi ta e afliccionnan di e husto.” (Salmo 34:19) Esaki no ta un sorpresa, pasobra “henter mundo ta bou di control di e malbado”, Satanas e Diabel. (1 Juan 5:19) Den un manera of otro, nos tur ta experencia e efectonan di Diabel su control riba e mundo aki.—Efesionan 6:12.

E Efectonan di Afliccion

3. Duna algun ehempel biblico di sirbidornan di Dios cu a experencia hopi sufrimento y tristesa.

³ Sufrimento of tristesa prolonga por laga nos cuminsa mira tur cos scur. (Proverbionan 15:15) Considera e homber recto Job. Durante un experencia teribel, Job di: “Hende cu a nace di muher ta biba poco dia y ta yen di problema.” (Job 14:1) Job su goso a disparce. Pa un tempo, el a asta pensa cu Jehova a bandon’e. (Job 29:1-5) Job no tabata e unico sirbidor di Dios cu a experencia sufrimento fisico y mental intenso. Bijbel ta conta nos cu Ana tabatin “amargura di alma” debi cu e no tabatin yiu. (1 Samuel 1:9-11) Un situacion den famia tabata tormenta Rebeca, y el a bisa: “Mi ta fada di mi bida.” (Genesis 27:46) Ora cu David a reflexiona riba su erornan, el a bisa: “Henter dia mi a cana rond tristo.” (Salmo 38:6, NW) E par di ehempelnan aki mes ta mustra bon cla cu den e era precristian tabatin hende homber y hende muher  temeroso di Dios cu a pasa dor di periodonan di hopi sufrimento y tristesa.

4. Dicon no ta un sorpresa cu tin personanan deprimi entre cristiannan djawe?

⁴ Kico di cristiannan? Apostel Pablo a haya cu ta necesario pa bisa e Tesalonicensenan pa “encurasha esnan cu ta falta animo.” (1 Tesalonicensenan 5:14) Un buki di consulta ta declara cu e palabra Griego traduci como “esnan cu ta falta animo” por referi na esnan “cu temporalmente ta ser aplasta pa e presion di bida.” E palabranan di Pablo ta indica cu algun cristian ungi pa spirito santo den e congregacion ei na Tesalonica tabata abati of deprimi. Awe tambe tin personanan deprimi entre cristiannan. Pero dicon nan ta deprimi? Laga nos considera tres cos cu hopi biaha ta e causa.

Nos Naturalesa Pecaminoso Por Haci Nos Hopi Tristo

5, 6. Ki consuelo nos por saca for di Romanonan 7:22-25?

⁵ Distinto for di personanan corupto cu ‘a perde tur heful’, pa cristiannan berdadero nan estado pecaminoso ta un cos doloroso. (Efesionan 4:19) Kisas nan ta sinti mescos cu Pablo, kende a skirbi: “Segun e hende interior mi ta deleita mi mes den e lei di Dios, ma den e miembronan di mi curpa mi ta mira un otro lei cu ta bataya contra e lei di mi mente y ta haci mi preso di e lei di pica, cual ta den mi miembronan.” Caba Pablo a sclama: “Hende miserabel cu mi ta!”—Romanonan 7:22-24.

⁶ Abo a yega di sinti manera Pablo? No ta malo ora bo ta profundamente conciente di bo imperfeccionnan, pasobra esaki por yuda bo realisa e gravedad di bo pica y por fortalece bo determinacion pa keda leu for di maldad. Pero bo no tin nodi ta constantemente tristo y aflihi debi na bo faltanan. Pablo a agrega na su palabranan di afliccion cu nos a caba di cita ariba: “Mi ta duna gradicimento na Dios dor di Hesucristo, nos Señor!” (Romanonan 7:25) Si, Pablo tabatin e confiansa cu e sanger cu Hesus a drama lo por a libr’e di pica hereda.—Romanonan 5:18.

