Mencion No Biblico di un Pueblo Cu Yama Israel

DEN e Museo di Cairo na Egipto, tin un piedra di granit cu inscripcionnan riba dje cu ta conmemora e victorianan di Farao Merneptah. Segun calculo di expertonan, e di 13 yiu aki di Ramses II a goberna rond di aña 1212 pa 1202 prome cu nos era, kiermen, durante e ultimo parti di e periodo di e Huesnan di antiguo Israel. E ultimo dos liñanan riba e piedra di Merneptah ta bisa: “Canaan ta ser captura y sakea. Askalon a keda conkista, Gezer captura, [y] Yano‘am ta completamente destrui. Israel a keda desola, su desendientenan no t’ei mas.”

Kico e palabra “Israel” kiermen den e contexto aki? Den textonan skirbi na forma hieroglif (skirbi cu simbolo), hende tabata agrega algun simbolo adicional na e otro simbolonan pa indica di cua categoria e palabranan tabata. E publicacion The Rise of Ancient Israel (E Aparicion di Antiguo Israel) ta splica: “Pega na tres di e cuater entidadnan—Askalon, Gezer y Yanoam—tin un simbolo adicional cu ta bisa nos cu eseinan ta stad. Sinembargo, e simbolo adicional pega na esun di Israel ta ser uza pa un pueblo.”—Letter scuin ta di nos.

Kico ta e importancia di e texto aki? Hershel Shanks, editor y autor, ta contesta: “E Piedra di Merneptah ta mustra cu tabatin un pueblo yama Israel ta existi na aña 1212 prome cu nos era, y cu e farao di Egipto no solamente tabata sa di nan, sino tambe cu el a sinti cu tabata bale la pena broma cu el a derota nan den bataya.” William G. Dever, profesor di arkeologia di Medio Oriente, a comenta: “E piedra di Merneptah definitivamente ta bisa nos: Den Canaan tin un pueblo cu ta yama nan mes ‘Israel.’ Anto nan ta ser yama ‘Israel’ pa e Egipcionan cu, de echo, no ta inclina na confirma e autenticidad di Bijbel, y cu no por a inventa un pueblo asina specifico y unico manera ‘Israel’ djis pa nan propio propositonan di propaganda.”

Den Bijbel, Israel ta ser menciona pa prome bes como un nomber duna na patriarca Jacob. Desendientenan di Jacob su 12 yiu hombernan a bira conoci como “e yiunan di Israel.” (Genesis 32:22-28, 32; 35:9, 10) Añanan despues, tanto profeta Moises como e Farao di Egipto a uza e palabra “Israel” ora nan tabata referi na e desendientenan aki di Jacob. (Exodo 5:1, 2) E piedra di Merneptah ta e mencion no biblico di mas bieu cu hende conoce di un pueblo yama Israel.

[Plachi na pagina 24]

E piedra di Merneptah

E combinacion di e ultimo tres simbolonan (di drechi pa robes)—un boemerang y un homber y muher sinta—ta identifica Israel como un pueblo stranhero

[Reconocemento pa Potret na pagina 24]

Egyptian National Museum, Cairo, Egypt/Giraudon/The Bridgeman Art Library