7. Kico por yuda un persona pa e no ta mucho tristo debi na su tendencianan pecaminoso?

⁷ Si bo ta sinti bo aplasta dor di bo naturalesa pecaminoso, bo por haya consuelo den e palabranan di apostel Juan. El a skirbi: “Si un hende haci pica, nos tin un abogado cerca e Tata, Hesucristo, e husto; y e mes ta e propiciacion [“sacrificio di reconciliacion”, NW] pa nos picanan, y no pa di nos so, ma tambe pa esnan di henter mundo.” (1 Juan 2:1, 2) Si bo ta sinti bo hopi tristo debi na bo tendencianan pecaminoso, corda semper cu Hesus a muri pa pecador, no pa hende perfecto. De echo, “tur a peca y ta falta e gloria di Dios.”—Romanonan 3:23.

8, 9. Dicon nos mester rechasa pensamentonan cu ta pone nos condena nos mes?

⁸ Sinembargo, supone cu den pasado bo a comete un pica grave. Sin duda bo a acudi na Jehova den oracion tocante e asunto, podise hopi biaha. Bo a haya yudansa spiritual cerca ancianonan cristian. (Santiago 5:14, 15) Bo a demostra berdadero arepentimento y p’esei bo a keda un parti di e congregacion. Of podise pa un tempo bo a bandona Dios su organisacion, pero despues bo a arepenti y a bolbe haya un posicion limpi. Den cualkier un di e situacionnan ei, bo pica cu bo a comete den pasado por bin na bo mente y haci bo hopi tristo. Si esei sosode, corda cu Jehova ta pordona “abundantemente” e personanan cu arepenti di berdad. (Isaias 55:7) Ademas, e no kier pa bo sinti bo totalmente condena. Ta Satanas kier pa bo sinti asina. (2 Corintionan 2:7, 10, 11) Diabel lo ser destrui pasobra e merece esei, pero e kier pa abo sinti cu bo ta merece e mesun huicio cu ne. (Revelacion 20:10) No laga Satanas su complot pa destrui bo fe logra su meta. (Efesionan 6:11) Mas bien, “resistie” den esaki, mescos cu bo ta resistie den otro cosnan.—1 Pedro 5:9.

⁹ Na Revelacion 12:10, Bijbel ta yama Satanas  “e acusado di nos rumannan”, esta, di cristiannan ungi. E “ta acusa nan di dia y anochi” dilanti di Dios. Ora bo reflexiona riba e versiculo ei bo por mira cu Satanas, e acusado falso, lo keda contento si abo mester acusa y condena bo mes, aunke cu Jehova mes no ta haci esei. (1 Juan 3:19-22) Pakico lo bo keda tormenta bo mes te na e grado cu bo ta sinti cu lo bo kier give up? No laga Satanas destrui bo relacion cu Dios. Nunca laga Diabel ciega bo pa e echo cu Jehova ta ‘yen di compasion y gracia, no ta rabia lihe y ta abunda den misericordia.’—Exodo 34:6.

Nos Limitacionnan Por Desanima Nos

10. Den ki maneranan nos limitacionnan lo por desanima nos?

¹⁰ Tin algun cristian ta sinti nan desanima debi na e manera cu nan limitacionnan ta afecta nan sirbishi na Dios. Esei ta bo caso? Kisas un malesa grave, edad avansa of otro circunstancianan ta stroba bo di dedica e mesun tanto tempo na e ministerio cu bo tabata dedica na antes. Ta berdad cu cristiannan ta haya e animacion pa cumpra tempo pa dedica na Dios su sirbishi. (Efesionan 5:15, 16) Pero kico si limitacionnan legitimo ta stroba bo di haci mas den e ministerio y esaki ta desanima bo?

11. Con Pablo su conseho cu tin para skirbi na Galationan 6:4 ta beneficia nos?

¹¹ Bijbel ta urgi nos pa no bira floho, pa no flakia, sino pa ta “imitadonan di esnan cu pa medio di fe y pasenshi ta hereda e promesanan.” (Hebreonan 6:12) Nos por haci esaki solamente si nos analisa nan excelente ehempel y trata na imita nan fe. Sinembargo, nos lo no beneficia si nos compara nos mes den un manera negativo cu otro hende y conclui cu nada cu nos haci ta suficiente bon. P’esei ta bon pa nos aplica Pablo su conseho: “Laga cada un duna prueba di loke su mes trabou ta, y e ora ei lo e tin motibo pa alegra encuanto su mes so, y no na comparacion cu e otro persona.”—Galationan 6:4, NW.

12. Dicon nos por alegra den e sirbishi cu nos ta rindi na Jehova?

¹² Cristiannan tin bon motibo pa alegra, asta ora problemanan grave di salud ta limita nan. Bijbel ta sigura nos: “Dios no ta inhusto pa lubida boso trabou y e amor cu boso a mustra pa su nomber.” (Hebreonan 6:10) Kisas circunstancianan fuera di bo control a pone cu ta dificil pa bo haci mesun tanto den Jehova su sirbishi cu bo tabata haci na antes. Sinembargo, cu Jehova su poder, lo bo por participa mas plenamente den cierto aspectonan di e ministerio cristian, manera por ehempel predicacion via telefon y via carta. Bo por tin sigur cu Jehova Dios lo bendiciona bo sirbishi haci di henter bo alma y e amor cu bo ta demostra p’e y pa bo prohimo.—Mateo 22:36-40.

“Temponan Trabahoso” Por Descurasha Nos

13, 14. (a) Den ki maneranan e “temponan trabahoso” aki por causa nos afliccion? (b) Con falta di amor ta bisto awe?

¹³ Aunke nos ta anhela bida den Dios su husto mundo nobo, na e momentonan aki nos ta biba den “temponan trabahoso.” (2 Timoteo 3:1) Un cos cu ta consola nos ta di sa cu e sucesonan angustioso cu ta tumando luga awe ta indica cu nos liberacion ta hopi cerca. Sinembargo, situacionnan rond di nos ta afecta nos. Por ehempel, kico si bo ta sin empleo? Trabou kisas ta scars, y segun cu lunanan ta pasa, lo bo por cuminsa puntra bo mes si acaso Jehova ta mira den ki situacion penoso bo ta of si e ta tende bo oracionnan. Of podise bo a bira victima di descriminacion of cualkier otro forma di inhusticia. Asta djis lesa e titularnan di corant por laga bo sinti manera e homber husto Lot, kende tabata sinti su mes “oprimi” (“tormenta”, BPK) pa e comportacion inmoral di e hendenan rond di dje.—2 Pedro 2:7.

¹⁴ Tin un aspecto en particular di e ultimo dianan cu nos no por pasa por halto. Bijbel a  profetisa cu hopi hende lo ta “sin amor.” (2 Timoteo 3:3) Den hopi cas tin masha tiki amor entre miembronan di famia. De echo, e buki Family Violence (Violencia den Famia) ta bisa: “Evidencia ta indica cu tin hopi mas chens cu un hende lo ser mata, ataca fisicamente of abusa emocionalmente of sexualmente pa un miembro di famia cu pa cualkier otro hende.” E buki a sigui bisa: “Caminda hende lo mester sinti nan mes stima y safe, pa algun adulto y mucha, ta e luga di mas peligroso di tur.” Personanan cu a biba den un mal ambiente di cas asina, lo por experencia kisas añanan despues ansiedad y desesperacion. Kico si esei ta bo caso?

15. Con Jehova su amor ta superior na e amor di cualkier hende?

¹⁵ Salmista David a canta: “Maske mi tata y mi mama bandona mi, SEÑOR lo recohe mi.” (Salmo 27:10) Ki un gran consuelo pa sa cu Jehova su amor ta surpasa e amor di cualkier mayor humano! Pa doloroso cu e rechaso, maltrato of abandono di un mayor por ta, esei no tin influencia riba e amor cu Jehova tin pa bo. (Romanonan 8:38, 39) Corda cu Dios ta hala esnan cu ta stim’e pa bin cerca dje. (Juan 3:16; 6:44) No ta importa con hende a trata bo, bo Tata celestial stima bo!

Pasonan Practico pa Alivia un Estado Deprimi

16, 17. Ora cu un persona ta sintie deprimi, kico e por haci pa conserva su fortalesa spiritual?

¹⁶ Bo por dal pasonan practico pa trata cu un estado deprimi. Por ehempel, participa plenamente den actividadnan cristian. Medita riba e Palabra di Dios, specialmente ora cu desanimacion ta parce aplastante. E salmista a canta: “Si mi lo a bisa: ‘Mi pia ta slip’, bo misericordia, o SEÑOR, lo sostene mi. Den e multitud di mi precupacionnan den mi, bo consuelonan ta alegra mi alma.” (Salmo 94:18, 19) Lesamento regular di Bijbel lo yuda yena bo mente cu palabranan di consuelo y pensamentonan edificante.

¹⁷ Oracion tambe ta masha importante. Asta si bo no por expresa plenamente cu palabra bo sintimentonan di mas profundo, Jehova sa kico bo ta purba di bisa. (Romanonan 8:26, 27) E salmista a duna e siguransa aki: “Tira bo carga riba SEÑOR, y e lo sostene bo; nunca e lo no permiti pa e husto wordo movi.”—Salmo 55:22.

18. Menciona algun paso practico cu un persona deprimi por dal?

¹⁸ Tin cristian ta experencia desesperacion debi na formanan severo di depresion. * Si esei  ta e caso cu bo, purba enfoca un parti di bo atencion riba Dios su mundo nobo y riba e tempo cu “ningun habitante lo no bisa: ‘Mi ta malo.’” (Isaias 33:24) Si bo sintimentonan negativo ta parce mas cu djis un depresion temporal, lo ta sabi pa busca yudansa profesional. (Mateo 9:12) Tambe ta importante pa bo cuida bo mes fisicamente. Un dieta saludabel y un poco ehercicio lo por ta util. Haci sigur cu bo ta haya e sosiego necesario. No keda lanta te lat ta wak television, y evita formanan di recreo cu ta agota bo fisicamente y emocionalmente. Mas cu tur cos, sigui participa den obranan cu ta agrada Dios! Aunke ainda no ta tempo pa Jehova “seca tur lagrima”, lo e yuda bo persevera.—Revelacion 21:4; 1 Corintionan 10:13.

Bibando “bou di e Man Poderoso di Dios”

19. Kico Jehova ta priminti esnan cu ta aflihi?

¹⁹ Bijbel ta sigura nos cu maske e afliccionnan di e husto ta hopi, Jehova “ta libr’e for di nan tur.” (Salmo 34:19) Con Dios ta haci esaki? Ora cu apostel Pablo a pidi bes tras bes den oracion pa e ser libra di su “sumpiña den carni”, Jehova a bis’e: “Mi poder ta wordo haci perfecto den debilidad.” (2 Corintionan 12:7-9) Kico Jehova a priminti Pablo, y kico e ta priminti bo? No un curacion inmediato, sino e poder pa persevera.

20. A pesar di nos pruebanan, 1 Pedro 5:6 y 7 ta sigura nos di kico?

²⁰ Apostel Pedro a skirbi: “Humilia boso mes . . . bou di e man poderoso di Dios, pa e por halsa boso na e tempo apropia, tirando tur boso precupacion riba dje, pasobra e ta percura pa boso.” (1 Pedro 5:6, 7) Como cu Jehova ta interesa den bo y ta percura pa bo, lo e no bandona bo. Lo e sostene bo a pesar di e pruebanan cu bo ta pasa aden. Tene na mente cu cristiannan fiel ta “bou di e man poderoso di Dios.” Segun cu nos ta sirbi Jehova, e ta duna nos e fortalesa pa persevera. Si nos keda fiel na dje, nada no por causa nos daño spiritual permanente. P’esei, laga nos mantene nos integridad na Jehova di manera cu nos por disfruta di bida eterno den su mundo nobo priminti y mira e dia ora cu di berdad lo el a libra esun aflihi permanentemente!

[Nota]

Bo Ta Corda?

• Dicon afliccion ta afecta asta sirbidornan di Jehova?

• Cua ta algun factor cu por pone algun hende den e pueblo di Dios sinti nan deprimi?

• Con Jehova ta yuda nos trata cu nos ansiedadnan?

• Den ki manera nos ta “bou di e man poderoso di Dios”?

[Preguntanan di Estudio]

[Plachi na pagina 25]

A pesar di prueba, e pueblo di Jehova tin motibo pa alegra

[Plachi na pagina 28]

Predica via telefon ta un manera pa duna Jehova lo mihor cu bo tin